يوميات علوب ...158 .....مدفع الكجم وفستان رغد ....
إنه العيد .... !! 
🎉
🎁
🎈
🎉🎁🎈
يوم استثنائي تعلو فيه الفرحة وتسمو فوق الجراح ....!!
طبعا كالعاده صلينا في الساحة القدام جامعنا دا ولاقينا كل الناس هناك ...اتطايبنا واتقالدنا وعيدنا علي بعض ....والعفو والعافية ....
شوف حلتنا دي ذاتا الليله فرحانه كيف ......!!
أنا غايتو أكتر حاجه بتديني إحساس العيد ياهم الشفع ديل ..!! مراهنين علي الفرح وقاصدين السلام ...ودايما بكسبو الرهان .....!!
....اللبسات الجديده ....واللعبات ....والمسدسات والبنادق لأول مره تبدو وديعة ومسالمة ....!! فالعبرة بالمستخدم النهائي ....
الحلاوة و (الأندومي ) في نص الشارع .....والضحكات ماليه الزقاق ...
😋😋
😋😋
ناس الكجم قشرة السنين حتي لو لامس الدولار الخمسين .....
💰
💰
فالورقة الخضراء وبكل جبروتها عاجزة ان تطيح بفرحتهم أو تنال منها ...فهناك الحنان المنان يدبر الأمور ويحمل السرور ....إنهم أحبابه ...
استوقفتني بت جيرانا صغيرونه كدا اسمها ( رغد )
صاحبة ناس ( فطوم ) رأيتها بهذه ( اللبسة ) اليتيمة أكثر من مره وهاهي ترتديها من جديد يوم العيد ولم ينتقص ذلك من فرحتها شيء ..!! فهناك حزام أحمر يبدو أن أمها اضافته لها حتي يكون فيه لمسة تجديد ( والباندا ) الجديده في الشعر 
🎀
🎀
والصغيرة لم تركز كثيرا ويبدو أن الشريط الأحمر الذي يلف خصرها النحيل أوحي لها أن الفستان جديد...!! والوردة علي شعرها منحتها إحساس الأميرة ....!!
وهي كذلك ...!! والدنيا عيد ....
الكجم طبعا متعود أغمت ليهو العيديه في كل مره
فعمل ليهو حركتين التفاف جوي كدا قدامي ....( يعني شوفني ) ...وفِي الثالثة هبط امامي مباشرة كالنسر وهنأني بالعيد السعيد فرددت التهنئة بأفضل منها...
قاااشر الليلة (كجمونتي ) ومستحمي ...!! البنطلون والقميص الجديدات والحلاقة كيف ...وعامل ليهو خطين بالجنبة كدا في الشعر ....!!
غايتو الكجم دا لو استمر بالطريقة دي العيد الجاي حيعرس ...
وكل جوارحة تهتف تقول ...( العيديه مكانا وين ) ..!!!!!؟
و إن لم ينطق بها ( جهرا ) ...!! فعصرتا ليهو العشرين ( سرا ) ....!!
عاين ليها كدااا وابدي عدم الرضا والاهتمام هذه المرة ويبدو أن الورقة أم عشرين فقدت كثير من بريقها وقوتها الشرائية ووقفت متجهمة امام الدولار الحريف .....!! ولكن ماهو واضح ان الكجم اصبح يعرف ماهو ( التضخم ) 💰💰
💰💰
فأردفتها باخري ...!! حتي شوية فرا خشمو وظهرت سنيناتو ..حتي المترومة ...و إن كانت العيدية كلها ستذهب لميزانية الأمن والدفاع ...!!
لأني سألتو بشكل مباشر قلتا ليهو إنتا يالكجم بالظبط كدا عايز تشتري شنو ... !!؟ لم يتردد كثيرا في الإجابة قال لي ....طلق .....!! طلق ...!! يقصد المفرقعات والألعاب النارية 
💣💣وانطلق جاريا بي رجلينو الرقاق ديل ....!! ( الكجم دا مكانو الطبيعي سوريا ....)
