يوميات علوب ...157 .......عامر يامشاعر ..!!
الليلة مشاعر كانت عاملا الفطور بتاعا في البيت تشيل وتحضر في الحاجات من امبارح المره دي كمان لاقطا ليها كم حاجه كدا من الفضائيات قالت دايرا تعمل ( لانكشير ) قلتا ليها دي عاصمة وين ....قالت بسكويت (سبحان الله ) غايتو حق شوشو دا بكون لانك ( طير )
اها المره دي قالو عازمين ناس القروب .....!! (جابت ليها قروبات كمان )
قلتا ليها ودا قروب شنو ...!!؟
قالت ( جامعتنا وناس معزتنا )...
جديدة كرت المرة دي ... !!
غايتو العملتها رقدت يامارك ...درعتا فينا القروبات دي وبقيت مارق ....!!
فعلا من عصرا بدري المطبخ دا مدور
الغاز الواقفين فيهو تلاته ساعات مشاعر حتمصرو
لينا في نص ساعة ....
ناس تقوي وأمنيات من الضهر كالعادة معسكرات معاها يقشقشن ويرتبن ..يا حليلن البنات الزييييت
😍😍
😍😍
اما ( الأوادم ) وفاء وفلقصة وعصعوص ...ديل بجن قبل الاذان بي خمسة دقايق ..
ياحليلا ( عبو ) حاسا انها كبرت دارعين ليك العباية وداخلا ومارقه تضاير وتنضف الله يكبرك كمان وكمان ...البت دي مرات بحسا بيها اعقل من أختا ( شوشو ) ( المجنكسة ) دي ....!!
طبعا ( مشاعر ) دي مرات كتيره بلقاها واقفه بتغني مع المراية ...ومغمتين العيون ...ومادين البوز ...يوم خاشا في شخصية ( اليسا ) ...ومرات ( نانسي ) ...وشيرين دي يوم عرسوها تحلف تقول هي العروس ....
اها ولما المزاج يكون رايق بتشتغل محلي ...القلعة وانصاف ....!!
ياربي الحاجه دي عادية ...
جاتني قالت لي حصلني ياعلوب ....الكهربا قطعت وما خلطنا المنقة ....!!؟قلتا ليها وشنو يعني..!! المنقة دي ( فرض ) ولاشنو ...!!؟ قالت لي لا لا ما بقدر مابقدر ..!! القصة كدا بتنقص ...والبنات بشيلن حالي ...عشان خاطري ياعلوب جري علي (ملك ) المنقة....!! النبي فيك ....!! 
😳
😳
وكتلت لي حيلا ( المجرمة ) لما حننتني ...!!
دا كلام دا عليكم الله دا
اول حاجه في سبعتاشر محل بتاع منقة وكل واحد قال هو الملك .....( بالخط العريض) ...بلد ذاتا ماعرفنا ( الملك ) فيها منو ...
المهم في وقفتي دي اسمع ليك الكواريك ...!! قالو الكهربا جات ..!!
💡💡
💡💡
غايتو لو اي بلد تاني سمعو ساكت بالغلط إننا بنكورك لما الكهربا تجي .....!! حتكون فضيحتنا دولية ...!! و وطوالي حيبدو يحللو فينا ....يشوفو الحالة دي من شنو
بس الحمد لله اتحلينا من المنقة وملكا ...
اها زي الساعة خمسة كدا بدت الوفود تتقاطر صوب منزلنا العامر ..العبايات تتطاقش....ناس جامعتنا ومعزتنا جن بس ما عرفتهن ...بعدشوية ظهرن بنات حلتنا وناس حيطتنا .. وفاء واختا ( السغيرة ) ( شجن ) مخمخمات نفسن قايم .....انا ماعارف الشافعة دي السماها ( شجن ) منو ...!!؟ صوتا ذي الجرس تلعلع.....!!
( جالداهو ) طبعا..!! تقرض في العيش ...!!
( مستحيل تطلع ( دكتوره ) البت أم قروض دي ) .....
شايلين ليهم جردل أحمر كدا ...!! انا واااقف في نص الحوش أزقي في الشجر ..!! قلتا ليها إنتي ياوفاء الجردل دا فيهو شنو ...! الساعة العوجت ليك الخشم قالت لي دا بلح الشاااام ياعلوب ....!!
