يوميات علوب ...136 .....ودامت الأفراح ....!!
بكور صاحبنا قال لي عندو أهلو كدا عندهم عرس وعزمني أمشي معاهو ...ورغم إنو ما فاضي اليومين ديل لكن قلتا النعز بكور دا ونجبر بي خاطرو ...!! بستاهل ....!!
والحمد لله المشيت ....حفلة تاريخية ....!! ...ناس هجاجين ذي ديل قريب دا ما لاقوني ...!! فعلا للبهجة عنوان ...
أول حاجه الفنان صوتو قريب للسخلة ...!!
اسف ماقريب ...!! سخلة عديييل ....!!! نكون واضحين ...!!
لكن بأمانة بتاع الاورغن كارب ...البيز دا مولع ....والأغاني عجيبة ...!! والمباراة ( جمهور ) ...!!
غايتو ( السخيل ) دا وكت يقول ليك
كسرتني الصغيرة
بي عيونا الكبيرة
انا مابقدر بدونا
ولا بهواهو غيرا ....
تسمع ليك ورورووووووك ...دي فوق .....!! واليدين ديل في السما ....!!
غايتو في عمك كدا دا شكلو عايز يخلص حق زمان والهسا بنطط برا ....!! وواحدة كمان ذي انفعلت شوية كدا ..!!
العيون يغمتوها ويفتحوها ..!! ماعرفتو ( رمد ) ولا تبع الرقصة والرقبة تتهوزز ...!! وتنقز ....!! إخلاص شديد ....!!
مشاركة مقدرة
أها قدامي بنات كدا ( الفي النص ديل ) .....عاملات دايرة ( والدوائر مشغولة حاليا....!! ) ...كل واحدة بتتخيل إنو الأغنية دي فيها هي ...!! وتعال شوف الحالة ...!!!
أول حاجه الوش دا مدنو حبة ( كرفيسة ) كدا لزوم شوفة الحال ورفع القزاز والعيون بالجنبة يكتلو فيهن رقدوهن سلطة
مع صرة خفييفة كدا يعني ما شغالة بي زول .....وميلان أقرب للوقوف نظام التقلا ( والبرستيج ...) ...!! والموبايل لو ظابط بكون ظاااهر تبع الرقصة والمنصة .....!!
( وإلا ...فالهزاز ...والناس عزاز ) ....!!!
بس ( السخيل ) دا طبعا ذي ( الجو ) أصلو ما مضمون
طوالي قلب ليك ....ودخل في (العربية ) ومسكا ليك من الكبري ....!! اها صاحبتنا ديل نسو موضوع ( البرستيج ) القبل شوية دا ......!! قولة العربية ..!! طوااالي بركنن ...!!
قبل ما يخش في ( تودينا للسادة ) .....اليدين دي اترفعت ...!! وثكلن ..!! انا قلتا جاهن خبر ....
( وكل الأحلام معلقة في الفضاء )
دي الحفلة ولا بلاش ...!! سياحة بصرية كاملة الدسم ...!
وقف تأمل ...!! حتي تتفنقل ....!!
اها في جزء بستغلو لحظة الهجيج دي ....وضعف الرقابة وبلعبو راس مع نص الجداده الفي الصحن دا ...!!!
( ذي القصادي دي ...!! ) عاينت الملعب وانطلقت ليك بالجناح ( حق الجداده ) ..!! دا اسمو الهجوم عن طريق الأطراف ..!! باص وقون ...
أنا غايتو قون ذي دا في كاس العالم ما شفتو ...!!
( ملعوب بي حب ) ...!! ( أنا الوحيد الشايفا ) ...!!
ينفعك ان شاءالله ...!!
اها الملاحظة المهمة إنو بت دايرا ليها عريس من حفلة دي بقت موضة قديمة ....!!
والبنات جلن الحنك دا ...عشان كدا المنتخب الأكبر شوية من
بتاعات ( الكبري ) ديل ...ما مركزات مع القصة دي مشغولات في ونستن وشماراتن ....العريس دا ممكن يجي Skype كان دايرنو ....!! حفلة شنو كمان .....
واحده وراي قالت ليها إنتي ( بسمات ) دي ما عندها غير فستانا دا ...!!! قربتا أكلم ( بسمات ) لما لقيتن برقصن معاها
...!! وكمان مادات البوز ( سيلفي ) بدون خجلا ....!!!
القالت الكلام دي بالذات حاضناها ليك التقول أختا ...!!