💣💣وانطلق جاريا بي رجلينو الرقاق ديل ....!! ( الكجم دا مكانو الطبيعي سوريا ....)
التفت فوجدت ( رغد ( وصويحباتها في حالة جذب سماوي ابتهاجا بالعيد ..! دايرات يتشقن من الفرحة منظر يرد الروح ...!! مكشكشات بالسلاسل ... والأساور دي ماتديك الدرب ...والفساتين أم ورود ...وكل دقيقة يعاينن في الجزم ....
سلمتا عليهن...!! قلتا لي ( رغد ) ....أها إنتو هسا ماشين علي وين ...!!؟ قالت لي ماشين نعيد علي الناس ....!! (ما أجملك ) ...!! شوف علي الناس دي ذاتا حلوة كيفن ...!! ماقالت لي ناس فلان ولا علان ....قالت علي الناس ...وكل الناس ..شوف الإحساس .....!!! جنس حلا ....
وأردفت قائلة ....وناس أمي قالو بعدينك مودننا الحديقة ...( وهي أقصي أمنيات الوديعة ....) ..!!
قلتا ليها انا البوديكن ....وفِي قرارةً نفسي الْيَوْمَ أن أسعد ( رغد ) ورفيقاتها ....!! وفطوم اختي في نص الجوقة دي طبعا والشنطة الحمرا ....والضفاير والحال
همست (فطوم )في أذني وخاتا يدها جنب أضاني عشان ماف زول يسمع ...وكشكشة الغويشات تصحي النايم
(الليله لبستن كلهن ....)
قالت لي علوبه ..!! علوبه ...!! هي طبعا بتقول لي علوبه ...!!
قلتا ليها في شنو ..!!؟.
قالت لي كان شفتا ( رغد ) قعدت تبكي ....!!!؟؟
قلتا ليها لييي مالا ..!! ؟؟؟
قالت لي ناس ( لوران ) ....!! ( لوران دي بت جيرانا اسمها ( نوران ) ( وعادي نُون النور تبقي لام ) عند فطوم ) .....!!!
قلتا ليها مالا ( لوران ) ..!!؟؟
قالت لي هي وناس ( مهوية) قالو لي ( رغد ) ويييي ويييي فستانك حق العيد الفات ...
هنا فقط أظلمت الدنيا في وجهي ...و تحول طعم العيد الي العلقم ...وسدت العبرة حلقي ....وشعرت بالألم يعتصرني ...والأسي يلف المكان ....!!
كم هي قاسية هذه الدنيا في بعض الأحيان ...
نظرت الي ( رغد ) فوجدت أن عقلها الصغير تجاوز هذه ( السقطة ) وانخرط يحتفل بالعيد ....وبقايا دموع مبعثرة علي خدها النضيض ...!!
أربكتني الصغيرة هذا الصباح وبعثرت مشاعري ...!!
ومرقت العيد دا ذاتو من نفسي ....
اشتريت لي كل واحدة حلاوة وعصير وتعمدت ان ( اكشح ) بعضا منه علي فستان ( رغد ) ...التي بكت من جديد فقد أحست أن العصير المسكوب سيسرق جزءا من فرحتها بالعيد ...!! فأسرعت بدوري الي البيت مهرولا وشلتا الفستان الجايبنو لي ( فطوم )وخاتنو لي عرس ( كمال ) ودعمتنا تالتة العيد....'و أخفيته ....واخدتا ( رغد ) من يدها لي بيتم ...!! هم مابعيدين مننا شديد ساكنين جنب دكان ( يس ) والبيت علي صغره وتواضع أثاثه لكن برضو ريحتو ( عيد ) مقشوش ومرشوش ومرتب ....فالعيد يستهدف النفوس ولا تصنعه الفلوس ....!!
