يوميات علوب .....126 (عطية سبب الأذية )
عطية دا جارنا في الحلة ......زمني دا كلو ماسمعتو بتكلم كتير ودايما ما اشيد بهذه التجربة الرائدة قبل ان تنهار في ذلك النهار ....!!! غايتو الْيَوْمَ داك فهمني كتاب ...........
لاقيتو ليك في اللفة منتظر المواصلات .....سلمتا عليهو وركبنا سوا ....اها يازول بعد اكتمال النصاب أعلن سائق الحافلة عن قيام الرحلة 1209 المتجهة ال السوق العربي ....!! وأغلقت الأبواب بعد سماع النداء الأخير والصعود الي البوابة الرئيسيّة الشافع يكوركً ذي الجرس ( عربي..!! عربي..!! عربي عاااااربي يا )
البسمع عربي يقول (مول دبي ) ....!!
المهم تحركت ( الحافلة ) مع دعاء السفر....!!! 
🚌
🚌
أها لازم تلقي ليك واحد من النوع داك البكلم الناس بما يدور في خاطرو ...( الله يدينا خاطرو بس ...!! ) لانو الحركة دي في العالم كلو مافي ....!!! إلا نحنا ... الزول عادي ممكن وسط لمة كدا يقوم يقول ...
( غايتو ناس الدنيا ديل الله يدينا خيرم ...) ...!!!
كدا بس بي صوت عااالي وقدام الناس...!! ومافارقا معاهو اذا كان بعرفم ولا مابعرفم ....!! حيردو عليهو ولا لا ...!!! المهم إنو عمل العليهو وذاع بيانو دا علي الهواء ولكل الناس ...!! شاء من شاء وأبي من أبي ....!!!
ماعرفتها دي شنو ...!!! فضفضة ولافرفرة ...ولا مسخرة ولا سمكرة ......ولا شنو....!!؟؟ والله ماعرفتا ...!!!
بس يرمي ليك كلامو دا كدا دون إيضاحات ....اها لو لقي ناس شاركوهو بالتعليق ممكن يسترسل ...!! ولو كمان وقفت علي كدا بقفل الموضوع ....!! ،..
( مشاركة الانسانية في مواضيعك الخاصة ...) ( في حب يا اخوانا أكتر من كدا ) ......!!
انا شاكي شك شديد جدا ( وعديب ددا ) انو ( مارك ) سيد ( الفيس بوك ) Facebook دا جاب فكرة ( ماذا يدور في خاطرك )
what's in your mind
دي مننا
ياخ نفس الفكرة....!! كل الفرق حقتنا( شفهية ) وحقت الفيس مكتوبة ....!! بس قطعا نحنا الجبناها اول ....!!
هو ( الشفت ) أضاف انو الناس الحتشاركم أفراحك واتراحك ديل أصدقاءك .....!!
ونحنا حنرد عليهو في المحكمة الزول دا ....!!
لأنو حنرفع دعوي حقوق ملكية فكرية نيابة عننا كلنا ويدكم معانا بالله ياشباب ....!!!
( مارك ) دا لو طلعنا منو بي مليون دولار بس ...!! في ناس كتيرة حتكون عبرت ....
هو طبعا حيقول ( حقتكم ) دي الزول بشارك حاجاتو مع ناس أصلا ما بعرفم بس لقاهم قدامو....ودا إقحام الآخرين في مواضيع مابتهمهم وتعدي علي الخصوصية أما في ( الفيس ) فانت تتشارك ( الخاطرة ) مع أصدقاءك ....!!
بس نحنا مجهزين الدفاع ....!!!
حنقول ليهو منو القال ليك ما بعرفم ....!!
ونشغل ليهو أهل الحارا ديل أهلي ....!!! والله السودان دا كلو يبقي مارق ....!!! وفِي ناس بقلعو للبطان والجلد ...والصواني دي تمرق .....والنسوان تزغرد....!!! والله يا ( مارك ) تشوف نور...! انتا بتلعب ولا شنو ...قايلا ( أوكلاهوما )
وكان عندك شك ابقي مارق تعالنا جاي ....!!! نوريك أهل الحارا ديل اهلي ولا ...!! لا ....!! وبالمرا تعرف منو ( الشحن ) الفيس ...!!! تحسبو لعب ...!!
