يوميات علوب ...135.....جواب من ( اسماعين )
من ( فرجينيا ) لي ( فجتنا )
اسماعيل صاحبنا وحبيبنا اكيد بتتذكروهو كنا ودعناهو قبل مدة مشي امريكا ...اها رسل الجواب دا ....
قلتا أقريكم ليهو....تطمنو عليهو
دا الجواب
العزيز الغالي
علوب ...!!
أخوي وصاحبي وفردتي ....!! إزيك يارايع ....شوق الشوق ياخ ...كيفكم بالله وكيف الحال ...!!! كيف ناس البيت كلهم الحاجة والبنات ان شاءالله بخير
والله مشتاق ليكم كلكم .....ولي كل الناس وكل الحلوين والحلة كلها ....!! بيت بيت .....!! وزقاق زقاق !! ( وزنقة زنقة ) هههههههههه
إن شاءالله الناس كلها كويسة ومبسوطة ... أنا الحمد لله بخير بس فاقدكم بالجد جد ...!! ما كلام جوابات ....!! قصدتا أرسل ليك الجواب دا وبي خط يدي لانو أصدق من اي حاجه تانية ....الواتس ممكن يودي نكتة...!! يشيل حكمة ..!! يحمل فيديو ...!! لكن مابقدر يوصل مشاعر و أحاسيس ...
طبعا بكتب ليك والاف الأميال والبحار والمحيطات تفصلني عنكم ....!! صحي الدنيا فراقا ....
المهم ياعلوبه بحمد الله وصلت الي أمريكا ...بعد رحلة طويلة جدا .... ياخ دي بلد بعيدة شديد ....كنتا مضايق شديد في الطيارة ياعلوب بعد ما فارقتكم ....الأكل غلبني .... لما المضيفة سألتني قالت لي حاسي بي حاجه ....!! قلتا ليها حاسي بي غربة ....!!!
المهم في النهاية وصلنا مطار ( دالاس الدولي ) ...شوف اخوك بقي مثقف كيف ..!! كان حدنا المينا البري ...بس تصدق ( البري ) أكثر حميمية من دا ....بكلمك بي أمانة انا مابتكلم عن الشكل ....بحكي عن إحساسي ....!!
المهم نزلنا من الطيارة علي الإجراءات ...!!!
مافي كلام كتير بس يشيلو أوراقك دي يدخلو ويمرقو ....!! يدخل بيها واحد ...!! يجيك مارق واحد تاني يقشطك سؤال كدا ويمشي ....!!! بس شغالين كدا
ونحنا بالحالة دي ذي ساعتين حتي أخدنا براءة ...!! قالو لينا خلاص دخول ....( دي الحالة رفعو الحظر ....)
المهم طلعتا برا المطار .....!! أول حاجه ياعلوب برد يخج ....!! وأخوك ماشايل معاهو أي وسائل تدفئة ...بس لقيت ليك فنلة برد كدا خاتاها أمي في الشنطة ....!!! والله ياعلوب لما طلعتها بكيت بكي ..!! شميت فيها ريحتا ...!! قلتا هسا إتذكرتا كيف الحاجة دي وهي التي لاتعلم عن أجواء أمريكا شيء ...!!! لكنه حدسها الذي لايخيب...!! وقلبها الحبيب .....!!
لبستها كدا وكأنها ألبستني إياها ....!! ياحليلا مدفيانا هنا وهناك .....!!!! الله يحفظا .......
المهم يازول مرقنا برا طبعا أنا شايل العنوان بتاع قريبنا كدا ليهو زمن في أمريكا دي إسمو ( جمال ) ....!! إتصلتا عليهو
قال إنو هو شغال ....!! لكن قال لي أركب تاكسي من المطار وأديني بتاع التاكسي في التلفون ....!!!
مشيت برا أتلفت لقيت محل التكاسي .....والهوا ضاربني
غايتو ربك رب الخير من دون الناس ديل لمحتا لي واحد منهم سوداني ...!! ( بنحس بي بعض ياخ ...) .مشيت عليهو طوالي سلمتا عليهو قلتا ليهو .. أنا إسماعيل من الخرطوم ...!! طوالي إتقالدنا ورحب بي ...
( وأظنه أيضا كان في حاجة الي أنيس ...!! )
طبعا قصر علي المشوار شديد..!! قلتا ليهو أنا الحقيقة أول مره أجي هنا ...وإتصلتا من جوا علي قريبي قال لي أركب تاكسي واضرب لي من عندو ...!! وانا طبعا تلفون ماعندي ومعاي الرقم بس ....!! قال لي معقولة ياخ ولايهمك ... هات الرقم ....!! واتولي الموضوع وإتكلم مع ( جمال ) وقال لي أبشر وصلتا ....!!
