يوميات علوب .....150.....الحب وطن...
فيصل جارنا رسل أولادو وأسرتو من السعودية نهائي للسودان بعد أن تعثرت الحلول وتبعثرت الخطي وتضاءلت الامال في العثور علي ( تأمين )
....حسبا كدااا لقاها ما ( بتقسم ) ...فكان لابد من إتخاذ القرار .....!!!
فأرسل أسرته كوفد مقدمة ليبقي وحيدا في مواجهة ( غول اغتراب ) طال .....!!
واستعدت أسرته للإ قلاع .....!!
فيصل متزوج من سمية .... وعندو تلاتة بنات وولدين ....!! البت الكبيرة ( تسابيح ) أصغر من ( مشاعر ) بشويه بتدرس في الجامعة ....!! والتانية ( علا ) في الثانوي ممتحنة شهادة ....و ( رؤي ) في تامنة..... وولدين ( منتصر وأبوبكر ) ديل مولودين هناك ....!!!!!!
ناس ( تسابيح ) و( علا ) يشيلن يبكن ويعزن ...القصة دي مامستوعبنها نهائي وقد كن يبدين تململا حتي في الإجازات السنوية ....فبعد مضي أسبوعين منها يستبد بهن الشوق الي الوطن البديل ...( التقول ماشات عمره ) .....
وهو إحساس ينتاب بقية أفراد الاسرة حيث يتولد لديهم الشعور بأنهم اقتلعوا من جذورهم بعد كل هذه السنوات التي قضوها هناك ...رغم رؤيتي ان هذه هي رحلة العودة للجذور ....ماعرفتا المعادلة دي بحلوها كيف....!! دي غايتو إلا (بالجذر ) التربيعي )
اها البنات ديل القصة دي ما واقعا ليهن .....
دايرات يحضرو البرامج البحبوها في وقتها.....!! والكهربا أصلو ماتقطع ....!! ومايجي ضيف فجاة ....!! ( وماكدونالدز ) ( والبيتزا ) تحت الطلب ....!! والشوارع المضاءة ....والتكيييف الذي لايتوقف ....
والاهما من دا كلو (الواي فاي ) .....!! الكابي دون رصيد ليتواصلن مع الدنيا ...!! ورفيقات هناك ....
و هنا في هذا الجزء من العالم فالصورة مغايرة .......!! نحنا هنا عندنا الواي ( واي) ....!!! والشوارع الهناي (والبيتزا ) بالجنيه الحار البكاي ....!! والضيف من غير سبب بجي ساي ...( هو في أحلي من يجي ساي ....)
حبابو حبابو الضواي ...!!
أها كيف الراي....!! معاهم ولا بي جاي .....!!!!؟؟؟
بعدين شنو يعني ( الواي فاي ) ما الناس دي كلها هنا دااخلا نت وقااااعدة في الفيس والواتس محكرين وخالفين رجلم ....!! يتبادلو الأنس ...ويتشاركو
( تربيعة ابواللمين في مسرح الضباط ) .....!!
شوفوهم بدخلو كيف ...وادخلو معاهم ....!!!!
هي الحياة دي ذاتا بدون مجازفات وأزقة ....!! ما لذيذة ....!! ولا عندها طعم .....!!
المهم ناس (تسابيح ) ديل صحي قاعدات هنا في الخرطوم لكن شغالات بي شريحة السعودية
مشاعر قالت لي ( تسابيح ) دي تجيب سيرة أي حاجه تقول ليك ياحليل السعودية .....هي طبعا بت خالة ناس (أمنيات) ... وأمنيات هي البتجيب لينا قصصا دي...
قالت (شاماها ) ......عشان حركاتا دي ...
بتقول ليهم ( السودان ) دي لذيذة لكن حاره ....!!! هيااااا السودان اللذيذة ...!!
أجري الحق يا ( ود الدكيم ) تمت اضافة تاء التأنيث للشين ودشن حار سيافي وشين ...!!!ياربي تكون قاصدا ( مديدة الحلبة ).......!!!!
قالت ( هناك ) في حر بس ما بنشعر بيهو مع المركزي
وبعدين نحنا مع ( هناك ) دي البحلنا منها شنو ....!!!
ماهو ياتغنو إنتو يا أغني أنا ... 
😜
😜
فحددو لينا إنتو هنا ولا هناك ......!!!!؟؟؟؟
المهم شغالين معانا بالطريقة دي و أي حاجه يحولوها للريال ...!! تحلف تقول ( البنك الفرنسي) تقول ليك هسا الايسكريم دا بعادل كم ريال يعني ....!! ....
اها ونحنا بس في الحالة دي منتظرين البنج دا يفك ...
