الحلقة المئة وتسعة وخمسون من يوميات علوب 159 مع الطيب عبدالماجد

0
يوميات علوب 159 ....( كاس العالم ) 


( صباح ) عرس أختو كان في الأيام الفاتت دي ...!! 
( صباح ) دا ولد بالمناسبة مابت ....!! اسمو كدا ...ما عارف أهلو فتشو مالقو ليهم اسم ...!! ولا هو ذاتو ولدوهو الصباح بدررري ..... ولا القصة شنو ...!!؟ 
والله ماعارف ...!! 
بس هو زول صاحبنا ومن زمان قرينا الجامعة سوا ..!! المهم إسمو دا سبب ليهو بعض المشاكل ايّام الدراسة كانو معانا بتين اسمن ( صباح ) وهو التالت لكن بالجد تجاوزنا الأزمة .... !! 
واضح إنو شخصية الزول هي البتصنع الإسم ...!! 
( وعمرو الإسم ماعمل ليهو زول .....!! ) 
المهم هو ذاتو صباح خير كدا بشبه إسمو دا ...!! 
زول جميل خلاص ...!! خلقة واخلاق...!! 
ولطيف شديد ....!! عشان كدا اتلملمنا كلنا قلنا نقيف معاهو .... خاصة إنو هو ماعندو أخوان ... عندو أخت واااحدة أصغر منو ياها العروس دي اسمها ( نور....!! ) 
وانا اقوووول
( نور وصباح ) .... !! ياربي ...!!!؟؟ 
احتمال ..!! 😇
يازول بي طريقتم يسمو الدايرنو .....غايتو بس أي حاجة دايرين نعرفا ...!! دا ذاتو الجايبنا ورا ....
المهم يازول ناس (صباح )ديل ساكنين في ( جبره ) مربع شنو كدا ماعارف قالو قريبين من بيت ناس ( ندي القلعة ) ..!! ( سنة ياااا المعالم ) ......!!
طوااالي نحنا من بعد الفطور كدا توجهنا الي ( جبره ).....!! لقينا ليك بيتم دا مليان فل هم النوع العندهم ناس في أي حتة ديلاك ...!! أهل في كوستي وجزء في مدني والدمازين والأبيض وبورسودان بس الدوري الممتاز....!!! المهم كلهم اتلملمو جو العرس ....!! 
أبو صباح دا كان شغال في السكة حديد لافي البلد دي كلها وبعرفا ....فشنو ....البيت مستف لي عينو 
المشكلة هسا انو بعد المقدمة الطويلة العريضة دي ..بتصدقو إنو دي ما القصة ...😳😳
القصة ( البت ) اللاقيناها هناك لافا في بيت ناس ( صباح ) ديل .....!! 
آمنت بالله ...!! 
مش مرات بتكون زهجان كدا ..وقرفان... وقافلة معاك والحياة لاعبة معاك ضاغط مع هداياها اليومية دي ...!! 
الماهية المابتجيب تسالي ...!!! والبنزين المتعالي 🚘
والغاز البهدل حالي ...🏮والكتاحة الفي العلالي ⛅️المواصلات وبص الوالي .....!🚌 ومغسة الصراف الآلي والعيش البلدي وداك كمان الآلي .... والدولار الديمة غالي .....!! 💰 ورمضان الشكيتلو حالي ....والعيد الجانا طوالي ......وقولي كدا يا المدارس تعالي ....والصف ماقدر أحوالي ...!! 
هياااا اخوانا ....والله الواحد بقي يقطع دوبيت عديل كدا شدة ما كتمت ....السنة الجاية طوالي برامج البن والقهوة اللافات ديل ....شعر من أمو ....احسن مننا في شنو ...!!
اها بمناسبة الصف دي ....أنا غايتو ما بضحكني الا صف الغاز ....!! ( وشر البلية مايضحك ) 
تلقي الأنابيب واقفة صف 🏮🏮🏮🏮 ....!!
والناس جنبها واقفين صف ..🚶🏻‍♂️🚶🏻‍♂️🚶🏻‍♂️🚶🏻‍♂️🚶🏻‍♂️....!! 
والسودان كلو واقف ( قنا ) .....!! 
والحشاش يملأ ( انبوبتو ) .....!! 
غايتو جنس إمتحانات في البلد دي كان نجحتا فيها تدخلك الجنة عااادي ....!! 
( هي الجنة شنو غير صبر ويقين ) 
اها وفي عز الصف والصيف دا ..................
