يوميات علوب 151......سهير ( البت الحديقة )
صاحبي ( أحمد مختار ) دا ساكن في البيت القصادنا علي الناصية بيناتنا شارع .....!!! متزوج واحدة زميلتو إسمها ( سهير ) والاتنين شغالين مع بعض في واحد من البنوك دي عندهم ولد واحد بقولو ليهو ( حمودي ) .....
اتلاقينا بالصدفة كدا العصرية قدام البيت ...إتسالمنا والمطايبة والتحيات ... قلتا ليهو وييين انتا ياخ البنك دا دساك مننا كلو كلو .....قال لي البنك هين .....!! المشكلة في ( الصراف الآلي ) المعاي جوا البيت دا ....!!
علوب إنتا راجل أخو وماعليك مدسة ...إنتا النسوان ديل كلهن كدا ولا ( سهير ) مرتي دي بس ....!!!؟؟
قلتا لي كيف يعني .....مالا ..!!!؟؟
....قال لي ياخ كلو يوم لازم تشتري ليها حاجه ...!! أي حاجه ...!! يومي ...!! المهم تشتري .....!! صدق ياعلوب خلاااص وكت ما تلقي حاجه واليوم يكون قرررب يخلص ....فرررررر ....تطبق ولدا دا وتركب عربيتا الزي علبة الصلصة دي ....تمشي ( الأنفال ) تخم ليها كم حاجه لي ( حمودي ) دا وتجي ...حاجات أقلا حاجة بي متين ولا تلتمية جنيه ماعارف .....شكولاته وشوية ( كرور ) كدا.....!! ومراوح ورق .....!!!
دي هسا مرضه يقولو عليها ولا دي شنو دي .....؟
قلتا والله يا ابوحميد النوع دا في منو كتير ...!! بس إنتا تحمد ربك إنو (سهير )دي شغالة وبتجيب قروش... خليها تصرفا ياخ زي ماعايزا بي طريقتا ....!!! قال لي بسسس جبتا الرايحة مش دا المفروض يحصل ،..!! لا ابدا ..!! تتخيل ياعلوب إنها بتشيل قروشي أنا دا ...!! قالت لي إنتا راجل البيت علي شنو .....!!!؟؟
مره زهجتا قلتا ليها أنا ( راس ) البيت ....!!!!!
قالت لي الليلة إلا تبيت فيهو...!!! بعد تحانيس حتي دخلتا ..
علوب ( سهير) دي لاقياني ضعيف كدا ما باكل ...!!! حقرت بي ....!! قلتا ليهو إنتا من ناحية ضعيف والله ضعيف أكضب عليك ...!!
بس أنا حأديك خطة لو طبقتها صاح ......فقل وداعا للقهر واهلا بالغد .... أخلي ليك ( سهير ) دي
نور دربك .......ورفارف قلبك
الحبة ماتصيبك ....ولا بتحتو جيبك ...
وفوق دا كلو .......أريتا ريدة حبيبك ....
قصرتا معاك ....!!!!!
قال لي ألحقني .....!!
كبيت ليهو الخطة ..!!! وقلتا ليهو نفذ بي حرفية وتابع معاي أول أول .....البسمع تابع معاي يقول أخصائي الجلدية ....!!
( علوب أخصائي القلوب ) ......
فعلا يازول أبو حميد مشي البيت وحسب ما حكي لي
قال لي فعلا ....إهتمامي بالموبايل زاد شوية زمان كنتا بجدعو في أقرب ركن ...وبطاريتو دي ناااادر تشوف ال 50%ً ياعشرينات 20%...ولا قاطعة ....!!!
بلعب ( بليستيشن ) مع حمودي دا
المهم بقيت طوااالي طابي ليك الموبايل....وخاتي ليك في الشاحن قصاد عيوني ....!! وسهير لاحظت وبقت تخش وتمرق وترمي لي في الكلام .........!!
إنتا شنو الموبايل القايم فيهو اليومين ديل ....!!؟؟
( عملتا رايح ...!!!)