( شوف حلات أبشر دي ذاتا كيف ...!!! تطمن )
المهم دورنا ياعلوب وأنا أتأمل في المدينة من خلف الزجاج وإن كنت أراها في الأفلام والمجلات ....!! وإحساس بالأمان مع
الزول الركبتا معاهو دا ..... جعلني أسترخي ....وقال كدا شغل ليك وردي ...!! ( وحبيت اللطافة والنَّاس القيافة دي دورت ليك في نص واشنطن .....!! يالطيف ....!!! بتصدق ياعلوب شفتا المدينة بي شكل تاني وإحساس مختلف ...!!
الظاهر القصة ماقصة مدن بتلف ...!! القصة قصة الريد والولف .....!!
أها أنا هنا انسجمتا مع ( أبو الورود ) ..انتشيت واتمطيت
وهو ذاتو طلع شاب لطيف خلاص قال إسمو ( اللمين ) من أولاد (جبل أولياء ) ...هل تعلم ياعلوب بالونسة والكلام جرا طلع ودخالتو صاحبي وقرا معانا في الجامعة ....( غايتوالسودان دا يمحن .. ) ...
أها علي حس # ودخالتو _قرا _معانا دي ....كان مصر نمشي ناكل حاجه ويكرمني ....!! شكرتو جدا واعتذرتا ليهو شديد .....!!!
( والله لو اخبرو عمدة نيويورك بهذا الحوار بيني وبين الرجل لجزم أنها الكاميرا الخفية ...!!! )
المهم وصلنا قريبنا دا ....!! وليتنا لم نصل...!! لم يكلف نفسه من باب الذوق أن يسأل عن حساب التاكسي وانا طبعا أصلا ما محتاج ليهو بس ساكت كدا من باب الكشكرة ...!!
دا بكون قايل إنو لو اتعلَّم برود الخواجات ديل بكون أنجز المسكين ....!!
المشكلة بقت في ( اللمين ) والذي رفض بشكل قاطع ان يأخذ الأجرة ...!! ووصف إصراري علي دفعها بالعيب ....!!
( أها دي لوعرفها ( ترامب ) لسقط مغشيا عليه من هول ماسمع .....!!! )
وبين اللمين وجمال تبقي مسافات وأميال .....!!
مضي ( اللمين ) البشوش وتركني ل ( جمال ) العبوس
والذي فشل حتي في أن يأخذ نصيبه من اسمه ...!!
بالجد ما ارتحتا لي مقابلتو نفسها أداني احساس انو هو مشغول شديد ومافاضي و أداني تنوير ياعلوب إنو البلد دي لازم الزول يعتمد فيها علي نفسو ...!! يعني المعني ما تعتمد علي كتير ... !! وانت بتعرف ياعلوب نحنا أولاد بلد نقعد نقوم علي كيفنا ....وانا أصلا ماعندي كان أي نية اقعد معاهو ولا اشغلو ...!! بس باعتبارو قديم في البلد بديك المفاتيح ويختصر ليك الزمن ....!!! نحن أمريكا ماجيناها...!! لكن بنعرفا وبنقدر ظروف الناس ...بس هو استعجل ....
المهم يازول من محلي داك قلتا ليهو انا أصلا مرتب أموري ...وانا بس حبيت اسلم عليك لأنو ناس البيت والوالدة تحديدا طلبت مني كدا وأصرت وانت بتعرف انها دايرا تطمن علي ...وعشان أكون معاك اكثر صدقا ....!!
أصلا أنا ماكان عندي نية اقابلك من أول يوم ...!! نحن بنقدر المشغوليات ...قلتا يوم يومين وبتصل بيك الدنيا ما طايرة ...بس دي وصية الحاجة عشان كدا نفذتها ...!! بتعرف قلب الأم ....
أحس ببعض الحرج ...!! قال يعزمني ناكل ...!! ( انا ما قلتا ليك الزول دا مسكين ...!! ) ...!!
أنا أخوك يا ( وهيبة ) ....!!! نحنا الأكل عندنا ماعزومة ...!! الأكل إكرام ...!! كان تجينا هناك تشوف كان ماضبحنا ليك ...!! شابكني ليك ( اني ويز ) ...و ( هيييي مان)
كم كلمة كدا حافظم ...!!! بكون حدو هنا ....!!!
