يوميات علوب ...165
أنا ما ( شلبتو ) .....!!!
غايتو ناس حلتنا ديل الذا منهم مافي مونسين روحم دي ....!! زي عمك عبد الحميد ومرتو الزهور ديل ...!! مزروعين في الحلة دي ليهم مية سنة كدا
لقيتو ليك بحكي لي ( يس ) سيد الدكان قال ( الزهور ) مزرزراهو اليومين ديل حاسا بيهو زي داير يعرس فيها ....!!! 
😳😳وميت من الضحك ...!! مع حبة شعور بالعظمة كدا ....!! سبحان من يحي العظام وهي رميم
😳😳وميت من الضحك ...!! مع حبة شعور بالعظمة كدا ....!! سبحان من يحي العظام وهي رميم
أنا واقف غلبني أقول شنو ...!! غايتو الناس ديل مرات وكت تغلبن وتقفل معاهم عاااادي الواحد برفع روحو المعنوية برااااهو كدا بي قصص حزينة زي دي ...قال يعرس فيها قال .....!!! هو (عبد الحميد ) دا لو بس قدر ياكل ويمشي يغسل يدينو براهو.....!! ويترسل الدكان ...بكون أنجز ... وأصلو ما قصر ....!!
عرس شنو كمان ياحاج .....!!
و ( الزهور ) بالجد لو فعلا قالت كلام زي دا
( ولا اعتقد ذلك )
تكون بالغت وشذت!!
أو يعني المرا عايزا تخش مع الجيل التاني بالحركة الجبانة دي ...المعني نحنا ناس ( شلبونا)
😳😳
هو هسا لو إفترضنا جدلا إنو فعلا ( حميدو ) دا عرس فيك وأي حاجه ......!!
صدقي برضو ما حتكوني من ناس ( شلبونا ) ....
وحتظلي محسوبة علي جماعة ( شجرونا ) إنتي والدفعة المعاك ديل ...!! لأنكم شجر كبار بغض النظر عن كمية ( الصمغ ) الفيهو ....!!
...فعليك الله شنو حاولو أطلعو لينا من الدور دا بي سررررعة إنتي والشلة المعاك دي .....وكان عندكن باقي خدرة امشن افركنها ....!!
زمان ( حبوبتي ) ( حرم ) الله يرحما كان بتجينا نفحات كدا وبتعمل لينا الخدرة المفروكه دي أها لما ( تفركا ) كدا والملاح ينجض ...!! بتعطن فيهو ( المفراكة ) وتضرب بيها بطن يدها ضربتين كدا خفافيات ...! وتديهو لحسه ...للتأكد يقينا انه قد وصل للدور النهائي ...!! القصة دي بتم في كسر من الثانية ...!! ولو داير تشوفا كويس إلا يعيدوها ليك بالبطيء ..ولا تقنية ال ( VAR )
أنا غايتو الحركة دي كانت أهما لي من الملاح ذاتو
...!! معموله بي حب ياخ ...الله يرحمك ياحبوبة ....!!
خدرة بال( VAR) دي مفروض نعزم ليها ميسي
أهاا ناس فوزية ..!! وسنية ...!! وملكة ...! وكل الكوامر الفي حلتنا ديل دخلن في الشخصية ...! وعجبن دور المرا المعرضة للاشتلاب دي ...!!
( إشتلاب ثقافي )
بقن عااادي يقولن ليك ...!! غايتو الله يسترنا من بنات الزمن ديل بقت يختفن الرجال من بيوتم .....
أنا بس غايتو الضحك شارطني ...تسمع الرجال تقول ...الله يوريني ،..!!
لأنو أنا ( رجالم ) التلاتة ديل بعرفم حق المعرفة .....
مش ماعندهم فكره في الموضوع اقسم بالله ولا ساكت جا في بالم وخيالم .....!!
دي اسمها ( منحوني شرفا لا أدعيه ) ....!!!
أول حاجه نمسك ( إسماعيل ) راجل فوزية....!! دا شده مافوزيه مخوفاهو وقاطعا قلبو .....بقي كان شاف ضل مرا ساكت ..!! بقوم جاري ..!! وبعمل ساتر ...
الحاجة التانية عندو ( خمصطاشر ) جنيه في جيبو يعرس بيها ...!!! ولا يشتري بيها ليمون ...!!!
الأهما من دا كلو إنو ( فوزية ) ساكت مكبرا اللفة وشغالة ليهو دعاية إنتخابية أكبر من إمكاناتو
وهو طبعا عمك دا لاجيبو 
💰ولا سنو ...!!
💰ولا سنو ...!!