لكن عرفتهن مالن ....!!؟
( بسمات ) شديدة شديد ....!! )
أها يازوووول والشفع ديل ذي ( الرقشات ) جارين بين الطرابيز
حقيقة مفروض يعملو إعلان يلصقوهو في باب الخيمة يكتبو فيهو عرض خاص .....
( أحجز عرسك ...!! واربح رحلة للأطفال مجانا ....)
كل شافع طابق ليهو قزازتين ( ميرندا ) وجاري زي رجل الخط
..غايتو في واحد من الشفع ديل لامي ليهو في قزازة بيبسي
كتم نفسا ....!!! دا بكون إتفطم قريب ...!! فضل ليهو يكدها.... ....ماعندو حاجة لي أي زول هنا ....!! وفاء شديد للقرازة قافلين بيها الخشم ...!! نخرتو دايرا تطير ...!! والبنطلون الناصل ....!!! مافاضي لي أي حاجة ...غايتو كان لقي لي مرتبة كان رقد بيها ....
بعد شوية أعلنوا في المايك عن شافع رايح ...اها دا قطع شك بكون واحد تاني برضو حاضن ليهو قزازة غمران بيها في كورنا .......
المهم غايتو بهجة ذي البهجة ....!!
( الحمد لله الشافع الرايح لقو نايم تحت طربيزة ....!! دا بكون خلاص اتهدا .....!!! )
اها جات واحدة كدا ماسكا ليك ولدا من يدو تزرزر فيهو معاهو شافع تاني علي مايبدو إنها علاقة حفلة عابرة ...!!شكلهم اتلاقو هنا ....لانو التاني دا شمتان في القبضتو أمو دا ...
المهم شايلين ليهم كمية من ( السكسك ) و ( البلي ) بلعبو بيهن ....!! أمو قالت ليهو ....!! دا شنو دا ....!!؟ وجبتو من وين ....!!! ؟؟
عايز تبلعن تموت لي هنا صاح ....!!؟ وزولك منطط عويناتو وقالت كدا رصعتو ليك في ضهرو ....الشافع لما إتني ....!!!
( أخير كان يبلعا بي مية مره من الدلدوم النفخو بي دا ) المفاجاة كانت إنو فردتو التاني دا سجل إعتراف قضائي
قال جابوهن من فستان العروس ....!!! 
😳😳
😳😳
اتاري الناس يباركو وهم متكلين تحت يمعطو في ( السكسك)
بالله دا كلام دا ...!!؟؟ هسا دا يسمو شنو..!! ديل شفع ولا مافيا...!! ولا دا شنو دا .... !!
العروس تكون شهرين لافة يعزلو ليها في الفستان ...!! يجو يمعطو ( الشفاتا) ديل ...!!
يازولة كرامة وسلامة مش عدي العرس واشتغل لحدي نهاية الحفلة ....كفاهو خالص ( الفستان ) دا ...أصلو ماقصر ...!!
بس لو مؤجر ..!!الشفع ديل بكونو عوقوقكم ....
واشارت عقارب الساعة الي العاشرة ( بالجديد ) وتوقف شهريار عن الصياح ....
انتهت الحفلة وانفض السامر ......!! واتخمخمت الحشود بحثا عن خط رجعة ....!! وملامح إبتسامة مرسومة علي الشفاه
والكل سعيد بما أنجز ....ويبقي طعم المشاركة هو الأكثر تجليا
...........!!
اها ما يفوتكم واحنا مارقين لمحتا ( الشافع ) الرصعو جوا دا خاماهو ( أمو ) ذاتا وهو نايم ....!! شايلاهو المسكينة ....!!
يكون نام ليها مخصوص ...كيتن فيها ..قال ليها تعرفي تدقي بس ...!! اها خمي وشيلي ....
تأملتها مليا وكانت اللقطة الأجمل في هذا الحفل ...فبكل خوفها عليه ما دفعها حتي لضربة إنظرو اليها وهي تحمله الان علي كتفها وبكل هذا الحنان ....!!!
استوقفني المشهد صراحة وهو متكئ علي كتفها .....فجاة تناثرت حبات ( السكسك ) من يده ...فقد كان قابضا عليها رغم كل ما حدث ...حتي نهاية الحفل ....قربتا أصفق ليهو دا اسمو ان تكون قابض علي جمر القضية ....!!
وعربتك المارسيدس يا السايق العربية
ان شاءالله دايما قابضين علي الفرح ....وان لا يتناثر منا كما تناثرت حبات السكسك والخرز من كف هذا البريء
ونقول للعرسان بيت مال وعيال قدر الجوكم ديل ....!!!
ألف مبروك
نسينا ما عرفنا الفنان دا إسمو منو ...!!؟؟؟