يوميات علوب ..152...عندما يأتي ( الخليل )
أوووو أبو خليل ياخ ..... ...خليل الجميل ... ...( عن حبيبتي بقولكم. ...) ....بتتذكرو يوم كلمني عنها وقال هو مأزوم لأنها أحيانا سطحية وبتتجاوز نبض الجماهير ....
أنا بس نفسي أعرف ناس خليل ديل بقيسو النبض دا كيف .....!! دكاترا بس ...!!
المهم يازول لاقيتو ليك جنب حديقة (إشراقة ) سلامات وتحايا وأشواق لي منو زمن ...قلتا ليهو أها نتكل وين ....( أوزون ) قريب من هنا ...كيف معاك ...!!؟؟
قال لي حتي إنتا ياعلوب ...!!
...قلتا ليهو في شنو ...!!!؟؟
قال لي عايزنا نشرب اتنين ( كابتشينو ) بي تمن خمسة وجبات ...!! وفِي ناس مالاقية حق وجبة ....!!
( ياهو خليل ما بتغير ....!!)
قلتا لي خلاص تعال نقعد في الواطا دي .....!!!
قال لي ما للدرجة دي ...!! بس شوية محل معقول ....وانتا بتعرف طبعا ماعشان الدفع والقروش بس مراعاة لشعور الناس ....
قلتا ليهو دا ( أوزوووون ) ياخليل ( أوزون ) ما ( رمضان .....) شنو نراعي دي ....!!
بعدين إنتا قايلنا بنجيهو كل يوم ...!! ماياها المناسبات ( الثقافية ) دي ....!! برضك حارمنا
المهم يازول مشينا قعدنا لينا في محل تعبااان كدا كلو صفق شجر ...!! قلتا ليهو يلا نادي الناس تصور .....!!! يضحك كمان بدون خجلة ...!!
قال لي مصيرك تفهمني ياعلوب ...!! قلتا ليهو أنا فاهمك أكتر من روحك ...!!! بس المصبرني عليك إنك صاحبي وأنك صادق في حاجاتك ....!! تاني ماعندي ليك شي ....قال لي كفاني اكتر من كد ذاتو ما داير ....
قلتا ليهو كدي خلينا هسا من الكلامات دي ...!! ورينا اخبارك شنو ...!! والحاصل عليك ...
وكيف ( سحر ) ( النبوضة ) لسة بتنبض عكس حركة الجماهير ....!؟؟؟
أخد ليهو ضحكة كدا ....!! معاها سرحة قال لي
( عرسا مغترب ساقا أبوظبي ) ...!!
(قالها ولم يرمش له طرف ...) ...!! 
😳
😳
طبعا ناس ( أبو الخل ) ديل بقت عندهن مناعة ضد الأزمات ...!! أخدو كل أنواع التطعيم .....!!!
انا الما خصاني دا اتخلعتا .... قلتا لبهو بالغت لكن ...
...!!!! قال لي ولا بالغت ولا حاجه...!! بالغت الظروف ...
( أصلا هي عندها استعداد ...!! وجاتا فرصة ....)
قلتا ليهو هي ماكانت بتحبك ....!!؟
قال لي البحب بضحي ...!!
هي بالظبط ياعلوب كانت بتشوفني زول مختلف ...!!
و الإختلاف طبعا شي إيجابي في العلاقات بس هو زيو زي الغيرة والشك والأمور دي إذا زادت نسبتها أكتر من اللازم .... ( إنه الطوفان ) ....
فعلي مايبدو إنو الإختلاف بينا كان أكتر مما يجب بدليل إنو الزول الإتزوجا دا أصلا هي مابتعرفو ولا سمعت بيهو قبل كدا ....عندها صاحبتا متزوجة قريبو ..رشحتا ليهو وقبلت الترشيح..
( عبارة عن وزارة ...!!)
دي كل القصة ودا الحصل بالظبط ...
قلتا ليهو ...لقتك بتتجرجر ....!! ( إبتسم )
قلتا ليهو ندمان ...!!؟؟؟
قال لي .....لا ...!!!
بالعكس دي ممعنة في التقليدية حتي لو كنا إتزوجنا فإحتمالات فشلنا كان ممكن تكون أكبر ....!!!
ربنا يسعدا ...!!
قلتا ليهو بمناسبة كنا فشلنا دي يا ( ابو الخل ) ...