يسمحان بهذه المغامرة ... تعبانه ساكت في الفاضي المرا دي ....!! ولا ....لاعبة صالح ورقا ..!! يعني البت بتتشلب .....!!! وهو الاحتمال الأرجح ......لا ياخ
أما ( صديق ) راجل ( سنية ) فدا الفريد في طبعو ...فضل ليهو يطقع بالحجار ....!! هوايتو الرئيسيّة الصفوف ....!! قال بلقي فيها روحو ....!!! وبحس فيها بالإنسجام ...( عدم الموضوع بعمل أكتر من كدا)
أها زولك دا من صف العيش....!! بستلم ليم صف الغاز ....!!! ومنو بنط لي صف ( البنزين ) ....!!!
عندو عربية كدا مفروض تشتغل بالعجين ما البنزين تشبة ( الفضية ) ....!! كمية ( الخشب) الفيها أكتر من ( الحديد ) ...!! شكلها كانت ( كارو ) حصلت ليهو طفرة جينية ....!! وتاب ....
وأي صف بلقاهو بنقشط فيهو ...اخر مره بحكي لي هو ذااتو الما بخجل .... قال لقي ليهو صف طويييل كدا في ( العمارات ) شارع 1 ...!! طوالي انقشط فيهو كالعادة ....!! أها لما وصل الشباك أدوهو ( إستمارة ) كدا يملاها.....!!! طلع صف ( الحج ) .....!!
وهو أصلا ( جواز ) ما عندو ساكت عجبو الصف ...!!
قلتا لي طيب ما كان تعبي الإستمارة إمكن الله قاسم ليك الحج .....!!
قالي أفرض مليتا ....!!!! ( جيبي ) دا البملاهو شنو .....!!
يملاك ( جرب ) يا صديق ....!! أها هسا دي خلقة عرس ...!!!؟؟
اما ( ملكة ) فدي كلاما برا ( طبعا ملكة دي بتعرفوها كويس وزمان كلمتكم عنها ...!! هي دون شك واحدة من أجمل النسوان في الحلة ...!! إن لم تكن الأجمل ( بي أمانة يعني ) .....!!!
لكن طبعا الحلو ما بكمل ....
( لتاخة السنيييين ) .....!! عوارة جد .. أي كلمة بتقول بعدها .....وكدا ......!!
وأحسن زول بجيب مواضيع ماعندها علاقة بي بعض
....وطواااالي جايبه العيد ....
( ملكة) طبعا راجلا اسمو ( سعيد ) والله بالجد هو ذاتو سعيد...!! أول حاجه طيباااان شديد وفي حالو كدا ...!! وأكسل منو الله ما خلق..قريب دا لاقاكم زول بنوم في الحمام ...!! اها بس دا ياهو ( السعيد ) راجل ملكة دي ....!!!
مرات بحلف بيها ...!! هو كلامو سريع كدا وفيهو قطيع يقول ليك ...!! وووووووو وحات ملكة ......!!
وححححات ملكة ... ... !! ياحليلو ياخ .... أحلي زول
بريء خلاص ...!! طبعا لي هسا ما بكون عارف إنو في رجال بعرسو في نسوانم ......!!
( صدق من سماك السعيد ) ....
أها موضوع الشلب دا يعلو ويهبط في الحلة حسب الحالة ...!! يوم النسوان ديل يحسّن بالملل وعدم الموضوع يخرج هذا الموضوع للواجهة ....!! ويوم الحياة تدعكم والصفوف تتطاقش ....!!!
يقفز ( العيش والغاز ) الي المرتبة الأولي والباقي برجع ورا ...!!!
طبعا المحاولة الإنقلابية الوحيدة التي أوشكت علي النجاح في حلتنا دي ...!! كان إنقلاب ( كمال ) مدير البنك كنتا حكيت ليكم عنو لو تتذكرو كان داير يعرس بت جابوها تتدرب معاهم في البنك ساكنة المهندسين اسمها ( مرافئ ) ...عايز ( يرسو ) علي الضفاف ( المعلم ) وقرر إنو يضمها للتشكيلة الرئيسيّة والفريق الأول ويلعب بيها المباراة النهائية .....!!
بس ( مخابرات ) حلتنا بقيادة ( سنية )كشفت الخطة قبل ساعة الصفر ...!!
طلع قرايب ناس سنية ديل جيران ( الشلابة ) دي في المهندسين ....( شوف ليك حظ ) ...!!
وطوالي لفت ليك الموضوع في ورقة سلمتو لي ( مرت ) كمال دي في يدها ...!! وقبل التنفيذ بساعات ...!!
و تحركت الاخيرة بدورها علي الفور وقطعت خطوط الإتصال والإمداد عن ( كمال ) وتم إحضارو وحصارو واحباط المحاولة في مهدها ....!!
كمال نكر حطب ....!!!
وهو تذاكر ( ماليزيا ) قاطعا ( المجرم ) .....!! المهم تم احباط المحاولة بنجاح ...
معانا واحدة في الحلة اسمها ( ثويبة ) من البنات المثقفات ديل ...!! وناشطة في حقوق المرأة ....
