يوميات علوب ....115 ....( سورانتينا )
غايتو بس مرات الواحد كدا وكت مايلقي ليهو موضوع بلقي نفسو متابع ليه قصص ذي قصتي دي ..
اول حاجه انا (الرياض ) دي ماعندي حاجه توديني ليها لا ايسكريم (لذيذ ) ولا (بيتزت ) شنو ديك ماعارف اسما ....ولا شارع المشتل ...!!! ولا القصص دي .... اها الليله جابني الدرب بس ...!! في شركة هناك عامله اعلان قالو دايرين محاسب ..!!! قلتا كدي النجرب امشي أحسب ليهم ....!!! الشهادة ومبروزه....!! والخبرة مافي ...!!! باقي لينا الحظ بس ...!!! (وده معدوم طبعا ...) الا الأمل موجود ...!!
المهم مشيت الشركة دي ..قالو لي خت ورقك ده هنا ...!! لو عجبنا بنتصل بيك ....!!! قلتا ليهم اها ولو ماعجبكوووم اتصل انا ....ههههههه وفكيتا ضحكة....... قلتا يقولو الود ده ظريف نعينو ....!!! لقيت نفسي بضحك براي ....!!! طوالي سكتا وهم ذاتو ولا قالو لي بتقول في شنو ....!!؟؟ المهم خليتو ليهم ومشيت ...!! ( أهو عملنا العلينا....!!! ) ...ذي كل مره ....!!
(انا ماعارف متين حيعملوا العليهم ....!!!) ...!!!؟؟
المهم وانا مارق لقيت (طياره) خاشه ...!! سألتني قالت لي دي شركة ( سوميتا ) قلتا ليها أيوا ..!!! عايزه تقدمي ....!!؟؟ ( لقيت نفسي سألتها كدا تووش ...!! ) وهي طوالي ردت ....(تكون قايلاني من جماعة الشركة ...) قالت لي أيوه عايزه أقدم .....!! عرفتا طوالي انو ( طيارتي ) قامت ....!!!
(كان لي مراد أمشي اجيب ورقي الختيتو جوه ده ....!!! )
بس بصراحة البت تستاهل بغض النظر عن المؤهلات ....!!!
دي كان ساااكت قعدت (تحسب ) في أصابعينا ديل مكسب للشركة دي ...!!! مالم ومال (علوب ) جا متأخر.... وناس ( علوب ) اتكسرت بيهم الرقشه ....!!! والكلام الفارغ
ده ...!!! خليهم يكسبو زمنم ....!!!
اها دي كووولها ما القصة .....!!! القصة ياها الجايه دي ......
و انا طالع بالحالة دي لقيت لي محل جميل كده شكلو من بره ...!!! القزاز والتظليل والقيامة ....!!! قلتا ياخ خلينا نخش نشوف ذاااتو هو في شنو هنا ...!!! والعالم دي بتعمل في شنو ذاتا ....!! يازول اتوكلتا طوالي اتقشطا.....!!!
اول حاجه المحل تلاجة موز بس ماشاءالله .....سااااقط لمن بهناك ...لما نعستا ....!! اها وناس قاعدين كده كيمان كيمان ...!!! طلع هو ذي (كوفي شوب كده ومطعم ....!! ) اسمو ( سورانتينا ) هسه تقول ليهم ( سورانتينا ) يعني شنو .....!!؟؟ يقولو ليك ده (اله ) الحب عند الإغريق.... ( يلتخو ليك اسم من راسم ...ويكبو ليك في الجماعة ديل ....جننتو (الاغاريق ) جن ) ...ماعلينا....!!! المهم المحل حلو ....!!! اضاءة لذيذه ...!!! وموسيقي هاااديه .....!!! و أجواء أوروبية ...!!!
( شوف ديل وين ....!! ونحنا مع دكان (عمك ) يس ..!! )
الناس الجوه ذاتم نضااااف .....ومتمريييين ....!!! بتمسحو بي شنو الناس ديل ...!!!؟
لا وكمان جنس أدب ...!!! مافي أي صوت طالع ...اتذكرتا ليك نادي (الشعلة ) جنبنا ...!!! كواريك تجيب الطاشي ....ياريت كان بلعبو ( غولف ...) بس شغالين ليك ..خمسييييين ....!! (كشاتين السنين ) ...!!! تعالو شوفو القفلة دي هنا كيف ...!! جوكرا بايظ ....!!!
