زقاق ونسة خارج النص ....والونسة بتقوي المناعة
وإذا كلت ملت ....!!
وعلوب بسلم عليكم ....!!!
يوميات علوب .....!!!
أبرار النار
زمان قبل ما نجي حلتنا دي ونحن صغار كنا ساكنين في في بيت جدنا الله يرحمو
بيت كبير كدا مقسمنو ...!! وكان عندنا بت جيرانا
( لتخة ) كدا بتجينا طوااالي في البيت بي سبب وبدون سبب ...!! ) إسمها ( أبرار )
مرات كتيرة بتجي مرسلا ...!!
المهم البت دي طوااالي بتكشح الحاجه الشايلاها التقول مهبوشه ...!!
ملاح ...فجل ....لبن
أي حاجه طوالي بتديها الواطا ....!!
لكن اول ما تنكشح منها الحاجة بتجيها حالة غريبة كدا...!!
....!!
تقعد تتبوم وتتكوم
وتنطط عيونا
وبعد داك تفكها بكيه فيها جرا طويلة كدا في البدايه
وبعدها تبدا ( تشفط ) زي مكنة العربية الوسخانه ....
ققققققققق ...!!!
أمي دي لما بتشفق عليها .....!!
المهم بي جاي بي جاي غايتو بنحاول نلم الموضوع ..!!
يا جبنا حاجه بدل ( الإنكشحت ) دي ختيناها محلها ....!! ولا كمان أمى لفحت توبا ساقتا من يدها مشت بيها بيتم وخصمت أمها بالنبي والرسول كان تهبشا
...!! وكلام زي دا ...!!
المهم أهلها بستلمو البت مع خطاب الضمان دا ...!!
لكن ( الشرار ) البكون طالع من عيون أمها في اللحظة ديك ينجض العيش
...!!!
ا ( تجاري وعادي )
أمها اسمها ( مكنية ) ..!!
( مرا معضلة كدا ) ....
ورغم التوصيات المشفوعة باليمين دي ...!! لاتسلم ( أبرار ) من ( دلدوم ) في نص ضهرا ...!!
أمي قالت قبل ما تغادر ( الفجة ) بتسمع صوت ( اللبعة ) وصرخات ( أبرار ) المكتومة ....!!
لا عرفتو بيت ( جيرانا ) ....!!
ولا عرفتو بيت ( اشباح )
وأبرار دي شدة ما دايشة عادي ممكن تجيكم داخله الساعة اتنين ضهر....
فجاة كدا تلقاها واقفة قدامك زي الشيطان ..
فضحت راجل جيرانا القدامنا ديل فضيحة ...!!
اسمو ( التلب ) ...!!
زول مسكين كدا في حالو ....!! ( ولا يشكو من مرض )
جاتم ( متلبة ) نصصص النهار في رمضان قالت لقت التلب دا بياكل في جدادة ... !!
الحلة كلها عرفت ...!!
شفع الحلة بقو لما يلاقو ( التلب ) دا في الشارع بكوركو بصوت واحد ......كااااااك ....!!
المهم دي ( أبرار ) ...!! والغريبة كانت كبيرة شوية يعني
ما شافعة شديد ...!!
أمبارح بحضر لي في برنامج في التلفزيون مستضيفين فيهو واحده عاملا ليها ( قجة ) كدا
.!!
المذيعة قالت والليلة نحن ( سعيدين ) إننا نرحب بالاستايلست وخبيرة التجميل ( أبرار ) ...!!
( غايتو العاجبني في المذيعين ديل طوااالي هم سعيدين )
المهم أنا لفت نظري الاسم ..!!
أظنو مخزن في ذاكرتي .....!!!
لكن طبعًا أصلو ما ربطتا بينو وبين ( أبرار ) الحكيت ليكم عنها دي ....!! بس ساكت كدا الإسم دقا لى في راسي
هل بتصدقو إنها فعلا طلعت ياها ذاتا ( أبرار ) البحكي ليكم عنها دي ...
أي والله ..!!
( مشاعر ) جاتني جارية جرى ...!! قالت لي ألحق الحق يا علوب إنت ماعرفت البت الفى التلفزيون دي منو ..؟؟؟
قالت ليها ماعرفتها .....!!! دي منو دي !!؟؟
قالت لي دي ما ( أبرار ) ....!!
( أبرار الهادي )
ناس ( مكنية ) ياخ ....!!
ما أتذكرتهم ..!! "؟؟؟
جيرانا الزمان
اهاااااا ...!!!
يازول دققتا ليك فيها كدا القاها ليك ياها ذااااتا ( أبرار ) الما بتغباني ...!!
نفس الجضوم والعيون المدفنات ...!!
بس الوش عاملين ليهو ( سيراميك ) ....!!
وكبرت ما شاءالله ....!!
عاملا ليها مظلة رموش ( عارشا السقف) ...!!
وتقلب في عويناتا ....!!
......!!
