يوميات علوب .....125....عرس ( الزين ) ....أرضا (صباح )
عندي صاحبي كدا اسمو( الزين )...!! لاقيتو في حوادث بحري بعمل في الامتياز ...كان اخدوهو ( طب الجزيرة ) الوكت داك ...وكان ودوهم دورة عزة السودان دفاع شعبي ..!! قبل الجامعة....!! قال لي هسا بنعمل في الالزامية
غايتو بالخبرات دي مفروض يدونا رتبة ...وقعد يتذكر لي في ايامم
ديك في عزة السودان ...قال والله عزيناها عزة البلد دي ...
بحكي لي الزين قال لي مره عملنا احتجاج كدا ...
قلنا مستوي الأكل متدني ...والعدس فيهو حصحاص ...!! والزيت ده ( ذي ) معتت كدا .....حتي ( زي ) دي ذاتا قلناها ساكت كدا حركات ( مثقفين ) لكن هو النصيحة ياهو ( العتيت) الواااحد دا ...!!! ما داير ليهو ( زي ) ...
أها هسا الكلام دا فيهو حاجه .....!!!يازووول القيامة دي قامت ...!! العساكر يضحكوا ...معبرين عن دهشتهم واستنكارهم وشجبهم للحركة ....
قالو حصحاص...!!؟
خليتو العدس مشيتو علي الحصحاص ....!!! طيب لو اديناكم ( حصحاص ) بس ..كان عملتو شنو ...!!؟
اما قصة الزيت ( مر ) ومعتت دي ...اعتبروها تمرد عدييييل ( أدونا الزيت ) .....
واحد من التعلمجية ديل اسمو ( الخير ) (ماشفنا من اسمو ده ولا حرف ....
قال لي اها عمك( الخير ) دا داير يموت من الزعل ....!!! قال والله لو جايين مطعم مامعقولة تقولو جنس كلامكم دا ...( دايرين ( البينزا ) مش كدا ...!!؟
قاصد ( البيتزا ) ....!!
( البينزا ) البي ( النُّون ) دي تكون ( النسخة المسلحة ) ....!!!
قال دا كلام أعوج شديد ...!! وكلام شين ...!! تخجلو بس ...هسا لو ماشين تحاربو ومالقيتو أكل ...تقعدو تبكو كدا ....!! انتو قايلين نفسكم شنو ...!!؟ انتو عبارة عن ( ملكية ) مابتفهمو اي حاجه... ( وتمومة جرتق ) ساكت ...!!! كان دي الحالة
ولم يكتف بذلك ...!!! داير يقول ليهم إنتو خسارة فيكم التعليم قال ليهم إنتو ( خسارة ) المجتمع ...!!!
بس جماعتك قالو دي فرصة طيبة يلطفو الأجواء وويهظرو معاهو ...!!! كنوع من الدعابة ...!! وكسر جمود العلاقات الثنائية بين الأشقاء ....!!!
قالو ليهو أها وبمناسبة الخسارة دي دي حنلعب دور الأربعة ولا خلااااااص ...طرنا من الدوري ...!!
بس كدا ...!! رموها بي كل هذا اللطف والظرافة ....!! كنوع من الدعابة البريئة ( الممزوجة بخجل ) ....!!! معاها ضحكة خفيفة كدا عربون محبة و إلفا ....!! ( مش كلام ذي العجب ..!)
فالظاهر شنو ....!! الجماعة فاهمين الموضوع غلط ...!! قايلنها لمة كدا ....!!! وجمعية أدبية ...وكلمة الطلاب الجدد ...!! وتعارف ...!!! وانتا من وين ..!!؟ ونحنا من هنا ....!! وكلام ذي دا ...
فعمك ( الخير ) ( التعلمجي ) ده الله يديهم ( خيرو ...!! )
( وشكلو كدا دا ماحيحصل قريب ...!!! )
قال ليهم .... ابددددا....!! ماف كلام زي دا ....!!! القال ليكم منو ...!!
