يوميات علوب.......163 .....الغرفة ( 25 )
بسكويت ( نازك ) وصينية ( الخال ) ......
زمان في الجامعة كان معانا واحد إسمو ( النور ) مشهور ب ( الخال ) ..أكبر زول في الكلية ....وغالبا الجامعة ... أصغر من الدكاترة شوية كدا ...!!
اها ( الخال ) دا ...متكل في الجامعة دي ليهو سنين ...!! مره يجمد السنة ...!! ومره يمتحن ( إكسترنال ) ..! ومرات ( ملاحق ) ....!!! ومره تغلبني القراية ...!!!
حافظ قوانين الجامعة أكتر من عميد الطلاب .....!! لذلك لايصيبه مكروه ....!!! ولا يتردد في إعمال المادة 9 من قانون النتائج والامتحانات مقروءة مع الفقرة ( ج ) من لوائح الفصل والكليات ...اذا واجه مشكلة ...!!
وقد فعلها مرتين ..!! وكسب الرهان
أها ( الخال ) مدور لبك تجارة جد ...!!
شي سوق ليبيا ...!! وشي السوق العربي...!! وسعد قشرة ....!! ومرات بمرقا في مصر يجيب منها ( جكوك ) البلاستيك الحمر ديل ..!! وحلل الألمونيوم وهدوم الشفع ....!!
عشان كدا الجامعة عندو محطة ومركز استقرار ...!! تدور في فلكها الخبايا والأسرار ...!!
قاااعد في البركس دا ( هيلتون ) بس ..!! وشغلو مدور
والكلية ملحوقة ....!! أها ياها دي النظرية ...
عشان كدا زولك مقررررش ... !! بس كمان هو محمول شديد ...( الخال ) كبير البيت ومسؤول من بنات اختو يتيمات ...!! واختو التانية مطلقة وعندها ولدين وبت ...!! دا غير خالاتو وعماتو ...!! الحلة كلها راجيا.....وكت يقولو ليك ( النور ) جا .....الكلام إنتهي
......
عندو أصحابو ( فردو ) في الجامعة ...!! ونحنا بنعرفم طبعا واحد إسمو ( حافظ ) ...!! دا حافظا ومنقطا مثقف حد الترف ...!! وفهمان درجة التخمة ...!!
إذا تداخل في ركن نقاش ...!! فهو الحضور الساطع
...!! والبيان القاطع ....!! الناس دي كلها بتنتظر تعقيبو ...!! تعاين لي كدا شكلو مسكيييين ....وهو ذاتو ضعييييف ومهلهل كدا ...!! لكن فظيع ...!!!
بفهم في أي حاجه ...ولذيذ خلاص ...!! تعليقاتو مضحكة شديد وعلي درجة عالية من الذكاء ....
صاحبو التاني إسمو ( الزين ...!! ( الزين عوض ) ..
دا كمان ( بسف ) .....!!! السفه الواااحدة دي قال دي حريات شخصية ...!! أهما حاجه إنو ( بسف ) قدام البنات ديل كلهن ولا داسيها ....!! أها بعد ( سفتو )
دي شطاره لمن عوارة ....!! شاذ ...!! بطقطق ليك ال Math ) دا ذي ما جا من المصنع ......وبحطم أرقام قياسية أحيانا في النتائج ....تلقي سبعة ( A ) مرصوصات دا غير ال ( +A ) ...!! مرتين عامل ريكورد في (الإحصاء التطبيقية) زول كسرو مافي ....!!
( طبق ليهم فيها نظرية لمن فهمو حاجه ....!! )
الزين من منطقة وديعة كدا لاتعكر صفوها الأرقام
غايتو السودان دا يحير ( علما )...لافين ....!!
الأساتذة لما بتفرجو فيهو ( الزين ) دا...!! وينبهرو به في كثير من الأحيان ...!!
