يوميات علوب .....161 .....!! ابن ( كلب )
المره الفاتت وعدكم أحكي ليكم عن بعض رموز وشخوص حلتنا ..
( جنس ( شخوص )لكن) ...!!
المهم كنتا حكيت ليكم عن ( اشراقة ) الكتاحة ديك صاح ......!!!
أها الليلة كنتا عايز أعرفكم علي شخصية عجيبة كدا اسمها ( عبد الكريم ) ...وانا ماشي عليهو ... اسمع ليك كلب ( بهوهو ) اتلفتا لقيتو ( جركاس ) ....اخييرا ياجركسة سمعنا صوتك ...عشان كدا خلوني الليلة أحكي ليكم عن الكلب إبن الكلب دا .....
دا أشهر حيوان في حلتنا دي .. كلب ناس حاج التوم دا ...وبلا منازع ....هم سامنو ( جركاس ) وكان قلتا لي ( جركاس ) مابتلفت عليك ...!! وفي الغالب هو ذاتو ماعارف دا إسمو .....!! ( واحد حيوان ) ....وعوير عوارة تشوف الرقدا تقول ديك يالضلعة في العشا ....!! سنتين ماشاف لحمة ....!!
هو فاضي لكن من مبارات الحيط و الرقاد في الضللة ...ولو شاف ليهو ( زير ) سبيل ساكت في الشارع خلاص حيلو بموت ....!! متيين يتكرفس يتكل تحتو
( لو الحر غلبك ( الزير ) حلك ) ...!! مكيفات ( الودكا )
غايتو جنس ( كلب ) ...بعدين الكلاب دي الشي الوحيد البتعملو إنها ( بتهوهو ) .....صاح ....!! أها كلب ناس حاج التوم دا أظنو فنان ....!! الا مزاجو يحكم ....!! أنا كنتا قايلو أبكم...!! شهر كامل ممكن ماتسمع ليهو ولا نبحة ....!!
ماعرفتها عباطة ولا غتاتة ولا شنو بالظبط يعني ( كلب ) يخلي مهامو الأساسية ويتفرغ للرقاد والحوامة ...!! معقولة لكن ...!! واضح جدا إنو فاهم الموضوع غلط ...!!
مرات كدا بتقوم علي الحالة بديها ( هوهوا ) كدا ما عندها أي معني ...!! ولا مرتبطة بي أي حدث معين ...!! لا في زول غريب جا ماري ...!! لا ساكين حرامي ....ولا أي حاجه .....!! بس كدا ....نفسنة
مربع يدينك ديل من ضل لي ضل ...عيب عليك الكلام دا ياخ ...!!
لا وعندو مرات جنس سقالة ....!! مثلا تجي ماشي بي جنبو وهوبكون ممدد في موية بلاعة ولا سجم يدعكو ...!! المهم موسد راسو دا في يدينو الطوال ديل وراقد ....!! وعندو حركة كدا بتاعة ( كتيل ) عيون بعرفا برا...!! يعني الكلب نايم ....وهو صااااحي ابن الكلب ...!!
اها تجي ماشي يديك عين كدا ...والتانية طافية
يحسسك بأنك زول تافه ساكت ولا تستحق حتي إهتمامو ...!!وانت أصلا تكوت جاي مفلس وزهجان ما طايق روحك ...!! ومفتحات جروحك ...!! يجيك ( العواليق ) دا يتم ليك النافصة ويحسسك إنك لا تسوي مجرد نظرة ( كلب ) .....!! ياربي بكون قاصدا ....!!
كان في لقطة حايمة في الواتس دا لي واحد كدا قافلا معاهو جا ماري ليهو بي ( كلب ) زي ( الكرور ) حقنا دا عاين ليهو سمممح ....!! وقطع ليك فيهو ( كف ) 
🖐 ومشي ...!!
🖐 ومشي ...!!
اها أنا اللقطة دي وريتا ( كلبنا ) دا عشره مرات كان يفهم ....!! ولا كأنو شاف حاجه ....!!! في سجمو ورمادو ...!!
بعدين شنو مرات طليع اللسان واللهثي وحركات المسلسلات دي ....!! خلاااص يعني الكلب اشتغل وداير يموت من العطش .....!! ما هو إنتا النهار كلو ممدد راقد ...والليل تتمطي ....!! مما الله خلقنا ماسمعنا بيك قبضتا ليك حرامي ..!! ولا سكيت ليك نشال ...!
