الحلقة المئة وثلاثة وخمسون من يوميات علوب 153 مع الطيب عبدالماجد

يوميات علوب ...153 ...( الشانا ) الفي خديدو

مشيت مع مصباح صاحبنا دا اشتري ليهو عربية صينية صغيرووونة كدا اسمها ( شانا ) لكن ماشاءالله عليها مكنة ولساتك وأي حاجه ....قال لي أرحكا معاي نوثقا عند المحامي ..... أنا بس فرحان لي فرحة ( مصباح ) بالعربية دي ...!! زي الشفع الجابو ليهم خروف العيد يشيل ويهبش فيها ويمسح ....

ياربي تديهو خيرا وتكفيهو شرها ......!!!

المهم يازول اتقشطنا مشينا ....قلتا ليهو المحامي دا وين ..!!؟ قال في الخرطوم شارع الجمهورية ...!! 

فعلا وصلنا هناك ...!! قلتا لبهو هسا ماكان أي محامي جنبنا بنجز القصة دي ...!! متلتلنا جايبنا لحدي هنا مالك ...!!؟؟

قال لي ياخ ( المحامية ) دي جاينها توصية بتظبط لينا السعر ....

فعلا اللافتة معلقه فوووق ..( تماضر الخزين المحامي وموثق لعقود ....) ...!! اسم ذاتو يطمن .....وقلنا كدا دخلنا علي الاستاذة وليتنا لم ندخل ...وقد دخلنا في أمرا ضيق ....

اللييييييييييلة .......

دي شنو دي ....!! محامية ولا حورية ...يااخوانا بالجد لما أخدتا لي وقفة .....!! تماضر بالغت ....عيون زي دي قريب دا ما لاقتني ....خيال ....

غايتو الاستاذة جنس قيافة وفايتا الناس مسافة وقد تجاوزت السرعة القانونية ...

اشرت لينا نقعد في كنبة بالجنبة كدا في المكتب ....لأنو واقف معاها واحد قدام طربيزتا بودع فيها ....

مقشط بالبدلة والكرفتة ويتكبكب في الوداع لما عرقان ...!! قال ليهو كم كلمة كدا مع بعض ما قدرتا أفرزم ....هي ذاتا ما بتكون عرفتم ....!! 

(عاذرك والله انضربتا بالنووي القدامك دا ....) 

لكن تماضر بي أمانة قصة ....الحلا الوااااحدة دي ....!

وبالقانون ..!! 

لابسين ليك التوب الأبيض دا كيف ...!!مفروض من بكره يطلع موضة ....أبياااااض ...!! والشعر دا كارنو كلو لي ورا وفِي خصلتين شاردات ...!! ( ديل بكونن مفكوكات بي ضمانة) 

والوشzee ألوان ....😜

والعيون ياهن الكلمتكم بيهن ديل .....يجهرن 

انا غايتو بعرف القضاء الواقف والقضاء الجالس إلا النايم دا فاجئتينا بيهو صراحة يا استاذة ...!! ولاطرفك من طبعو نعسان .....!!! 

والشامة مسنترة في نص الخد زي ( البنلتي) .....!!! 

ولا غلطة ...والله بدّي الجنة ....!! 

القصة ماهنا الكلام في الروح العند البت دي ...!! 

فعلا الجمال روح ...وشها دا كلو مبتسم ومنددددي الساعة القالت لينا اتفضلو .....!! رجليني الاتنين بقو شمال .....!! وصلت قبل سيد ( الشانا ) .....!! سلمتا عليها....!! يدها بالظبط زي حلاوة قطن ماعندي أي وصف تاني ...!!! 👋

قالت لي إنتا (مصباح ) ...!!؟ قربتا اقول أيوا ....

قلتا ليها... لا ...دا ( مصباح ) أنا ( البياح ) أقصد علوووب ....!! 

سلمت علينا قالت اتفضلو ....!! 