أها دا جا داخل علينا في الحافلة طوالي وقبل مايقعد كدا رمي ليك ( الخاطرة) بتاعتو ومايدور في ذهنو في تلك اللحظات ....( تقول لي الفيس بوك ) شوف القصة دي كيف ....
وبي صوت عالي وواثق قال ( السخانة دي حاتخلص متين ياخ ...!! انتهت مننا ...)
( كأنو إكتشف ليهو حاجه جديدة ...)
المشكلة بقت مش في الزول دا المشكلة في الزِّي ناس ( عطية ) الاتغشيت فيهو دا .....طوالي استلم ليك الموضوع ....!!!
وبدا ( الكومنتات ) ....
دبغنا ليك دبغ بغياب الأحزمة الغابية ومصدات الرياح وتأثيرات كل ذلك علي المناخ وكيف إنو ( الكسرة ) البناكلا دي سبب في ( الحر ) لانو بعوسوها بالحطب ...يازوووول موضوع طويل عريض ...!! والحطب من الشجر ...!! والشجر ...!! عايز مطر ....! والمطر عند ربنا وربنا جيب المطر ...!!
وندعوك مبتهلين يا الله أمطار تصحبها زوابع رعدية تهوزز ( عطية ) دا لما يتخجا ....!! قول اميين ....ياعطية
.....( وياعطية ) من الله والله بدّي الجنة ....!!! عامل رأسك الكبير دا ..!!
المهم ( عطية ) اتجدع ليك فينا لقي ليهو جمهور مضمووون
نمشي وين ماياها الحافلة دي .....!!! الا نطير
غايتو بلعناها قلنا كويس معلومات عامة .....!! بس مشينا محطة كدا لي قدام واحد تاني عمل مداخلة قال ...!!!
(غايتو ترامب لو ما رفع العقوبات دي يكون قاصدنا بس )
دي غايتو ماخاطرة ...دا بوست عديييييل )
طوالي زولك قعد يتحكحك المرة دي خشي لينا بي شخصية المحلل السياسي والخبير الاستراتيجي عطية اب طاقية ...!!!
ودخل ليك في موضوع العقوبات دا من جوووووه بحثا وتحليلا ( وتنكيل ) ...!!!
وكيف أن السياسة الامريكية تعمل لمصالحها وان السودان يحب ان يستعمل بعض أوراق الضغط والكونغرس والجمهوريين وقصص كدا ...
غايتو يا عطية أصلو انا ما قايلك بالمستوي دا ...!! طبعا بالمناسبة اسمح لي اقول ليك انك ( مرطنا ) مرض ...والدنيا سخانة والنَّاس زهجانة ...!! جنبي مرتين مقنعات كدا لما عطية بقول في كلامو دا ( وترامب والكونغرس واللوبي ...!! )
قالت للمعاها مسكين مايستاهل ...!!! ديك قالت ليها ( والله اهلو ذاتم بالغو يابت أمي يعني فاكنو كدا ...) ... اها نقعد لي جنس دا ...!!! كدا كويس ياعطية ...! أهو طلعتا ( مجنتر ) ...ألف ألف مبروك
أها بعد ما انتهي من ندوتو دي وسكت داير أتكلم معاهو يهدي شوية ..!! تاني قلتا أنا مالي ومالو...!!! ان شاءالله يغني في نص الحافلة دي ....هو ذاتو شكلو راكب اساااكت عدم موضوع.... الزول دا واضح إنو ماعندو وجهة محددة ...!! بس عشان لما يسألوهو كنتا وين يقول ليك كنا في الخرطوم وجينا ...!!! كلام النسوان صاح ...!!!
