حكومة كان تنصلحي ...!!
حكومة تعبانة وملكلكة وما قادرة تعمل أي حاجه ....دي ما فيها خلاف كبير ...!!
لكن برضو ما يستغلو ضعف الحكومة عشان يسقطو الثورة كلها ....!!
حاففطوا على ثورتكم .....!!
الحكومة عمرها ما كانت هي الثورة ....!!
الحكومة هي إحدي افرازات ومخرجات الثورة
لازم نفرق في المصطلحات وبدقة ...تمشي الحكومة كان مشت نسوي ليها شنو !!!
هناك ثورة ...!! وهناك تصحيح مسار الثورة ....وهناك
اقتلاع نظام ....!! ويوجد أيضاً مراجعة أهداف الثورة
دي كلها متغيرات ....
الثابت الوحيد فيها هو الثورة نفسها ....
( هي جات بالساهل كدا عشان تمشي بالساهل ) ....!!
الحكومة دي في النهاية اسمها انتقااااالية بنص أي
وثيقة ولا دستور ...فيه عطل ولا معطوب ولا فيهو ثغرات في النهايه دا هو العقد الدستوري النحن شغالين بيهو ...ودا الواقع ....!!
ما يحدث من غلاء وتردي يتطلب الاحتجاج والاحتجاج شديد اللهجة ...بس مش البحث عن ثورة جديدة
الثورة ماقميص طلع ضيق بغيرو ....
وما كل الشوارع بتودي ( روما ) ....!!
والناس الشغالين على شارع تاني ....!
الثورة دي ما بتسقطوها .....!!
وموضوع ( أكرم ) قريب ما بعيد .....
( (( الحقونا ...والناس ماتت ....والمستشفيات قفلت )))
بعد خمسة دقائق من إعفائه اختفت كل هذه البوستات
والمظاهر ....!!
دا ما بحصل تاني ....!!
وفي النهايه أنا أقدر جداً كل هذه الأصوات لأن الحرية والديمقراطية لا تتجزأ وتفرض على احترامها أياً كانت وعدم الغائها ...!!
أفرض إنت ضد هذه الثورة وهذا التحول وقحت والتغيير كلو ....
وعايز نظام غير هذا النظام ...أو حتى عاجبك النظام الفات ومقتنع بيهو ....والبشير أفضل رئيس في العالم
في النهاية دا حقك ورؤيتك وأصلو ما عندي حق اصادرو منك ...!! وحتى لو حاولت لن أستطيع ....
دي أفكار بتعشعش في الرأس والدماغ من الصعب اقتلاعها ....!!
عشان كدا الناس في الدنيا مختلفين
وهذه سنة الكون ...!!
هو الناس لم تجتمع على الرسول عليه الصلاة والسلام ....حتجتمع على ثورة ....!!
بس مطلوب حاجه واحده وهي إنو تخلي رأي الأغلبية هو اليمشي في البلد دي ....ويوما ما حتجي انتخابات حقيقية وشفافة ..وقتها الصندوق هو الفيصل ....
وحتى ذلك الحين يجب احترام التغيير الذي احدثه الشعب وعدم الالتفاف عليه بطرق ملتويه هذا هو المطلوب ...!!
وعشان ما نكون مكابرين ساكت ....
وبالنسبة للسؤال العبثي الذي يدور في ذهن البعض هنا ليكتبوه لي في تعليق وهو .....
( منو البحدد الأغلبية دي ...!؟؟ )
مش ياهو دا السؤال....!!!!!
وأنا أجاوب ليك ....!! عشان ما ندخل في حوار الطرشان والجدل البيزنطي دا ...!!
هي لو ماكانت ثور ة حقيقية بي أغلبية مريحة منو الكان بسمح ليها أصلاً تنجح ....!!
لقد تمت محاولات وأدها دون هوادة اكثر من مره وبأكثر من طريقة ....
لكن الله غالب ....!!
أي زول جوه نفسو عارف الكلام دا وكويس جداً
بس مرات صعب يتقال ....وأنا اقدر .....
وأتفهم ....!!
يعني المؤتمر الوطني دا ما صحى كدا من الصباح قال يا سلااااام ياخ نحن الحقيقة أخطأنا وتجاوزنا في حق هذا الشعب والناس ولازم نتنحى جانبًا ونفسح المجال لغيرنا ...
دا ما حصل ...ولا كان حيحصل لولا ما حصل ....
ولم يكن ليحصل إلى أن يأتي المسيح ...
أو كما قال ....!!
لكن البني آدم يريد والله يفعل ما يريد ....!!
عشان كدا الديمقراطية دي حاره شديد ....وصعبة
أي زول في السودان دا عندو أهل وإخوان وأخوات وأولاد خالات وعمات وأصحاب وقبيلة وراهو بشوفوهو أحسن زول .....!!!
لذلك لاتستهدفوا الناس بفاحش القول وسقط اللسان
والتقليل من الذات ....وتضربو كل هؤلاء بي تعليق فقير وبائس يستهدف الشخصية ...!!
هاجم الأفكار وانتقد التوجه ...واختلف مع الرأي دون مساس بالشخص نفسو ....!!
ياخ الله كرمو ...تجي تهينو انت ....عشان شنو !!!؟؟؟
مهما اختلفت معاهو احترم إنسانيتو كحد ادني ....
عشان يكون في أدب خلاف واختلاف ....لأنو مثل هذا الاتجاهات تخلق الضغائن والأحقاد وتصيب الأوطان في مقتل بامراض قاسية دولار الدنيا كلو ما حيعالجا ...!!