القراية الكتيرة خلت ليك نضاراتا ( قعر كباية )
هي النوع داك البقول ليك بنية الوعي الثقافي حصل ليها ضمور واضمحلال ....!!
اها ( ثويبة ) دي قالت مفروض يطلع قانون يجرم (الشلابات ) بتهمة التعدي علي حقوق الغير بغير وجه حق ....وزي مافي سرقة عادية ...!! وسرقة ادبية.....!! فدي تعتبر سرقة إنسانية ...!!!
و امونة الشيطونة طبعا لديها تصريح خطير في هذا الجانب قالت ما ترموها ساكت في ( الشلابات )
الرجال نوعين ...!! نوع خفيف بتشلب ....!!
والتاني تقيل ...!! وبتقل القلب .....!!
غايتو ( أمونة ) لما تتجلي بتبدع ....وقالت هي تمًوت وماتبقي شلابه .... !! ديل ابرز الناشطين في القصة دي
في الحلة ....!!
ناس ( فلقصة ) طبعا الكلام الزي دا ما بعجبم خاصة وانو
فلقصة ( سوابق ) لديها تجربة ( شلب ) فاشلة استمرت تلاتة شهور طق طرق ....مازادو يوم
اها الْيَوْمَ داك في قيدومة ناس ( معاذ ) جابو ليهم
فنانة كدا من (فريق ورا ) ....!! الساعة الإتفرت ليك
والمايك دا لصقو في الخشم قررربت تاكلو ....وقالت كدا ولعلعت ....!! وبي أعلي صوت ......
والله انا ما شلبتو 
🎵🎵 يا اخوانا انا ما شلبتو 🎵🎵
🎵🎵 يا اخوانا انا ما شلبتو 🎵🎵
انا ياناس عجبتو 
🎼 وأعقبتها بجملة اعتراضية
🎼 وأعقبتها بجملة اعتراضية
تقول .....!!!! ( والما شلبت ما مزة .....!! )
عليك الله ياثويبة أضيفي المادة 2 ( الماشلبت ما مزة دي ) ...!! ( التحريض علي السرقة ) واثارة النعرات العاطفية ...!!في القانون الجديد ...!!
اها ( فلقصة ) بس سمعت ليك الاغنية دي من هنا قامت من كرسيها و اتنفضت التقول ضربا سلك
💃🏿💃🏿💃🏿 واليدين ديل فوووق 
🖐🖐
💃🏿💃🏿💃🏿 واليدين ديل فوووق 🖐🖐
( جاتا الحالة )
في محاولة لنفي التهمة ....!! وتفريغ شحنات من
الضغوط والشكوك ...!!
( مشاعر ) قالت لي ( أمونة ) طوالي علقت في نفس اللحظة قالت كلمو ( فلقصة ) دي قولو ليها الكلام دا تقولو لي زول ماعندو حديدة .....!!
لما كلموها ..!!قالت ليهم ( امونة ) معذورة المسكينة بعد دا لا بتشلب لا بتتشلب ....!!
(عوقو ياحكم) ...!!
جماعة اللوبي اليميني المتطرف شالو الشمار بي صمة خشمو دققو لي ( أمونة ) ....وأمونة ردت ....
قالت ليهم دي غلطتي المره الفاتت كنتا داير أحلق ليها صلعة ...الحلة دي كلها اتوسطت ...خليتا ...وما كان اخليها شايفين قلة أدبا ...قولو ليها ( الشلابة ) الجد جد بتعرسو وبتدرسو ...مش بكشوها بعد تلاتة شهور ....( يوزززززززع )
....!! ....
وقولو ليها الصلعة راجياك راجياك ....( تجديد العهد والميثاق ) ...
غايتو غنا البنات دا أهم حاجه فيهو إنو زي موجز الأخبار تشوف أهم العناوين وطوالي بديك ( زيت البلد )
وأنا يابلد إحترتا فيك
واحتار دليلي وسر هواك
تدينا مرات بالقفا
وحاجات بتحصل من وراك
مرات صفوف
مرات صروف
مرات تعاكسنا الظروف
برضو بنموت بس في هواك
بالملايين والألوف
وتبقي دايما سر أمل
وغالي ياسيد الحروف 
❤️
❤️
ومره من أعلي الجبل
ندلي لي عند الجروف .....!!!
صحي والله ...من أعلي الجبل لي عند الجروف
من ....
ياضنين الوعد إن يكن حسنك مجهول المدى
فخيال الشعر يرتاد الثريا
وننزل نمسكا من الكبري لحدي ما نصل وانا ماشلبتو ...وانا ياناس عجبتو ....!!!
لوووووووووووووووول 💃🏿💃🏿💃🏿
💃🏿💃🏿💃🏿
صحي يا فلقصة