يوميات علوب ...148 .....كشحا ( أبكريك )
( أبكريك ) ...!! إسمو (عبد الكريم ود الجد ) ...بقولو ليهو ( أبكريك ) ( دا الإسم المعروف بيهو ....)
أسوأ صنايعي أنجبته المدينة ....!! لو الحاجه عديييلة بعوجا
تقول ليهو عندنا ( ماسورة ) بتنقط....!! طوالي بتحول لي سباك ...( ماسورة لاقت ماسورة ) .....!! ياخ الحيطة دي فيها شق ..!! ( أبكريك ) بقول طق ...!! المروحة (بتسكسك) ...!!! بجيب عدتو ....!!! بس بالطريقة دي .....أنا خايف يوم يقولو الفنان اتأخر ( أبكريك ) ينط في المايك ...!!!
( وابكريك في اللجج سدر حبس الفجج ...خال فاطنة ...وليهم بلاااالي... البدرج العاطلة ....!!
دا كلو هين ...!! هسا نحنا( البدرج ) لينا الزول دا شنو ..؟؟؟ يادوووب انتبهتا إنو ( أبكريك ) حقنا ...وحق (الغنية ) نفس الإسم .......!!!
( أكيد ما نفس النوع )
المهم غايتو رغم ( المغايس ) دي وللامانة ( أبكريك ) دا طيب جنس طيبة....!! ولطيف لطافة ....ومسكين مسكنة ... مشكلتو الوحيدة إنو متسلبط في كم حاجه كدا ....مامركز اللعب ...!! بعدين أصلو ما بزعلك ...!!! تهيج فيهو وتقول ليهو دا شنو العملتو دا ياخ ... إنتا ما بتفهم ..!! هسا أمانتن في ذمتك دي بعملوها كد...!! طلعتا لينا من وين انتا ياخ ...!!! الله لاكسبك ..!!
أها بخليك تكمل كلامك دا كووولو وهو يستمع اليك بكل وقار وطولة بال...!! وفِي النهاية عندو إجابة وااااحده بعد هذا السيل الجارف من الإنتقاد والتوبيخ .....!!
الحقيقة هم كلمتين ...!! أصلو مابزيدم ...!! معاهن مسحة خفيفة كدا في الراس لي ورا ....!! ويقول ليك ......
مش كضااااا......!!!
يعني ( مش كداااااا ) ....مع الجرا
( حتي الدال ماقادر يصلحا )
ليكتفي الرجل بذلك ويصمت ...( شوفو جنس الوداعة دي....)
يندمك علي الْيَوْمَ الشاكلتو فيهو ...!!! ومرات تديهو زيادة في القروش لإحساسك بالندم علي العصرة دي ...متناسيا كل عصراتو ....والبي ( العصر ) مرورو ...
ورغم كل ذلك ( أبكريك ) إصرار شديد علي الشغل ...شايل عدتو من ستة صباحا علي باب الكريم .....!!! والذي لايرد طارقا .....!! فمابالك بمن بكر وأبتكر ...!!!
عشان كدا الجماعة أحيانا بجيبوهو في إطار الموازنات ...!! عملا للأجر ....!! ذي الحصص الوزارية ...!!!
مش مرات يقول ليك وزير شنو كدا ما عارف ...!!! بتكون ترضية حزبية بس ...ماعندها علاقة بالوزارة ...!!!
طيب هسا ما كان يشوفو لينا وزارة لي ( أبكريك ) دا ....!!! يسموها وزارة ( المافي شنو ...!!! ) ....ويعتبروهو من حزب المهمشين في الارض ...!! ( يعني ديلاك احسن منو في شنو ) ...!!!! والمافي شنو ...!!!؟
المهم وعلي هذا المنوال ( أبكريك ) يواصل العمل والنضال ويكفي نفسه شر السؤال ....!!!
لحدي ما لما فيهو واحد من قرايبو ديل أقنعوا يمشو الدهب ....!! يازووول علي حس ( الدهب ) دا الفكرة ( لمعت ) في راسو...!!
وطبعا ( طرزان ) يعجبك ...!! قال هو ذاتو بفهم في الدهب ...!! تاااااني يا سيدا 
😳
😳
( مافي فايدة ) ...