النهار والليل حايم في الجامعة دي بقرا متين ما عارفو ....البنات البكرهن هذا النوع من التبغ تجاوزن الموضوع مع ( الزين ) بي شطارتو دي ...قالن دي مسالة شخصية وسلوك خاص ....( كم انت كبير يابن النيلين)
الزين اهتماتو الأدبية مكتنزة ....بفهم في أي شي ويناقشك باستفاضة في أي موضوع ....من الإلياذة مرورا بالأدب الفرنسي ...وقصص شكسبير ....ولا ينتهي بالثورة البلشفية .....!! وقضايا التحرر .....!!!
اها التلاته ديل ...!! الخال ...!! وحافظ ...!! والزين ...!
ساكنين مع بعض في داخلية النجومي ...!!
الغرفة ( 25 )
ومفترض حسب لوائح الجامعة وسكن الطلاب إنو يكون معاهم رابع في الغرفة ...!! لكن هم ماعايزين أي زول يخرب الرصة .......!! لذلك يشددو من الإجراءت الأمنية ....!! فأي زول بجيبو ليهم يا أقنعوه بالمنطق أن يغادر.....!!! أو ترك لحال سبيله تحت الضغط و الإكراه لأنو غرفتم دي في البركس إسمها ( وكر الأشرار ) حيطتا مشخبته بي أشعار ( درويش ) ....!! وبعض تجليات ( كويلو ) .....وَدُومَة ودحامد ....
( لطيبنا الصالح ) ....!!
فيها أي حاجه ثقافة وفنون وأدب ...!!! وقمار ...!! 
😳
😳
( نعم سادتي ..إنه الميسر ....!! )
بلعبو ( حريق ) الجماعة ديل ...بس بريء ...البحرق بسوي الشاي وبنضف الأوضة ......!!!
بجوهم ناس من كل الداخليات المجاورة ....!!! الطربيزة بالحجز ...!! دفاتر ( الأسكورات ) أكتر من ( شيتات الحامعة ...) ...( الزين ) طبعا بجر الخمسين بالحظ أحيانا ...!! وفِي الغالب بالرياضيات ونظرية الإحتمالات ...!!
( حتي الحريق بأدبو ) ....!! 
😜
😜
العمادة جابت ليهم ( فلسطيني ) كدا من البدوهم منح ديل سكنوهو معاهم ..!!
وطلع بيُؤْمِن بالحريات الشخصية... .قاااعد ..!! رغم الجوطه دي ....!! ومتكييف ...!!
أصلو ما إضايق ..وطلع النوع داك البحب التجريب بلعب كشتينه كمان ....!! ولا يأبه للضجيج ......!!
( وهو الشاهد علي صواريخ العدو تتجول في سماء غزه ...) ...اسمو ( وسيم ) ....!!!
( الخال ) قال لي ( حافظ ) والله نحن ( فلسطين ) في راسنا دا من فوق ....!!
بس كمان ما بنقبل ليهم وطن بديل ....!!
( لتبدأ إجراءات العودة ) ...
جابو ليك كبدة إبل نيه أكلوها قدامو بالليل ...مع البصل ...!!!
صحو الصباح لقوهو غادر... ولا اثار حتي لأغراضه الشخصية ..!! لم يغادر الغرفة فحسب ...!! لقد غادر الجامعة ...! والسودان ...! لا ادري مالذي دار في راْسه تحديدا...!!
لكنه فضل العيش الي جانب الاحتلال ....بدلا من الغرفة ( 25 ) ......!!!
( دا بكون آمن بالسودان والدول المجاورة ) ....!!!
أها ( الخال ) دا برضو هو نحيييف كدا عندو بنطلون جينز ( مقدود ) بالجنبه ...!! طوااالي دارعو ....
وشعيراتو المزعطات ديل ...!! وشنب محترم سحب اليه كل شعر رأسه ....!! ملامحو ( حنيينه ) كدا ...!!
وهو كذلك...!! طوالي ضاحك ...!! عشان كدا الله فاتحا علي ...!!!
أها كانت معانا واحده إسمها ( نازك ) .....!!
( نازك نبق ) ...!!
بت برجوازية كدا ....!! بتقري علوم .....!! وشكلها بتقرا ساي تتسلي بس ...!!! أي حاجه فيها براحة ...مافي استعجال ...!! المافي شنو ....!!