المهم شرحتا لي أمها ماحدث ..وحلفتا عليها تلبس الفستان دا لي ( رغد ) عشان أنا السبب .....!! كمان أمها حلفت ستين يمين دا ما بحصل ...!! وقالت لي يعني شنو ياعلوب إنتا يعني كنتا قاصد ..!! (إندفق الشر ..) ...!! هو البركة فيك الجبتا ليهن الحلاوة والعصير ... !! ورغد بيننا تتابع الحوار وتنتظر المخرجات
قلتا ليها غايتو لو ما معتبراني من ناس البيت بعد العشرة دي كلها ( ورغد ) دي زي ( فطوم ) فعلي الدنيا السلام ...!! وبعد لأي وتعب رضخت ( المستورة ) أمام إصراري ....وعلي مضض ..!!
(إنهن العفيفات الحرائر ..) والعشرة لديهن مقدسة ....!! فرغد يتيمة وسط كوم من الأخوان و الأخوات تربيهم أمها ( مسرة ) بشرف وثبات ....!!
ولبست رغد الفستان الجديد ....!! 
👗
👗
وحنستا فطوم حنيس إنها ما تجيب أي سيرة إنو دا فستانا ...ووعدتها بآخر... وهدية ( سلسل ) فوق البيعة ....!! فوافقت السمحة ......
( حتي ( فطوم ) بتعرف سعر الفائدة ....!!!!!
😳
😳
لكنها عقبت ...!!
قالت لي ولاحتي ( مهوية) ما أكلما ...!!
( رجعنا المربع صفر ) ...😳
😳
مهوية دي صاحبتا وفردتا ...ومشروع إذاعة اف أم
أصغر شاتلة للشمار في الحلة ...!! البت دي بتحكي لي ناس ( فطوم ) ديل قصص تحير ....قاطعاها من راسا دا ....!! وهن يصدقن ..!! بالجد موهوبة ....محتاجه توجيه لي موهبتا دي في المسار الصحيح عادي ممكن تطلع روائية...!!
مره قالت ليهم جانا( أسد ) في البيت أبوي دقاهو ....وطردو من البيت .....!!
تكون قاصدا ( أمونة ) ياربي ....!!
اها ( فطوم ) كان لحقت وكلمت ( مهوية ) دي أحسن نودي الخبر الإذاعة عديييل ... أنا ذاتي لاوزتا ...!!
قلتا ليها خلاص يافطوم ماداير معاك أي كلام ...
برجع ليك فستانك ...ومافي هدية ولا في عرس ذاتو ....!! يلا .....!!!
انزعجت الصغيرة .....
قالت لي خلاص خلاص وحات كتاب الدين ما بكلم ..!!وعندما تحلف ( فطوم ) بكتاب الدين فهو القسم المغلَّظ والحلفان المتين ....!!ولا رجوع عنه ...
( تربيتي وبعرفا ) ....
هنا فقط اطمأنيت علي سرية العملية ...
تأملت ( رغد ) بفستانها الجديد حيث بدت كالوردة اليانعة تكاد أن تطير كما الفراشة فقد حباها الله بوجه ملائكي نضير ...!! وديع التفاصيل ...وضاح المحيا لطيف الملامح ...فيه كل البراءة والصدق والبهاء ....!!
وقطعا فهي الأجمل بين كل قريناتها ...!! وليس الله بِظَلاَّم للعبيد ....بشيل هنا وبديك هناك ....أفلا تبصرون ...!!
...!! والبنات من حولها ( سكتن سااااكت ) إنو ( رغد ) ممكن في أقل من ساعة تلبس فستانين ....!! مش واحد ....!!!
والله بدّي الجنة ....
الان فقط بدأ العيد عندي ...
أركضي ياصغيرتي ولا تبالي أفرحي وأمرحي...... و املاي الدنيا صخبا وضجيج ...
فأنت العيد ....!!
.........
والعيد شنو ....!!!
غير لمة ناس ...وعمق إحساس
تمني ووعد ...
وضحكة ( رغد ) ....
.....
....
مش بالجد !!!!!!!