المهم يازول( تسابيح )دخلوها الجامعة هنا (وعلا )مدرسة خاصة ممتحنة الشهادة ...!! ورؤي ( القبس ) ....!!!
منتصر أخوهن دا كمان طالق ليهو دقن كدا وبفتي مرات ...!! هو شافع ( فنطوط ) لسا ماقام من قعر الواطا ....عندو قريبتو بت عم ابوهو مرا كبيرة اسمها ( الروضة )لاقتو بعد سنين قالت واحلاتي ( منتصر ) كبر كان مادقنو دي كان جضمتو .....!!!
قرب يجاهد فيها ......!!!
انتا هسا عمتك دي عرفتا اسما دا معناهو شنو ....!!
كدي شوفو ..!!
اسما ( الروضة ) .....
( الروضة ) دي لو طايبتها ...عادي ممكن تدخل بيها (الروضة )
أصلو ماقالو ليك صلة الرحم بتدخل ( الروضة ) ...!!! مصيرك بكرة تتعلم ...لانك كل ماتتعلم بتشعر إنو في ( الروضة ) ......!!
أما أبوبكر فهو الأجمل ...!! ألطف واحد فيهم هادي كدا ومسكييين ....!!! النوع الممكن تختو في أي محل بشتغل ...!! الرياض ....!! الخرطوم .....!! أو حتي العاصمة النيبالية ( كاتماندو ) بعيش في أي مكان ( برمائي ) .....
المهم جماعتك ديل بعد فترة أظنهم اكتشفو انو البعملو فيهو دا مضيعة زمن ساكت وأنهم جوا ( الجك ) وفي نص ( الكتمة ) شاء من شاء و أبي من أبي .....!!
( والصقر ان وقع كتر ( البتابت ) عيب .....!!!
هسا لو قلتا لي ( منتصر ) لو عرفتا لي ( البتابت ) يعني شنو بديك مليون ريال ...!!!
كن واثقا بأنك ستحتفظ بالمليون .....!!
ورويدا رويدا بدأت الأسرة في الهبوط التدريجي نحو
( نهار ) الخرطوم .....!!! وبدا السودان بسرة الباتع يؤثر عليهم وينتزعهم مما هم فيه ....!!!
والسودان دا عشان ما نظلمو طواااالي كدا ...ما كمان عندو حاجاتو البعرفا هو .....دي ماعندها علاقة بالحكومة والريال والدولار ...هي ذات صلة بالناس والذكر والأسحار ....!! دي بلد محروسة ...!! ولو بدت عَلِي غير ذلك في كثير من الأحايين ....!!
هو لو ما صحي محروس ...!!
هسا مثلث ( الماهية والجنيه والأسعار ...) دا في زول ممكن يتخيل إنو يسوقك تلاته يوم ....!! خلي شهر ...
( بالله دي مش نظرية تدرس ) ....!!
الزول يكون ذاتو ماعارف بعمل شنو ولا يتصرف كيف ....!! و فجاة تأتي فزعة السماء ...ويتنزل الدعم الالهي ( ونعم الكريم ) ....!!!
المهم يازول ( تسابيح ) دورت ليك في المواصلات والحافلات و ( سبحت ) في شوارع الخرطوم ....
ولسعتها ( حراية ) نص النهار ديك البتجيب( العجاج ) البلف ذي المروحة دا ...فووووووو وماشي لي فوق ....
كان نصورو ونقول تم إطلاق المكوك الفضائي السوداني بنجاح ....
انتو هو ( بلف ) كدا مالو ( مسطول......!!!
الليلة كمان جا ( المغربل ) داك ...الفئة A ....( عجاج مستورد ) ....
المهم أخذت ( تسابيح ) جرعتها الأولي من التطعيم ضد ( عسل الامال ) ......دا ود عمو طوالي لي
( شلل الأطفال ...) النسخة المعنوية ....!! بقلل الشطحات ....
وًبدأت ( تسابيح ) تتأقلم مع الواقع ...وتستجيب للظروف ...وتنسجم مع المعطيات ....فتبدلت الرؤي وتغير المزاج ...
وتسلل اليها السودان بجماله الخفي ودخل عليها من الباب الخلفي كما النعاس في علاقات جامعية
فيها كثير من الدفء والحميمية والقرب ما افتقدته لسنوات طوال بعيدا عن الغرف ( الباردة ) والونسة ( المعلبة ) في الرياض العاصمة .....!!!