عندها عربيه بي سواقا كل يوم بتجيبا ....!! مشتهين يوم تدبل اللبسة ...!!!
عمك ( نبق ) دا ما تشوف الإسم دا ...تقول مسكين وياحليلو .....!!
عندو مصنعين ...!! وتلاته مزارع ...!! ووكيل لي ( بن ) حبشي مشهور إسمو شنو كدا ماعارف ...!!
نحنا نشرب القهوة بالجنزبيل .....!!
وهم يتكيفو بالقروش والكناجيل .....!!
الشاربين ليها شنو ماعارف ...!!
( أشرب قهوة وأدعم نازك ...!!! ا اقلي البن وحتي الشرا ) ...!! ( الشرا ) دا بكون نحنا .....!!
وقالو ( نازك ) دي بتو الوحيده عندها أخوين ذكور عشان كدا بعزها شديد ومدلعا .....!! النصيحة كلنا بنعزها ....!!
هي ذاتا زوله لطيفة كدا ومنزلا القزاز حبه ماكتير
ملامحا وديييعة ...!!! ونعومة غير عادية ....
( ياخ دا ( مال ) ينعم أبو القنفد خلي ( نازك ) ...
مش في صابونة كدا إسمها ( دوف ) بس نازك بتشبه الصابونة دي ....!!
بعدين أي بت اسمها ( نازك ) جذابة ....من الاخر كدا..... ( كدي راجعو ) في. راسكم دا ........!!!
اهاااااا...!! ماقلتا ليكم ...،،!!
شايفك يالبتقرا في كلامي دا وتتذكر .......!! 
😇
😇
اااي نازك القرت معاكم ...😳اها كيف .....!!؟
😳اها كيف .....!!؟
شديدة صاح ......
😂😂...كلمممتك
😂😂...كلمممتك
كدي خلينا في نازكنا دي هي ماقصة سمحة ....جذابة شديد البت دي ...!! الغريبه بتتكيف لي ( الخال ) دا شديد ....!! قالت ( عصامي ) ....كان عصامي ماعرفتا ( ياهن الحلل ديل )
المهم طواااالي بتتونس معاهو ...!!!
طبعا الميزة الفي الخال ...!! والزين....!! وحافظ ...!! ديل إنهم مشبعين بي ثقافة عالية جدا ...عشان كدا واثقين من روحم ...
وناقشين صراع الطبقات والنخب ....والجماعات بين الايثنولوجي وعلم الاجتماع .....و كل الكلام الكبار دا ...!!
و إنو أحيانا خطوط التواصل والتماس مع الغير بتكون هشه .....والقصص دي
لكن الخال غايتو ( حنك ) ليك ( نازك ) دي .....!!
البت بقت ما بتزح من جمبو ...!! ( حافظ ) قال لي بكون نزل ليها نظرية ( الخروج من القمقم )
قلتا لي ودي شنو كمان ...!!؟
قال لي يعني بكون أقنعا إنو في حياة تانيه غير الغرف المكيفة ...!! والممرات الساكنة ...!!! أكثر دفئا وحرارة
بتصدقو فعلا ( نازك ) بقت بس ياهو دا زولا ..( وحبة بندولا ) ....طالعة ونازلا مع ( الخال ) حتي تم تسجيلهما رسميا ( كيس جامعة ) ...!!
وكان العرف الجامعي يقبل هذا النوع من العلاقات طالما أنه في الشمس وتحت أعين الجميع .....!!
( نازك الملائكه) بقت تمشي تاكل فول في الجان ...!! وتركب الحافلة مع ( الخال ) ...!! وتضحك بصوت عال
لقد بدأت رحلة الهبوط الي أعلي ...!! داير يطلعا من جنتا (شيطان) البركس دا .....!!
وإن كانت الجنة الحقيقية هي المكان الذي تجد فيه سعادتك بغض النظر عن ماهيته وجوهره ....!!
فبيت صغير قد يهبك سعادة يفشل قصر فخيم في منحك إياها ....!!! اها دا ياهو الهبوط الي أعلي ...