تظهر ليك واحده زي بت ( جبره ) دي ....تشهيك العافية ذاتا ...وتنسيك الأزمة .....................ومكانا وين ....😜 
غايتو انا بس آمنت ليك إنو السودان دا عبارة عن حقل (ألغام ) 💣 تمشي أي حلة لازم تكون في ( نجفة ) مدسوسة ولغم( نايم ) بقوم في أي لحظة .....من حلفا ولا استثني ( نمولي ) 
ذي ( النغم ) 🎵القام فينا دا ...!! 
بت ذاتا ماعرفناها جاية من ياتو كوكب ...!! 
( أنا شاكي في ( الزهرة ) ...!! 
داخلة ليك ومارقة في بيت ناس ( صباح ) ديل .... أول حاجه طبعا لامكياج ولا كحل ولا أي حاجه ...من المصنع للمستهلك ...!! 
( وش )زي ما الله خلقو .....!!! وتجلي الخلقو .....
البت خدوري ....!! ودقاااااقا .....!! ( وشها ) مدور 
علي بيضاوي كدا ....مع ( وجنة ) في الحنك ....أها النوع دا من ( الوجنات ) ببن كل خمسة ألف في حالة واحده بس ...!!! ومره مره اتنين 
عيونا ما عسلية ..!! عيونا العسل ذاااتو ..👀
لنتأكد و بما لا يدع مجال للشك إنو الخدار ( ودار ) وفِي بعض الأحيان ( دمار ) ...!! 
كما في حالة ( جبره ) أعلاه .......
معاي التاج وسيف وأنور ديل بعرفو ( صباح ) شديد 
لأنهم كلهم قرو معانا في الجامعة ....أها التاج دا مولانا حبة كدا إسمو اصلا ..( تاج الأصفياء ) بقولو ليهو ( التاج ) .....!!! إنتو ديل بسموهم كدا كيف ...!!؟ الظاهر أهلهم بعرفوهم من الولادة ....!! يعني فجاة كدا يسمو ليك ( تاج الأصفياء ) ( إسم إمام جامع ...) بدون أي سبب ...وفعلا يطلع كدا ....!! انا ذاتي ماعارف القصة دي بتجي كيف ......!! 
شوف نحنا .....!!!! ( علوب ) 😂😂 😂
المهم الداير أقولو إنو ( التاج ) دا ذاتو المولانا دا ....لما البت دي جات ماشا بي جنبنا ...!! براهو كدا قال ماشاءالله تبارك الله ....!! ومرتين .....!!! طبعا الباقين بقولو ( حي أنا ) بلغة أسفل المدينة .......!!! 
فلكم أن تتخيلو جبروت بت ( جبره ) ...التي ضربت ( تاج الأصفياء ) في منطقة الجزاء .......
نحنا طبعا خلينا ( صباح ) ....!! وعرس أختو ....! وغدا أهلو ...... واتجهنا الي البت ( الزيت) ....!! 
( زيت صباح ) .....وخلّينا الورا والقدام بقينا بس مركزين مع الغزالة الشاردة دي .....!! 
أول سؤال لي ( صباح ) صاحبنا قبل السلام ....!! 
قلنا ليهو ...إنتا البت الواقفة قدام بابكم دي منو ...!!؟ 
ومن وين ...!!؟. ....!!ومالا ..!!؟ ..........!! والحاصل شنو..!! ؟؟؟؟؟؟؟ 😇
قال دي بت جيرانا ياخ ...!!
قالا بكل بساطة وفترااانة كدا ...( دي بتكون السماحة الشايفا يومي دي مخدراهو ) ....!! 
قلنا ليهو وعادي كدا بتشوفوها طواااالي ...!!؟؟؟
قال ياخوانا قولو بِسْم الله ......
أقول ليكم بت جيرانا تقول لي بتشوفا عادي ...!! 
وقال كدا ناداها ....يا مهجه .....!! طلع اسمها ( مهجة) ...!! 
ابو الزفت ...انا اخو السمحة ...!! 
ما قلتا ليكم الأهل بحسو بالمولود 
شوف زي ( ست البنات ) دي سموها ( ست البنات ) جات الأولي في الشهادة السودانية....!! تقولي لي شنو ...!!؟ طلعت ست أي حاجة ...مبروك 
اها بس مهجة جات دافرة ...!! ( اعصار كاترينا وقام فينا ) فضل لينا نجري بس ...!! وقفت قدامنا زي ( الأسد ) ....!! نحنا ولا كلمة ....نتأمل ونغني ونناجي الطير من غصن لغصن ...قالت السلام عليكم كلنا ردينا ( روضة بس ) ...!! 👬👬👬
قال ليها عليك الله يا( مهجة ) خشي لي ( الحاجة ) جوا قولي ليها ( صباح ) قال ليك مفاتيح الدولاب الكبير وين ...!!؟؟
قالت ليهو حاااااضر .....!! ومشت ...!! 
