الحلقة المئة واثنين واربعون من يوميات علوب 141 مع الطيب عبدالماجد

يوميات علوب ....142 .....راس ( الرجاء )

الحلة قايمة وقاعدة إحتفالات راس السنة ....ناس مشاعر قالو عاملين لمة في بيتنا مع صاحباتا وكل واحده تعمل ليها أكلا تجيبا معاها ...مشاعر في المطبخ من الضهر ...!! 

قلتا ليها أها انتي حتعملي شنو ...!!؟؟ 

قالت لي ( ترايفيل ) ....!!!!! قلتا ليها منو ...!!؟ .منو ...!!؟؟ 

قالت لي (ترايفيل ) ياعلوب...!! ما بتعرف ( الترايفيل ) بالغتا لكن ... !! قلتا ليها والله بالغت ال mbc ...الورتك ليهو 

عليك الله شوف البت دي هو نحنا ( العيش ) لاقنو ...!! قال ( ترايفيل ) قال ...شوف جنس المغسة دي

اها سبعات كدا ....بدت الوفود في الحضور 

( وفا ) في المقدمة ....وطبعا دي لازم تعمل ليها جدعة ...!! جات خاما ليها صندوق مزركش كدا وملون زي ( صندوق الحاوي) داير يطرشق ...ومنفوش ...!! بعد دا كلو بكون جواهو ( بلحتين ) ....!!! بتموت في الحركات البت دي ....!! 

دي ما ياها ذاتا ( وفا ) القالت ...الامم المتحدة عرضت عليها سفيرة نوايا حسنة للشباب لكن هي رفضت ...!! قالت ابوها قال ليها بتشغلك من القراية ....😂😂 ديل الناس البتفوقو علي الأحلام ....لذيذين شديد ...!! لاشفنا السفيرة ولا شفنا القراية ....

اها سبعة ونص كدا وصلت المعلمة سماسم ( أميرة فلقصة ) ....شايلة ليها كمية من ( العصاير) قالت ( الأفوكادو ) مهم للبشرة ....ما ( يفكدوك ) في شينة إن شاءالله ..!!! 

غايتو السودان دا مرات فيهو المحن ...!!تكون خلطت ليها خيارتين وتلاته جرجيرات مع الليمون قالت (افوكادو) ....!! عاجبا الاسم بس ....

قالت معليش أنا ( حداشرات ) كدا مضطرة أغادر لأني معزومة حفلة ( طه ) ...( بتغادري يا الإماراتية ).....طوااالي انتي معزومة حفلة ( طه ) ....

ياسلااام جو الناس القيافة ( أمنيات ) و( تقوي ) الذا اتنين في صاحبات مشاعر ديل...!!! أديهن الضحك بس ...وأمنيات دي كمان قدر ما تلاقيني ....تعمل لي حركة القلب ديك بالأصابعين وتقول لي (علوووب الحووووب ) ...! مش زي مودة ( عصعوص) شابكاني ليك رقبتك مالا مسلولة وجبهتك ناطا ...ينط فيك قرد شارد من الغابة... يافقر ...!!! 

( منمن ) ياخ ...!!! 

اها ناس ( أمنيات ) ديل جن عاملات (لقيمات ) ولا داسنها....!!! (والله إنتو الزيت ) .....!!! ريحتا طاقا ....تشهي ....!!! عفيت منكن .....!! بعجبني صدقهم دا ياخ البتين ديل ..(جوز اللوز) 

اوووووو اخيراً ظهرت ( عصعوص) .....( مودة كيس المخدة ) جات تقدل زي سنارة السمك ...جبكك جبكك ...!! والكعب العالي ...والشعر بالجنبة ....!! البشوف اللبسة يقول راس السنة في ( الألماني ) ...!! 

نفسي أعرف ( مودة ) دي راسا بقول ليها شنو لمن تكون ماشا ...العيون في اتجاه والنخرة في اتجاه ...والحواجبين ( سيريسلي ) ....!! حالة صعبة ....!! 

المهم ( مودة ) جات خاما ليها ( بيتزا ) ...!! 🍕 

غايتو النشوف الصندوق لو مكتوب فيهو اسم محل يبقي ( مكسب ..) لو كمان طلعت هي العاملاها ياهو ( المقلب ) ...

....!! قبل كدا جابت لينا ( كيكة ) قالت عاملاها بي يدها ...ياها ديك قاعدة من السنة الفاتت ....

طبعا ( عبير ) و ( وفطوم ) يعجبوك ....!! لآبسات من العصر ...بحبو الأفلام دي في إطار تواصل الأجيال كان يلقو ليهن نقلة نقلتين ....!! 

( غايتو ناس ( عصعصة ) ديل الا ينقلو ليكم ( ملاريا ) 

أها دي الأجواء في البيت لحدي الان ....!!! كنتا قبلها 

في (الجامع ) كواريك في السما ...إنو الاحتفال بي راس السنة حلال ولا حرام .....!!؟؟ 

نحنا غايتو ماعندنا أي مانع في الخلاف الفقهي دا ....!!