و ( نازك ) طبعا زي ( صرصور حبنا ) ديك ...!!
حاسا ليك بي عظمة مع السياحة العائلية دي ...يازول ومبسووووطة ...وجااادة ....دا النوع العادي ممكن تعرس ( الخال ) دا رغم الفارق ...!! لأنو ( الخال ) دا براهو مسؤول ليهو من تمنيه وعشرين نَفَر كدا في حلتم
وزي ( طمنتاشر ) بت ..!! البتقرا ...! والدايره تعرس والولدت ...!! وقصة كدا ...!! المهم مسؤوليات جسام في حلتم البهية التي تبعد كثيرا عن الخرطوم المركز ...!! تتوسد النيل في دعة وسلام ...!! مستسلمة..! قنوعة وراضية...!!
وبيت ناس نازك في ( المعمورة ) قدر الإستاد ...فيه شجر النخيل الأملس داك قالو إسمو ( الملكي )
( حتي تمر المساكين ألبسوهو التاج .....) ....!!
الله غالب ....!!
أها ( النخل ) دا مرصوص صف ...!! وملعب تنس وحوضين سباحة ....!!
أنا لو من الدولة ..!! طوالي أصادرو ....!! و أعلنو المدينة الرياضية .....!!
أها في جماعة حاقدين كدا لمو ليك في ( الخال ) دا
أقنعوهو يتقل شويه مع ( نبق ) دي .....!! وماينبهل عشان تحبو أكتر ....!! وتتعلق بيهو ...!! وما يكون عندو مشكله بعدين في العرس ....!!
وتقول لي أبوها بحبو يا بابا ...!! بحبو ...!! ومابعرس غيرو .....!!!
( الخال ) قالي لي ( نازك ) دي وكت تقول لي ( بابا ) قال و( بابا ) عمل ...!!
بحس إنو أنا في مسلسل مصري مع ( الهام شاهين ) قال لي بقرب اقول ليها ....
( عارفه يانزاكا يا حبيبتي نفسي أغمض وافتح عينيا نلاييي نفسنا في بيتنا والطيور بتتنطط حوالينا وقنبنا ...ياااااه...!! ياتري الحلم دا .... حيتحأأ ...!!؟ إمتي بس يارب ....وإزاي ...!!! ) ........
وبتخيل ليك يدي دي جارية في الطربيزة من هنا ويدها جارية من هناك ( ميسي والقون ) ...ويتلاقو في النص ...( النسخة المصرية )
وكتير بتناسا إيديا واسيبا عنية في إيدك
🎵🎵
🎵🎵
( أوووووو السودان ياخ ....) ....!!!
عليك الله شوف حقتنا حنينة كيف ....!!
( واسيبا عنيه في إيدك ) ....
❤️ ....عذاب
❤️ ....عذاب
اها قال لي شوية كدا برجع استغفر ....!!
...( الخال ) قال لي أنا لو قلتا لي أبوي دا ( بابا )....كان ربطوني بي ليلي داك ودوني الفقرا
المهم فعلا ( الخال ) استجاب للنداء وبقي بتجاهل ( نازك ) ....!!! بتصدقو ....😳
😳
و( نازك ) المسكينة تمشي السواق ..! تنتظر ( الرمة ) دا قدام الكلية ....!!
والجماعة مدورين ليك فيهو .....!! أتقل يا ( خاااال ) اتقل يامعلللم ...!! وهو سايق .....!!
( سايق ) دلالو علي ....!!
لحدي ما يوم جاتو ليك من هناااك .... قالت ليهو عايزاك دقيقة ...!! زولك جا يتلولح .....!!
قالت ليهو صدق كلام ( بابا ) صاح ....!! قال لي الحياة دي لازم بكون فيها نوع من التكافؤ عشان تمشي لي قدام وتستمر ....!! وأنا الظاهر إخترتا الزول الغلط ...!! أنا فاكرا إني إخترتا رجل يعتمد عليهو ....!!
بس للأسف لقيتك سميع..!! وبتسمع ....!! والبسمع عمرو ما بنفع ....!! عن إذنك .....
