يوميات علوب ....116 ....حكومة والنَّاس أهالي
غايتو ناس حلتنا مانسحرم عولمة جد اليومين ديل اكبر موضوعين عندنا ....الوزارة الجديده والعلاقات السودانية الامريكية
يازووول اي زول يدلي بدلوه ...،وواحدين بيدلو (بجرادلم )كلام الطير في الباقير ....ومثقفاتية الحلة ديل طبعا زوووول فاهم بقولو في شنو مافي ...!! لاقيت ليك واحد منهم اسمو عبد الناصر (شوف فخامة الاسم ...) ..!!! قلتا ليهو كيف ياناصر كيف الحكومة الجديدة معاك ..... ...قال لي ...لا جديد ....هو فقط ( اجترار ) للماضي بمسمي جديد ...!!!
بس كدا مازادو معاي ...وانا مازدتو ....!!!طبعا ( اجترار ) دي بعرفا هو وبس ..وبكون معاها ذي تلاته كدا في الحلة ...!!
اها عندنا واحد اسمو الرضي ( ناشط ) معتزل ...!! قلتا ليهو شنو يارضي ماسمعتا صوتك ...شوفو الرد ذاتو كيف قال لي ...صوتي يأبي البوح لانو مبحوح ....!!! والحا خفيفه ....
يازووول قلتا ليك الحلة دي كلها تنظر ....ناس ميادة وعصعوص وأميرة صاحبات مشاعر ديل ...اها ديل مركزات علي وزارة الاتصالات ...!! (وشارع السيد علي...!!! ) ...!! ( واتس ) بس
هياااا اخوانا صبري ذاتو بنظر ....!!!!جاني يتجرجر
قلنا ليهو اها كيف الحكومة الجديده معاك ....!!؟؟ قال لي جضيضه شنو كمان انطا ياعلوب اعلنوها ظماااان ...!!! ( بالله دي ولدا دي )
لا وكمان مشي لي علي موضوع تاني قال لي انتا في الوظاره ولا طرامب قالو قال( الصودان ) بقي حلو ....!!! والله طرامب طلع لظيظ ...ههههههه (لي هسا ماعرفتا الضحكة دي لي شنو.....!!)
لكن والله انتا قربتا اكتر من ناس ( اجترار ديل ) ...) ....!!! وعقب الفقري....!! قال لي يعني طاني العشا (كنطاكي ) بس ....!! يوزززززع ....!! صبري يحكي عن رفع الحظر وفك الحصار بكلمتين ...!!!( بقي حلو ....!!! وكنطاكي ..)...لم يفعلها أعتي المحللين ...!!! أفحمني (المبري ) هذه المره ....!!! الزول ده لازم نشوف ليهو طريقة يطّلع في قناة العربية ......!!
غايتو اهما شي اانو إشاعة كمال بتاع البنك حيستوزرز دي راحت في ستين داهية ...يازووول كمال علي حس الإشاعة دي مشيتو ذاتا اتغيرت ...!!! (تاني رجع للحركات .....!!! ) انا ماعارف البطلع الإشاعات دي منو ...يكون ده هو ذاتو ياربي ...!!
اها ناس (بله ) يعجبوك لقو ليهم مولد..... لقيتو ليك قدام دكان ( يس ) قبل الاعلان ده ....!!! بتكلم عن كمال ..!! ودراسة كمال...!!! وعلم كمال....!! وتخطيط كمال ،....!!! تسمع( كمال ) تقول ( كمال اتاتورك ...!!!) ....!!
( كمال ) وينو فهمو ...!!! ووينو تخطيطو ...!!! والله الحاجه الوحيده الخطط ليها ياها عرستو لي ( فلقصة ) دي وحتي دي
ماتماها سمح ...!!!! (كمال ) شنو عليك الله ...!!!
طبعا ناس( بلة ) ديل( سماسرة ) ...!!! وزارات يعني ممكن يدقو ليك ( طار ) للزول كدا يا ( وصل ) ياكمان ( طار ) ...!!