هيااااااا اخوانا
المهم المذيعة قالت ليها اها يا أستاذه ( أبرار ) وأنت من متين بديتي تكتشفي علاقتك بي عالم الجمال والموضة .....!! ودا طبعا عالم قايم بي ذاتو ...!!
(( لا ياخ .....!!
قولي والله
))
والاتنين يضاحكن مصدقات
وطوالي زولتك استعدلت قعدتا وقال ليها والله من وأنا طفلة كنت بحب أرسم وألون ....!!
وقالت ( ماما ) كانت بتشجعا ...!!
( ماما ) دي ياها ( مكنية ) القلتا ليكم عنها دي ....!!
( كانت بتضربا كيماوي )
قالت بس أخوها ( الرشيد ) كان بزعل منها لانها بتشيل الألوان بتاعتو .....!!
(( الرشيد دا اخوها الأكبر منها طوالي ( شفت ) من يومو ...!!)) منجض الحلة دي نجاض
مافي زول بعرف إنو اسمو ( الرشيد ) غير ناس بيتم ...! والدوائر القريبة من مركز القرار ..!!
وشهادة الميلاد ( إن وجدت ) ....!!!
معروف بي الرشيد ( ودكة) ....( من الودك )
....بس مافي زول عارف مناسبة الاسم شنو ...( أسرار دولة ) ...
المهم إسم الرشيد ذاتو اتمسح بالودك دا ....
وبقي ( ودكة ) حاف ....!!
قالت كانت بتشيل علبة ألوانو...!!
غايتو دي أنا ضحكتا فيها جنس ضحك
هو الرشيد كان عندو علبة ألوان كان بقا فنان ...!!
أكيد قاصدا علبة ( التنباك )
الرشيد ( ودكة ) دا أول شافع سفا ( سعوط ) في الحلة دي .....!! ولعب الميسر .....!!
بالجد...!!
قالت كان بقول ليها لو شلتي ( الألوان ) بتاعتي بشخبت ليك لوحاتك ....!!
( معاها ضحيكة كدا )
وأنا آخر منظر متذكرو ليها مع الرشيد أخوها دا ....
كان ساكيها بي جنزير العجلة
قال أبت تغسل ليهو ( الفلينة ) .......!!!!
( قاصد الفنلة ) ....
والحلة كلها جارية وراهم منعا لوقع حادث ..!!
وفكتا ليك ضحكة بعد ماحكت مناكفاتها ( البريئة ) ( الملونة ) دى
مع الشفيف ( ودكة ) ....!!
ورغم إنها حاولت تقصقصا لكن ياها ضحتكا ذاتا الزي صوت ( الخلاطة ) دي ....!!
معاه صوت ( شخرة ) في نهاية الضحيكة...!!
( البت تكون حارقة طارة كلتش ) ...!!؟؟
...!!
المشكلة المذيعة ذاتا بتضحك معاها ...!!
( هن بضاحكن مالن ) ..!!!؟؟
)
((غايتو يالرشيد منور التلفزيون الليلة ...!!))
الغريبة قبل كم يوم سألت منو أولاد حلتنا الزمان ديك...!!
( بكون قلبي حسا ) ...!!!
قلتا ليهم مسؤولين من الخير ....!!
إنتو ( ودكة ) صاحبنا داك وين ....!! ؟؟؟
واحد منهم قال لي كان في في سجن الهدى
( شيكات واحتيال ) ( إتخرج ) قريبات دي ...!!
(( تخصصين ما شاء الله ...!! ))
الود دا موهوب من يومو ...
( كان يكلمونا نمشي التخريج ...!!!)
قربتا اعمل مداخلة في البرنامج بالتلفون
داير أقول ليها غايتو لوحتك السيريالية حقت ( الخدرة ) الدفقتيها في بيتنا ديك كانت بتجنن ...!!
وقلتا بالمره أحذر البنات ديل ...!
( الطرشا ) دي كان لمت في وشوشن دي
بتقلبا ليهن ( بيتزا ) ...!!
مشيت فتشنا صفحتا في ( الفيس ) قلت النشوق ( أبرار ) البقت نجمة و بجيبوها في التلفزيون دي ..!!
لقيتا ليك شاحطا ليك صورة كبيييرة معلقتها ليك في نص حيطة الفيس
كاتبا تحتها ( أبرار نار الضلع...!! )
..!!
( فأيقنت انها لم تنضج بعد ...!!
)
المشكلة مافي الضلع المشكلة في اللايكات والتعليقات
واحد كاتب ( لهبة يا أبرار ....)
وبت كاتبه ليها غايتو (الصابونة ) طلعت مبالغة
وآخر يسطر .....!!
النضارت يخلوها ليك يابره
(( صحي ( بره ))
وهي معلقة تحت ....
الصورة بعدسة الفنان ...( كوكب ) ...
صحي والله ......هو كان ما ( كوكب ) بصورك يا الملكة .....!!!!!
أبرار وأنامل ...!!!
...!!!
...كانت لنا أيام