تااااني الشام ......!! 😳 يحلنا الله
😳 يحلنا الله
شاورما الشام ....!!شباشب الشام ...!! كراسي الشام ...!! ملايات الشام ...فضل لينا ست ( الشام ) .....اقصد
( الشاي ) ....!! ربنا يصلح حالم وحالنا كمان
وبعد دا كلو بلح الشام طلع ( لقيمات ) .....!!
...عصعوص جات داخلا ...خاما ليها ورق ملفلف
كدا ماعرفتها ذاتا شايله شنو ...شكلو ...( أقاشي ) ....!! هسا تقول ليك ..( كوستليتة ) ....بالبقدونس ..!!
قالت ليها ماعرفتك ياشوشو رمضان قسمك النص ...
انا متاكد انو وزنها دا لو ما زاد مانقص بس طبعا ( عصعوص ) عشان تطمن روحا أي زول بتلاقي بتقول ليهو نوع الكلام دا
اممممك وصلت المعلمة ( فلقوص ) تتجرجر ...!! العباية أم ترتر ...والعصير في الجك ...لاقتني في الباب ...سلمت علي قالت لي غايتو ياعلوب لو ما شربتا من عصير ( الخووخ ) العملتو دا ...نص عمركً ضايع ...!!
انا متاكد مليون في المية ...قنقليز مع عرديب خلطتن قالت ( خوخ ) ...
هو في غاز يا ( فلقصة ) تقولي لي خوخ.... الخوخة ....!! ....!! بتعرفي ( الخوخة ) ..!!؟؟
يازووول مشاعر حاسا ليك بي العظمة مع الوفود دي
عدة البيت كلها مرقوها ...ولحظات صمت ودعاء قبل الاذان ....وبعد أن ذهب الظمأ وابتلت العروق ...مرق
الشمار وظهرن العروق ...!!
اول حاجة ذاتك ما بتعرف منو البتكلم ومنو البسمع
دورن ليك نقة كدا لما تفهم حاجه كل الكلام المخزن في الصيام طلع..!! والقهوة دورت والشاي والتحلية ...!!! رحلة بس
نحن طبعا اخلينا المنطقة من عصرا بدري للمناورة العسكرية دي ....!!
( فطوم ) جاتني جارية جري قالت لي الحق ياعلوب البنات برقصن مع التلفزيون ...شكلهن دورن مع أغاني وأغاني....!!!
بعد شوية القي ليك الصورة نازلة في ( الفيس )
ومشاعر بالخط العريض صاحباتي حبيباتي واللمة تحلي في رمضان ...!! ناس فلقصة انسحبن واحدة ورا التانيةٌ قالن لاحقات التراويح ....!! (لاحقات المسلسل...!! )
فضلن ناس تقوي ومنمن طقطقن ليك العدة دي زي الماحصلت حاجه مع شوشو وقَعَدن في بطن الواطة دي ضربن النعيمية الظابطاها الحاجه دي بي مزاج ....!! جيت داخل لقيت ( تقوي ) دي تلحس في أصابعينا لما شافتني ...!! لحستن تاني ..!! اتكيفتا منها كيف ...ثقة عالية ياخ ...!!
قالت لي النبي فيك ياعلوب كان ماجيت (دستا )معانا الملاح العجيب دا ...طوالي قعدتا معاهن راس هرسنا النعيمية دي هرس يادوب حسّيت اني فطرتا ....!! ( أمنيات ) تاكل وتضحك قال بنات القروب بلعن الطعمية زي الاسبرين ...قرضتن ( أم تفة ) ....
وقالت ( فلقصة ) طلعت بيهن الجو قالت ليهن انها بتعمل في ماستر في العلاقات الدولية ...
(تقوي لما شرّقت من الضحك ) ...!! 
😂😂وبعد ما بلعت اللقمة قالت ليها والله الا ماجستير في ( الشلب والعلاقات العاطفية ) في إشارة واضحة الي زواجها السابق من راجل مرا ....
😂😂وبعد ما بلعت اللقمة قالت ليها والله الا ماجستير في ( الشلب والعلاقات العاطفية ) في إشارة واضحة الي زواجها السابق من راجل مرا ....
ومشاعر من جوه المطبخ فكتا ليك ضحكة ...!!😂😂
😂😂
دا الحالة رمضان ...!! البنات ديل في العيد حيقولو شنو ...!!
بعد داك عرفتا انو حصل إشتباك خفيف بين
قروب جامعتنا وبنات حلتنا ....مختلفين في
( هناي ) داك انو فنان ولا حركات ساكت وقمصان
اللهم إني صايم ...!! ويجعلو عامر يامشاعر ....