بس في سؤال مهم ...!!؟ بخصوص السنة المسكتو راسا وخليتو قعرا دي ...!!؟؟ 

باقيها وينو ...!!!؟؟؟ 

في تلتمية أربعة وستين يوم فضلت عملتو لينا فيهم شنو ...!!؟ وخليتوهم لي منو ...!!؟؟ 

ليه ما بتكلمونا عن شرعية ( الرغيفة ) وتنقد ( الرهيفة ) ...ولا الحركة ماظريفة ...!!! وخروج عن التوليفة ...

ماشايف لي أي سيرة عن التكافل وشرائح الدعم للفئات الفقيرة العايشة بالتصبيرة ....!! 

ماشفتكم حكيتو لينا عن باقي السنة وكلمتو الناس عن مسؤلياتم ...!! 

والله بس كان شرحتو لينا حديث ( كلكم راع وكلكم مسؤول عن رعيته ) دا.....!!! ووصلتو المعاني كنتو اصلو ماقصرتو...!! عديتوها لينا راس السنة وراس الدولاب ....اها استفدنا شنو ...!! دا يوم واحد وبعدي ...دايرين باقي السنة ،..باقي السنوووووووو ....!! 

ركزو معانا شوية ياخ... يرحمكم الله ...!! استغفر الله ...

خلينا في اجواء البيت احسن أها لقيت ليك الحاجه ذااااتا قاشرة ...!!! قلتا ليها علي وين الليلة ( مروسة) في ( الهوليدي فيلا ) ولا شنو ...!!؟؟ 

قالت لي ...بِسْم الله ...أبرا واستبرا ...

قلتا ليها انتي هسا عرفتي دا شنو يا حجة ....!! ؟! قالت لي إسمو ساااكت ماعجبني ....!!! 

وعقبت الحاجه الله يديها العافية إنو ناس ( سنية ) عاملين درس ديني ماشين يحضرو ....!! قلتا ليها غايتو ما بندخل في النوايا لكن (سنية ) شنو يا أمي البتعمل ليها درس ديني في راس السنة ....!!! دا ( كمين ) ساكت ....!! 

الحاجه ضحكت قالت لي ...ماهي سنية قالت بعد الدرس دايرين يعني زينا زي الناس نستقبل السنة الجديدة ....!!! 

قلتا ليها بسسسس ركزي لي علي الشق التاني ...و عليك الله كلميهن النسوان ديل ...قولي ليهن أي ( شمارات ) وقطيعة ياها ( الحتغتس ) حجركم في السنة الجاية دي ...خليهن يبدو صفحة جديدة 

قالت لي أي والله ( ملكة ) ذاتا قالت كدا....!! 

قلتا ليها هي ( ملكةً ) ....جاية 😳

قالت لي هي في اللجنة المنظمة ....!! 

قلتا ليها إذن فالنبشرك ....!!( سنة وغتست ) .....!!!!

انا طبعا مبسوط وسعيد إنو في حركة وفِي ( اكشن ) بدل الروتين الكل يوم دا ....!! والكل يمني النفس بعام سعيد ...!!! 

جيت داخل البيت اسمع ليك الغنا دا فوق ...وشلة مشاعر دي كلها قافلين عليهن الباب والصفقة ....!! بس فطوم جات مارقا من جوه دايرا تتشقا من الفرحة وجالطين الأحمر قلتا تعالي هنا دا شنو الفي خشمك دا الليلة مابخليك ...!!! قالت لي الوووب والله كلهم عاملين كدا وبنططو ....!! اقول ليها شنو دي هسا ....!!! 

الصور طلعت عالهوا في الفيس .....ما قصرتا ( يا مارك ) وإحساس بالعظمة يظهر في تعابير الوجوة ....عصعوص داخلة في شخصية ( أليسا ) ....!! ومشاعر خلااااص في الصورة ( نفشة جد ) يعني المعني انا مستضيفة البطولة ....

هياااا يا جماعة ( فلقصة ) مسنترة في نصص الصور ...😳 هسا في داعي لي ماشا حفلة ( طه ) دي ...اها طلعت حفلة ..( طلسة ) ...!! 

كدا كويس ...!!! 

؟؟

دي كانت الأجواء يوم راس السنة ...ما نقلتها ليكم ( لايف) 

لأننا انشغلنا بالبحث عن ( الرغيف ) ...

المرة الجاية 

حاوريكم انا روستا وين ...!! وشفتا شنو ... 

غايتو السودان دا حيرنا تشوف الاحتفال تقول ( سان فرانسيسكو ....) ..!! تدخل السوق الناس ( يبكو ) 

نعمل شنو .ماعارفين ....!!

لاهو( بفكنا ) ولا بنقدر ( نفكو ).....!! 

يوم ( ساكينا ) ويومين ( نسكو ) ....

الله كريم علينا بس ....!!! 

عام ....سعيد