قلتا ليها كيف يعني من ياتو ناحية ...!!؟؟
لا قالت لي يعني شايفاك مهتمي بيهو زيادة كدا ....!! وشاحن طوااالي ....و( فرجة ) شديدة وتركيز ...!!! سينما بس ...!! هو في شنو ...!!؟
قلتا ليها في شنو دي بتعرفيها إنتي أكتر مني بما إنك حاضناهو أربعةًوعشرين ساعة .....!!!
قالت لي نحنا بي سببنا عندنا قروبات نسوان وونسة .....وبيع وشرا ...هسا الحاجات البنشتريها وبنشرفكم بيها دي ما من الموبايل دا والمواقع 
😳😳😳
😳😳😳
( اتاري المرا دي حتي وهي راقدا بتشتري ....!! معناها أنا معرس لي ( تمساح ) .....!!
قالت لي لو إشتريت ( عدة ) للبيت ...!! أو حتي إن شاءالله ( توب )...!!! ما في النهاية بيقولو المجيهة دي ( سهير ) مرت ( أحمد مختار ) ......!!!
الشكر يجيك في حتتك ....!!!
(دا اسمو التفوق علي الذات )
قلتا ليها إنتي قايلا الرجال ديل ماعندهم قروبات ..!! قالت لي تلقاها كلها أخبار نسوان وصورن ....!!!
قلتا ليها دايما ظالمننا والله تفتحيها من الصباح... الله ذاتو يفتحا عليك من الأدعية والأقوال المأثورة ....!!!
قالت لي بتكلمني أنا بالقروبات .....!!
الكلام دا بكون يوم الجمعة لحدي الصلاة ....الساعة أربعة ...بتنزل صور حفلة القاهرة ...ستة ونص ( المأثورة ) بتبقي ( ماسورة ) .....!!!
فعلا مرتي دي بتخوف ...!! عارفا أي حاجه ...!! تكون داخلا معانا بي اسم حركي .... !!!؟
انا غايتو شاكي في واحد معانا في القروب إسمو ( السر ) يوم واحد ما قال ( بغم ) يتاوق بس ...مره واااحده نزل الزول البضحك وبطنو طاما داك 
😏😏 ...ومسحا كمان ...( ياها ضحكتا ) ........!!
😏😏 ...ومسحا كمان ...( ياها ضحكتا ) ........!!
( السر ) و ( سهير ) .......!! 😳يا ربي ....!!!؟؟؟؟؟؟
😳يا ربي ....!!!؟؟؟؟؟؟
المهم كلامي دا ماااا أقنعا ولسا حايصة ...!! فضل ليها تقول لي جيب الموبايل دا أشوفو ...!! بس دي كمان صعبة شوية مابتقدر عليها ...لأنو أنا ما حصل عملتها معاها ...
المهم أنا ماشي في الموضوع ومتكيف شديد واهتمامي زاد وأصبح الموبايل شريكي الإستراتيجي ....!!
بقيت طابي ليك معاي زي الطبنجه.... الحمام بدخل بيهو .....!! ( وسهير ... اتشلهتت ...!!
ولأول مره أحس بكينونتي كرجل في هذا البيت ... ومحل إهتمام .....مرتين حاولت تسطو عليهو وتم إحباط المحاولتين بنجاح ...!! وبعد فشل المحاولات
العسكرية ....بدت ( سهير ) في التحرك الدبلوماسي
جاتني ليك تتسحب قالت لي يوم الخميس
(عندك شنو يابيبي ......!!!!
( بيبي ) ...😳😳😳😳😳
😳😳😳😳😳
حليل زمان .........!!!! ( عندك شنو يا ( جيبي ) ..!!
قلتا ليها ولا أي حاجه..!! إنتي خميس واحد شفتي عندي حاجه .....!! قالت لي حلو ...!!! رايك شنو عازماك ( ديبونيرز بيتزا ) .....!!
( اها المحل دا بالذات عبارة عن ( مرتي التانيه) نص قروشي دي هناك)
ياجماعة دي سهير ولا واحدة غير .....!!
قلتا انفخ النار شوية قلتا ليها.....!! اووووف اتذكرتا ..!!صدقي الخميس الجاي دا بالذات عندي إرتباط ....!!! وشها دا لما اتغير ...وبدأت تتيقن أن هناك شيئا ما في حياتي يستجد ....!! وريقا نشف ...!!!