( تحضري ما تغيبي انتي يالسمحة ...!! حلات حاضر في خشمك ...!! يمين قربنا نمشي معاها ....!!
كتحتنا كتيح ( الخدرا ) وغادرت ( اللوفتهانزا ) ...!! ✈️
مش مرات في النشرة بقول ليك تراجعت حدة الإعصار للدرجة التالتة لكنه لازال يشكل خطر ...!! دا بالظبط دا الحصل علينا ....!! 
لابسه ليها توب مكرفس كدا حق أمها اظنو ....( للكرفسة عنوان ) وشبشب ذي بتاع ( افراح ) الفي الدعايه داك ....!! 
بس كدا مازادتم ...!! وبعد دا قيامة قايمة ....!!
هل من منافس .....!!؟؟ 
والله صحي القالب غالب ....!! بت ذي الشجرة ماشاءالله خدرا ...ورويانة ....وعالية ...والله جد ...
المهم غايتو وقفنا مع ( صباح ) ....وغدينا الناس 
وانسترنا ....ورجعنا البيت .....قالو الحفلة بالليل في صالة ( مون ) جنب المعرض ....!! 
وعشان نكون واضحين ...وما نلف وندور ...ومن الآخر كدا ...!! الحفلة بالنسبة لينا ( مهجهً ) بس .....!! 
حددنا خياراتنا من بدري وعقدنا راينا ...!! 
صباح واختو ماقصرنا معاهم وغدينا الناس وحضرنا العقد..... (والعرس عقد ) ...!! دايرين بعد دا نشوف ( البهجة ) وعيون ( مهجة ) ونشوفا ذاتا لما تلبس بتبقي كيف ....!! ....................ياربي حتطير .....!!!؟؟ 
فعلا جينا ليك من بدرييييييي ... ( التاج ) ذاتو جا معانا 
ركع العشا دا سريع سريع ....وبقي مارق...
( إنها سطوة الجمال ....!! ) 
ووصلنا صالة ( مون ) ونبحث عن ( المووون ) 
لقينا ( صباح ) واقف يستقبل في الناس ،..!؟ خجلنا نسألو تاني .....!! اها وكت إتأخرت ( مزة ) أقصد ( مهجة ) ...أنا غايتو ما قدرتا أصبر ..... طوااالي قلتا ليهو إنتا ( مهجة ) بت جيرانكم وينا ما شايفا .....!!؟؟ 
قال لينا لا ماحتجي لأنو عرس بت خالتا الليلة في نفس الْيَوْمَ .. ....!! 😳😳😳😳 
والله يا اخوانا ذي الدقتنا مطره ....مش مرات كدا فجاة زول بلبعك في نص ضهرك ( لبببب) من غير ماتكون متوقع ...!! بس دا ياهو الوقع علينا بعد التصريح الكعب دا ....!!! 
( صباح دا جادي ...) 
وهو بت خالتا الفقر دي ما لقت تعرس الا الليلة ....!! يعرس ركبينا .....
غايتو جنس حالة وبهدلة ...!! 
لكن الجديد شنو ..!!؟؟ ولا أي حاجه ...!! ياهو حظنا وياهو حالنا المايل ...!!
إحباط شديد .....
( تاج الأصفياء ) ذاتو زهج ...!! خلي نحنا ...وقعد يستغفر ...!! 
لكن لا استسلام ..!! ولارجوع ...!! قلنا لي ( صباح ) بي حركة زول مستغني كدا ومامهتم أيواااااا خير إن شاءالله .... أها وعرسم دا ماقريب من هنا يعني ممكن تجي تبارك وتمشي ...!! ؟؟ 
صباح بي براءة كده قال لينا ...ما أفتكر ...!! عرسم دا اظنو في كزام ....!!! 
( لاشوفتن تبل الشوق لا ردا يطمن ...!! ) ......
( الله يطمنك .....!! ) 
طوالي انا قلتا ليهو ياخ ما تقول لينا أفتكر واعتقد وعلي ما أظن ..!! العرس وين بالظبط ...!!؟ 
( مسكين لما اتخلع ) ..😳
لكن هو زول طيبان طبعا ...برضو ما انتبه... لفت ليهو واحد من أولاد حلتم ديل جا عابر ...!! قال ليهو 
إنتا عرس أهل ناس مهجة ديل في ياتو صالة ...!! داك كمان ولا أتلفت قال ليهو في كزام الحديقة الدولية ...!! ( حافظنو اكتر من العريس ) ...😂😂😂
أها دا بكون ماشي هناك أب عوينات دا .....جا يتحاوم هنا وكاسرا بي ( مهجة ) ...!! 
