يوميات علوب ...162
حلتنا وناس فجتنا ....( كرما )
طبعا أمبارح وعدتكم أكلمكم عن أحد شخصيات حلتنا البارزين لكن ( هوهوا ) طارئة ...حالت دون ذلك عشان كدا وحفاظا علي الوعد أخليكم الليلة مع بطل من ابطال حلتنا ....!! بطل من ورق ....!!
اسمو ( عبد الكريم) ...عبد الكريم الداف ....!! بقولو لبهو ( كرما ) ( بضم الكاف ) ....ماعندو أي حاجه لكن متصدر أي حاجه ... أكبر منظراتي في الحلة و ( الحلل ) المجاورة ...!! تشوفو بتكلم عن سعر الصرف تحلف تقول مدير البنك الفرنسي ...بقول لي الاسترليني ( استيرلنغ ) £ متفوقا حتي علي الكبار ....!! وهو الذي لم يشاهد الجنيه الإسترليني في حياته ...وعلاقته باللغة الانجليزيةً متأزمة ان لم تكن مقطوعة ....!! بالله مش مفروض الملكة تكرمو .....
🇬🇧
🇬🇧
المهارة الوحيدة التي يمتلكها ( كرما ) إنو مقنع ...
تشوف الجلابية البيضا ...!! والشال المطرز ..!! والشنب والصوت الوقور ...!! والثقة والثبات تحلف تقول قاضي محكمة الاستئناف ...!!
ترفع العمة تلقي ( قرعة ) قدر الليلة وبكرا ....!!
لي هسا زول في الحلة عارفو شغال شنو مافي ...!!! لقيتو مره جاي المغربية كدا قلتا لي وييين مسجل غياب اليومين ديل قال لي ياخ الوالي مريحنا...!! إجتماعات طوااالي...! ولجان ..!! فترنا ذاتنا والله .....!!
بقولا ليك كدا ولا يتردد ...!! كأنو بشرب في موية .......!!
وهو بكون كان في السوق العربي ...!! واتغدي بي قراصة في مطعم ( صوفة ) وجا ....
الغريبه مافي زول بكرهو ناس الحلة كلهم عارفنو
كضاب لكن علي الرغم من ذلك ينصتو له ...!! وأحيانا باهتمام ...!! فهم حتما يجدون فيه أحلامهم المؤجلة ويخرجون به من واقع مشحون ....
هو ذاتو ما بقصر ...مجتهد في روحو ...يعني مثلا قام
حفظ ليهو كم معلومة عن ( المرا ) العرسا هاري ولد المرحومة ( ديانا ) دي .....الود اب شعرا أحمر دا ..
( الملكة حبوبتو أم أبو طبعا ) ....!!
أها ( كرما ) التقول مناسبن ...!! مشي لقط ليهو كم معلومة عن البت دي ( إسما ميغان ) ...وكيف كانت طفولتا ...!! ولاقت هاري دا ذاتو وين ...!! ومقاس جزمتا كم ...وإنها أكبر منو ...!!وبتتمشط ...!! وكلام زي دا ...!!
أها نوع المعلومات الزي دي حلتنا مافاضية ليها ...!!فلما تجي من زي (عبد الكريم ) دا بترفع أسهمو ...!! وواحدين بقولو ( كرما ) مثقف ياخ ....
ولما يقول ليك قالو الأميرة الجديدة دي ( بتتمشط ) في واحدين كتار بقربو يدمعو بجيهم إحساس إنو الزولة دي قريبتم ....!!
( وأننا قد طرقنا أبواب باكنغهام ....!!
✌️
✌️
ديل ناس عمك الجاك وشلتو ..( نضااااااف ) أكتر حاجه يعرفوها في الدنيا .....( الضمنة ) ....!!
اها ديل ( كرما ) متخصص فيهم....!!!
بخيتم خياته ....!!!!
لقيتو مره بحكي ليهم عن جدو ( الكلس ) ...!! وإنو كيف كان ملقبنو بي ( تمساح الدميرة ....)
وهم في حالة إنتشاء وتبلد ...!! ينصتوا باهتمام وبراءة .......!!