قالت لي أوكي بي ظروفك ....!! بس أنا كنتا حابا نغير شوية ......!!
قلتا ليها بي سري كان عادي بتغيري لي بي ( ترس ) وزيت فرملة ....!! الليلة جابت ليها جير أوتوماتيك
( ديبونيرز ) دا مرات بلقي كرتونتو مجدوعة في المطبخ تآكلو هي وولدا .....!! ولا بجيبو لي سيرة ....
( تاكل الأكلو الأحيمر )
طوالي رجعتا لي موبايلي الساري بالي ودخلت من جديد في الرصد والمتابعة .....أشيل وأعاين ليها بي طرف عيني ...!! تدخل وتمرق زي رجل الخط ....!! خلت حقها داك نهائي ......بس مركزا معاي .....
زمان أكورك يا سهير ...!! ياسهير عشره مرات ... لما حسي يتقرش ....ولابتقول لي إنتا بتقول في شنو ...!! غاتسة في الفيس عايمة عوم ....!! وتجلبق في الواتس ...!!
( وليه يالوزة (ديمة ) تعومي ) .....!!!
اها جاتك الكتاحة ....!!!
نحنا كمان لما نقوم علي الواتس دا ما عبيطين عباطة اصلو ما معقولة ......!!
يازوووول جنس جديع هو لكن ...!! ملك بس ...!! ولا كلمة....!!! ماسك ليك الموبايل دا ومدور ليك ....!!
تاني جات جنبي تتحاوم كاتلا ضلها ...!! قالت لي ....حماااده...!! ( هياااا حمادة ) ....!! حماده بالحا
قالت لُي ممكن خلااااص نبطل موبايل .....!!!
( بي دلع كدا ....)
لما اتخيلتها دي ( مرا ) تانية ....
قلتا أواصل الضغط الدولي ...!! ولا عبرتها ....!!
بس في اللحظة دي رجعت شريحتا القديمة وهاجت ليك .....
هييي ها .....بتكلم معاك أنا ......!! طرشتا ...!!
....الطرش ....!!! ماهو يا انا يالزفت الشايلو دا ...!!
لما دخلتني رجفة كدا ....!!! ( بقايا الماضي ...)
لكن مافي اي طريقة للرجوع وإلا خسرت المعركة برمتها
قلتا ليها ممكن بي هدوء كدا توريني إنتي منفعلة كدا لييييه .....!!
قالت لي يعني حضرتك سايب حياتك كلها ومتابع لي الموبايل..!! دا شنو يعني دا ...!!! بسمو شنو ..!!؟؟
عدم شغلا مثلا ....!! ولا الفهم شنو ...!!؟؟
قلتا ليها والله انا بستغرب الكلام دا يجي منك انتي تحديدا ...لانو الموبايل دا فضلة خيرك وياهو ولدك التاني ...!!!
قالت لي ممكن أعرف بتتواصل مع منو ....!!؟؟
اخدتا لُي ضحكة كدا قلتا ليها حصلت كمان ...دايرا تشوفي أصحابي .....
قالت لي قول ...( صاحباتي ) ......!!
أها أنا في اللحظة دي بي أمانة كدا ...
( اخدتا لي رقصة بي قلبي ....) ....!! 
🎶
🎶
اخيراً يا ابوحميد ....،بقيت متنازع بين الحسان ...!!
مرتك تجر من يد ...!!!
وهن يجرن من يد ...!!!
وانتا بيناتن متمحن ....
ويدك هناك في الخد .....
لما أنا ذاتي صدقتا ......!!
بس طبعا ( بت ) واحده مافي كلو ( يوتيوب ) وقروبات خاصة قروب ( اضحك من قلبك ) ديل مانعين الكلام في السياسة والدين وتكرار النكت ....النكات
حااااره ( من المصنع للمستهلك ) .....( نضحك مما نصنع .....!!! لذيذين ياخ .....
تسلم لي ياعلوب ياخ الخطة ماشا ( ألف ).....!!!