ياخ إنتو حتلعبو دور الأربعة ....!! وحتخشو الدوري ...!!! وتشيلو الكاس كمان ....!!! افوووو ...انتو الزيكم منو ....!!! جماعتك يضاحكو سااااكت قايلنها رحلة نيلية
وطلع ليك صفارة كدا من جيبو ..!! زي الحاوي .... وتوووووووت صفر ...!!! نحنا قايلنو انبسط لحدي ما وصل مرحلة ( الصفير )
اها مع صفارتو دي جو تلاتة عساكر ....!!! ( الزين ) قال لي هم في الحقيقة تلاته ( عواميد كهربا ) ...!! كل واحد يقول للتاني انتا شنو ( طول في عرض في إرتفاع ....) ....( خزانات تمشي علي الارض ...
عمك الخير دا قعد يوسوس معاهم كدا ...الظاهر أمنو علي فحوي الاتفاق ...!! وتوصلو الي قرار ...!!! لكن علي مايبدو أن ثمة نقاط خلافية لاتزال عالقة ...!!! لانو العسكري التالت دا سامعو بقول ليهو !! هُم قالو كدا كلهم ...!!؟ ولا في واحد بس هو القال ...!!؟؟ ( ياسلام ...!! سؤال وجيه )
التاني قال ليهو افرض واحد قال ....!! حتفرق شنو يعني ...!!؟ 
😳
😳
اها نحنا في اللحظة دي أدركنا إنو المفاوضات باتت تأخذ مسارا أكثر جدية وان هناك حوار عميق ومسؤول ...وإنو الناس ديل في طريقهم للتوصل الي حل ....!!! وقد وظهرت بعض نقاط الالتقاء ...!!! لأنو ومن خلال متابعاتنا ورصدنا لردود الفعل وقراءتنا المتأنية ( لوشوش ) الجماعة القدامنا ديل...!! كل المؤشرات تدل علي قرب التوصل الي اتفاق ...
وان العملية باتت مسألة زمن ...!! وَمِمَّا لا شك فيه ان الساعات القليلة المقبلة ستشهد مخاض اتفاق بات وشيكا ....( وشاكة شديدة )....!!
غايتو نحنا حيلنا دا... برد ....!! وبالفعل يبدو ان عاصفة ا( المرخيات ) قد بدأت ...!! ( ماعارف سموها كدا لي شنو...!! ( رخية واحده مافي ) شادننا من يوم جينا )
اها الخير دا تاني ( صفر ) ....!! مع صفارتو التانية دي واحد فيهم فجاة كدا وبي أعلي صوت قال اييييييينتباه 
👨🏻🎨
👨🏻🎨
يازووول رطططك ....!! رطططك .... وقفنا انتباه ....!! 
👐
👐
طبعا دي اول حاجه علمونا ليها ...قالو لما يقولو
( إنتباه ) ....!!! لو شايلنك في ( نقالة ) خاشين بيك العملية تقوم تعمل ( إنتباه ) وبعد داك تاخد إذن وتمشي ترقد تاني في نقالتك ...!!! نحنا يوم قالو لينا المعلومة دي للصباح مانمنا ...
اها يازول انتبهنا ....!!!
واقفين ليك ( حطب ) ( والتلاتة نيسانات ) ديل واقفين يعاينو لينا ...ويتحاومو فينا ...ونحن في النص كابين ( إنتباه ) ....
ولا نفس ...!!
واحد منهم قال الظاهر إنكم بقيتو لذيذين وبتاعين نكته
وهزار وبتحبو الضحك ....وكدا ..!! ماشاء الله عليكم ( مبروك )
اها نحنا يا مؤمن يامصدق فرينا خشمنا تجاوبا مع هذا الإطراء
الرشيق .....!!!
( غايتو عرفنا الهزار والضحيك ... إلا ( كدا ) الاخيرة دي ماعرفنا قاصد بيها شنو ....!!