بس الحافلة وقفت نزل منها راكب ...!!! قربنا نبارك ليهو ...اخد أفراج ( من عطية السبب لي أذية ) ...وركب واحد تاني ...!! اها الراكب الجديد دا الله لا غزا فيهو بركة ولا كسبو ...!!! جا شايل معاهو موضوعو في جيبو دا ...اول ما اتوهط في الكرسي طلع ليهو منديل كدا ( شربااان ) أدا ليك وشو دا فوطه جد ....!! تمرو سممممح ...وطلع ليك جريدة الدار وقعد يتصفح ....!! المستشار ...!!
انا قلنا الحمد لله ينشغل شوية ...لانو شكلو كدا النوع الهاباش البقابض داك ... أول مادخل الحافلة سلم علينا أربعة مرات التقول نسابتو....ويضحك برا ....اها النوع دا خطر جدا البضحك برا دا ...لانو دا النوع كان مالقي ليهو زول يفضفض معاهو ...!! عادي بتونس مع روحو ...!! العينة دي لو لحقت لمت ليها في موضوع ......( ماسورة واتحلجت ....!! ) ...!! كمان يلقي ليك نوع ( عطية ) قسما بالله الا يلعبونا ( صفرجت ) .....!!!
المهم زولك يقرا سااكت ....ونحن ندعو له بالثبات ...ونتضرع للمولي خاشعين إنو يهدي سرو ...!! المهم أخدنا لينا صنة كدا مسااافة ولله المنة .....!!
فجاءتن العواليق دا بدأ يتدفق ويستفيق ....خلاص ما قدر .... رفع راسو من الدار وقرأ الملعب ...وجدع ليك الباص بالمقاس ( باص قون ...!!)
قال غايتو الله يستر ( ابن يعتدي علي والده بالساطور.....!! )
( دا عنوان البوست الولدوهو لينا في نص الحافلة ....!!! )
...عمل شيرshare من ( الدار )
اها كدا ما أتأكدتو انو ( مارك ) دا لعبنا ...وشال حاجاتنا
عمل بيها ( فيسو ) دا ...قضيتنا مضموونة ...!!
ياخ مالك علينا ياخ ...!! جاي بي سواطيرك
ومنو القال ليك الجريدة بقروها جَهْرًا ....اسمها جريدة ياخ
ما قصيدة الله يرضي عليك ....!!! يجروك من رجلينك الطوال ديل ( ركبتو وهو قاعد جنب اضنينو ) والدار في النص ...!!
انتا اصلو ماسمعتا ( أبو اللمين ) قال ليها بتقري في أية كلميني ...!!! وانتي مشغولة بجريدة ...!! تجي انتا ياخ عايز( تسمعا ) لينا ....
( أبو اللمين ) شنو كمان البتسمعو إنتا .....!!!
انتا حدك ( الخدير انا ماني حي ....والنقدو الطير انا ماني حي ....) ينقدك ( الدبيب ) البجيبو في ( ناشونال جيوغرافي ) داك ( ياللهول الثعبان يقترب منهم وهم نيام لكن انظرو
للمفاجأة التي تحدث ..!!! ) عرفتو ....!!!؟؟ بس ياهو دا
مالك علينا ياخ ....!!
وكما كان متوقعا اخونا ( اللغم ) دا اكتفي بقراءة العناوين ...والأخبار بالتفصيل كانت مع ( عطية ) الجزلي
ختف ليك الكلام من خشم الزول دا وبدا التعليق والبري والمرض ....!!
قال يا اخوانا دي ظواهر جديدة علي مجتمعنا ....دي المخدرات مافي غيرا ...الود دا اكيد مافي وعيو ...!!! يجب عمل حملة قومية لمكافحة هذه الافة ...!!! ومساعدة الشباب في إيجاد بدائل وفرص ...!! وداير يخش ليك في كلام الحكومة الكبار داك ...التوظيف ورعاية الشباب والأوعية الشبابية وحاضنات الاعمال والكلام الكبار كبار دا .....!!
بتصدقو في واحد قال للكمساري قرصة عليك الله عمك دا ذاتو ( قدانا ) ياخ نزلنا هنا ...!!! كدا بي صوت عالي ( الشعب بدا يتململ )
( عجبني ليك ياعطية ) فعلا قديتنا ياخ ...ماف غيرك ...