قال ليهم كان إسمو ( الوقيع ) بقولو ليهو الأسد ...
( الأسد النتر ) ....( نتر ووتر ) 
😜
😜
قال مره زمن الإنجليز جدو دا زعل من الخواجة دا شديد ...! استفزاهو .....!!!!
قال ليهم جدي دا أصلو ما سألو ولا عاين ليهو
.....!! عندو قرش الحديد الزمن داك ...!! مسكو كدا عصرو بي يدو لما تناهو ...!!
قال ( الخواجه) يعاين ساااكت في المنظر دا ...قام أتلفت قال ليهو ....
( مستر وكييع ... إنتا يارف انا يخب هزار خبيبي ...مايكون انتا زااااالان.......!! ( زعلان ) ...!!
قال ليهم وباسو في راسو ....
😘
😳 ........!!!
😘😳 ........!!!
هو الجاب ليهم القون في كولومبيا ماباسو في راسو الإنجليز الباردين ديل ...يبوس راس ( الوقيع ) ....
(طلس الطلس غايتو .....!! )
و جماعتك شدة ما اندمجوا بقو خايفين من ( عبد الكريم ) حفيد (الوقيع ) الكرفس القرش ( للخواجا ) ....!! سليل الراعي الأبا يبيع النعجة ....!! غايتو الا كان صرا وشو دا وكرفسو وهذا اضعف الإيمان
الميزة الأساسية في عبد الكريم دا إنو ماعندو صعب وكبير أي حاجه بدرعا .....!! ثقة عالية ياخ
الجماعة ملمومين كلهم في عقد بت عمك ( الصافي ) و ( كرما ) جا ليك من هناك الجلابية والعمة والحال
(عدة الشغل دي أصلو ما بلعب فيها ..)
بكون لما فيها غسلا وكواها براهو ..!! تلمع ماشاءالله ...
👋
👋
وأي جماعة دايرنو بقعد معاهم....!!! ( نجم شباك ) كمان ....!!
مرات الزول الكضاب وواثق من كضبو بكون كلامو طاااعم ...!!لأنو بخليك بين الواقع والخيال ...!! بتنطط بيناتم ...!! ودي مساحة الناس كلها محتاجا ليها
( لا الواقع سمح مقبول ولا عنب الخيال بنطول ..!! )
المهم علي حظنا الحلو ( كرما ) استقرا في الطربيزة الجنبنا طوالي ...!! وعلي حظوا ( المرض ) الطربيزة كلها رتب ...!! ومعاهم واحدين كدا بدوك احساس انو هو الحكومة ....!! والحكومة ذاتا ما شغالة بيهو ....!
حدهم لجنة الحلة بس ...
دستوري) وااااحد ماسمعنا بيهو منهم ...!!! وأنا (دستوري ) نازل في الخرطوم دي ذاتا ....
المهم دي التشكيلة وكالعادة جات سيرة الحكومة والغلا ...والدولار ...و الأجانب ... والبنزين ...!!
وكلام زي دا
ووجد ( عبد الكريم ) نفسه محشورا في الزاوية هذه المرة ...وجوه ذات صلة بالحكومة علي مقربة منه
والشعب في الجانب الاخر ......
(زنقة الإنجليز مع الكروات ...) ...!!
والكل ينتظر تعليق ( كرما ) ...وهو حسا بالمطب
والله يا اخوانا آااخر حاجه كنتا أتصورا ...!! عملا الزول دا ...!!
اتخيلو ( كرما ) دا بقي يشيل في نفسو ويخت ..!!معاها شوية قحة كدا ...!؟ بقي يزيدا حبه حبة ....!!
لما وصل مرحلة الخججان ....
🤧🤧
🤧🤧
( عربية ودورت .....)
وطلع ليك بخاخ من جيبو ...كخخخخخ ...!! كخخخخخ بخا ليك في خشمو.... قال ( الأزمة) قامت عليهو واستأذن مرق ......!!
خلا ليك المباراة دي مجهجهة ومسيييخة ....!!
...
......................
إرتاح يا كرما وابلع الحبوب دي تلاتة مرات ...
💊💊💊
💊💊💊
أها هسا كيف ...!!؟...........أحسن ... ...!!