الحلقة المئة وثمانية عشر من يوميات علوب مع الطيب عبدالماجد

يوميات علوب ....118 ...!!! ( ليلة القبض علي ( أمونة ) ....

الحلة دي مقلوبة فوق تحت وحالة الطوارئ معلنة ...قالو ( أمونة ) قبضوها في بلاغ (شيكات ....!!! ) ايوه امونة الواااحدة دي ...!!! مرقت من الصباح تاني ماجات راجعة ....!!! شوهدت اخر مره وهي تلقن عمك ( يس ) سيد الدكان درسا في الأخلاق لأنو زاد تمن (الصلصة ...!! ) ...!!! سألتو عن السبب ..!!!قال ليها (الدولار ) زاد ...!!! واريتو كان ماقال ....!!! لمت ليك فيو سمعتو ليك الفارغة والمليانة....شهتو العافية ...!!! قالت ليهو أول حاجه كدي فهمني انتا ( يس ) سيد الدكان ولا ( حازم ) محافظ بنك السودان ....!!؟؟ ( غايتو امونة طلعت قادره العارفا اسم المحافظ .....!!! وواصلت (الرصينة ..!!! )...قالت ليهو الليلة بس توريني انت ذاتك علاقتك شنو بالدولار ...!!؟ وبتعرفو من وين ..!!؟؟ تكون شغال (عملة ) ونحنا ماعارفين ...!! غايتو هجمت ليك الراجل لما نطط عيونو ...!!! ( جابت ليها تجارة عمله كمان ) ....!!! قال ليها خلاص خلاص يا امونة ياخ شيلي الصبر ...!! ما الصلصة دي شيليها ان شاءالله مجان ...!!! وليته لم يفعل ...!!! ( قايلا بتحلو ..!!! ) ...!!! تاني نطت ليك فيهو ....!! مجان ...!!؟؟؟ ليه شايفني شحادة ....!! هييي أحسن ليك ياعم ( يس) أنا لحدي هسا محترما (شيبتك ) دي ...!!! ( الحالة محترماها ...) ...!!! ماتخليني انفصم فيك...!!! ( ياربي (امونة ) دي فصمتا كيف ) ...!!؟؟ ( غايتو يحلك الله الليله يايس ....!!! ) وواصلت القصف ....!!! ولحقتو بي اتنين وهي ماشه .....!!! قالت ليهو والله رخستك يالدولار البقي يسعرك ( يس ) السجمان ..!! وهملتكم يا الأمريكان ....!!! وركبت الحافلة ..... !!! خلت ليك عمك ده يتلفت برا ....!! غايتو السوتا فيهو رقدت ....!!! سوات العاصفة بي ساق الشتلة الني ....!! صحي الصلصة (وصية أمي ) ...!!! 

اها ده كان ملخص لاخر ماتفوهت به الراجمة ( أمونة ) قبل اختفاءها المفاجئ حسب شهود العيان الجنب الدكان ....!!! ودي كل الحيثيات المتوفرة حتي الساعة ...!!! ومن الوكت داك تلفونا مغلق ومامنها خبر....!!! ومن المبكر توجية أصابع الاتهام لأحد أو جهة....!!! أو تبني فرضية عمل ارهابي ....!!! 

يازووول نسوان الحلة يعجبوك متجمهرات قدام باب ناس امونة من العصر ودرامات تقيلة .....عاصرات بيت (الشيكات ) ده 

وناس مشاعر وصاحباتا (الاوادم ) لقن ليهن موضوع متحزمات ومرصرصات في نص الشارع .....والكل يدلي بدلوه ...!! 