( اتفضلنا . ...!! ) 

داست ليها ( زر ) كدا جانا ولد داخل 

( حظك انتا غايتو يومك كلو تشوف في تماضر ) ..!! مفروض تشتغل بلاش وتدفع ضريبة بث فضائي ...!! 

قالت تشربو شنو ..حار ولا بارد ....قلتا ليها بي قلبي هو في أحرا منك ...!! بارد بارد ...قلنا ليها ...!! ( كان نطفي نارنا دي ...) 

قالت لي ( مصباح ) إتصل بي عمك ( السر ) بخصوص عربتك... وقالت ليهو نحنا ( عمو السر ) دا ما بنقدر نرفض ليهو طلب.... !! 

هيااااا ياجماعة ( بتقول عمو ) معناها دي محامية ديجيتال موديل جديد ....!! ( حليل المحكمة البتخوف ) ذي دي عاااادي ممكن تنزل هي ذاتا في شكل تطبيق ...🍎( تماضر legal services )

أها ( مصباح ) يعجبك يلولو في الكلام هو طبعا خجول حبة كدا ...شبكا ليك صحي والله ...تقول ليها كلمة 

....!! يرد ليك عليها ...!! أيوه صحي ...بس مدور ليك فيها صحي ...اي صحي ...ذكرني ....(مكانا وين ) 😜 

هو شنو ( الصحي ) يامصباح ...جاي توثق ( الشانا ) ولا ( صحي ) دي ...

بالمناسبة هو صحي ( مكانا وين ) ....!؟؟؟؟؟؟ 😜

طوالي أنا اتدخلتا قلتا نطري القعدة ...والبارد جاي 

والدنيا حلوة ...!! المافي شنو ....

قلتا ليها أنا قلتا ليهو هسا ( شانا ) دي بتحتاج مشوار قدر دا ......!! ما كان نوثقا ( سيلفي ) . ..!!

يضحك ساااي مصباح التقول ماعربتو ،...لذيذ ياخ المصباح ...وطيييب عشان كدا الله بدّي 

قلتا ليها لكن يضع سرو في أضعف خلقو اها ( شانا ) 🚗جابتنا لي ( البورش ) ....!! 

أخدت ليها ابتسامة كدا اقرب للضحكة ....تمت بيها الناقصة ( عارفة روحا المجرمة ...) 

مَش مرات الناس بتتضاير كدا لو عندهم سن مخلوفة ...تلقي الواحد كان ضحك بخت يدو في خشمو ...!! بس كنتا دايركم تجو تشوفو ( خلفة ) سن تماضر دي لما ضحكت ...والله اصفق واعلق ....والله اصفق واعلق .....دي ما ( خلفة ) دي ( ضفة ) 

مفروض الناس طوالي تمشي ( تخلف ) سنونا تبعا لهذه الظاهرة .....!! اللهم أخلفها عليها صحة وعافية وبركة ....كما أسعدتنا 

لا لا ما عادية تماضر ......!! و بعد دا كلو ظرافة السنين ( صحي الجمال لايتجزء .....) ..!! 

لاقيت لي واحده قبل يومين في الحافلة الوش دا صارنو 

داير يتقطع ....

قلتا ليها ممكن تشيلي شنطتك من الكرسي دا داير اقعد ....

الساعة الشحطت لي حواجبينا ..وبكل مساخة وعويج خشم قالت لي 

( حاجظاهو لي صحبتي في المحطة الجاية .....) 

لا ياخ ..!!😳

....!!! ( يحجزوك في الباطنية حريم ) شاحد الكريم يالمابتشبهي الحريم ....!! 

تسمع المحطة الجاية تقول ( برشلونة) .....جنس تناحة وسناحة ..تعالي شوفي ( المحطة ) النووية دي عشان تامني ....عليك الله خلينا ياخ من ضياع الزمن فنحن في حضرة القانون .....

غايتو أنا محامي زي دا قريب دا ما لاقاني ....انا بس شايل هم القاضي البتقيف قدامو .....سيكون بين العدل والقانون من جهة ...!! و ( تماضر ) التلفزيون من الجهة الآخري ................إلا ( يعوم ) ...!! ....

