يوميات علوب ..143 ... المعمورة
كنت وعدكم أحكي ليكم عن ليلة راس السنة وقضيناها كيف لكن السنة ذاتا ما أدتنا فرصة وزحمة من الأحداث ...!!
باين عليها شايلة تقيل ...!! اللهم اجعلو خير ...
المهم الْيَوْمَ داك كنا بنسأل ....!!
نروس وييين ..؟؟ نروس ويييين ..!!؟؟ دا السؤال الكان في ذهني وذهن الكثيرين الماعندهم أصلا خيارات لي راس السنة بس ساااكت كدا مع الناس ...( عادات وتقاليد )
فمجرد مشاركة الآخرين بالتفكير و الإهتمام حتي لو في الخيال فيه شي من المتعة وشرف المحاولة ....
الحمد لله لازال (الخيال ) بالمجان ....!!
لي قدام لو قدرو يقروهو ولقو الفكرة الفي خيالك فكرة مبدعة وبتجيب دخل ...!! الخيال ذاتو حيكون بي قروش ....!! ( رسوم خيالية )....
😜
😜
المهم ربك رب الخير لاقيت ليك طلال ....طلال دا صاحبنا كدا كان معانا في الجامعة ...من زماان مقرررم وحريييف بعرف ليك الجخانين والأزقة ...!! ووين أحسن عضه في الخرطوم ...!! وقطعة الواطة في ( الرياض ) بي كم ...!!؟ واذا طالبين دكاتره في الدمام ...؟؟ والقصص دي ...!!! المهم بتاع كلو ....!!
لميت ليك فيهو يوم ( تلتين بعد غيبة كدا في مطعم ( سمك ) ....!! المهم سلامات وتحايا قال لي شايفك في ( الفيس) يوم مودعين اسماعيل في المطار بتصدق براي قلتا يا اخوانا ( علوب ) دا لينا منو زمن ...!! سبحان الله هسا لاقيتك ...والله مشتاقين ياخ ....!! خبرك شنو ..!! أدينا الزيت ...!!
قلتا ليهو والله بخييير يا ( طلطلة ) الحمد لله ... أهو (مدردقين) قال لي ( الدرداقة ) دي ما عرفناها تشيل منو وتجلي منو ...!!
البلد كلها مدردقة ....!!
اها كيف يا مان ...!! الراس وين بكره ...!!؟؟. قلتا ليهو إنتا لسا في حركاتك دي ياطلال .....!! والله ماعارف ...!! ضحكتا قلت ليهو إحتمال راس البيت ...!!
قال لي بسسس جيتني في ملعبي ...!! أنا بكره عازمك راس من أمو .... حتشكرني عليه باقي السنة دي كلها ....!!
قلتا ليهو وييين الكلام دا ...!!؟. قال لي خليها مفاجاة
المهم بكره أبقي مارق من بدري الدنيا زحمة ...والدواير مشغولة ....!! إتفقنا ...!!
قلتا ليهو ظابت ...!! وافترقنا علي أمل لقاء ......!!
(طلال دا من زمااان حاجاتو أصلية ....!! أصلو مابلعب في روحو .....!! عشان كدا ربطا كفاحي معاهو ...
المهم إتلاقينا يوم راس السنة في شارع المطار جنب (أمواج ) تسعات كدا ...!! والشوارع بدت تزدحم .....!!
جا سايق ليهو عربية ( اكسنت ) بيضا ...مبهرجا ليك من جوه السماعات دي كيف...!! والفرش والبخور والحركات ...!!
( قلتا ليكم الزول دا شغلو نضيف ..!! )
المهم دورنا مشينا ...من شارع لي شارع ...ومن لفة لي لفة
أخدنا لينا زمن لافين ...!!
لما انا ذاتي شفقتا ...!! قلتا ليهو إنتا دا راس السنة ولا راس الرجاء الصالح ...الحكاية شنو .....!!؟؟ قال لي شيل الصبر ياعلوب ...!! مافي حلاوة من غير نار ....
