يوميات علوب ......137..... ( مايوركا)
طبعا الصادق صاحبي دا عندو ميزة ...!! هي الحقيقة ما ميزة
هي موهبة ولا شنو ما عارف ...المهم الزول دا بعرف ذي مليون نَفَر كدا ومن كل الفئات ....!!!
من زمن الجامعة الزول المسلط دا بعرف ليك الجامعة دي كلها تلقاهو بياكل في (البوش ) مع جماعة بي هنا ...!!! وتورته بي هناك في عيد ميلاد ( زحل ) عاملنو صاحباتا ....وتاني وين كدا
لافي ...!! وبالطريقة دي ...
اها في نفس الوكت عندو علاقات ممتازة ومتميزة مع ناس
( سلمي نمر ) ...( وشذي بركاوي ) و ( درة الخزين )
النخبة المخملية والأماني السندسية في الجامعة ...
أي واحدة من ديل عندها سواق بجيبا وبرجعا ....!! سواق ناس ( سلمي ) دي الطلبة بقربو يعملو ليهو السلام الوطني شدة مالابس ومهندم .....
أها الصادق ...( كلب ) ما عندو ...لكن برضو محنك ليك ناس سلمي وشذي ديل وشلتم ....والوحيد البهزرو معاهو والبساط أحمدي بيناتم ...!!! سلمي دي بالذات تلاته بس بكونو سمعو صوتا ...من ضمنهم ( الصادق) ....
هي ذاتا بت ( براااحة ) كدا ...ما سمحة قاطعة ..لكن جذابة شديد .....!! وممهههههلة ...!!
مشيها ....!! كلاما لفتتا .....!! ضحكتا .....!! كلو...كلو بالبطيء ...!! ليها حق ...!! لاحقة شنو ذاتو .....!!
كلو في ....!! وسمحة المهلة .....!!
غايتو لو وزعو( رقتها ) و ( عذوبتها ) علي الجامعة ....لنامت كل الجامعة نوم طفل وديع ....!!!
مش بقول ليك بت ذي النسمة ....!! وعذبة أنتي كالطفولة كالأحلام ....!! والكلام النوع دا .....!! بس دي ياها ( سلمي) دي ....!! مره أمها جات الجامعة ....طلعت أسمح من بتها ...!! قربنا نعمل عيد الام .....!!!
أها الصادق جابا كبيرة .....!!! قال لي بتتذكر ( سلمي ) ديك الكانت معانا في الجامعة .....!!؟ قلتا لي سلمي منو ..!!؟
قال لي سلمي ياخ ...!! سلمي نمر ...!!
والله يا اخوانا بس كأنو ( النمر ) دا هجم علي .....!!! إتذكرتها طوالي طبعا ....!! وطوالي رجعتا لي زمن الجامعة وهي ماشا قاسما ليك شارع ( إقتصاد ) دا النص ....( برق و شاقي السحاب )
قلتا لي مااااالا...... ( نسايم الليل ) ...!!! لما ضحك
قال لي عازمانا عرس أختا ....!!
قلتا لي رغم إنو أنا متأكد يالصادق ماجابت ليك سيرتي .....!!! لكن حرررم أنا ( سلمي ) ذاتا مامحتاجا تعزمني .....!! كفاية إنو شالتنا جامعة واحدة ....!!! الصادق قال لي عزيتني ياعلوب .....!! لكن بالجد كدا هي قالت لي لو عندك صاحب فرده أعزمو طوالي ....!! اها شفتا ....!!
قلتا ليهو الموضوع دا ما بحتاج اي تبرير يالصادق يا أخوي أصلو ما تتحسس أنا معاك في السراء والضراء ....!! وسراء أكتر من دي صعب تتلقي تاني ....
نمشي للدنيا والزمان نشوف عرسم دا ذاتو كيف ....!!
قلتا ليهو أها والعرس حيكون وين ...لأنو عرس ذي دا مفروض يكون في المطار مع ( الطيارات ) ديل ...!!