وهو ولا كأنو هنا ....غايتو جنس سقالة ...
ويادوب نحن عبرنا أجواء ( بحري ) داخلين علي كبري ( المك نمر ...) يعني المسافة الباقية ( للعربي) بتشيل ليها تلاته ندوات براااحة ....!!
بس هسا أهما خطوة تكمن في محاصرة ( عطية ) وعدم إعطائه طرف الخيط ...!!! وبالفعل سادت حالة من الهدوء و الصمت ارجاء الحافلة ،...وعمك بقي يتملل داير ليهو موضوع يتمطي فينا ....!! زووول هببو ليهو مافي ...بقي يتلفت بالشبابيك لما وصلنا نصص الكبري ...!!
ووقع المحظور ...!! وجاء الإلهام ...!! من خارج الصندوق هذه
المرة ....شات الباص لي نفسو وجاب القون ...عاين كداااا بالشباك وقبل علينا قال الحمد لله البحر نازل ...!!
( زووول قال ليهو نازل وين مافي ...)
تاني ردا علي نفسو قال
انا قلتا ليكم مافي حاجه اسمها ( فيضان ) السنة دي لانو حصل تغييير كبير في المناخ ....والجو ذاتو اتغير ...شوف زمان كان ذي الوكت دا بنكون داخلين علي الخريف ...!! تدخل ما تمرق ياعطية ....!!! وكسر ليك فينا ( فصول ) ) ( وتغير مناخي ) وظاهرة التبخر ...... عايزين ( نستفرغ ) ..!
معقولة ياعطية ياخ
مناخ.. وسياسة ...وطاقات شبابية ....ومخدرات ...وترامب وترامادول ....!! مافي راجل غيرك في الحافلة دي ولاشنو المعني ..!! ؟؟؟
بس في واحد نزل كدا الظاهر من الزعل عايز ( يدور ) لينا
( عطية ) دا قبل مايفوت...!!! أها قبل مايتخارج كدا اتلفت علي عطية قال ليهو هسا دا غنا شنو دا بتاع أولاد الزمن دا وريهم عليك الله ياعمك الغنا زمان كان كيف ...!! ونزل ...!!
( تنزل فيك صاقعة الهي وانتا جاهي تفرطق اضنينك الواقفات ذي ابراج ( سوداني) ديل ....!!! ) عليك الله شوف الود دا
اها المره دي عطية بالقانون وبناء علي طلب الجمهور
( الولد نزل يضحك سااي بعدما فكا ( العبوة الناسفة) دي في الحافلة ....!!!
وعطية استلم ...!! ( بي سدرو المره دي ....) والنوع ده من الملاعب واسع جدا ...!! وأي زول في السودان دا عادي ممكن يقول ليك لاقيت ( سرور ) ...!!! وقعدتا مع ( كرومة ) ...!! ( والكاشف) قال لي
...!!
المرة دي درع ليك بدلة ( قدور ) .....!!! حصة كاملة عن الحقيبة وتاريخا ...!! وأم درمان وحي العرب .... ( والحقيقاب) ديل كانو بتلاقو وين وبفطرو بي شنو ...!!
والخدرو ناعس ...نامت ولا لسا ....!!
وود الريح صحي اتشاكل مع سرور .....
والخواجة ( برمبل ) كان فردة ود الرضي ...ولا عتيق .....!! وصحي ( برمبل ) دا كان عامل فيها خواجه ساكت وهو أصلا من مدني ...!!! ولازم طبعا تجي سيرة ( جورج مشرقي ) ( سيد القهوة ) وسيد الشي كلو ...( لحدي قريب دا انا قايلو مدرب المريخ ...!!! )
المهم يازول ماخلي صفحة للحقيبة دي اهم الفنانين واهم المنعطفات ...!! والعربية تشيل ( وتنعطف )بينا تارة لليمين وأخري ذات اليسار...( وتقوم بينا العربية ...!!)
