يوميات علوب ...124....!! الثورة ( بالنص )
بتذكر اول يوم دخلنا الجامعة جاي قاشر ليك البنطلون والقميص والريحة يازووول الارض دي ما شايلاني دخلتا جوه لقيت ليك البنات ديل ماليات الواطا ...!! والأولاد معاهم...!!! واحدين قاعدين واحدين واقفين ...واحدين ( خالطين) ) شايلين الليل قسموهو اتنين ...!!! وزووول شغال بالتاني مافي ...!!
والدنيا حلوة ...!!
قلتا بس خلاص انا وصلتا ....!!! ديل ذاتم ياهم ناسي البفتش ليهم ...!!!
فعلا ده ياهو ( التعليم العالي...) ..!!!
بس ظهرت لي واحده كده لابسا ليها بنطلون جينز وفنلة ( وكدارة ) ...!! قلتا أكيد دي (عمادة الطلاب ) ...!!البقولوها
ملامحا جاده كدا ونضارات النظر ماخدا مساحة محترمة في الوش ( النضارة البنومو بيها ديك ) ...!!
والشعر كاشنو لي ورا .....( شكلو محتاج تغيير زيت ....)
لديها جرأة لاتخطئها العين ...!!! شايفا من بعيد بنتناقش ليها مع واحده كدا النوع داك البتكلم ويدينو شغالات لدعم وتوجيه الحوار... ( ذوات اليدي )
عاينتا ليها كداااا ...!!! متخيلا تجر نور قصير ...!! جرتو طويل ...!! انا الطفيت...!!!
لا...!! وجات علي من هناااك قاصداني عديييل ...!! قالت لي بي ثقة كدا ( إنتا من البرالمة الجداد ديل ) ...صاح .....!!؟؟
داير اتفلسف ...!! قلتا لبها وليي صاح دي !!!
مكتوب في وشي ولا عرفتيني كيف يعني ...!!
قالت لي من ( شكتك ) دي ) .....!!
والله لما( شكيت ) في روحي ...!!
يشكك ( الدبيب ) ان شاءالله
....!!! بالله شوف البت دي ...!!
قبل ما استعدل كويس تاني رصعتني ...!!! قالت لي وإن شاءالله ناوي السنة كلها تكون ( شاكي ) فينا كدا .....!!
دا كلام شنو دا ...
😳
😳
هياااا يااخوانا نحنا ما اتمرمطنا عديييل كدا يا جماعة ...!!!
ديل ياهن بنات الجامعة البقولوهن ...!! ولا في شنو هنا ...!!
وكت لقتني اتحسستا ..!! قالت لي تعال ...!! تعال ....!!! ممكن تقبل عزومتي ...!!!؟؟
حتي شوية اتفشيت ...!!!
ساقتني الكافتيريا اشترت لي ( بيبسي )
( بس الشافع الضايع يوم العيد ..!!! )
المشكلة ماقادر أعبر ...!!! بس ( مبكم ) متابع ( القصة ) دي .....!!! قربت تقول لي اها بعد ما شربتا يلا طوالي تمشي تنوم ...!! عشان تجي الصباح من بدري ...!! شاطر ..!!
بس يازول قررتا انتفض ليك عليها ...!!! هي الظاهر ما بتعرف علوب ....!! ( كمان نحنا الوكت داك عضمنا ذاتو كان طري شوية كدا .....) ( ما أخدنا كورسات التقوية ...!!! )
المهم ...!!! قلتا ليها طبعا إنتي لما جيتي الجامعة أول مره عملو فيك كدا صاح ...!!!؟؟ ( قلتا اشوتا ضفاري ....) ...!!! قلتا ليها .......
( بمعني اخر ... فما تمارسيه الان من سلوك ...!! هو نتاج طبيعي وانعكاس لما حدث معك وقتها ...) ....!!
قلتها كدا باللغة العربية الفصحي دي ...!!! جايبن فيها 84 في امتحان الشهادة .....( كتلونا كتل بالمدح بما يشبه الذم دي ...!! سنة حتي فهمناها )
صاحبي ( بكور) الهسا دا...!!! كنّا بنذاكر سوا للشهادة ...!! قلتا ليهو اديني أي سؤال في العربي ننشط بيهو الذاكرة ....
قال لي ( مبروك عليك الليلة يانعومة... ياحليل ناس ديك الزمان بجونا ) ....!!! ( نعومة) موقعا شنو من الاعراب ...!!!؟؟
شوفو ليكم مستوي طلبة .....