والله التقول أدونا ( أنبوبة غاز ) دايرين نطير من الفرح ......( حددنا مكان الهدف ...!! ) 
إنتو طبعا مستغربين ...!! وأنا جد عاذركم .....!! 
لكن لو كنتو جيتو معانا عقد ناس ( صباح ) ....وشفتو ( مهجة ) بالتوب .....هسا كنتو قدامنا في الصالة ....
المهم كل زول عاين للتاني وكان القرار قد تم اتخاذه .....وحسمنا أمرنا ....ربع الساعة الأخير في صالة كزام ...نعز ( مهجة ) طالما هي جارة ناس ( صباح ) ....!! وتقديرا لدورها في شوفة مفاتيح الدولاب الكبير...!! وإكراما لكل أهالي ( جبرة ) ......!!! 
قضي الأمر .....
حداشر الا ربع كنا في نص كزام .....ومهجة أمامنا كما الأحلام ......!! فستان طويييل لما شايلاهو .....الشعر مدفق ...والوجنة عامله شغل غريييب ....
وبفضل الله اكتشفنا لينا بير بترول تانيه ...
(غمازه في الخد الشمال لما تضحك ...) 
انا اخوك ااااافاطنة .....
هذا بجانب السنون البراقن بشيل ....والخدرة الدققوها زيادة .....!! 
وسماحة ..سماحة .... أصلو ما معقولة ولا ممكن تتخيلوها .....
بس أنا عايز أقول ليكم معلومة صغيرة عشان ماتشيلو حالنا ساكت وتقولو ديل مالم هسا متخمخمين ومتخففين ماشين لحدي الصالة وماعندهم موضوع .....!! 
اها النكلمكم ......ونحدثكم .... ...ونوريكم 
البت الإسمها ( مهجة ) دي الجماعة هناك في ( جبرة ) وكل الأحياء المجاورة دون فرز ......سامنها 
( كاس العالم ) .....
اي والله عدييييل كدا ... ولا داسنها ....
ك ا س ا ل ع ا ل م 🏆🏆⚽️
أفتكر القصة بعد دا وضحت ليكم ...وأمورنا وضحت ....وأي حاجه وضحت ....!!!! 
زول اسمو (كاس العالم ) حيكون كيف يعني ...!! 
بس براكم كدا قدرو وكلكم نظر .....
هو ( كاس العالم ) الجد جد الناس مشت ليهو لحدي ( روسيا ) نحن وقت جانا في كزام ... ما نمشي ...!!؟؟ 
مش حرام ....!!!! 
دا بس للمعلومية ...عشان ماتكوركو ساكت ...وتجوطو 
....!!! 
واكتفينا بهذه الفرجة وعدنا ادراجنا مبتهجين 
ناس ( مهجة ) ديل زي السينما تمشي تشوف وتبقي مارق ...
ما سألنا عنها تاني أي سؤال ...!! زي دي بس تخلي في أمل إنو ربنا يجمعك بيها تاني ....!! أو كلو كلو ...!! 
ويبقي الأمل ....!! 
وهي الحياة دي شنو غير حبة أمل ....

وتلقي الدنيا ( مهجة ) لما أجيك تاااايب 
يكفي رضاك لمممحة يا أغلي الحبااااايب 🎵🎵

الذا حاجه صاحبنا اسمو ( الباقر ) كان مفروض يمشي معانا ...!! بس أبوهو كان عيان شوية اليوم داك ..!!
قال لينا أها كيف كان عرس ناس ( صباح ) والحفلة كانت بي منو ...!!؟؟ 
أنور لم يتردد ....قال ليهو 
بي ( مهجة ) ....!! 
قال غايتو البلد دي إتملت فنانين ...كل يوم فنانة جديدة ..!!؟ بس دي من وين دي ما سمعتها قبل كدا .... !!؟؟ 
قلنا ليهو دي ما بسمعوها...!! دي بشوفوها بس 
( سمع وشوف ) 
...وجبرونا جبر يايمة.... وحال الدنيا دايرا صبر يايمه ....!! .........
ان شاءالله (مهجة ) تلاقي فرنسا في النهائي ... ....!! (الحمامة والديوك ) 
😋😍😍♥️♥️ ...صحي يالملكة ...!! 
التحية لي ( جبره ) ياخ ......

التعليقات

احصاءات المدونة