المهم يازول ...مشاعر تكوي في القميص والبنطلون من العصر والجزمة ( اورنيش ) مرتين ....!! والاستعدادات فووق لمباراة القمة دي ....وطبعا حنلاقي كل شلتا الزمان ديك هناك ...!!!
ياخ ديل كانن بقعدن ليهن تحت شجرة كدا في الجامعة ...ما بتعرف ( العصافير) دي فوق في الشجره ولا القاعدات تحت .....!! ( شجرتم الشباب سامنها كاس العالم ...!! )
قلتا لي الصادق ....إنتا صاحبتم ديك الاسمها ( درة ) وين هسا ...!!!
هو عليك الله شوف الأسامي دي ذاتا كيف..... ( درة ) ...
الناس ديل قطع شك كان بشكلو لجان إختيار للاسامي دي ....!! الواحدة أهلها يتفاءلوا ليها من يوم السماية بي اسم حلو ذي دا ...!! حياتا كلها تبقي حلوه ...!! وهي ما بتخذلم تطلع ....!! ( درة )
اها ( درة ) دي صراحة كانت مكسراني شديد في الجامعة ( من طرف الحبيب ) ....!! ( اللي هو طرفي أنا بس )
الصادق قال لي أكيد حتجي .....!!! داير أقع من طولي ....( درة ) دي كان عندها ميزتين غريبات ...الأولي عيونا ديل صاحيات ولا نايمات مابتعرفن ...!! ( أول مره اشوف لي عيون طابقين .....!! ) ...!! الميزة التانية إذا بكت وشها دا بكون ضاحك ومبتسم ...!!! ( الموناليزا ...والنسخة اللذيذة ...)
مره لقيناها بتبكي قالو اخوها الصغير عندو ( حصبة )
ماشافت ( الكجم ) عندو ( ملاريا ) وساكي كلاب الحلة بالطوب أها دي واحدة من الشلة دي ...!!! هن أصلا ستة بنات كدا ...!! وفي رواية اخري ( ستة ( لهبات ) .....(
سلمي ) و ( شذي ) وياها ( درة ) دي ...!!! وواحدة رابعة اسمها ( صفاء ) ....!! صفاء الربع ....!! تلقب ( بالشبح ) تيمنا بالطائرة الامريكية البتجهجه الرادار ....لأنو أول ما تشوفا لازم تتخلع من السماحة ....!! أبوها إسمو (الربع ملك الخيش ) ... أي شوال في السودان دا عندو فيهو خيت ....!! وهي لابسة الحرير...
نجي بعد داك لي ( حرم ) ....!! ماتسمع ( حرم ) دي تقول مره كبيرة ....!! ( حرم ) سامنها علي حبوبتا ....أي زول بشوفا ...!! حيكون اسمو المفضل ( حرم ) ....!! البت ولا غلطة....!!! فيها شبه شديد من حلاوة لكوم ...!! وتتفوق بالرواقه... والخدره الدقاقة...!!! ( صحي الخدار ودار ) ...!!
وسادستهم ( أروي ) ....!!! تشرب ما تروي .....أشدا ( وجنات ) في أفريقيا ....والمنطقة العربية ...وتنافس دوليا
دي ياها الشلة ...!!!
أريتا ( شلة الحبيب ) ....!!!
صحي ( النوارس ) علي أشكالها تقع ....!!!
أها دقت ساعة الزحف ...،،!! ووصلنا الصالة ....!!
صالة جديدة كدا ..!! إسمها شنو ماعارف .....!! في شارع النيل دا بعد الفلل الرئاسية ....!! عبارة عن سفينة ....!!!
غايتو دخلنا كدا ...لا بتفرز الأنوار الفوق من الأنوار التحت
...!! اللبس بس الملبسنو الطرابيز والكراسي ...!!! يكسي ليهو مدرسة ...!! خليك من الناس .....
وهي ذاتا الناس دي كانت نايمه في ياتو ضل ماعارف ....