جابو لينا عصير التبلدي ... ( أول يوم اشوفو لابس كدا ) أتاري المكان والجو عندو علاقة كبيرة بطعم الأشياء ...!! لأنو ( التبلدي ) دا ذاااتو أنا بشربو في حتات لما بضرسني ....اها هنا فعلا الطعم مختلف ....ومابنختلف ومن الليلة مشروبك المفضل شنو يا علوووووب .....؟؟؟ التبللللللدي .......... ولا بتلفت ...

الاستاذة شالت ورق العربية دنقرت فيهو وأدتو نظرة ...فأصبحت أمامي وكأنها مغمضة العينين فازدادت حلاوة علي طلاوتها حيث أسدل الستار علي محيط عينيها وسيفها البتار ....!! 

وفِي الحالتين انا الضايع و أنا المحتار ....!! 

وتماضر نااااار .....!! ياحبيبي نار ....

اخدت الورق ونادت الود مشي صور بطاقة ( مصباح ) وشالو بطاقتي صوروها كشاهد ...! وكت رجعتا لي قلتا ليها خليها معاك إمكن تحتاجي لي تاني ....المهم أي وكت أنا جاهز ...! زواج ...!! طلاق ..!! توثيق.... توكيل كبدة مشاوي ...أي حاجة ورددت في سري ...

(أشهد ان لا امرأة اتقنت اللعبة الا انت ....!!! ) 

تشيل وتضحك ( والخلفة ) تظهر ...!! 

(دمرت دفاعاتنا البنية ....!! ) 

انتو السودان دا ما يتعاقد. مع ناس تماضر ديل طاقة نووية بدل طاقنها لي روسيا

قدمتنا لحدي الباب الظريفة الحليوه وبكل لطف قالت لي ( مصباح ) إعتبر العقد خالص ...مر علي في أي وكت شيلو ......وربنا يبارك ليك فيها ....

قلتا ليها ماتشيلي هم كل يوم ممكن نمر ...و بركة الشفناك طيبة .....وبلدنا نعلي ( شانا ) ياناس ..سودانا نادانا .....

مصباح داير يتشقا من الفرحة ياربي تسعدو ....فعلا السعادة دي ماعندها دخل أبدا بقيمة الحاجة المادية ....في ناس بتفرحم لبسة جديدة ...!! في الوقت الذي لايضيف فيه بناء طابق اخر في منزل من أربعة طوابق اي مظهر من مظاهر السعادة ...فالثلاثة طوابق التي قبله اصابت صاحبة بالتخمة والاعتياد ....!! 

( فمالجديد في طابق جديد ....) 

بينما يسعد اخرون بعشوة كاااربة وعشرة ونسة ....وبعضهم من غير أي سبب واضح .....!! سعادة كدا كابا من فوق ....!! 

ولسوف يعطيك ربك فترضي ....( ديل ياهم الحظهم ) أشياء صغيرة تُخلْق سعادة كبيرة وتصنع الفرق ....هنا تتجلي المعادلة الربانية في العطاء واشكالة ..... والزيادة لمن يحمد ويشكر ....!! 

(لأزيدنكم ....) كلام واضح

طلعنا منها كانو الواحد سافر وجا .....اهو ديل نوع الناس البجددو حياتك ....

مرات السودان دا لم يكتم زي ناس ( تماضر ) ديل بجيبو الطراوةً سماحة وسياحة والاهما من دا كلو اللطافة والظرافة 

مش ذي اللتخة ديك ...

( حاجظاهو لي صحبتي منتظراني في المحطة الجاية ) تعالي اخدي ليك نقلة ....!! تنقلك ( أنثي الأنوفليس ) 

أتلفتا وراي عاينتا لي اليافطة قربتا أغيرا من 

تماضر المحامي وموثق العقود لي تماضر ست الأسامي وحافظ العهود ....!! 

وانا بهديك سلامي وبلغو احترامي وأوعاك الصدود 

.......مححححكمة ...