اها لقيت نفسي بتلفت كدا جاتني واحده ...!! (مضيفة بس ....) ...!!! هي ذاتا حلوة ....!!! قالت لي اتفضل ...!!! براك ولا معاك حد ...!!!؟ قلتا ليها نحنا معانا الله بس ...مش مفروض تقول لي ونعم بالله ...!! ولا علقت ...!!! ماعارفا ذاتا انا قلتا شنو ...!!! المهم قعدوني ...!! قعدتا ... !! ذي مسمار النص .....برااااي ..الله ورقبتي .....!!! واشيل واعاين وأتلفت ...( الطربيزه ) الجنبي دي فيها تلاته بنات وولدين ...!! بنات حلوات خلاص ....اتنين منهن عندهن (وجنات )...!!! مش حاجه غريبة ...!!! اها كمان جنس قرقرابه وضحيك يشيلو ويعاينو لي موبايلاتم دي ويعلقو .....!!! قربتا أقوم اشاركم الفرحة .....!! ياربي بشوفو في شنو الجماعة ديل ....!!؟؟؟
والله يا اخوانا اول حاجه البنات ديل ....نضافة جد ....!!! ولبس حلو جنس حلا ....!! وريحه حلوه طاقا ....!!! هو الأولاد ذاتم مقصرين ....!! بناطلين جينز (مشرطة ) كدا والشعور دي مفلفله وتتلامع .....!!! ياربي يكونو أولاد خالات البنات ديل ...!!! شايف الحالة واااحده كدا ...ومرات في (رصيع ) في الضهر متبادل مع كل ضحكة ...!!! (ربنا يخليكم ومايحرمكم من بعض ودايما (متراصعين ) ومتلمين في السمح ....)
اها ونضارات الشمس دي كمان مجدعة في (الطربيزه ) ذي الكبابي ....!!!
وزول شغال بالتاني مافي ...!!! (غايتو دي أحسن حاجه عجبتني في المحل ده ...!! ) كل طربيزة عالم تاني ...!!انا الوحيد المتابع ...!! حكم بس...!!
اها في (الطربيزه )الجنبهم طوالي في ولد وبت ...ديل لاعبين راس ..!!! ولا داسنها...!!! حب عديييل ...بتشم ريحتو من بعيييد ...!!! يشيلو ويعاينو لي بعض ...!!! والبت غازا ليها سماعات في اضانا تكون مشغلا ليها أغنيه ( بتغمز ) فيها و وتحلي ب (الحبيب) القداما ده ......!!! ده اسمو ( حب اون لاين ...!!! ) (أجدا نوع ) ....!!! وهو ذاتو يعاين ليها جوووه عيونا ....!!! غايتو جنس ثقة ...!!
هسي البت دي اصلو ماختت احتمال أخوها يجي داخل فجًّاة كدا ....!! يشوف (غرويدة ) العيون دي ....!!!
لا لا ما ظنيت ...!!! دي ما ثقة زول خايف ...!! انا خايف اخوها ذاتو يكون في الطربيزه التانيه دي ...!!!
هيااا اخوانا ده كلو كوم ...!!! انتا ذاتك دخلك شنو ياعلوب ...!! الحشرك شنو أساسا في الموضوع ده ...!!!! يعني دخلتا المحل عايز تشتري الناس الفيهو ....!!! داير تجيب شمشرة حلتكم دي هنا كمان ...!!! يازول احترمتا نفسي وسكتا ....
اها بعد شوية جابو لي ( المنيو) وقائمة الطعام والشراب ...
والله كأنو جابو لي خبر ...!!! بس قعدتا أعاين ليك فيهو طلع
أصعب من امتحان الشهادة .....!!! قلتا النشوف اخبار (الجداد ) شنو...!!؟؟ مشوي ولا محمر....!!! بس القي ليك (chicken fajita) مشيت طوالي للترجمة .. ( جيكن فاهيتا ) ...!!! اها دا كيف هسا (الفاهيتا ) ده ...!!؟ بياكلو حي ولا شنو ...!!! قلتا مامشكلة اشوف البعدو القي ليك ( جيكن سب ) ....( اخير الفاهيتا ...) طوالي قلتا ليها جيبي عصير ليمون بس يكون بارد عليك الله ..!!!
غايتو الزول بس كان يجيب (ديك حبصة ) هنا ...يوريهو اسماء ( الجداد ) في (الرياض ) دي كيف .....!!! (والجدادة) الطفت النور منو !!!؟
(اقعد انتا اتعولق كدا من حيطة لي حيطة ....!!! (الجداد ) بقي ( فاهيتا ) و( سب ) ....!! كرهتنا الحلة ذاتا ...!!!
صدقو عصير الليمون طلع بي خمسة وتلتين جنية ...!! الله لاغزا فيكم بركة ...!! انا ذاتي الدخلني هنا شنو ....!!!