لم انتظر معه طويلا ...قلتا ليهو خليها مره تانية وترانا قاعدين ...!!
لكني أحسست ببعض المرارة ما بدس منك ...!! الغربة أحيانا تغير النفوس ...لكنها لاتفلح مع من كانت نفوسهم أصلا راضية مطمئنة فهذه قادرة علي العيش والبقاء في كل الأجواء
....،!!
المهم ياعلوب مشيت لي فندق صغير كدا ...الْيَوْمَ بي خمسين دولار ...دفعتا حق أربعة يوم ...علي بال ما أقابل الجهات المعنية
لتقنين أوضاعي ....!! أجواء الفندق الباردة ...!! وبرودة الناس
هنا ...!! جعلت يومي باردا ...وتملكني إحساس بالضيق ...!! حتي تساءلت في نفسي إنو أنا الجابني هنا شنو ذاتو...!!! ومالذي رمي بي في هذه البلاد ....!!!
نمت ليلتها نوم ( الديك علي الحبل ) وتذكرت كيف كنت أتوسد فراشي في السودان وطمأنينة من كل مكان هي التي تغطيني ....!! أحسست بالضيق الشديد ....!! صحوت باكرا
وحسب العناوين ذهبت لأكثر من جهة ...!! وأشيل وأتلفت قلتا إمكن ربنا يلمني في ( اللمين ) بتاع التاكسي داك تاني
والناس القيافة ....!!
لكن يبدو أن هذه المدينة قادرة علي ابتلاع كل شيء ومن الصعب أن يتكرر فيها المشهد مرتين ....!! الناس هنا في هذا البلاد ياعلوب في حالة مشي وهرولة دائمين ...!! جيئة وذهاب ..!!
لا ادري الي أين هم ماضون ..!!! وهل هذه الحركة دائرية ....!!؟ بمعني أنهم يعودون لنفس المكان أم أنهم ذاهبون دون رجعة ...!! لا أدري ....!!؟ ولكنهم قطعا في حالة سباق .....!!
( ولا أظن أن هناك فائز....!!!!!!!)
سكنت الان في احدي البنايات في ( استديو ) صغير في حتة اسمها ( فرجينيا ) لكنه يستوعبني وأحس فيه بالخصوصية أعطوني كل اوراقي القانونية للإقامة ....!!
وأبشرك ياعلوب بتصدق لقيت شغل ...!! 
😳 اي نعم ..!!حاجة كدا سريعة لحدي ما نشوف الحاصل شنو و أكيد نعمة من كريم ...
😳 اي نعم ..!!حاجة كدا سريعة لحدي ما نشوف الحاصل شنو و أكيد نعمة من كريم ...
الحتة السكنتا فيها دي فيهاحاجة كدا بين ( البقالة والسوبر ماركت ) هنا هم بقولو ليها ( إستور ) ) بتاعة واحد( يمني ) كدا ....!! بجي بشتري منو موية وسكر وحاجات ذي دي ....إتكيف مني كدا لله في لله بدون سبب ..اظنها دعوات الحاجة المتكررة أن يوقف لي أولاد الحلال في طريقي ...!! المهم إتعرف علي ....!! وقال لي بي لهجة يمنية ( قحة ) ...لم تضربها الراجمات الامريكية.....!!
إنو جدو كان شغال ومستقر في الخرطوم قبل ثلاثين عاما ....!!! قال لي كان يحكيلنا عن السودان والسودانيين وأنهم من أفضل شعوب الأرض ....!!! قلتا ليهو هذا من طيبكم ونحنا دايما برضو بحكو لينا إنو في أي حي كان هناك مايعرف بدكان ( اليماني ...) ...وهو من المعالم المهمة ....أنتم أيضا أهل حضارة وتجار شاطرين .....!!! المهم ياعلوب عمك ( زيد ) دا ...!! اسمو ( زيد با عزيز ) قال لي رأيك شنو تشتغل معاي في ( الاستور ) .....وكانت كل المؤهلات أني ( سوداني ...)
بالله بتاعين المطار ديل مش مفروض يدخلونا بي زفة ....
المهم ياعلوب الساعة بي خمستاشر دولار ...حسبتها بالسوداني للصباح ما نمتا ...قلتا عشرة ساعات بشتغل أنا جاي لي شنو هنا ....!!
قبل يومين رسلتا للحاجة واخواتي تلتمية دولار .... ( إنتصار ) أختي المجرمة دي قالو زغردت بي طول حسها ...وقالت عقبال ( الآي فون ) .......!!!