أميرة (فلقصة ) ...!!! كمان عاملة فيها متأثرة وكاتمة البكية ...برضو يقولولو ه ليك الدراما السودانية ضعيفة ...!!! ) يمين العاملاهو أميرة ده لو برة كان جاب أوسكار ...ياخ أنا ذاتي صدقتا ...!! اها مع دموع التماسيح دي كمان تشيل وتوصف....!!! والليلة يا امونة ...!! وياحليلك ياحنونه ....!! (خلاص كتلتا ...!!! ) ....!!! هو غايتو بالذات (أميرة ) دي ماكان في داعي للكلام ده لأنو قبل كدا( أمونة ) دي ذاتا جاراها من شعرا قدام الناس في بيت عرس ....( مشكلة في كرسي كدا ...!!! ) وقالت شعرا تركيب ...!!! هسا في داعي لي (حنونة ) دي ....!!! 

اها جات ليك من هناك (عوضية ) ...(وسبب الأذية ) ...!!! بت ناس القاضي اها دي مدير مصنع (الشمار ) في الحلة دي ....!! خطبوها تلاتة مرات وعقدو عليها مرتين ...!! نجو كل الضحايا ..!! واتفرغت هي للقضية ....!! اسمها في الحلة (رويترز ) ...!! الخبر كلو عندها ....!!! هي ذاتا عارفا كدا ..!! ولا بتتلفت ...!! تعشق الأجواء المتوترة ومشحونة ....!!! تستمتع جدا لما الناس تكون مشدوها ...أجمل يوم عندها يوم تكون في مصيبة ...تجيد صياغة الحكايا ونسجها ...ولو مافي قصة (حزينة ) ...!!! ممكن تتبرع بي واحدة من عندها ....!!! مرات كدا من غير سبب بتكتب في صفحتا علي الفيس ....( غايتو ذي ده لاشفنا ولا عرفنا ...!! بس نقول الحمد لله...!! الظاهر القيامة دايرا تقوم ....!! ) بس كدا ياهو دا البوست ....!!! فهمتو حاجه ..!!؟؟ ولا أنا ...!! ولا هي ذاتا ...!!! بس تنزلو كده وتقعد تنتظر التعليقات البتنزل ذي المطر .....!! ( النوع ده ناسو كتار ...) والتعليقات تترصا ...!!! في شنو يا عوضية ....!!؟؟ الحاصل شنو ..!!؟ عوضية مالك ..!!؟؟ 😳

وهي ولا كأنها هنا ...رد واحد مافي لأنو أصلا مافي حاجه ...!!! وبتكون في قمة المتعة وهي بتقرا .....!!! وتستأثر بالاهتمام ...!! عوضية فاقدة (حنان ...) ....!! ونقص في فايتامين دال ....!!! (دال للغلال) (معمول بحب ) عوضية فاقدة حنية ....الزِّي ناس عوضية ديل دايرين زول يحتويهم ويرعاهم بي فهم....!!! (يفكك ) مشاعرم دي براااحه ولا بنفجرو في اقرب لمة ...!!!

داير تشوفا في أسعد لحظات حياتا ...!! احضرا بتقول في كلام والنَّاس مركزا معاها....!! ده بكون يوم مناها وسعدها ....

اها جات ليك من هناك والجماهير دي كلها منتظراها ولَم تخيب ظن الحضور .....اخدت ليها سرحة كدا لمزيد من الإثارة والتشويق ( عفيت منك يابت القاضي ...!!! ) ( العاجبني فيها انها محترفة ) ...!! وقالت كدا كبتو ...!!! قالت امونة رسلت رسالة ( ذي ) الساعة أربعة ونص كدا من تلفونا قالت هم ماشين علي نيابة بحري ...!!! وبعد داك تلفونا قفل ...!! 

وطبعا ( ذي ) دي اهم من تحديد الساعة ذاتا لانها بتريح المستمع شديد وبتحسسو بالمصداقية ...!!! اللعب كلو في ( ذي ) دي .....!!! ماقلتا ليكم عوضية دي (عذاب )...!!! 