ياخ في حاجة أنا مستغرب ليها شديد ومحيراني
إننا كيف الناس بتكون بيناتم علاقة ممتدة ودخلة ومرقة ورسايل ..وسهر ...وتلفونات... وريد وغرام ...!! وفجأة تتقطع العلاقة دي لأي سبب ..!! ودا كلو يروح ويرجعو أصلا زي الماكانو بعرفو بعض ....
( إعدادات المصنع ) ...!!
الحاجة دي بتحصل كيف ...!!؟؟؟؟
إتصلح المعلم ....واتنحنح ...!! قال لي سؤالك محوري ياعلوب...!! ( شوف محوري دي ذاتا كيف ) أبو ( المحاور ) ذاتا ....!!
قال لي شوف ياعلوب ....المسألة دي بتختلف حسب الشخص الكان ليهو النصيب الأكبر في انقطاع العلاقة وهنا بيظهر فرق جوهري بين الرجل والمرأة
قلتا ليهو دقيقة...!! دقيقة...!! دقيقة ...!! قبل ما تواصل..!! شنو هو ذاتو المعيار البحدد ليك من هو المتسبب في انهيار العلاقة ...!! ماكل طرف عندو وجهة نظر مختلفة .....!!
قال لي بالحيل ....!! بس مابتفرق لأنو أي واحد فيهم قد يتنصل من المسؤولية ويقنع نفسو بي كدا...بس المحصلة والحقيقة أن الفراق قد وقع ...ونحن نتحدث عن مابعد المعركة ...!!!
ولاشنو ....!!! ؟!
...( جنهم معارك ) ....!!
قلتا ليهو نرجع لي سؤالنا ..... البحصل شنو مابعد العاصفة ....
خليل قال ...بشكل عام الراجل إختزانو للمواقف واسترجاعو ليها مرة تانية أقل درجة ....!! ودي ماعندها أي علاقة بالجندر ولا التكوين والقصص دي ....!!!كل الحاصل إنو ظرفو الحياتي خلاهو كدا .....!! في المقابل المرأة ما بترتاح حتي تستوعب تفاصيل الصفحة الفاتحاها دي ....!! حتي تمشي للتانية ....طبعها العام كدا .....!! بتهتم بالتفاصيل أكتر ....عشان كدا ياعلوب العلاقة دي اذا قفلا الرجل فالمرأة بتتأثر بشكل أكبر لانها بتحس بالغدر وإنها أعطت ولم تستبق شيئا ....!! خاصة وإنو العرف والمجتمع والناس بغضو النظر عن تكرار العلاقات لدي الرجل ويستخدمو ( الفيتو ) ضد حواء ....لذلك وبهذا الانسحاب بتكون سلبتها فرصة ثمينة ..وفِي كل الأحوال بحصل التناسي والعوده للمربع صفر النحنا بتتكلم عنو دا ....وخت خطين تحت ( التناسي ) دي مهمة جدا ....لأنو الانسان ياعلوب سموهو إنسان عشان ( بنِسَي ) ودي واحده من اكبر النعم الادانا ليها ربنا ...!! وإلا توقفت الحياة في محطات بعينها دون حراك .....!!!
و إمكن دا السبب الجوهري لي سؤالك ....!!
لأنو المبرر الاول القلتو ليك دا يبقي وجهة نظر شخصية وقابل للملاحظات ..!! ولا تعميم،..!!
.....قلتا ليهو بسسس ريحتني بي قصة لاتعميم دي لانو يا ابو خليل إنتا قلتا المراةً بتتأثر أكتر و إنتا بتعرف إنو في رجال ...!!
( بخشونة رجل وقوته ...وبقلب طفل ورقته ) ....
قال لي دا اسمو الرجل الرقيق .. عقل رجل وقلب طفل ...وسعيدة من تظفر به لن يجرحها بالمطلق .....اخد ليهو ضحكة قال أوعي تكون منهم لأنو ديل ازمتهم بتكون كبيرة اذا وقع المحظور ...!! عشان. كدا ياعلوب لازم تعرف فن وتكنيك إدارة الأزمات .....!! قلتا ليهو سويتا فن ...!! شكرًا يا اخوي انا شغال في فن إدارة ( البهجات ) ...!!!
عيبو لي ....!! جارين للازمات ....يتفطرو بيها فطور .....
الله لأجاب باقيكم ....( يشيل ويضحك ) ....!!!
.....قلتا أغير من الشواكيش الطايرة دي ....