يازووول بعد شوية الموسيقي الشغالة ذاتا وقفت ...!! انا قلتا خلاااص الحمد لله الكهربا قطعت ...!! يدونا قروشنا بس ...!!
طوالي دورو ليك (هابي بيرث دي تو يو ....) والبنات الشغالات في المحل ديل ..أتلمن كلهن وجن شايلات (التورته ) ختوها في طربيزة الولد والبت البحبو بعض ديل ...( طوالي لقطتا ليك اسم البت في التورته مكتوب ( لميس ) ....!! (لازم تكون لميس ) حتكون منو يعني ...!!!
يازوول بس بقيت متابع الفلم ده ....اها ناس (الطربيزه ) الجنبي (جماعة الموبايلات ) ...اتلمو معاهم وكلهم بدو يصفقو ويغنو مع بعض اتاري طلع ده عيد ميلاد ( لميس ) وعاملنها ليها مفاجأة .....!!! لانو لميس لما شافت البنات ختو (التورته ) اخدت ليها خلعك كدا قربتا ألحقا بي مويه ...و قالت كدا نطقت اوووووو ....اووووو ...اوووووو (ماي قود) ....!!! وعشان أكون دقيق قالتا كدا ( ماي قوش ) ...الظاهر اوووو ...! دي لازم تكون تلاته مرات ...( بعد الاكل ) وقبل ( ماي قود .....)
وأعقبتها (لميس) ب ( اتز ..ريلي ...امييزنغ سربرايز )
انا بس كنتا دايركم تشوفو الطريقة القالت بيها الكلام ده ...!! وختة اليد في (الخشم....!!! ) اسف...... ال ( ماوس ) ....!!
لا لا لا مابتتحكي ..!!! مابتتحكي ...!!! بتتشاف بس ...!!! غايتو نحنا كان كدي بس ضيعنا زمنا ساكت كتلونا كتل بي ...(بريزنت كونتنيوس تنس ) ....( وبرزنت بيرفكت تنس) ركزو لينا عليها ...!!! وخلو اللغة ....هسا (لميس ) دي القراها منو ....!! دا مش سؤال مشروع .....!!؟ قالتا زيها زي اي خواجية ...!!! (عصعوص ) ماعندها غير. (اوكي ...) ومره مره ( بليييز ) كرهتنا بيها الحلة .....كان تجي تشوفي (سربرايز) دي قالوها كيف ..!!
المهم غايتو انا اتاثرتا تأثر شديد ...!! بالله هو الليلة عيد ميلاد ( لميس ) ا ياسلاااام ياخ ...وليي ما اديتونا خبر .... علي الأقل نجيب الهدية .....ونشارك ...!!!
اها الظاهر الناس ديل كلهم (شله) واحده بس كانو مديين لميس وحبيب لميس ده فرصة ....!!!! شايفم بقولو ليهو( صلوحي ...!! ) صحي ( صلوحي ) ...!!! بكون اسمو (صلاح ...) ...يعني حيكون ( صالح ) ...انتا كمان ياعلوب ...!!!
المهم الظاهر كانو فاتحين لي (لميس ) (وصلوحي ) ديل يحبو بعض ......!!! طلعتا انا الوحيد الغريب في المكان ده ...!!! (غريب والغربة سترة حال ) .....!!!!
لكن اهو الحمد لله شاركنا بي ( الليمون ) ...ابو ( خمسة وتلتين ده .....!!!؟ ( نحنا كمان ما ناس واجب ...!!! ) ...
هسا ياربي أقوم ابارك للبت دي ولا ابقي مارق ...!!اخترتا الاجابه التانية .،،ينعل ابو اي حاجه .....!!!
ررررررركششششه ....ودينا بيتنا ....ياخ ...مبروك يالغالية عقبال مية شمعة ...!! والامة مجتمعة ....!!! هسه انا ليموني ده بي خمسة وتلتين ....!! غايتو انا شلتا هم الفاتورة للجماعة ديل في الصحانه المردومة والعصاير ...!! ده غير التورته والكوفي (لاتييه) .....!!! اي والله سمعتها بي اضاني دي قالت ليها خمسة ( لاتييه ) ...(انا قلتا ديل اصنام ولا شنو ....) ...!! وواحد (كابتشينو ) ...عليك الله ياعلوب فاتورة شنو كمان ...!!! انتا شيل هم رجعتك ....!!! هو ناس طلبت كابتشينو ....مابكون عندها حقو .....!!!
ناس بتاكل ( فاهيتا ) ....!!! وناس تاكل في (خاطرا )
وسايقا (صلاح .....!!! ) ....!!! صحي يالميس .....!!! ؟؟؟