تمومة جرتق بس ...( كلب ) بي الإسم وشهادة الميلاد
قال ( جركاس ) قال .....خسارة الإسم غايتو ....!! صحي الكلاب ماتو في ( الجزارة ) ......!!
ياخ بقيت مضحكة...!! الشفع ما بخافو منك ....!!! الكجم وأصحابو وكت مايلقو حاجه بلعبو بيها بلعبو بيك
ياعرة الكلاب ....!!!
مره يعقدو لي ( إضنينو ) الكبار ديل ...!! ومره يجرو من ( ضنبو ) ...!! ويرشو بالموية .....!!
غايتو مرمطا سمعة الكلاب في الواطا دي ...!!
هسا إنتا لو صحي ( كلب ) ود ( كلاب ) زي ناس ( الكجم ) ديل مفروض يخلو ليك الشارع ....!!! قاعد زي الأبلة وسطم ..!! إن شاء الله يلعبو بيك كوره ...مالي ومالك ...جرررر
بس كمان يا خوانا عشان نكون أمينين بالجد ( الكلب ) دا حنين جنس حنية طبعا بعرف ناس الحلة ديل واحد واحد ... ...ومرات كتيره لما يكون في واحد غايب شديد ويلاقيهو...جنس نطيط هو وعباطة ...!! ويتلصق ليك جنبو كدا ويتحكحك ...يقررررب يحضنو ...وأصوات كدا (نشيد بس ) فضل يقول لي وين إنتا ياخ طولتا كدا ...!! بحنني شديد ...!! ياخ دا بعرف أسامي الناس
الحاجه التانيه بحب شفع الحلة ديل حب خاص
لما يجو جنبو بحس بيهو بيضحك معاهم.... الضحك الوااااحد دا ....!! شدة مابكون مبسوط ....!!
أنا مرات اقول هسا الكلب دا لو نبح نبحة واحدة بس والله مايفضل شافع ...
لكني أظنك تقصدها وتستسلم بمزاجك أيها الكبير ....!! وهي تكفيك لتكًون .....( كلب السرور ) ....!!
كلب يخلق علاقة صداقة مع كديسة دا مش كلب عظيم ....!! عااادي كديسة ناس صفاء بت جيرانا دي تجي عابرة بي جنبو ذي الأميرة.... ولا بقول بغم ...مرات معاها هزة ضنب ترحيبية كمان ......وهي مرات بتعاين لي ومرات بتجليهو حسب المزاج .....!!
( وعطرتي كل الدنيا وانت مارا ) .....!!
مرات بعاين ليك كدااااا يقرررب يسألك ....!
صحي الرغيف زادو ...!!؟ بحسا بيهو كدا ياحليلو زمن ما ( كدا ) ليهو عضم... ( هو نحنا ( كدينا ) ....خلي هو )
ميه المية الكلاب دي بتكون حاسا بالغلا الحاصل دا والله جد .....!!! وااااضحة
واليومين ديل كمان اتعلَّم ليهو مرقه كدا برا الحلة ...!! بمشي ( حلة فوق ) الجنبنا دي ....ودي كلها كلاب ( شفوت ) كدا ومقرمين ....!! النهار كلو لافين في الشوارع دي بي كراع ( كلب ) ..!! وبالليل متكلين في الخيران .....
أمشي سمح ...!! قالو ( كلابن ) دي بتشرب البنقو ...و إنتا بي راسك الخفيف دا يوم تسطل هناك تجينا مسرح شعرك دا لي ورا وتغني..... ببا يا ببا ياعلب المربا .....!!
انا غايتو كلمتك وحذرتك ..... !!!
بي طريقتك ياخ إن شاءالله تنحرف .....!!
......!!
ورغم كل ذلك يظل ( كلب ) ناس حاج التوم إحدي علامات حلتنا الفارقة ولا يمكن أن تتصور الحلة بدونه بي نومو دا ....
لن أقول لا أسكت الله لك حسا ....تراكا ساكت خلقة
بس بقول ....دمت وفيا وصاحبا ورفيق ....
هوهوا وحلات ( جركاس ) في الطول والهوا
هوهوا ....ترا را را رم 
🎵
🎵
ابشششششر يا كلب ياود الكلب 
🐕
🐕
اتعشيت !!!؟