يوميات علوب ....117 ...يامطيرة صبى لينا ...
غايتو أى زول تسألوا من طرف فى العالم ده تقول ليهو ياخ لو سمحت سؤال ..!! ماهو أجمل فصول العام بالنسبة لك ...!!؟؟ طوالى حيقول ليك الربيع...!! وبالعدم الخريف ..!! وفى واحدين كدا رومانسيين بختارو الشتا ...!!( يقولو ليك شتاء ديسمبر دافئ بالحب ...!!) .....!! (دافى بالدا ) !! المهم بس ياها دى الخيارات..... طبعا نحنا الصيف متصدر...!! أما بالنسبة للربيع فمعذرة الدواير مشغولة حاليا ...!! ما موجود عندنا فى القائمة أصلا ...
اللهم الا كان (الربيع ) ود جيرانا .... !! وحكمة الله ده ذاتو (ضارب ) ....!! أكبر ( رمتال ) فى الحلة دى..!!... من ضل لى ضل...!! بكون مصدق بالجد إنو (ربيع ) ....!!
نرجع للخريف واللوارى البتقيف...!! أول حاجه اكتشفتا ليك إنو نحنا الوحيدين فى العالم ده كلو البنقول المطرة (دقتنا....!! ) ...!! أى والله الدق الوااحد ده....!! ماعرفتها مطره ولا دانه ...الناس دى كلها مدورة...!! زخات المزن ...!! المطر والرزاز ....!!..الحب والمطر ...!! المطرة ( أم دق ) دى عندنا نحنا حصرى ..!!
مطرتنا ذاتا تقيييله مابتجى براها متعوده تجي قداما الكتاحة تقش الدرب...!! طبعا البلد دى الكسرة والقراصة ماخلت ليها حطبة شجرة لافه تصد الرياح .....!! كلو تحت الصاج ...!! النهار كلو نغنى... الزهوووور والورد شتلوووها جوووه قلبى ....!! (كدى اشتلوها لينا قدام البيت أول حاجه ...) ...!! ومن لم يستطع (فبقلبه ) وذلك أضعف الإيمان ....!!
أها على حظنا الضارب كالعادة كنا فى نص الشارع وكت المطرة دى معاى النذير وجعفر أصحابنا وبعد ما الكتاحة (ضربتنا ) جات عليها المطرة ( دقتنا ) ...!! ( بالله ده هسه جو ولا مصارعة )... غايتو بقى علينا جنس منظر ...!! الشعر مجلبط والتراب والموية عاملين شغل ...!! (ضريرة جرتق ) ..!! ...(عرسان بس ) .....!!
وقالت كدا المطرة دورت شووووو ...!! تلاته ساعات ...دون توقف ....!! طبعا الشي الطبيعى إنو بعد المطرة دى تقيف الجو يبقى رهيب ..!! وتتفتح الأزهار ..!! وتزقزف العصافير .....!! مش كدا ....!! اها ده كلو ماحصل...... الحاصل انو الشوارع والميادين إطمبجت بالموية....!!! والحيط شربت لما اتشرقت ....!!! والعصافير نصها مات ...!! تحلف تقول المطرة دى صبت فى حَلتنا (الحا مفتوحة ) ما فى حلتنا بكسر الباء .....!!
وقالت كده الضفادع اتلملمت فى دقايق ونظمت صفوفا....( ياربى بكون عندها واتس ....) ده شغل قروبات السريع ده .......!! وبدأ الكورال....!! غيييغ غاااغ ...!! غيييغ ....!! شالوها ليك بى نفس واحد ....!! يمين شهونا العافية.....!! لا وكمان منظمين...!! واحدين يى صوت عالى وجزء بشيلو بى ورا ...!! فضل ليهم الأورغن ...!! انا بس حاجه وااحده محيرانى ....إنو ( القعونجات ) دى كانت ( مبركنة ) وين المده دى كلها ....!! لا...!! ومافى أى فاصل ...ياخ عليكم الله بس ( فاصل اعلانى ) ننوم فيهو بعد داك ممكن تواصلو ....!!!...لأنو ماممكن ياخ... غووغ ...!!غاااغ...!! الليل كلو .... بتكوركو ليكم مية سنة ادوكم (علاوة ) ...ولا شنو العباطة دى ....!! لكن واضح إنو (الضفادع ) دى عندها رسالة دايرا توصلا ....!! جد جد ..ده ماكوراك عشوائى ....!! ...!!ياربى تكون محتجة على تصريحات (حميدة) الزمان ديك ..!!؟؟ كلو جايز ...
اها ماصدقنا الحفلة دى (بردت ) شوية بدا (الاوفر نايت ) ..!!! (بعوض السنين ....!!) ... أها ديل كمان الغتاته الأصلية ...والله لو قرصتك ومشت مافى اى مشكلة أهو نقول شافت شغلا وقامت بالواجب...!! لكن العرض الجوى البتقدمو جنب أضانك ده يقولو عليهو شنو ....!! فوووووو ... وتمشى وتانى تجى... فووووو ...وجنس (طنطنة) وكلام فارغ ...!! عليكم الله هسى دى ما حقارة ....!!! نقعد نحنا الليل كلو نصفق جنب اضنينا ....!! وأنثى ( الأنوفليس ) ترقص ....!! شوف المستوى الوصلنا ليهو ....!!
المهم فى الموضوع إنو حلتنا البهية بى قدرة قادر تحولت الى البندقية الإيطالية ....
ناس الكجم طلعو ذى (القعونجات) ديل ....!! جوووه الموية حتى الإضنين .....!! ومعارضة (المطرة ) برضو قدموا عرض ...!! وصبوا جام غضبهم على الحكومة بمافيهم عمك (بلة ) المستهبل ده ....قال الحكومة ماشايفة شغلا ....!! لكن السنة دى أحسن من الفاتت ...!! لا ياشيخ ...!! اخير نسكت بس.....!!!!
غايتو نوع ناس (بله ) (المواسير) ديل اخير منهم المطرة أم (خيران ) دى ....!!
لكن بى أمانة فى ناس كده ولا عايزين حتى حوشم ده يظبطو كان الموية دى تطلع ....ان شاءالله راجين الحكومة تجيكم جوه البيت ....!!؟؟
غايتو يالراجين المحلية ...!! كترتو المحلبية ...
اها بعد القيامة الرابطة دى كلها فتحتا ليك الفيس القى ليك البوستات دى كها (فايحة) دايرا تتطرشق...!! تتحدث عن الجو الخرافى فى الخرطوم ..... !!! .... صدقو عملتا لايك .....!!! جينا ليك والشوق دفرنا .....!! غاااااغ ...