المهم اخيراً وصلنا ....!!
بيت كدا طابقين ....!! وسطوح ....ودرابزين من بره ... ....!! وشجر ....!! اااخر ( المعمورة ....!!) .....!!
سلمو علينا ودخلونا لقينا لينا هول كبييير يرصرصو في السماعات والحاجات ...وفي ذي حديقة كدا في الحوش فيها كراسي قعدنا فيها ...
وقاعدين ذي سبعة شباب كدا النوع المبرمين شعرم ديلاك ....( راستات كدا ...) والقشرا والبدل والشالات ....اها بعد شوية جو تاني خمسة كدا ....الحلاقة بالجنبة والحركات ....ونحن قاعدين نشوف في طوابير العرض دي .....!!
شويتين كدا هبط سرب من المقاتلات F16 
🚀
🚀
سبعة بنات .. أقلا واحدة اسمها ( سهي ) ....خدورية كدا صاقعة .....!!
يازووول .البنات ديل قشرة السنين ...شي جلد ....!! وشي فرو وبناطلين ....وقيامة رابطة ...(مجلة بس ) ...والعطور فايحة ....الريحة دي ملت الواطا ...( باريس في الخرطوم ) ...
قالو هاااي ....!! قلنا( هاي ) ...!! ولا كلمة زيادة
إنجليزي جد ...شوية كدا جات تاني كتيبة داخلا ....دي الظاهر عليها ( عمليات خاصة ) مع الطواقي والبوت .....ديل كمان بقيادة ( لميس ) .....!! ( شوف الاسم 
👋)
👋)
( حتي الأسامي السمحة لقطوها شالوها ) ...
( لميس ) حلاوة قطن بس ...!! أول مره اشوف لي شعر مضروب ( أحمر ) ....!! 
👩🎤 ...
👩🎤 ...
واحدة قالت ليها بي صوت عالي كدا من بعيد
You look beautiful today (Losy ) ...your hair is crazy ....you look like ( Nichi minaj )
والله يا اخوانا بس حسّيت أني بتفرج في mbc 2 .....ورغم إنو ماعرفتا ( ميناج ) دي منو ....!! .بس نحنا حنصوت لي ( لميس ) المرشح الوطني.....!! ( الرمز ( اللمبة ) 
💡
💡
(يدكم معانا رقم التصويت 7 )
برضو ولا كلمة بالعربي .....!!! الضحكة ذاتا شكلها بالإنجليزي....!!!
الله يخرب بيتك ياطلال جايبني (ليفربول ...)
المهم جا داخل ود صغير معلق لي كم سلسل كدا وحاجات في اليد ...والبريم الأصلي في الشعر ....( نص كيلو جل ...) ...!!!
يازووول كلهم صفقو ..طلع دا ( زيكو ) بتاع ال DJ.....
🎧
🎧
( طلال ) قال لي أوووووو زيكو ( المعلم ...) ...!!
قلتا ليهو يا سلاااام بالله هو دا زيكو ( المعلم ) .....!!!
( طبعا دي كانت أول مره أسمع بيهو أصلا واشوفو )
اتذكرتا أستاذ عبد القادر ( أسطورة الرياضيات ) وقتها ....!! كان دايما بقول لينا ....
(تعرفو يا ابنائي إن اكثر ما أفتخر به في حياتي هو أنني ( معلم ) ....!!!! )
( وقد علمنا كل شيء) 
🌹
🌹
أجري حصل يا أستاذ ( عبد القادر) البلد إتملت ( معلمين )
يمرقنا الله الليلة ...!!
قلتا لي ( طلال ) إنتو عندكم تصديق للحفلة دي ....قال لي تصديق شنو يا مان ....زووول بجي هنا مافي .....!!