اها نسوان الحلة طوالي نططن عيون وبلعن ريقن ودخلتن الخوفة ....ونسوا السؤال الأساسي ...!!! إنّو الرسالة دي اترسلت لي منو ....!!؟ وعوضية ذاتا عرفتا كيف .....!!؟ وطبعا عوضية للأنباء ما اتبرعت بالمعلومات الإضافية دي ....

وأصلا مافي زول سأل ....خلتم علي كدا ...!!! ده في علم الشمار تفسيرو إنّو الحدث الاكبر بياكل التفاصيل الصغيرة....!!! ! وده الفرق بينو وبين الشمار الناعم ومدقق لأنو النوع التاني ده أصلا مبني علي التفاصيل ....وهنا يكمن الفرق ....!!! (وده شرحو يطول ...!!! ) عوضية لاعبة علي النوع الاول ...!!! وهي تجيد اللعب في هذه الخانة كمهاجم صريح ....المهم انها عملت العليها وختت الساس ...!! بعد ده اَي زول ممكن يجي يردم من عندو علي ( الصبة ) دي ....والداير (يسقف ) علي كدا ممكن عادي ...!!!

طبعا عوضية ولارمشت وهي بتقول في كلاما القاطعا من راسا ده ....!! درشتو بكل ثقة ...!!! واخلت المنطقة بكل هدوء ...

عندها (قهوة ) كدا بتمشي تشربا بعد المهمات القتالية دي ...!!!

المهم نحنا وشباب الحلة واقفين من بعيد نراقب في الأزمة ....

طبعا الهادي اخو امونة ده صاحبنا وياهو ود الحلة ...والله هو زول مسكين شديد وفِي حالو ... ...!!! هو ذاتو واقف معانا لكن ما شغال بالموضوع ...!! عارف امونة اختو دي خمستاشر جنيه ماعندها خلي دفتر شيكات ...!! لكن بس أهو قاعد منتظر زينا كدا...!! 

اشوف ليك من بعيد مشاعر مبلمة بي التوب داخلة ومارقة ...!!! خلاص يعني البت مشاركة ...ناديتا ليك بالجنبة كدا ..!! قلتا ليها خلاص امشي البيت الدنيا (فللت ) وعبير وفطوم ديل براهن ...!!! بالمناسبة انتو (فللت ) دي يعني شنو البنقول فيها طوالي دي ....!!! (أليل ) الليل دي ممكن....!!! لكن (فلل) الليل دي يعني شنو ...!!! ؟؟ واحدين كمان يقولو ليك الواطة ( فللت ) ...!! ( عزيز أنت ياوطني برغم قساوة المحن ....!!! ) صحي فللت...!!! 

المهم ماعلينا ...!!! قلتا لي مشاعر حصلي اخواتك البنات ديل ...!!! 

الساعة الركبت لي وش المسلسلات داك ...ولوت ليك بوذا 

قالت لي امشي كيف ياعلوب و أمونه مامعروفه حية ولا ميته (خلاص شوشو قرضتا ...) ....!! قطع شك ناس الحلة ديل كايسين ليهم موضوع ...!!! طولو من الأحداث ...بس جيت عليها قريب قلتا ليها في أضانا اطلعي لي سريع من الدور ده ...!!! أنا بوصل ليك شمار (أمونه ) ده في محلك امشي هسا حصلي اخواتك ديل....!! طوالي فكت ليها ضحكة صغيره كدا ومشت البيت ...!!! اتلفتت علي قالت لي ماتنسي ...!!؟ طبعا ده ياهو المقعدا ....!!! وبي غادي الحاجه طبعا قاااعده مع النسوان ...!!

اوووووو المعلمة ( سنية ) ظهرت ...!! أبو أي حاجه ياخ ...!! شخصية هي ذاتا المرا دي عاملا رجلينا( المكجولات ) ديل ...لكن والله النصيحة كاريزما عالية....!!! غايتو (سنية ) دي مفروض كان تكون وزيرة ...!! أها الأنظار كلها مشت عليها ...ذي الناطق بي اسم الجيش لما يكون في عمليات ...!!! الناس كلها ركزت معاها...!! ولَم تخيب سنية الرجاء جابتا كبيره قدر راسا ده .....!!! قالت في جماعة شافو أمونه في ( سرت ) شمال ليبيا ....!!