هو السوق العربي دا مالو بقي بعيد كدا ...!!عدينا( الخارجية) الله يخارجنا بالسلامة بس .....!!
أها ( عطية ) وكت ما لقي ليهو ناس ( يشيلو ) معاهو في الحقيبة دي ....!!! كضم ( المعفن )
وبفضل الله بدأت ملامح السوق العربي تلوح في الأفق .....!! والزحمة بدت تزيد ....والنَّاس البرا بقت قريبة من الحافلة ...وأصوات مناديب المبيعات في الخارج أضحت أكثر وضوحا وشفافية ...
( نضارااات ....ساااعات .....شواااااحن.. ) يااااااا
انا ( يااااا ) الاخيرة دي ( بتشلني ) من الفرح سمحة ياخ ..يااااا ....فيها ( اكشن كدا ) ....!!!
واختلط الحابل بالنابل ...!! لحدي ما تصل مرحلة انك مابتعرف الحافلة دي ماشا براها ....!! ولا شايلنها الناس ديل ...!! 
😳
😳
اها في عز هذه الأجواء المشحونة ... أبت نفس ( عطية ) إلا أن يقدم لحن الختام ....!!!
عارفين الراجل ( المطرطش ) دا قال شنو ...!! ؟؟
قال في ( اليابان ) الناس بتستخدم المواصلات أكتر من العربات الخاصة عشان كدا مافي زحمة في الشوارع ...
عمك حالف ينزل من الحافلة بدرجة وزير للنقل ...!!
واحد طوالي قال ليهو والله كلامك صاح المواصلات في (اليابان ) كان فيها واحد زيك كدا ...كان زول ركب مافي ...!!!
..........!!!!!!
اولا لا لااااااااااا... ...هدف قاتل في دقيقة قاتلة ...والله اصفق وأعلّق ....!! والله أصفق وأعلّق ...ما هذا الهدف .....!!!! ماهذه الروووعة ...ما هذا الجماااال ....شوف شوق شوف شوف فعلها الساحر ...وفي الوقت بدل الضايع ...أين انت يارجل .....أين كنت ...!!!!!
من الصباح عطية يتفسح فينا دمرنا كرهنا الحافلة وكل انواع ( الدواب )
عفيت منو الولد دا ....صدقو شدة ما اتكيفتا منو لما نزلنا مشيت هنيتو واتعرفتا عليهو قلتا ليهو عجبتنا والله وعجبنا موقفك ....!!!
وعجبتنا كلمتك الفي الختام دي ....!! طلع اسمو ( الفاتح) ...!! قال لي ياخ معقولة نحنا مما اتحركنا ماعندنا شغلة غير الزول دا ...!!
ينصر دينك ياخ وفتح الله عليك يالفاتح أخوي ......
اصلو كدا نحنا .....!!! ناسنا ديل صبوريييييين
لكن اذا وصلو الحد ...ينبغي للرهيفة أن ( تنقد ....)
قال مالم يجرؤ شعب الحافلة أن يقوله
وترجل عطية ( الأذية ) تزفة لعنات ( الراكبين )
يبدو ان الحافلة الجابتنا في طريقها الي رحلة العودة العكسية من ( العربي ) الي ( بحري ) لانو شايف لي كمساري تاني غير الجابنا داك ...!!! اكتشفتا انو الكماسرة ديل بفتحو فرص لي بعض وخانات ....!! ذي الحركة دي
داك يجيبا من بحري ودا يرجعا ...!! قوية منكم والله
دايرين لينا وزير كمساري ...!!
بس قعد يكورك بذات الجرس والإيقاع
شعبية ...شعبية ...شعبية..... شاااعبية يا ...
في رحلة جديدة تحمل في داخلها ....أمثال عطية
وأشباه (الفاتح ) وبعضا من ( علوب ...) واخرين
انطلقت الرحلة من جديد وتوهطت الحافلة الطريق
وهي تبحث عن شارع جديد ....!!!
والشارع فاتح في القلب والقلب مساكن (شعبية )
يموت ( عطية ) والأرض تنبت الف ( عطية )
شاااااعبية ياااا....!!!