المهم زولك إتشمر .. واتعمر ....شال عدتو ...! ويالدهب جاك زول ...!!!!! 
🏃🏻
🏃🏻
واختفي ( أبكريك ) من الحلة ...!! وتواري عن الأنظار ...!!
وفعلا والله الزول ما بتعرف قيمتو إلا تفقدو ...!!
أتاري ( أبكريك ) دا كان عامل جو في الحلة دي .....!!
مشيت دكان عمك ( يس ) فوجدت مكانه شاغرا ... وأنا متعود الاقيهو هناك في العنقريب القدام الدكان دا ...!! عاملو مكتب بنتظر فيهو الزباين .....!! والجماعة يشاغلو فيهو في الدخلة والمرقة ....!!
هل تتخيلو إنو ( أبكريك ) السجمان دا وبكل هذه الإمكانات المتواضعة ...!! كان عندو جمهور ...
يعني طوالي بجيبوهو ....مره يربط ليهو ماسورة اتحلجت ...
مرات يغير ليهو لمبة .....أحيانا يسلك ليهو مجري ...المهم اي حاجة ...
( وإذا أردت لبضاعتك أن لا تبور ..!!! فدع النساء يشكلن الحضور ) .....
تتخيل ( نسوان ) الحلة ديل قالن ( أبكريك ) دا مبروك ...!! وكراعو خدرا ....!! ودخلتو أي بيت ...!! بدخل معاهو خير ...
( مثل هذا التصريحات بوسعها أن تحولك الي ( مزار )
وعليه ووفقا ( لإعلان باريس ) أعلاه ......!! أخذ ابكريك ( باسوورد ) الدخول لأي بيت ....ودونما استثناء ....!!
مرات بخش يكشح ليهو مويه بس ويمرق.....!!!!
يقول ليك....( كشحا ابكريك ...!! ) .....!!!
أها وكت لقيت مكانو فاضي ...!! إتضايقتا صراحة وحسيت إنو المحل دا ناقص ....
وتماهي أمام ناظريا ( الرجل ) ...بكل تلك الملامح النقية البسيطة ...وذلكم الوجه الباسم الوديع ....!! وتلكم الضربة المميزة علي جبهتة الوضيئة .....!! والساعة ال ( سيكو ) معلقة علي معصمه تكاد أن تهرب لفرط ضعفه ..!!
وقد عفا عليها الزمن لكنها لازالت حريصة علي حسابة ...!! مع بعض التأخير ....ومراعاة فرق الوقت ...
وبجانب ( مركوبة ) الذي يصارع للبقاء تتوهط شنطة الحديد ( الخدرا) ...وبها ( عدة الشغل ) والتي أصبح لايعرف لها لون ( مسهوكة سهك ) لكنها تبدو صامدة أمام هجمات الطبيعة المرتدة ...!! والخدار ودار ..
..!! ياحليلك يا ( أبكريك ) ياخ ....
المهم بعد شهر ونص كدا فجاة وعلي غير موعد ... ( أبكريك ) ظهر ...!! وجا راجع ....!! وياله من رجوع ....!!
( رجوع القمرا لي وطن القماري ...)
وكن علي يقين أنه إذا نقل لك ( شفع الحلة ) خبر عودة شخص ما ...!! بعد حين ..!! فهو حتما ينتمي لفصيلة الأزاهر والرياحين ( وقد فعلها ابكريك ...) ....!!! ( الكجم ) ورفاقه جو شاقين الحلة زي ( الإسعاف ) ....يكوركو ....!! وهتف ( الكجم ) أمام حشد من الناس بأغلظ ماعنده من حلفان ...!!!
( وحات كتاب الدين أبكريك جا ...!!!)
هنيئا لك يارجل ...فقد زف خبر وصولك (عصافير الجنة ) ....ولا استثني ( الكجم ) .....!الذي يصنف من (صقور ) النظام .....
وتصدر الرجل المشهد وعناوين الحلة الرئيسيّة دون منازع ....!!هل تتخيلو إنو ( أبكريك ) جا راجع بي عربية ( بوكس ) حقتو ملك حر ....!!! غير الكاش ...!😳 ...