واستطرد قائلا .....!! ودا معناها انو نحنا طلعنا ناس ( خيخة ) ساكت بدل نعلمكم ( المرجلة ) علمناكم ( الهرجلة ) ( هسا في داعي ) ...خلااااص باظت
الوكت دا أسمع ليك صوت ( بلعان الريق ) ده واااضح ....!! ( يبدو أن ( الكتاحة ) شارفت علي الوصول ....!!!
و أضاف عمك الصول معقبا ... وطبعا دا بوري إنو لسا عضمكم ... ني ...!! وعايشين علي ذكريات الحلة ....!!!
والليلة العصرية ماشين ناس ( زبيدة ) ....!!! وَيَا أمي الفطور بي شنو ....!!
( والله صاح ...!! الزول دا التقول كان قاعد معانا في البيت ) ....! صحي حليل فطور أمي ...!! ا
بس ( زبيدة ) دي منو ...!!؟؟ 😳
😳
قال وناسين إنو دا مصنع الرجال .....!! قايلنو مصنع ( صلصة)
...!!! أها في اللحظة دي نحنا كلنا رقدنا ( صلصة ) .....
أنا متأكد نص الطلبة ديل ...الأمنية الوحيدة ليهم و الأمل اليتيم البدور في راسم في تلك اللحظة التاريخية ...!!! انو دا يكون ( حلم ) وفجأة الزول يصحي يلقي نفسو في بيتم مجدوع في نص الحوش...!! والشمس ضربتو وداخل خامي غتاهو يتم نومتو جوه الاوضة...!!! ( في ( معلمين ) بجازفو ( الحلمة ) ذاتا مابتنقطع ...بخشو بيها الاوضة ...! !
لكن للأسف البالغ ...!!والبالغ جدا... واضح انو القصة اكثر من كونها ( حلم ) ....إنها الحقيقة ...وفِي الحقايق ( الحامضة ) شديد ....!!
لأنو داك تاني قعد يكوركً .....!!! المرة دي بي صوت الأسد....ايييييييييييييينتباه ...
......!! رطططططك انتبهنا ....!!!
وقفنا ( قنا ) ،،،،!!!
قال لليميييييين دور ......!! اورررررر دورنا.... ورمينا الإشارة يمين ....!!!
قال لي بدا لينا العرض بي حاجه كدا اسمها (البيادة ) ...!!! لذيذه جنس لذاذا ....!!! إسما ذاتو حلو و لطيف ودمو خفيف .....!! كدي شوفوهو بالجنبة كدا ( بيادة ) ...!! حلو مش ...!!؟ 
👋
👋
يعني ذي ...( ريادة ) كدا ... !! ريادة البنوك والمصارف ...!! وريادة الاعمال ...!! والكلام الحلو دا ....
كمان فيها شبه من ( عيادة ...!! ) صاح ...!!؟؟
نفس النغمة ( بيادة ...!! عيادة ) ....
🎼. ( عيادة ....بيادة ) 🎼.
🎼. ( عيادة ....بيادة ) 🎼.
ياسلااام ...دكاترة وطب ....!! والعريس دكتور...!!! والقصص دي ....!!
أو كمان فيها لمحة من .. ( زيادة.....!! ) دي كمان ( سكر ) بس ...!!! ( زيادة ) في الماهية ... ( زيادة ) شاي بي لبن ...!! الحاجات دي ...!!!
بس ( بيادة ) الهنا دي غير ....!! أبدا ما كنا قايلنها عاملا كدا أو إنها أصلا حتلاقينا في يوم من الأيام...!!! ( وبريدك ياشقي الأيام )
طلعت عبارة عن إنك تكون ماشي ...!!
ماشي وين ...!!!؟؟
ولي شنو ....!!؟؟
وبتصل متين .... ...!!؟؟
دي كلها أسئلة إجاباتا في رحم الغيب ....!!!
اها رأيكم شنو في الكلاو دا ....!!! بالله مش إحساس مثير ومميز .....!!!