صدقني يا صديقي هذه الفرحة والبهجة التي أدخلها في نفوسهم هي ما يخفف عني كل هذا الألم والبعاد ...!!
بتصدق ياعلوب لما فتحتا الشنطة بتاعتي ..لقيت ناس البيت ديل خاتين لي الكعك والبسكويت والمنين ..!! وويكة ناشفة وبهارات ( ونبق ) ..( عارفني بحبو) ...!! ما بتتخيل بكيت قدر شنو ياعلوب وهسا انا بكتب ليك في الكلام دا ودموعي جارية ...!! اشتقتا ليهم ياخ ...!! بالله ديل مش ناس يستاهلو اشتغل عشانم عشرين ساعة ....!! الله كريم علينا بس ...!!
أنا أخواتي ديل ما دايرم يحتاجو لي زول في الدنيا دي ..!! ولا تنقصم حاجة .....لحدي ما اطمن عليهم ...والصادق دا يخلص الجامعة ...!! والحاجة دي كمان كلاما برا.. الله يقدرني وأفرحا ...محضر ليها مفاجاة عايز اوديها العمرة ...حتفرح شديد ...
معليش ياعلوب دوختك بس انتا صاحبي وفردتي وبفضفض معاك ....!!!
علوب الحبيب أرجو ان لانقطع اخبارك عني وسلم لي سلام خاص علي كل زول في الحلة ....غايتو أكتر حاجه هزتني إنو ( بكور ) أداني جواب كدا قال لي افتحو لما تصل هناك ....هل بتصدق ياعلوب لقيت فيهو ( خمسين ) دولار ...ماعارف اصرفا ولا أبرزوا ....!! الله يقدرني وأرجعا ليهو خمسين الف واكتر ....!! طوالي اتذكرتا ( جمال ) قربتا اقول ليه تعال شوف كل الجمال ...
كلما اتذكر دموعو في المطار ( بكور ) تخنقني العبرة ....
إتصلتا بي عمك ( عطية ) أكتر من مره ...!! ياحليلو ياخ .....تعرف بقول لي شنو في كل مره ...!!!
أها ما جايينا قريب ..!!؟
بضحك معاهو كدا واشاغلو ....وانا من الداخل أكاد ان انفرط نحيبا ....!! الله يجمعنا في ساعات الخير وأن شاءالله دايما هو طيب ...!!
عايز أرسل ليهو جهاز بتاع فحص السكر اشتريتو ليهو ...!! بفتش لي علي زول ماشي السودان ...!! يجيبو ليهو ...عليك الله ياعلوب تمشي ليهو من وكت للتاني ....!!!
لم التق بسودانيين حتي هذه اللحظة بس قالو انهم كتيرين
هنا ....!!!قريبنا ( جمال ) لم يحبطني فيهم ....ويكفي ( اللمين ) صاحب التاكسي وسائق الأمنيات
المهم أكيد حالاقيهم و أكلمك ....!!
تقبل كل معزتي ومودتي يا أجمل أخ وصديق ...!!
ملحوظة
علوب عليك الله لو درتا اي حاجه من هنا أخوك موجود ما تعمل لي فيها حساس ...!! خيرك وافضالك سابقة وانا اخوك ...!!
بس اوعي من الايفون ههههههههههه
دمت في رعاية الله انا عارف ياعلوب إنو السودان دا صعب وحار بس صدقني ياعلوب ...الله دا اصلو ما بظلم زول ....قسما بالله في حاجات في السودان لن تجدها في اي مكان في الدنيا ...ولن تعرفها الا بعد أن تغادر ...ان شاءالله نتلاقي في ساعة خير ودعواتك لي ....!!!
البلد دي حتي الشارع الرئيسي بتاعا اسمو ( الدائري ) يعني بلف المدينة كلها بس في النهاية برجعك محل بديت ....!!
بس طبعا الميزة الوحيدة هنا انو الدولار بي دولار 
😜
😜
علوب نسيت اقول ليك ....الناس كلها هنا شغالة دولار 
😂😂😂😂😂
😂😂😂😂😂
الله يخليكم لي كلكم ....وفِي أمان الله ..،
اخوك ابدا ....اسماعيل المبارك
فرجينيا ...
الثامنة مساء بتوقيت واشنطن
.............
................
أها دا جواب اسماعين ....قريتو سبعة مرات لحدي هسا
ياحليلك ياسمعة ياخ وبالكتير ....!!!
إنتا ما إسماعيل ود المبارك ...!!!
انتا ( إسماعين) ود السرور ....
ربي يحفظك ويغتيك
سلام ياصاحبي....