بلد ربنا ياخ أداها أي حاجه .....وتاني ممكن تشيل قدر العدد الموجود دا ...ونيلين كبار عراض غير الدقاق ...ونفط ومعادن وأكبر ثروة حيوانيه في المنطقة وذروة سنام النعم ارض ماليها حد تشتت فيها حديد بقوم .....!!
سايبين دا كلو وتتقاتلو على هذه الأبنية العتيدة المطلة على شارع النيل في مكتب مكيف وسكرتارية وحرس وجنينة كبيرة في البيت والأولاد يقرو في مدارس انجليزية ....!!
والناس لآفة وراكم في السوق العربي وشارع الجمهورية
يأكلو في المنقة بالشطة وكباية عرديب ...ويشترو في
( القوقو ) واقفين من صف لي صف ...!!
ليه كدا ....!! بتستمتعو كيف جوه ....!!
العنوان العريض للسودان هو سوء إدارة ما حبانا الله به من موارد ....بس ...
اضغطوا على الحكومة ووروها إنها لازم تشوف شغلها
أو تمشي غير مأسوف عليها ....وإنو نحن قادرين على اسقاطها ....!!
دا كلو مشروع ...!!
حاجه واااااااحدة ومهمة ومفصلية
فرقو بين الثورة والحكومة .....!!!
حتتلفتو لاحتلقو رغيفة ولا بنزين ....ولا حرية ......
( التلاته مع بعض ) ....!!!
ويومها لا ينفع الندم .....!!
والناس البقولو ليكم اكنسوها من أساسا ديل ....
ما حتلقو منهم ولا واحد ....!!!
وفي صفحات حتختفي ....!!
حيمشو يشوفو ( الجابتر ) البعدو ....
والله زي ما بقول ليكم ....نحن حارسين ومتابعين ...!!
ودي بلدنا ومافي زول بحدد لينا نقول شنو ونعمل شنو
حزبنا ياهو الشعب السوداني دا ....
وأي زول حر في زاوية نظرو ولو كره المحبطون ....!!
وانتو يا ناس الحكومة اقعدوا عاينو كدا واعملو رايحين لما تلقوها طارت ....!!
بس الثورة عمرها ما بتطير .......!!
حسو بالناس التعبت وشقت واتشهلتت واتجهجهت دي
شوفو الأولويات ....!!
ما تتكلمو عن الذكاء الاصطناعي وفي مشكلة أكل وشراب ....!!
شوفو الشباب ديل واشركوهم في مراكز القرار
والذين لولا تضحياتهم الجسام لما وصلتم الى هنا وقد قدموا أرواحهم سخية أبية ....!!
خلو سباق المناصب والمحاصصات دا
الزول الكويس المنصب بجيهو براهو ....ما بمشي ليهو ...!!
ضحوا من أجل البلد دي بإفساح المجال إذا حسيت انك ما قادر تقدم حاجه او تحدث فرق وتغيير ....
ونقدر كل ظروف ذلك ونستوعبها ...!!
عشان التاريخ يخليك في هذا المنصب إلى يوم يبعثون ....!!
واتذكر إنو في ناس ضحت بي روحا خلي طربيزة وكرسي وخبر في نشرة الأخبار ...!! فالوطن للجميع .....!!
حكومة تسقط أو تستقيل أو يطالها التغيير دا مظهر عادي ومتعارف عليه في الأنظمة الديمقراطية ....!!
وين المشكله ....!!؟؟
المشكله ما هنا .....!!!
المشكلة في الدايرنها تمشي كلها على بعضها ديل ...ثورة على قحت وعلى حمدوك وعلى الاخضر واليابس وعلى أي حاجه ....!! دا كلو بالنسبة ليهم كابوس .....!!
دي ياها المشكله
حمدوك لازال هو الشخصية الأنسب في تقديري لقيادة الحكومة التي يجب أن يطالها التغيير والإحلال والإبدال ...!! مش لأنو حمدوك منزه عن الأخطاء وكبير على الملاحظات ...أنا اعلم تماما كل هنات الرجل ومواطن ذلاته وما تفرضه الظروف مع نقاط قوته وتميزه ..
ولكن هناك حسابات داخلية وإقليمية ودوليه تجعل منه الأكثر تناسبًا وانسجامًا معها
ولن يأتي بعده ساحر ليغير الأمور .....وعليه داخليًا
ان يتوجه بكلياته وعلى الفور نحو الناس وهمومهم حتى لايترك فراغ يملأه اخرون ....!!
جزء كبير من حلول السودان ستاتي من المجتمع الدولي شئنا أم أبينا وفق كثير من التفاهمات ...!!
هم محتاجين لينا ونحن محتاجين ليهم ويعرفوا جيدا خصوصية هذا البلد وموارده والرجل يمتلك خاصية التواصل معهم بلغة يعرفها وانطباعات مسبقة وحوار بين الطرفين وثقة متبادلة ...نحن حتى الان لسنا بدولة مؤسسات لاتتأثر بغياب الأفراد دا كلام كضب ساكت
مؤسسية واحده مافي ...بشرط ان يكونوا افراد مؤثرين والرجل في النهايه يقود فترة انتقاليه ستنتقل بنهاية المدة
المشكله في السودان الان هي مشكلة ( System )
مش شخص ..وعليه معالجة ذلك فوري حتى لا يخرج عن السيطرة ...!!!
دا العندي ...!!
قد أصيب وقد يجانبني الصواب ...!!
بس ما أنا متيقن منه أننا قادرين على عبور كل هذي الصعاب .....!!!
ويا شعبا لهبك ثوريتك تلقى مرادك والفي نيتك ...!!
والنية زاملة سيدا ....!!!