قلتا ليهو والدنيا عاملة معاك شنو .....!! ؟؟
قال لي عاملة الواجب وزيادة ......قلتا لي شوف ياخليلوف المحاضرة القبل شوية دي كانت معقولة خاصة وانو فيها ( جكس ) وعلاقات وقصص
ماتقعد تقول لي الواجب والضمير والإنسانية...!!
ولا بقوم أمشي منك ...ماتملانا فقر ياخ .....بالجد ...!!
هو نحنا ناقصين ....!!
قال لي ياعلوب كلامي دا فيهو شنو ...!! سألتني وقلتا ليك ما مقصرة عاملة الواجب ..انتا ماعارف إنو من واجب الدنيا دي انها تدرسك وتوعيك وتمنحك العبر والدروس والاختبارات حتي تستفيد ....!! مش دي الحياة ....!!
( لنبلوكم ) دي أصلو ما قروك ليها .....
( حتي الدين خليل مجضمو...) ...!!!
قلتا لي نحنا الامتحانات دي انتهينا منها في الجامعة تاني ماعندنا معاها سكة ...( وسكا غير دربك تودر) تااااني جايبا خاميها لينا في شنو ...جنكم معاناة .........!!! ضحك الخليل
قال لي شوف ياعلوب مثلا مثلا يعني زي قصتي انا وسحر دي واستدرك بالقول ....طبعا الأمثلة الزِّي دي بتريحك عارفك ....قال لي أنا مش سبق وحكيت ليك عن سحر دي وعن تجاوزاتها ....
قلتا لي بالحيل ....!! حتي انا قلتا ليك ما بالضرورة هي تكون نسخة منك...!! انتا أعمق من اللازم وهي زولة عادية ...!! هل دا عيب ....!!؟؟
قال لي ....شوف ياعلوب أي شخص في الدنيا دي عندو بصمة بتختلف عن الآخرين
( خلاص قام يبصم )
اها واصل ...قال لي بصمتك ممكن تكون صاح في المكان الغلط ....واحتمال تكون غلط في المكان الصاح وفِي الحالتين النتائج كارثية .....!! وما بتفتح أكيد ..!! بس الأسوأ انها تكون غلط في المكان الغلط قال لي هل تصدق دي بعد مرات بتفتح لأنو في تطابق...!! بس للأسف بتفتح علي الشارع وعلي الهاوية دا ببساطة البحصل معانا ....!!
كلامي دا معقد ولا واضح ....!! قلتا ليهو واضح ....
بس ما جبتا سيرةً البصمة الصاح قي المكان الصاح
قال لي دي بقت نادرة ...!!!! قلتا ليهو ليه يعني
قال لي المشكلة مافي البصمة المشكلة في المكان
( غايتو جنس حالة )
قلتا ليهو طيب اها يعني والعمل شنو .....
والحكمة لو ( يبصم ) 
😜
🎶
😜🎶
قال لي انو البصمة الصاح تطابق المكان الصاح وتفتح الأبواب ....!!
(الزول دا اكيد قاصد بصمة الموبايل ...)
قلتا ليهو يعني إنتا هسا داير تقول لي إنو انتا وسحر بصمة صاح في مكان غلط .....قال لي بتصدق ياعلوب احتمال بصمة غلط في مكان صاح ....!!
انا مش قلتا ليكم بتعجبني مصداقيتو ....زول دوغري ياخ الخليل ....لكن متعب ...( عصار )
وكت حسا بي كدا حاول يغير الموضوع ....قال لي
ناس الحلة كيف طيبين ...!! قلتا ليهو تمام ....قال لي لاقاني ( ود الحاجه ) صاحبكم داك الأسبوع الفات في سوق ( ام درمان ) بتصدق ياعلوب سكاني لما وقفني عشان بس يسلم علي ..أكبرتا الحته دي فيهو شديد ....قال لي نحنا لاقيناك مع علوب لو تتذكر ...!! ( شوف الزول دا ( وفِي ) كيف ....)
لا و عزمني ( عصير قصب ) شربتو معاهو بي مزاج
قلتا أتونس معاهو شوية ..!!
قلتا ليهو هسا إنتا ياود الحاجة هدفك في الحياة شنو ....!!!؟؟
قال لي كل ما اجيب فيها ( هدف ) بتجيب فيني هدفين ...بس المباراة ما انتهت ....مصيري أدرن ...!!