المهم شتا ليك البت دي بكل هذا التوهج والجزالة ....(أحب ( الجزالة ) ذاتا ....!!! لغة ذي اللغة ...واخدتا لي ابتسامة جنباوية كدا 
😏
😏
الود ( عريس ) ...!! وياريتني كان ما أخدتها ..!!
( وليتني لم أفعل )
😳 بس واستلمتني ليك تاني ......
قالت لي هيي ها ...!! خليني من تمارسي وأمارس ...!! ونظريات ( فرويد ) دي ...!!
( لحدي الوكت داك أنا قايل ( فرويد ) دا مدير الجامعة ....)
قالت لي سيبنا من قصة دوري ودورك ...و إنتي و أنا والمسافة ( والعونكوليب ) ...!!!
اي والله قالت لي ( العنكىوليب ) ....!!! بتصدقو.....!!
قالت دي أسطوانة مشروخة عفا عليها الزمن وبقت ممجوجة لاتطرب ....( تكون قاصدا ندي القلعة البت دي ...!!!؟
واستمرت العاصفة ......!!!
قالت لي غير سلطتكم الذكورية القاطعنها من راسكم دي ....شي جابنا ورا مافي ....!! ( سنة يا الترلا )
خلقتو لي نفسكم هالة فارغة من الأوهام ...!!
و إنكم الأفضل ...!! والأحسن ...!! والأجود ...!! ( دا صابون ( تايد ) ولاشنو ) ...!! وصدقتو الوهمة دي .....وفِي الحقيقة أنتم ليس إلا صفر كبير يجلس علي يسار الواحد ...!! الا من رحم ربي ....( يعني ما تامين صفر ذاتو ) ....!!!
قالت واستثني الوالد ( النبي فيك كان ما خليتي واقف معانا في الصف ) ...!! غايتو البركة في ( اخوانك ) البقو معانا في ( الصفر) الدولي دا ...!!
قالت لي فحقو شنو ...!!! تطلع لي سريع من الدور ده ....!!! عشان ما ألبسك ليهو ...!!
(هكذا ختمت العاصفة خطبتها ....!!!)
البت دي قطع شك ( عاضاها ) حاجه ......!!!
هسا الزول ذاتو يقول شنو بس عليكم الله ....
بتصدقو لساني اتعقد ...!! ماقدرتا اقول ولا كلمة ...افحمتني المصيبة دي ...!! رصت ليك كلاما دا ذي مكنة الخياته ....!!! إمكن دي أول مره ألاقي لي بت بالقوة والمباشرة دي ...!!
قلتا ليها الله يسامحك ....
قالت لي لييي ....!! انا ما أساءتا ليك ...!! انا بس وضحتا ليك وجهة نظري ...!!! المسامحة في شنو ....!!!؟؟
( بالله هو في نسوان ذي ديل ...!!! لااااااحولا ولا قوة الا بالله ...)
قالت لي أنا ممكن أعتذر ...!! بس لأني اقتحمتا عالمك الخاص و إمكن بي شكل فيهو شوية من التعدي علي الخصوصية
وانا بتأسف علي كدا ...!! في اللحظة دي أدت ليك ( نضارتا ) رفعة لانها ( نصلت ) ...!! وبي حرفنة مبالغ فيها ...!!! شنقتا ليك بي اصبع واحد ..!!! كيفتني جنس كيف في الحركة دي ....!! إتمنيت يعيدوها لي بالبطيء ....!!! ( ياخ عملتا بي سرعة خرافية ....!! ) جكك ..!! 
👓
👓
( والله انا ذاتي استاهل ....!! هسا بعد الردم ده كلو ...! فاتح نفسي أعاين في النضارة اترفعت كيف ...!! ( غايتو انصرافية مبالغ فيها ياعلوب ) ...!! كلاما صاح البت دي .....!!!
وتاني دورت ( الغسالة ) ...قالت لي بالمناسبة ....!!!
الاعتذار شيمة الكبار ...عرفتا ....!!
( عليك الله وحلفتك ... أنا بس داير أعرف ... ( عرفتا ) البحشروها في نص الكلام دي يعني شنو ..!!؟؟ يعني انا مفروض اقول ايوه عرفتا....!! ولا هي تبع الرصة دي ...!!ولاموقعا شنو بالظبط من الاعراب ...!!! بالجد ماعرفتا ....)