وشوش ترقش .....!! ومنددددية ...وحالة صعبة ...!!!
يازول دخلنا نتلفت .. أنا و الصادق .....!! بس جاتنا ليك سلمي ومعاها زوجها عرفتنا عليهو ...!! إسمو ( خالد ) ...!! طلع طيار في ( طيران الخليج) ...!! لازم بكون طيار ...حيكون طبال يعني ....
المهم زول لطيف كدا وبشوش ...!!
( هو لو ما لطيف وحظو نضيف .... بسوق طيارتين ....!! )
المهم قعدونا في طربيزة كدا ...قربنا نربع يدينا ...!! الحاجات المرصوصة فيها دايرا كتلوج ....!!
( الناس دي ما بتخاف الله ...هسا برا الصالة دي في ناس من امبارح ما أكلت ...)
المهم الطربيزة مليانة عدة كدا غريبة ...!! ومستفة معالق وسكاكين ....!!
( إنها الحرب ....) ....
والظاهر الأكل دا ( بوفيه ) كل طربيزة مستقلة إداريا من التانية ....!!
( نحنا كمان وكت نقوم للبزار دا ( شيطون ) ذاتو بضاير )
المهم يازول عرض أزياء علي أعلي مستوي .....! وأصوات البنات
ديل يجرجرو في الكلام ( كمنجات ) بس .....بقولو في شنو ماعارف كييييفك كييييفك ...شفتي كييييف .....!! شفتا كيف وعرفتي ...!!؟ عرفتا ....!! بس ياهو دا .....وفِي إنجليزي برضو محشور في النص ....
أووووووو أخيرا ( الدرة ) ظهرت ...!! أول ما شفتها جاتني نفس الحالة الزمان ....!! ( عشراقة وخمة نفس ....!!) ...اللهم نسألك الثبات ...!! وبقت أحلي كمان ...!!!
لكن الحلو عمرو ما بيكمل ....!! 
😳😳
😳😳
( الحنة حدها الكوع ...) ..
😇
😇
واحد تاني محظوظ ذي ( خالد ) ختفا ...!!
تختفك ( الحدية ) رجيت الله....!!
هيا علوب استغفر ...!! افرض ما ختفا ....!! حترجاك إنتا تختفا ....!! وتختفا بي شنو ذاتو ...
عليك الله إتفرج ياعلوب ..!! واستمتع بالحفل ....!! خليني من ( درة ) و ( بره ) .....
😸
😸
( بره ) دي كديسة ناس ( عوض ) جارنا ....!! ليها مية سنة معاهم ماعرفو يسموها.... بس ياها ( بره ) دي ...غايتو دي الوحيدة البنافسو بيها ناس ( سلمي ) ديل ...طبعا ديلاك بتكون كديسة شيرازية بي شهادة ميلادا ...!!! 
😻أها حقت ناس ( عوض ) دي هي ذاتا فاقدا حنان ...!! تطنطن الْيَوْمَ كلو ...!! 
😾 عادي بتمرق تلاته يوم وتجي راجعة ...!! لاهم بسألوا عنها ...!! ولا هي بتغيب كتير ...!! ( عشرة الأيام ) ....!!
😻أها حقت ناس ( عوض ) دي هي ذاتا فاقدا حنان ...!! تطنطن الْيَوْمَ كلو ...!! 😾 عادي بتمرق تلاته يوم وتجي راجعة ...!! لاهم بسألوا عنها ...!! ولا هي بتغيب كتير ...!! ( عشرة الأيام ) ....!!
لكن بالجد في حميمية في العلاقة ودرجة عالية من الصدق تشوفا في عيونا ....!! ( عوض ) قال لي مره كنتا ماشي الدكان قال ( كديستم ) دي قالت ليهو جيب لي معاك بسكويت بركة .....!! ( دا كلام عِوَض لي ...!!)