ابهرني ودالحاجه بهذا الاستدراك المذهل ..!! بالمناسبة الزول دا حيجيب الدرون ...!! الثقة القال بيها الكلام دا تؤهله لذلك ...بس زي ناس ( ودالحاجه ) ديل قنوعين ماعايزين تفوق ....!! التعادل عندهم بطعم النصر
متواضعين حتي في احلامهم... ولأول مره ياعلوب انظر للنصف الاخر وهو تصاريف القدر ....وتقلبات الحياة ....!! الدروس قد تأتيك من اي مكان ...كما فعلها ود الحاجة الان ....
هسه بالله الكلام دا كلو عن ( ود الحاجة ) اريتو كان سمعك كان اتدردق في الواطا دي من الضحك وقال لي صاحبك دا ملحوس ....!!
قال لي بعد ما شربنا العصير و إتونسنا قال لي كدا الواحد يمشي الحلة يقول ليهم كنتا قاعد مع ( خليل ...) ...!!
قلتا ليهو والله ( خليل ) القعد معاك ...شكرًا ياخ ....!!!
أها أنا ياعلوب زي (ود الحاجة ) دا أصدق عندي وأعمق من ناس كتيرين جدا يدعو المعرفة ويتباهو بالثقافة والمكانة العلمية والعملية .....لكنهم عمليا ...أنصاف حلول وعاطلي مواهب ....كثير من إدعاء .....وجله خواء ......
...دي مشكلتنا ...كمية مقدرة بقت تتصنع الأشياء وتحكمها المظاهر تحترم ذوي السلطة والجاه والمال لأغراض ومصالح شخصية ....وهو ما يخلق ( كانتونات ) مسورة
تؤثر علي النسيج الاجتماعي بتاعنا دا اللي هو أغلي ما نملك ...!! ودي أخطر حتة علي المجتمعات
( بتشقها النص .....!!)
( جابت ليها نسيج وملايات كمان )
خليل دا لو خليتو واصل ....!!حيقيف علي حيلو وحيدور ليهو ندوة هنا ...أحسن أضايرو .....
بالله شوف الزول دا جا لافي لي بي ( ود الحاجة ...) غايتو ود الحاجة التقول شربك ( عصير بلح ) ما عصير قصب ....!!
ليك حق تسكو( ياحجوج ) اهو دخلك التاريخ قال ناس ودا الحاجة ديل ( ملح ارض و أجاجها ....) ...!!
ملح دي عرفناها ......!! ( أجاج ) دي شنو كمان ...!!؟؟
( أجاجي ) يلقط الحبا ) ...!! غايتو جنس محن......!! المصطلحات دي بلقوها وين ناس خليل ديل ....
هو طبعا ( ود الحاجة ) من ناحية ملح دي فعلا ملح ...بحب الملح شديد ....!!! تاني ما بعرف لي شي ...
قلتا ليهو بتصدق ود الحاجه كلمني بالحادثة دي قال لي لقيت صاحبك ( الراقي ) داك الاسمو خليل ...!!
( وعندما يستخدم ودا الحاجة مصطلح ( الراقي ) فهو قد لامس سنام الجبل ....لكونه استخدم أرقي ماعنده من مصطلحات )
غايتو الميزة الفي ( خليلوف ) دا انو رغم ثقافتو العالية دي أصلو ما بديك إحساس بيها ....!!
تلقي ناس قريعتي راحت حافظ ليهم سبعة كلمات معاهن انا بفتكر وانا بعتقد ....والبعد التالت ....
وطوااالي داخل في شخصية ( سارتر ) ومدور ( الإستارتر ) ...وتقوم بينا العربية ......!!
فجاة خليل وبدون مناسبة اخد ليهو ضحكة كدا
قال لي عليك الله ياعلوب الحاجه كيف بالله ....ان شاءالله طيبة ياخ ..... !!؟
قلتا ليهو تمااام الحمد لله ...ولية ضحكتا كدا
..!!!؟؟
قال لي إتذكرتا يوم قلتا لي سألتك مني مره ...!!
قالت ليك وييين صاحبك المشحط الكملان من لحم الدنيا داك ...بحنني شديد والله ...البنطلون المشروط ...والعروق الناطا .....!! هو مالو ياعلوب اهلو طاردنو .....!!
ضحك الخليل كما لم يضحك من قبل ...!! وانا فطستا من الضحك معاهو ....!!
شوفو التصالح مع الذات دا حدو وين ....!!!
خليل ياخ ....جمال الفكرة ...وعذوبة الإحساس ...وزول جميل في الناس ...ان شاءالله دايما عامر .....يازول يا ضو .....عشرات حبابك سلامات