أبو الزفت ...!!! أمونة عبرت ...!! وسنية جات من الاخر...!!! (ايوا كدا ده الكلام الواحد وكت يسرق يسرق جمل ....!!! ) واتدخلت (فوزية ) لتبني وجهة نظر ( سنية ) وتعمل إسناد جوي وتدقق (شمار ) صاحبتا قالت اهااا عشان كدا هي لاحظت إنّو امونة كترت من التهجد المره دي في رمضان في إشارة اكثر عمقا لزيادة الجرعة الدينية إنّو امونة ( ادوعشت ) ولحقت بالجماعة...عليك الله شوف النسوان المابخجلن ديل ....!!! ملكة طبعا شتارة السنين ...قالت يعني كان كدا الزول مايمشي الجامع ولا شنو ...!!! 😳..وكدا ...زووول قال ليها إنتي بتهببي في شنو مافي ..!!! قربتا أقول ليها ....!!! وكدا ....!!! 

بس جا ليك (ود الحاجه ) من هناك يجرجر في رجلينو الطوال ديل ...!! قال يااخوانا النسوان ديل ماعندهن شغلا ولا شنو 

(امونة ) دي لو جات لقتن متجمهرات هنا بتقوم بيهن ...!! اخير يفترقن ...!!! 

المهم العشا دخل كدا جا ليك صبري يتلولح 

وعند ( المبري ) الخبر اليقين ...!!! اصلو لا فرز نسوان ولا رجال طوالي خطب في الجمع ...

قال اها يانصوان بعد دا ممكن تشططو ....!!! امونة اتصلت 

قالت هي كويصة بس (طلفونا 📞 صرقوهو في الحافلة🚌 وهي ما حطجي الا تحضضا 👌مع (صواق ) الحافلة ضه وطجيب طلفونا ....(انتهي بيان صبري ...!!! ) ...!! ود الحاجه جراها ليك ضحكة قال اها وقع ليكم كلامي ...!!! طلع موبايل (بنكك ...) تحويل رصيد سويتو شيكات ....!! هسه المهم نطمن علي سواق الحافلة ...!!! البسمع تلفونا اتسرق يقول جلاكسي 8 ياهو تلفونا ( الملصق ) ده ....!! ( البنات من بعيد يضحكن علي تعليق ودالحاجه شاتو علي الطاير بي صوتو العالي ده ......!!! ) 

غايتو أنا العاجبني في ( أمونة ) دي انها في ولا مافي منجضا الحلة دي ...

هسا المشكلة ما في ( أمونة) المشكلة في عوضية وسنية وفوزية ...ديل ...يطيرن وين بعد الانقلاب الفشل ده ....!! 

غايتو عوضية بتلقي ليها طريقة ....!!! المشكلة في ناس ( سرت ) ديل ....!! 

لكن ماهو مؤكد الان إنّو الحلة علي موعد مع التحقيق والتحري ....بتهمة التلفيق وشهادات الزُّور ....والكذب الضار ...(دي صحيفة الاتهام ....) التحقيق برضو حيجر ويشمل الناس الجات والماجات في المِحنة دي ....!!! والراجح انو التحقيقات حتاخد وكت واستماع للشهود ...!!! بس من المؤكد والراجح إنّو الحلة حتمر بمنعطف حرج وحساس ....والإعصار ( أمونة ) قطع الكبري ) في طريقة الي الحلة ....!! والحساب ولد ...يعني الزول مايقفل تلفونو في البلد دي ولا شنو ...!!؟؟ 

والما جا في ( شيكات ) أمونة ما جا ....!! صحي يامنمن ...!!؟