خلينا ياخ بلا عِوَض بلا كديستو ،،،،
نحنا هسا مع الأولمبياد والأجواء الساحرة دي .....!! عالم تاني
..!! بس بعد شوية الصالة ضلمت .....!! إالا من أنوار (الايفون ) ( والجلاكسي ) ....!! ( الصين خارج الصالة )
وظهرو ذي اطناشر بت كدا لابسين ذي بعض جو داخلين يجدعو في الناس بالزهور.... !! وعشرة اولاد قاشرين بي البدل ....( انا قلتا دي بعثة صندوق النقد الدولي ...)
أها دور ليك فنان غربي كدا ....كلهم صرخو ( واااااو ....) أظنو مشهور شديد ...!! ياحليلنا نحنا حدنا ( البعيو ) .....
بس وبدو يرقصو ويغنو معاهو ...!! في اللحظة دي العروس جات داخلة معاها العريس ...!! بتصدقو الاتنين دخلو مع ( الكورجا ) دي في رقصة مشتركة ومنظمة حجل بالرجل
🕺🏼
💃🏿 غايتو إفتتاح الدورة المدرسية ما بكون عملو ليهو بروفات ذي دي ...!! بالله شوف الناس ديل بالن رايق كيف ....!!!
أها بعد شوية الشباب والبنات إنسحبو انسحاب تكتيكي وإتراجعو للخطوط الخلفية من المعركة ...مع النطيط ...!!
خلو أخت سلمي العروس دي وراجلا في النص مدورين ( سلو ) مع بعض ....ضاميها ليك ...أنا غايتو خجلتا ....!!! يشيل ويعاين ليها في وشها دا شديييد التقول كانت رايحة
والاتنين برضو بغنو مع الفنان ....!!!
إنتو الفنانين ديل منو هم ذاتم ...الناس دي حافظا أغانيهم كدا ....!! ونحنا مالنا ما سمعنا بيهم ....
هو الناس ديل معانا هنا في البلد دي ....!! ولا ما معانا ...!!
ولا مع الخيانا ....!!! ولا هو في شنو ذاتو ....
والله يغنو ليك مع الفنان دا كلمة بالكلمة .... الساعة البقول ليك
Baby .... Give you little more because I love you
يشيلو ويغرودو في عيونم ...كأنو مافي زول ...!!
( قاعدين براهم الشباب ....) ....عاجباني الثقة دي
غايتو نحنا ( بيبي ) دي لما كنا شفع جد جد ما في زول قالا لينا ....ياحليلنا ....!!
بعدين ياخ العرسان ديل صغار شديد ....!!! نحنا بس شغالين
كونتا نفسي ....وماكونتا نفسي ...لما اتكومنا ....
ديل معقوله هسا ( كونو ) نفسم الصغار ديل ...!!
يازول ها والله ديل الظاهر عليهم فتحو عيونم لقو نفسهم ( مكونين )
هو ناس رقصت الرقصة القبل شوية دي ....معقولة شاغلم
( تكوين) ديل ( مكونين ) خلقه ....!!!
الله يزيد ويبارك مبروك عليهم
المهم نحنا خلينا في نص ( النهائي ) دا ...نتابع بمتعة ...
وكلو طربيزة فيها قريب نص خروف ...يعني لو الخرفان
دي صحت ...خمسة وتلتين ( أسرة عفيفة ) ممكن تضحي العيد الجاي ...
دا بجانب المزات والسلطات والكنافة والحلويات .....والقيامة القايمة ..،..والشموع مرصرصة .....!!
🕯🕯
🕯🕯
( تشوف الشموع تقول عرس ولد ( ديانا ) ....) ...!!!
غايتو سلمي ماقصرت إهتمت بينا النصيحة ....والصادق منسجم ....!! لاقا ليك نص شلتو الزمان دي ...والسلام والمطايبة والضحيك ....!! واحده غايتو منهن رفعت معنوياتي ( شوية )
قالت لي ( الصادق ) لما عرفني بيها...!! ايوا ايوا كنتا بشوفو معاك كتير في الجامعة ....!! بس الظاهر عليهو كان ....مظلل القزاز ....ما بجي معاك تحت شجرتنا ..