عندنا واحد في الحلة ماعندو اي شغلا يقضاها اسمو ( دهيب ) لمو فيهو ناس ( بلة ) ديل ودهيب خدوم ....!!! ودهيب حافظ ...!!! ( بتكون الفاتحة ومعاها سورة ) ..ودهيب رهيب ....!!! اها يا مؤمن. يامصدق ....دخلوهو اللجنة الشعبية ومنها انطلق الي ( المحلية ) ...!! ( محلية بحري ) ...!! وكانت ( المحلية ) هي الطريق الي ( العالمية ...) ...والله ياهو داك عضو قال في المجلس التشريعي للولاية ...( أمو ) ذاتا عارفا ماتامي (دهب ..) سمتو (دهيب ...) ...!! أها لو سألتو قلتا لي انتا يادهيب (تشريعي ) يعني شنو .....!!؟؟ ماحتكون في اي حاجه ..!؟ ولا اجابة ...!! ولا اي شي ....!!! ولا حتي تعبير في الوش ...!!! والله جد ....!!! هسه ( دهيب ) ياهو داك يحل ويربط ....!!! وفي جماعة لو عندهم سماية بقولو ليك نكلم ....!! ( دهيب ...!! ) ورهيب والله رهيب ...!!!
ودهيب من شدة ماكان مخيت الحله دي (جيئة وذهابا ) وبدون اي شغلا ...!!! ( كلب ) ناس حاج التوم (التافه ) ده
بزوغ منو .....!!
هسا الا مواعيد مسبقة حتي تلم فيهو ...!!! واحتمال كبير ماتلم .....!!!
عشان كده انا كنتا خايف كمال ده فعلا القاهو محشور في التشكيلة الجديده دي .
غايتو كانت تكون دي العوجة ذاتا ..!!! هو كدا مابسلم عَلِينا وزير دي معناها ...حيقفل ليهو كم شارع كده في الحلة ...!!! اها قبل ايام لاقيت ليك ( بله ) ده صدفة كدا قبل اعلان ( النتائج ...!! ) قلتا ليهو انتا شنو حكاية كمال وزير ...!! كمال وزير ...!!! الفاكنها فينا دي ...!! اول حاجه الحكومة الجديده دي فيها صبعتاشر حزب ...كل حزب عندو سبعين مرشح ....غير سيد القهوه ...!!! كمال ده هو ذاتو شايت وين ماعرفنا ....( بله ) قال لي ها ااازول ها انتا بي صحك ....!! انتا ماك عارف (كمال ...) كان في الحزب البي غادي (الأصل ) واختلف معاهم وبقي في البي جاي ( الفرع ) ...!!! وهسه الحكومة ذاتا باقيه علي (الفرع ) دا بس ...(صغيبر وجاهل.... ) مالا ومال الشجر الكبار ...!! ( الشجر الكبار فوقو الصمغ ) ( والحيكومة ) دي جنها وجن (اللصيق ) الكتير ...!!! فهمتا ...!!!
(لأول مره افهم....!!! يابلوله الهمبوله ... ومنك تحديدا ...بتصدق )
...!!! أها ظهرت النتيجة وكمال ما زاعو ...!! وتنفست الحلة الصعداء ...!!! لكن الفرحة ماتمت .....!!
بلة طمني ..!! قال لي جلا من الكبيرة ....علا حرررم مابفوت الصغيرة ...قلتا ليهو الصغيرة دي شنو ...عرسة تاني ولا شنو ....
..قال لي الجاب سيرة (الولية ) منو .....اااعلوب ...بقصدلك ( الولاية ) ...الولاااايووه ) .....!!
يلوي بطنك يابله ...انتا (وكمال ) ...في يوم واحد ...!!! يعني حنقعد تاااني ننتظر نتيجة ( الولاية .....!!! )
ياربي ( كمال) ده مجموعو يدخلو ..!!؟ ولا حيمتحن ملحق ....!!! ..............
أوعي بس من القبول الخاص ...!! وفضلنا وحاتك منتظرين ...
رمضان ثبت ...الا بتاع العدل ماقدر يثبت ...قدا عربي ..!!
تصومو وتفطرو علي خير