لترتاد احيانا الرياض ( المشتل ) ... بكل ضجيجه وكامل حيويته ...!! وحتي الغبار ....فكان إحساسها به أكثر صدقا ....وتأثيره عليها أكثر عمقا من شارع ( الملز ) في تلكم المدينة فطبعت عليها الشمس قبلة من السمار جعلتهاأحلي وأنضر ....!! حتي انو صاحباتا في
( الرياض العاصمة ) علقن علي ذلك ...!!! و إن كان ( ترمومتر ) العلاقات بات يميل أكثر الي دولة المقر ...!!
أضحت ( السبوحة ) تشرب من موية السبيل ...!! وتغالط الكمساري في الباقي .....!!! وجنها نبق ....!!!
( لقد عبرت الشقية )
أما صنوتها ( علا ) فلازالت تحلق في تلكم العوالم التي اعتادت...!! ولو بالريموت ....
لمت ليها في شلة من العائدات امثالها بمدرستها الجديدة وحدث الإلتحام الفضائي بكل سهولة يسر ودون تعقيدات...!!
نفس المكنة ) ......!!
( مواصفات خليجية )
لذاك فهي تعيش في قلب ( الخرطوم ) وتفكر بعقل (الرياض ) ...يدعمنها صويحباتها ...!! ولا زلن يفضلن العباية ونوال الكويتية ......!!
شقيقهن (منتصر ) تمرد علي لحيته التي تبدو أطول من سنوات عمره الغض فخفف منها كثيرا حد ( الموضة ) وخفف علي نفسه عسر التفكير وضبابية التوجه ....
مرتين قبضتو في نادي الضباط ...متلبس في حفلة
خميسين تاني .....!! ( بزنق )......
وأبوبكر الحنين ....!! منسجم مع السودان أكثر من أي مكان فجيناته قد تركها هنا وذهب الي هناك فعاد من جديد الي مكانه الطبيعي ...تشعر به وكأنه أراد ان يعوض سنوات قضاها خارج الصندوق ....القي ليك في الدافوري لما بكيفني .....!! وانا ماري العصرية سامعو ليك بكورك لي واحد ...كان تباصي لي هنا كنتا وريتو الطفا النور منو ...!!!
( ضحكتا براي ومشيت ).....
طالما عرفت أين هو مفتاح النور ...!!! فانا علي يقين بأنك قد وصلت يافتي ...ولعو طوالي ولا تبالي ..... أنت في قلب الوطن ...
العزيزة سمية وتسابيح أصبحن جزءا من النسيج الإجتماعي في الحلة وبكل تفاصيله ....وأحيانا تفاصيل التفاصيل .......!!
سمية عادي بتقول ليك ماشه ناس فوزية القهوة رامياني ..... بتلقاهم في الصف الاول في المناسبات والاعراس عايزين يعوضو مافاتهم من عروض ....وبعد أن كن يكتفين باختلاس النظر وصمت خجول .....
(الصفقة فوق حاليا ) 
👏👏
👏👏
صرن يلتقطن ( شمارات )الحلة بوضوح تام وعلي أكثر من ( قناة ) وتردد ..!! بعد ان جددو الإشتراك
جيت ماري لقيتن نازلات من الرقشة ....وبتفاوضو مع سيدا علي القروش ....سلمتا عليهم ...!! فعلاقتي بهم بجانب الحلة إنو ( فيصل ) برسل ليهم القروش عن طريقي و أنا بوديها ليهم ....وبحاول دايما وبقدر الإمكان أساعد في عملية إعادة الدمج دي ....!!
( التقول مساجين )
قالت لي غايتو ياعلوب سعد قشرة بقي نااار حمرا ولع عديييل كدا ....!! أسعار خيالية ...الحكاية شنو ...
ورغم هذا التصريح المعادي فالرقشة (مردومة )حد الإرتواء
( ديل خلاص دخلو السستم)
ايقنت لحظتها ان أسرة السيد فيصل لم تصل فحسب لكنها توهطت ومدت رجلينا ....!!!
واتفرجخت ....!!
مش قلتا ليكم سرو باتع
بلد حنين ياخ بس ظروفو صعبة .. ....
شبكونا سلة غذاء العالم وسلة غذا الوطن العربي
لا لمينا في ( خدار ) السلة ولا ( زيت ) العربي 😜
😜
....من عين الحسود يبرا ......
ورغم كل ذلك يظل كل الجمال
ونحنا في السودان نهوي أوطانا وان رحلنا بعيد نطري خلانا .... ....!!!
شوف ( نطري ) دي ذاتا ( طرية ) كيف
مدفقا حنان ......
اها ( نطري ) دي ....( كرت عدم ) .....
♣️
♣️
فقط في السودان ......
في أحلي من كدا
ويجو عايدين ان شاءالله عايدين يا الله
ما الحب وطن .....!!! 
❤️
❤️
والريده بين الناس صلة ....!!! 
🌹
🌹
ولا شنو ياسمية .....!!!!