السير نحو المجهول ...!!إحساس المغامرة ...واللامعقول ..!! ( احساس يقطع القلب دا من جوه ...) دي ياها البيادة ...!! ( ياربي عايزين يبيدونا ...!!؟؟ )
بس بعد شوية جا العسكري التاني دا ....قال دايرين الدوري مش كدا...!!!؟؟ اها ماقلتو لينا دايرنو كيف ..!!؟ الانجليزي ولا الدوري المحلي ...!!؟
طبعا في الطابور ممنوع ترد ...!!!
تسمع بس ...!!! وتعمل ميت ...!!
في حل تاني ..!! تعمل ( رايح ) ...( وهذا أضعف الإيمان )
اها في واحد معانا ( شهادة لندن ) اسمو ( منذر ) ...اتفاعل مع السؤال ...قايلو ( جاتنغ ) في الواتس
قال ليهو ( الإنجليزي ياعمو ...!!
وكان ذلك هو الْيَوْمَ الأخير الذي نلمح فيه ( منذر ) في المعسكر ....!!! قطعا تم إرساله للارسنال يحضر (لايف ) من هناك
...بعد مدة عرفنا انو ( الخير ) قال ياهو يا ( الود ) دا في المعسكر ....!! فعلا تم اعفاء ( منذر ) ...!!
( اعفوهو من ال UN ...!!!!! ماياهو المعسكر ده ...!!! عقبالنا كلنا )
أهلو ذاتم ماصدقو جو بي نفسهم ( المعسكر) ذي تلتاشر عربية كدا ساقو ولدم ومشو ...!! بكونو ( ضبحو ) قايلنو اتخرج
...!! لكن غالبا ذي دا حيعملو ليهو معسكر خاص في البيت ...!!! واحتمال كبير يجيبو ( عمك الخير ) دا دروس خصوصية ...!!
اها نحنا من الْيَوْمَ داك شغالين ليك ..!! عمو....!! عمو ...!! كان يطردونا...!! زول اشتغل بينا مافي ...!!!
الزين قال لي معانا واحد اسمو ( محجوب ) وكت قنع بقي يقول ( عمو الخير ) عديييل ( داير جلاهو بالاسم ...) الخير ( الغتيت) عرف نومتو ...!!! بقي لما يقول ليهو (عمو الخير ) برد عليهو ...ايوا يا ( المحجوب ) ود أخوي بتدور شنو ...!!
محجوب وكت زهج قال ليهو ماداير حاجه....!! اشتقتا لي ( خالتو ) إكرام .....( لعب بالجوكر المحجوب )
بس دي كانت أول مره اشوف الخير عايز يقع من الضحك .....!! قال ليهو والله لو ( إكرام ) ذاتا جات هنا مابتحلك ...!!
محجوب ذاتو بالغ ....!!! كمان الفرق بين ( عمو ) اليابانية والصينية وااااضح ...( منذر ) داك قالا بي كل احساسو وعواطفو النبيلة ....!!! صاااادقة كدا وبي ضمير ....!! الله يغتي عليهو ...!!
المحجوب قال لي انا لو قلتا لي ( عمي ) دا ياعمو ...!! عادي ممكن اروحً فيها ...!!
قال لي انت عارف ( عمي ) دا إسمو منو ...!!؟
قلتا ليهو منو ..!!؟
قال لي ( ود عجيب ) ...قلتا ليهو خليني من وصفو ود عجيب ولا ود رهيب ...عمك ...!!عمك ..! اسمو منو ...!!؟
قال لُب ماقلتا ليك ( ودعجيب ) ...!!!
ايوااااا ( ودعجييييب ) اهاااا اسم مركب ....!!! يعني اتنين في واحد ....( اشتري واحد والتأني مجاني ...!!! ) قلتا لي هسا عمك دا كان اكتشف ( البنسلين ) كان ركبن تلاته مع بعض ...صاح ..!!! كان بقي اسمو ( ودعجيب جدا ) ...!!