لكن لازم استشيرو بخصوص الزنقة دي أتصرف فيها كيف ..!!!؟؟؟
فعلا أبو حميد ضرب لي قال لي ماعارف أشكرك كيف ياعلوب الأمور ظابته بس كمان برضو ( سهير ) منجضاني بالأسئلة والمتابعة ....
طوالي أديتو الزيت وأهم التحديثات ....!! تاني لفحا ومشي عليها .....
قال ليها ياسوسو ..!!
جات جارية زي الرقشة .....!!
قالت ليهو حبيب سوسو إنتا ...داير يغمر ....!!
قال ليها قالو في القروب عاملين تخفيضات في المعرض الصيني في قاعة الصداقة انتي بتحبي الحاجات دي ممكن تمشي ....
(تاني وشها بقي حامض ....)
قالت ليهو خلاص قعادي في البيت بقي يزعجك
احمممممدك يارب ....وداوها بالتي كانت هي الداء
بخرةً الفكي علوب ولعت ...( سهير ) تابي التخفيضات وما ماشه ...( عيانه رسمي معناها ) دا ياهو ذاتو الضرب بالنيران الصديقة البقولو ....!! يوم شكرك ما يجي ياعلوب ....!!
تاني عملتا نفسي رايح قلتا ليها أحسن زاتو ...ضياع قروش في حاجات نحنا أصلن ما محتاجين ليها ...!! صدقو قالت لي ..... أنا ذاتي شايفا كدا .....!!
تشوفي النبي إنتي ...ايوا كدا
قالت لي نحنا يا ابوحميد لازم ندي نفسنا مساحة أكبر
في التلاقي الحقيقي ما ننشغل بالموبايلات والسوق والحاجات دي أكتر من اللازم ....!!! ( وحمودي ) دا زاتو محتاج لينا مع بعض عشان يكون في تواصل حقيقي وهو ذاتو يحس بي الجو والدفء الأُسَري ......
( دي سهير ولا ساره أبو ) ....!!!
اخيراً راسك جا يا بت اللذينا ....
وانا استغليت ليك الفرصة ...!! قلتا ليها مافي حاجه بتخلي الزول يطفش وينشغل بي الموبايلات غير المرا المكملا وقتها كلو في السوق هي تمشي أَلَمُّول ونحنا نمشي الموبايل ....
الظاهر الكلام وقع ليها ..قالت لي بالمناسبة الليلة غادرتا قروبين في الفيس وواحد واتس ....( وجع قلب ياخ )
قلتا ليهاعقبال تغادري أَلَمُّول ....!!
قالت لي المهم إنتا تكون كويس .....!!
طوااالي فكيت ليك الموبايل جدعتو ونمتا بي مزاااج
صحيت المغربية كدا لقيتا ليك متقشطة وتسرح في ( حمودي ) ....قلتا ليها علي وين ...قالت لي ماشين المعرض الصيني قلتا ليها تمام أخدو راحتكم ......!!
وين موبايلي ....
قالت لي لميتو ليك حبيبي ...!!
إنتا كمان صدقتا ....نحن منتظرنك تقوم تلبس ونطلع مع بعض نودي حمودي الحديقة .....ونشوف بعض من جديد نحن مش اتفقنا .....!!!
هيااااا اخوانا المرا دايرا ترجعني شهر العسل تاني ...!! هسا انا لو مصروني مصر بقدر اقول لي كلمة واااحدة من القلتهن زمان ديك ....سهير دي جادا ...!! 😳
😳
متفائلة شديد وفاتحا نفسا .....
ماتقوم تتلحني بعد ما اعتزلت الفن.....نقعد نتحاوم
من حديقة لي حديقة ...!! ويوم في المنتدي ...!!!
وسماية نبوية ....!!
دي مصيبة شنو دي ....أرجعا السوق تاني ياربي ...!!!؟؟؟
علووووووووب تعال سررررعة ........
سهير طلع عندها تلاته شرايح .....والبخت رايح .....
ركبت شريحة (الحديقة ) ....!!
يعني يا الملايات والعدة التقيلة ...ولا الحدايق ونمعط في النجيلة ...!! !!
كدي شوف لي السوق ( حبتين ) في الأسبوع
ممكن ...!!!