قلتا ليهو ياطلال ياخ الحكومة دي في راس السنة بتكون هايجة ...!!! فعادي ممكن يجو ....!! ولو مافي تصديق حتبقي مشكلة ....!!! ( يمين ولا كأنو انا بقول في شنو ...!!! )
قال لي نحنا كلمنا الجيران ديل كلهم ... واستأذنا منهم ...وديل ياهم البجيبو الهوا ...بعدين ياخ ديل كلهم زملا في الجامعة وأهل ...!!
المهم ( سكتا ) ...!!! وانا مالي بطريقتم ..!!
بس الاسمو ( زيكو ) 🎧 دا قال كدا ودور اوووووووو.......يااااااه ....
🎉 دف دف دف .....كو كو كو .....
🎼 والحرب بدت ...!! مزيكة في السما ....
🎺 الساوند داير يتشرط .....!! والجماعة قامو ليك أولاد علي بنات ....حركة خفيفة بالأرجل ......!!! وواليدين اترفعت تتضرع في انتشاء .....
🎧 دا قال كدا ودور اوووووووو.......يااااااه ....🎉 دف دف دف .....كو كو كو .....🎼 والحرب بدت ...!! مزيكة في السما ....🎺 الساوند داير يتشرط .....!! والجماعة قامو ليك أولاد علي بنات ....حركة خفيفة بالأرجل ......!!! وواليدين اترفعت تتضرع في انتشاء .....
وانسجام روحي مع كل دقا ... وكل زفرة...!! وكل اهه ....
المشكلة في البنات ديل ....( يخوفن ..) ثقة ذاتا مبالغ فيها ....يكوركن وينططن كأنو نحنا مافيشين ....!!
( يكون دا الانجليزي دا ياربي ...) ....!!!؟؟
واحده كلمت ( طلال ) قالت ليهو صاحبك دا ( إستايل ) ....!!!
(صاحبو دا اللي هو ( أنا ) .....!!
لما حسّيت بي شوية نشفان ريق كدا .....!!!
انتو قايلين السبب شنو ...!!؟؟
كنتا لابس لي ( جاكيت ) قديم كدا حقي لونو ( بني ) أظنو بالركنة ومحشور في الدولاب ...مطووول ليه زمن ... بقي ( بني محروق )
اها دي قالت لي طلال صاحبك دا باين عليهو ( استايل )
ال (dark brown ) دا لون الموضة الرجالي لي شتاء 2018....!!! 
😳
😳
هيييييع ....!! أنا أخو ( الصقت ) ...!! 
✊️
✊️
( قلبي ذاتو كان حاسي )
الغريبة الجاكيت دا معاي من 2012 إشتريتو من سوق ليبيا ....!! وأبدا ما توقعنا إنو حيدخل التاريخ بالطريقة دي ....!!! ( سبحان الله ) ....
قلتا أضرب تلفون لي (مشاعر) أقول ليها زغردي وكلمي الحاجه واعزمي الجيران ....!!! قولي ليهم (علوب دخل ( قوقل ) ...!! )
بالله شوف ليك كلام ....!! ديل طبعا لسه مابكونو أخدو خبر إنو (الرغيفة ) زادت .....!! يمين في واحدات هنا هسا تقول ليها (رغيفة ) يعني شنو مابتكون عارفه ....
بس زيكو الأصلي 🎧 قلب ليك عربي ...!!! وقعد يكورك ( تاااامر حسني ) .....!!! ( طلعو برضو حافظين )
🎧 قلب ليك عربي ...!!! وقعد يكورك ( تاااامر حسني ) .....!!! ( طلعو برضو حافظين )
ديل كان شغل ليهم ( بادي محمد الطيب ) زول بفضل هنا مافي ....!!!
(أجسادهم تغتسل في النيل وأرواحهم تحلق في الأطلسي)
بعد شوية العشا جا ( ديلفري ) ....!! خمسة مواتر إترصت أنا قايلو وفد برلماني ...!!! والبيتزا اتردمت.... والجكن ....!!