( بالله دا كلو انا ) ....!!! 
☺️
☺️
بس كنتا دايركم تسمعو ( الجيم ) دي نطقوها كيف لما قالت
( شجرتنا ) .....!! مؤكد دي شجرة تانية غير ( اللبخة ) الشافتا عيني ديك ...
غايتو لو قالو لي أمنية واحده الوكت دا .... إنو يرجعو الزمن عشان أجي اتزرع ..!! و ( أترزع ) معاهم في الشجرة دي ....
أتاري إنتو لذيذات كدا وأنا ما عارف ....!! كلو منك يالصادق تعزمني هسا ...!!؟ ما كان تعزمني زمان....يعزمك المرض
هسا كانت ( درة ) دي ....في البيت مع مشاعر ....وصورة عرسنا معلقا في الصالة ....!! 
😍
😍
( الصالة بالصا ...)
غايتو الا صالة المغادرة .....
الحفلة انتهت حداشر ...حداشر وربع الحتة فاضية ....مافي جرجرة كتيرة ...العربات راكا برا ..!! وكل ( بلبل ) طلع شدرتو وماهو مؤكد إنو الاحتفالات حتنتقل الي موقع اخر ....!! سلمي قالت للصادق العرسان ماشين ( جزيرة مايوركا ) في الأرخبيل الإسباني ....!!! ( عليكم الله ما كتمت ...!!)
انا وأبو الصا ،..اكتفينا بهذا القدر من المشاركة
في هذا الاحتفال المهيب .....!! ومتجهين لي حلتنا الحنينة
ذي ديل تقول ليهم ....بيت عيال بس ...المال موجود ....
الله يدينا ويديهم ....
خسارة ( حرم ) ما جات الحفلة قالو عرسوها ومستقرة في ( ادنبرة ) ....!! ( حمام وطار )
وشال ( الدرة ) (وبرضو ) ( حرم ) ياناس القوز علينا ظلم
.........
وصلنا اخيراً إليّ مشارف الحلة ....رغم الأنوار المطفطفة
وبعض الحفر في الطريق ...لكن طمأنينة وهدوء يلفان الأفق
وحالة من السكون تفرض نفسها إلا من نباح كلاب تُمارس السمر ....
وبين أرخبيل مايوركا ....ورمال حلتنا .....تبدو المعادلة
والسؤال الصعب ...أيهما أكثر متعة ....طعم الأشياء
أم شكلها ....!!؟؟؟؟
دخلتا البيت كدا براااحة ..( فطوم ) صحت بي ...وكأنها تنتظرني ...!! طوالي رفعت راسا ...قالت لي الوووب ....جبتا لي شنو ..!؟؟ بدون ما اشعر قلتا ليها جبتا ليك ( مايوركا ) ...!! قالت لي حلوة ..،!!!؟؟
أربكني السؤال ..!! أقول ليها شنو دي هسا ...!!؟ أنا عارفا حلوة ولا ماحلوة ....!!!
لم تنتظر كثيرا ولم أجب علي سؤالها ....إبتسمت ابتسامة عريضة ..قالت لي خلاص تديني ليها الصباح ....!!! واستسلمت من جديد للنوم ....!!! وفِي محياها سرور
تركتني في حيرة من أمري .....!! لكني أدركت أنها ضحكت لأنها تثق في أنني لن أمنحها إلا حاجه حلوة ...بغض النظر عن ماهي ....!!
(مايوركا ) أسعدت فطوم رغم انها لم تراها ...!!
وأجابت الصغيرة علي السؤال ...!! يبدو أن
( طعم الأشياء هو الأحلي ...!! )
والله بدّي الجنة ...
🌹 ....
🌹 ....
ياربي العرسان بكونو وصلو ...!!
الف مبروك