وانا اقول الأزمة في الأسامي دي من شنو ...اتاري واحدين كتار وزنم زايد ...!!!ذي الجارج البشحن موبايلين ....( ودعجيب... وطيب الأسماء ...وسر الختم ...وعز العرب ...!!! والبقية تأتي ...( عجيب ) انتا ياوطني برغم قساوة المحن ....
بس صراحة كلهم بسدو عين الشمس ...!! سمو ...ولاتبالو ...!! ونقعد نقوم علي كيفنا .... المافي شنو
قلتا ليهو فعلا ( عمو ) و ( ودعجيب ) دي اصلو ماظابطا الزين قال لي هو ذاتو راجل رقيق كدا ( عمي ) دا ....بقولو ليهو ( ودعجيب شقاق العناقريب ) ( في إشارة لبسالته ...) قلتا ليهو ماشاءالله تبارك الله شجرة العايلة ( لبخة ) ولا شنو ) ....!!! يضحك سااااكت الزين ...!!
قال لي اها ماتميت ليك ( عمك الخير ) الغتيت دا قال لينا اها والدوري دا ساكت كدا ...!!! ما دايرلو لياقة ...!
ولاشنو ...!!؟؟
قلنا ليهو ...ولا شنو ....!!
( سرا ) طبعا ....!! هنا مافي ( جهر ) ...!!
بس فجاة قعد يكوركً ...!!! اررررررضا سلاح .....دي يعني انبطحو علي الارض استعداد للهجوم ....!!! ( الله يخلعكم ذي ما بتخلعونا كدا،.. هو في شنو ...!!!؟ البسمع يقول ( العدو ) ورا الحيطة القدامنا دي ...!!! انا ماعارف لي هم معجبين بي عنصر المفاجاة دا ....غايتو الخلع الدخلتنا الأيام ديك يمرقا الله بس ...!!! ) حال ( العدو )
اها يازول كلنا بطحك ...!!! بطحك دقيقتين كنّا في ( الدايمة ) ....!! والبوت ) اللابسنها الجماعة ديل امام مرمي اعيننا بالظبط...!! شايفنها زي ( اللواري ) ...
اها دا اسمو ( الزحف علي المناكب ) دا كمان كلامو برا ( حلو جنس حلا ...) وظريف جنس ظرافة ...!! ( الزين ) قال لي كانت فرصة اكتر من طيبة ( نشم ) تراب البلد دي ونبوسو ...!!! زمنا دا كلو نسمع ليك شميت تراب بلدي ...وريحة الجروف والطين ..وجدودنا زمان وصونا علي الوطن علي التراب الغالي المالي تمن ...!! قال لي في اللحظة دي مستعدين ندفع كل عمرنا بس يرفعونا من الواطا دي ...!!
قال لي والله شميناهو لما مرق بي اضنينا ....لانو ( الزحف علي المناكب ) ده عبارة عن درديق في نص الواطا دي ....( والخير ) دا يقلب فينا ذي الطعمية ...!!!
قال لي والله لو كبو فينا رطل زيت مع الحراية ديك 
🔥 والغبار الفينا ذي الدقيق ...!! كان بقينا (كستليته )...!!!
🔥 والغبار الفينا ذي الدقيق ...!! كان بقينا (كستليته )...!!!
.. وقالو كد ( ا الشفوت ) ديل طلعو بينا للدور ربع النهائي ....!!! دا كمان غير ...!!!
اسمو ذاتو يشهي....!!
( أرنب نط ) ...!!!
🐰🐰
🐰🐰
وياسلام علي الارنب لما ينط ....!!!
🐇 🐇
🐇 🐇
وما اجملنا ونحن نتقافز في فرح وحبور وكاننا طائر البطريق وقد خرج للتو من البحر يصفق بجناحية وقد ادار ظهره للغيوم ووجهة يحدق في القمر 🐰🐰
🐰🐰
(متعة المتعة )...!!! وقمة الإثارة والتشويق ...!!!