ودا كان اخر يوم تنزل فيه ( النيازك) ....وانتهت المغامرة 0/6 ....
غايتو الخال كأنو صقعو كف ...!! خلت خشمو ملح ملح ...!! يا دوب اكتشف انًو الحياة ادتو ...! وفَرَّط ...!!
جماعتك ناس ( أتقل ياخال ) تتفسو الصعداء ....!!
لما شاكلم ...!! قالو ليهو نحنا قلنا ليك ( أتقل ) ...ما قلنا ليك أقع في الواطا دي ...واترمتل ...!!
يازول كل يوم ساكيهم ليك ...!! قال هم سبب هذا الخروج المبكر .....!!!!
مادعاني لتذكر هذه القصة أمبارح لاقيت ليك ( الخال ) بعد كل هذه السنوات في المطار ...!!
( الخال ) الراجل الحلو أخو الأخوان ....!!!
طبعا قروشو دي ماحقتو فاكيها ليك.....و ( الجامعة ) دي كلها استمتعت ...!! عشان كدا ماكملت ....!!
قلتا ليهو إنتا لسة مع المطارات ....!! قال لي ولسه نحنا مع الطيور المابتعرف ليها خرطة ولا في ايدا جواز سفر ....!! ....يازووول سلام واحضان ومطايبة ...وتاني يسلم علي ....علوب ياحليلك ..إزيك ياعلوب ...ويحضني ...ياسلاااااام .....!! الناس الطيبة
قلتا لي ما قاعد تلاقي ناس حافظ ياخ قال لي حافظ في هولندا بتكلم هولندي احسن منهم وشغال ومدور
والزين في واشنطن اصغر موظف في صندوق النقد الدولي ....مشكلتنا ياعلوب بنصدر بني آدميين ....
عرفتا منو انو اتزوج بت عمتو اسمها ( وهيبة ) عندو منها بت وولد .....!!
قلتا ليهو بتتذكر ( بسكويت نازك ) ....!!
( كنا سامنها كدا ) بيناتنا ....!! قال لي هسا في داعي ياعلوب تقلب علينا المواجع ....!! قال لي أنت لما اتذكر ( نازك ) دي ...بشعر في زول دفق فيني مويه سااااقطة
....!! ياحليلا ( نازك ) ...!!سبحانو الرازق ....!!
يضحك سااااي .....!!!
قال لي ( نازك ) دي شعرا ماعندنا ليهو رقبة ....!!
الله يخلي لي ( وهيبة الرهيبة ) دي .....!!
حنيييينة ياعلوب وبتقول لي أبوي ...!! وجابت لي احمد وفرحة ديل ....!! عليك الله في أحلي من كدا ..
قلتا ليهم مافي والله ....!! ربنا يخليهم ليك ...ويفرحك بيهم إن شاءالله..... تستاهل ياخال .....
قال لي بتتذكر ياعلوب ( نازك ) دي لما تشرب ليمون بزنس ...!!ونمشي لي عمك نقول لي هسا كباية ( نازك ) دي قاعد تغسلا مع باقي الكبابي ...عمك يشيل ويضحك
غايتو لمن تقول كدا وتجغم ليها جغمة من الليمون دا الشجر دا كلو بصفق .....!!!
قال لي زمنا دا كلو ماعرفنا قيمة الليمون ..قايلنو من ( الحوامض ) لحدي ما شربتو قمر ا السبوع الداير دي ......طلعنا نحن الحامضين ...!!!
ضحكنا دايرين نقع ...😂😂😂😂.....!!الخال ياخ
😂😂😂😂.....!!الخال ياخ
( نازك ) هسا معرسا ودخالتا دكتور اسمو ( حازم ) وعايشين في ( دبلن )....
غايتو الله شافك يا ( نزاكا ) كان تابعتي ( الخال ) دا كان ملاك (سرامس ) تبخ .....وصواني النيكل ....وزي الوكت دا كنتو لافين في ( العتبة ) ....تاكلو في اللب .....!!
وتأزإزو الميرندا .......!!! صحي يابت ....شوق السنين يا ( خال ) ....
كانت لنا ايّام