😳 ...
لقد عثر منفردا علي عرق ( دهب ) قادة الي قرابة الكيلو بعد ايام فقط من وصولة مناطق التعدين متفوقا علي اقرانه في ( التعب ) وقد سبقوه الي هناك وقضو السنين .....!!
( فعندما تاني أوامر السماء ...لاتملك الارض إلا أن تلبي النداء )
والله نسوان الحلة ليهن حق ....!!!
إنه ( المبروك ) .........!!!
وبعد النقد والتجريح ....أصبحت العبارة الأكثر تداولا ...
( أريتك بي حال ابكريك ...) ...!!! وسبحان مغير الأحوال من حال الي حال ....
عاد ( الرجل ) بكل عذوبته وجماله ...! والبهاء .... يشاغل في الناس ويشاغلوهو ....!! بكل تلك المحبة والأريحية ...!!
( الذهب لم يخطيء طريقة ...!! فقد قصد ( معدنا ) أصيلا اسمه ( ابكريك ....!!! )
شباب الحلة قالو ليهو ماشا معاك باسطة يامعلم
خلاص تاني شغل مافي ....!!؟
قال ليهم قسما أنا ما أقيف من الشغل الا اتعطل انا ذاتي ....!! الجماعة وقعو ليك فيهو ...
( بعد الشر عليك ) ...وسلامتك ....!!! قال ليهم المره دي ( سلامتك ) شايفا قوية ...!! تكونو قاصدين ( البوكس ) ......!!! وتعالت الضحكات ....!!!
لم يخطر ببال الرجل علي الإطلاق أن يحدث له ماحدث
لكنه في المقابل استوعب كل ماحدث ..
(إنها النفس عندما تبلغ درجات الرضا ) ...!!
قلتا ليهو عليك الله يا ( أبكريك ) داير أسالك سؤال واااحد بس ....ممكن...!! ؟؟؟
قال لي لو ما سألتا إنتا ياعلوب البسأل منو ....!!
قلتا ليهو بصراحة كدا كان ممكن قبل شهر تتخيل مجرد خيال إنو يكون عندك البوكس والقروش ديل ...!! بي أمانة كدا .....!!
قال لي أقول ليك قولة ياعلوب .....!!
أنا مرات بيني وبين نفسي كدا ...بقول ياخوانا الناس دي مضيعين إسمي السمح دا وشابكني ( أبكريك ) ....!!
يااارب خليني عندك ( عبد الكريم ) .....!!!
اها الكريم دا ما عندو حدود ...!!
دحين وصيتي ليك ياعلوب أصلو ما تخجل منو ( الكريم ) وما تستحي....أطلب منو أي شي ....!! وخليك لحوح ... أطلب الممكن والمستحيل
وركز علي المستحيل ...لانو ( الكريم ) ماعندو مستحيل
هسا ( ابكريك ) يصلح في المواسير.....!!! الله يديهو بوكسي وقروش قدر ديل ...!!! دا ما ياهو المستحيل ....
مرات بديك لمن يرضيك .....!!! ومرات بدهشك ....
قوي قلبك وخلي ثقتك فيهو كبيرة شديد .....دا الشرط الأساسي
تأملت حديث ( الرجل ) فأيقنت أن ( ابكريك ) قد يكون ضعيفا
في عملة الذي يقدمه للناس ....لكنه ( مبهر ) فيما يقدمه لإله الناس ....!! فعزه ملك الناس......!!!!
أوا هناك أقوي ....
إن شاءالله ربنا يديك كمان وكمان يا ( ابكريك ) ويزيدك من نعيمو .....
قد يبدو مقصرا في معالجه الحيطة والحنفية ....لكنه قطعا
قد أبدع في فهم واستيعاب كل القضية ....!!
القصة ما قصة دهب ...
القصة قصة زول جميل
حاول يطاوع المستحيل ....!!!!!
والرب وهب
مش كضاااااااا .....!!!!!
..........!!!!!
كدا ونص وخمسة يا ابكريك ....!!
بركة الجيت طيب .....