( هنا لو قلتا جداد ..احتمال كبير مايتعرفو عليهو) .....!!
....!!
المهم الساعة اطناشر كدا ( زيكو ) شغل ليهو أغنية الظاهر عندها علاقة بي راس السنة دا ...لأنو الشي الفهمتو من حركات الجماعة ديل إنها لحظة تأمل كدا ودعوات للحب ....!! حيث دخل الكل في حالة جذب سماوي وصمت مع تمتمة خفيفة ....!! وجابت ليها غميت عيون وغرودة جفون ....!! وماسكين يدين بعض ....!! 
🙏 وتلويح شديد 
🙌
🙏 وتلويح شديد 🙌
...( لوحني ....حاول حسا بي ...) ...!!
الناس دي مالا ..!!؟؟
انا وبتاع الساوند الوحيدين المفتحين زي ( ديك حبصة ) ....!!!
ياربي يكون ( تنظيم ) ونحنا ما جايبين خبر....!! 😳
😳
المهم في اللحظة التاريخية دي ....!! وقع المحظور ...!!!
وجو خاشين ذي ستة كدا ...طوالي أنا عرفتهم ...!! رغم إنو ما لابسين رسمي .....!! جا واحد منهم نادى ( زيكو ) بالجنبة كدا ....!!! تاني ( ابوالزيك) ما شفنا ...) ....
أنا طوالي اتجهزتا للجريدة ...والعنوان العريض
( القبض علي شلة شباب وبنات في حفل ( راقص ) داخل أحد البيوت بالمعمورة ...!! )
الله لا كسبك ياطلال ولا غزا فيك بركة ....نبقي لي جنس دا ....!!
المهم البنات اضايرن...!! الإنجليزي داك كلو طار ....بس شغالات ( مسجات ) في الموبايل ...!!
قعدتا اتفرج في السرعة الرهيبة البكتبو بيها دي .....!!! وباليدين الاتنين ...!! (أكيد ماخدات دورة ....!!!!)
( سرعة ما طبيعية ) ...!! ياربي برسلو لي منو ...!!!؟؟
غايتو جماعتك عاينو كدااااا ....لقو الناس دي شكلها بريء .....!! قالو سيد البيت وينو ...!!؟
نطا واحد كدا أنا من قبيل شايفو يدخل ويمرق ....قصيروني مدقدق كدا ....!! إسمو ( أمجد ) ...طلع دا بيتم....أهلو في ( جدة ) ....!!
وخال ( أمجد ) دا ياهو صَاحِب( طلال )العازمنا ...
أها الزول الإتكلم معاهو دا ...طلع بعرف أهلو ...!!
قال ليهو إنتا ود مصطفي السندي ....!!؟ الود قال ليهو ايوا ...!!
( ما بالغتا لكن يا ( مصطفي) تخلي ليك بيت قدر دا لي ( أمجد ) يتجدع فيهو ....!!!
كان تختو في نص (النجيلة دي ) وخلاص ....اها ( أمجد ) قلبو ديسكو .....!!! ( كدا كويس ) ...!!!
المهم الراجل قال ليهو خلاص لحدي هنا ...!! وتاني ماتعمل كدا ...!! وخلي الناس ديل يمشو من هنا فورا ...!!
( كشة وانقشعت )،،،،
نحنا طوالي بقينا مارقين ...!! طلعنا لقينا زي صتاشر عربية كدا واقفة ... أتاري المعازيم كلو واحد بي عربتو ...!! ديل الوحيدين الما بكونو عارفين إنو ( البنزين ) رفعو منو ( الأبنص ) ....( مدعومين خلقة ....!! )
ولميس وسهي طلعت كل واحدة عندها عربية ....!!