بالجد دي بالذات الله لا ورآها حبيب ( أرنب نط ) دي ...!!!
قال لي نحنا بنطط من ستة صباحا لحدي حداشر ...!! دون توقف ....يعني لو في ناس ماشين ( لندن ) بالطيارة يكونو وصلو ونحنا لسا ( بنطط ) هنا في ( المرخيات ...)
لماصدقنا ذاتو انو نحنا أرانب ...
قال لي بقيت كل ما اشوف ( الجرجير ) بتهيج ...!! وبتجيني حالة كدا ...!! 🐇
🐇
الزول دا ( عبر ) رسمي واخد رخصة ( أرنب ) ....مبروك يالزين عقبال ( الرجل الوطواط ) 
🕶
🕶
قال لي بقيت عادي وانا ماشي باخد لي نطا ....!!
هسا في داعي يالخير ياعشايا ....تهجَّم الدكتور ورفاقه ( الغر الميامين ) ...ديل
دا كلو في الهظار الخفيف ده والكلمتين ديل .....!!!
مابالغتا يالخير ...!!؟؟
اها عمك ( الخير ) الله يطراهو بالخير .....بكي معاهم يوم التخريج ....و بكاءا مر ....!!
بالله شوف ( حتي عساكرنا حنينين ) .....!!! والله السودان دا حيرنا ذاتو ...!! بلد ذاتو عجيب ياخ ...الله يغتي علي ...
قال لي (الخير ) يبكي ...!! ونحنا نبكي
وجو عليهو جماعتك القبيل ديك أعضاء ( الكونغرس ) طلع واحد فيهم اسمو ( المفك ) بتصدق ....بس كويس عرفنا اللقب دا يوم التخريج ...قالو دا قالو ( بفك ) اللغم بي يدو دي مابستعين بي الأجهزة ....!! وقال لينا بشم اللغم دا شم من بعيد ...وبمشي عليهو ....!!
قلتا ليهو والله دا بالذات كنّا محتاجين ليهو شديد يشم لينا ( الالغام ) البشرية اللافة في الحلة دي ( ويفكفك ) الخلايا النايمة دي ....!!!
اها ( المفك ) جانا اليوم داك قال هو سعيد بينا وفخور...!! ودا كان اول يوم نهبش ( يدو ) وهو بهني فينا بالتخريج ...وياله من شرف ...!!!
قال لي مالاقي حاجه أُوصِّف ليك بيها يد ( المفك ) دا
بس كل البتذكرو انو فيها ( شرا ) ذي بتاع البامية داك
تاني قال لي ايوااااا...
لقيتا ليك ...ذي يد ( خرتشوف ) 😳😳
😳😳
الزين دا فعلا بقي ( أرنب ) ...خرتشوف دا منو ذاتو وانا بعرفو من وين .....!!؟ مشيتا لي
اها قال لي نسينا ليك اي حاجه ونشيل ونغني ....!!!
لن ننسي اياما مضت ( مرحا ) قضيناها ....!!! ونتقالد
😭😭
😭😭
اها ( المرح ) ياهو الحكيت ليك عنو دا ...
أما الأيام ....!! فخليها للأيام ....!!!!
قال لينا انا ضغطتكم عشان تطلعوا رجال .....!! قلنا ليهو الحمد لله ألما ضغتا شديد كان طلعنا ( أرانب ...!!! )
وتمر ايّام ....!!! ايّام ( وأرانب ...) ....
ومساء ( الخير ) يا ( الخير ) يالحبك سكن الضمير
والجيش سلاح ...!!! وانا مالي
الخدار مرق لي وداري .....!!
جا واحد قطع علينا التداعي ...قال ليهو يا دكتور الزين عايزنك في الطوارئ
قلتا ليهو
ايييييييييينتباه ...( أرضا صباح )
قال لي رط ط ط ط ك ...وضحكنا حتي الثمالة ...كانت لنا ايّام
للامااااام درررر ....