المهم اتحشرنا أنا وطلال في ( الاكسنت ) ...قلتا ليهو هسا أنا اعمل فيك شنو بس وريني ...!!؟؟ يعني عااادي كان السنة الجديدة حنبداها في ( الشرقي ) صاح ....!!؟
قال لي إنتا عارف الجابو العشا ديل بكونو هم الجابو لينا الكتاحة دي ....!!! لكن ما مشكلة ياعلوب هسا بعوضك بي واحدة تانية اشدا من دي .... قريييبة من هنا ما بعيدة .....!! ( طبعا جدول الخرطوم كلها الليلة بكون عندو )
طوالي فتحتا الباب
قلتا ليهو شوف ياطلال البيت هسا دي ...ولا ترحال ...!!
انت قايل نحنا رايحه لينا حفلة ولا شنو ....كان الغرض شوية تغيير والدنيا راس سنة ...داير تطلعنا راس الدولاب
قال لي روق روق ياعلوب ياخ .....خلاص الي البيوت ....
وبالمناسبة البت العلقت وقالت إنتا استايل ياها ( سهي ) دي
( عايز يلطف الجو ( الملعون ) ...!! لما ضحكني
قلتا ليهو تعرف يا طلال ناس ( سهي ) ديل ....الشتاء عندهم (موضة) ....تمنحهم بهجة الفصول وتقاطع الأزمنة .....واخرون الشتاء عندهم ( أوضة ) .....تقيهم لسعة البرد.... وزمهرير ديسمبر ....!! وغالبا ما تفشل في أن تسد رمقهم ....!!
( شتاء واحد ومذاق مختلف ) ....!!
شفتا الناس الكنا معاهم ديل سارحين في ياتو عالم ...!؟؟؟
بعض من أحلامهم ( رقص وتلحين ) ...!! وانظر لأولئك الذين يقطنون أسفل المدينة ...!! سقف أمنياتهم ( خبز وطحين )
البلد دي ياطلال مقسومة نصين....!! والنص التاني مقسوم علي أربعة....!!! فيها ناس بتشتري ( أون لاين ) ....وناس ( تتفرج وتعاين ) ....!!! واااخ أنا من زمني الخاين .....!!
( وقع ليك ياصاحبي ) ....!!
في هذه الأثناء دخلنا الي تخوم حلتنا البهية ....!! وإحساس (عام جديد) يلوح في الأفق من خلال أشعة ضوء تتسرب من ثنايا الغرف والنوافذ والبيوت علي غير العادة في هذا الوقت المتأخر من الليل ....!! وتشعر فيها بدفء ...حيث لايفرق الفرح بين الأمكنة ..ومداها ...و ( المعمورة ) وما سواها ....!!!
( إنه عطية السماء ...) ...والسماء لاتظلم ...!!!
طلال نزلني قدام البيت ...قلتا ليهو يلا دور بي سرعة ناس الحلة ديل لو عرفوني روستا مع ( زيكو ) ....بنفضوني ...
يضحك ساااي ....!! اها وهو بستعدل كدا فتح القزاز قال لي سمحة الخدرة لما تروق ....أحب ( البني والمحروق ) ...!!
دنقرتا اشيل لي حجر أفلقو ....!!! كبس البنزين وانطلق مقهقها بسيارته واختفي تحت جنح الليل ....!! خلاني اضحك براي في نص الشارع ...!! ( البركة في الضحكة دي )
طلال ياخ...الشاب الظريف اللطيف....كله حيوية وحركة ...ربنا يحفظو ويدي العافية ....!!!
حمدت الله كثيرا ان عدت الي البيت سالما ...وان شاءالله سنة حلوة عليكم كلكم ....
ياربي ( زيكو ) بكون طلع ...!!؟؟
دا غايتو الا يطلع بي سلم ( دو ) 🎼 ....معللللللم يا ...
🎼 ....معللللللم يا ...
أرقدو عافية ...!!
- [ ]