( بس كل دقيقتين تقشط ليك ( عرفتا ) دي في النص ....!!! )
قالت لي طبعا إنتا ( والوهم ) المعاك ....!!! اقصد ( الكرور ) من الرجال ....!!! يعني ما إنتا شخصيا ...ما تفهمني غلط ...(انتي خليتي فيها فهم ولا غلط يا الملكة ...!!! عليك الله شوف البت دي ....!! عندها تار مع الرجال ديل .....!! ولا الحاصل شنو ذاتو ....بس مدورة ليك فينا ( وهم ) ....( وكرور) ....وبنزين ...وكلام زي دا
قالت لي العايزا اقولو إنكم بتعتبرو الاعتذار والتأسف دا نوع من الضعف يتنافي مع رجولتكم... وفاكرين إنو
الرجولة دي عضلات ورياضة ....!!! وحوامة لي أنصاص.
الليالي ...!!
الرجولة دي ياسيدي ...!!! موقف ...
الرجولة إيثار ...!!!
والرجولة إحترام ....
دي ياها الرجوله .....!!!
مش راجل يشيل ليهو ( حس ) واحدة. لأنو قدر يغشها ...( وانا مابعذرا بالمناسبة ...!!! ) ...فاهم علي ....!! ( أها..( فاهم علي ) ...!! دي...!! أخير منها ( عرفتا ) ديك ...!!! وبي مية مره ...!!! )
البنات ديل بجيبو الجمل الاعتراضية دي من وين )
قالت لي وهذا لاينتقص من مسؤوليتا شعره ...( شعرة ) دي البت الغشوها ) ...!! قالت لأنها ببساطة .....( بت غبية ....(امممممك ....) خلااااص ...!! لصقت ليها ...!!! وتم ردمها بنجاح ....!!
بس الحمد لله طلعت في ( بت مردومة ) مابرانا ....!!
وبي كدا نكون إتساوينا مع الجنس اللطيف في ( اللبع ..!!
( العاصفة وصلت خشم الباب ) ....
وواصلت ( الكتاحة) تحليلها الفني...!! قالت لي يعني رجل منافق ...!! وكذاب ...!! وخاين ...فضل ليهو شنو يتغطي بيهو.....!!!؟؟
والله كلامك صاح ( فضل ليهو ( السجاير ) ...!! وهو ذاتو متغتي مالو في الحر دا ....!!! ( دا كلو قلتو بي سري )
كان قلتها كان فلقتني ( الفرطاقة ) دي ...!!!
قالت لي ده رجل عاري ...!! وبلا ورقة ( توت ) ...ومجرد من القيم و والاخلاق ....!!!
( البت دي من زمن ( التوت ) البتغتو بي ...!! التوت بقي عصير يالسمحة ....!! الدنيا سخانة والناس عطشانة...)
واضافت ( سونا للأنباء ) انه بهذا السلوك يكون بلا مبادئ ....!!! ولا هوية ...!!! وبعد دا كلو يجي يمارس كل سلطات ( الرجل ) الأداها ليهو المجتمع ...!!! لأنو ببساطة دا نفسو المجتمع الصنعو هو ...!!! وبي معرفتو ...!!
فمن الطبيعي ( يصوت ) ليهو ويديهو صوتو ...عرفتا ....!!! ( تاني عرفتا ) ....!! 😳 تعرفي السرقة ولعب القمار انتي ...!!)
😳 تعرفي السرقة ولعب القمار انتي ...!!)
انا يا اخوانا الرماني في طريق ( اللغم ) دا شنو ذاتو ...ودي مالا دي ياخ .....!! أنا مالي ومال المرأة والرجل والحقوق والواجبات ...!! انا جاي اقرا هنا ولا جاي ندوة ولا هو دا شنو دا ذاتو .....!!!
البنات حلات الدنيا عليهن يشربن في العصاير والشاي مجدعات في الكافتيريا ...!!! الا ( الجنريتر ) دي ...!!!
اختارتني دون العالمين وقاعدة ( تمزمز ) بي .....
لا لا البت دي أكيد في زول ( فلقا ) بي طوبة وهي ( سغيرة) ....
قالت لي انا آسفة دوشتك معاي ...!! ( لا ياخ .....!!!
بس أنا اتوسمتا فيك الخير ...!! قلتا إمكن تجي أجيال جديده تغير في المفاهيم البالية دي عشان تكون في شراكة حقيقية بين الرجل والمرأة ونقدر كلنا نمشي لي قدام ....!!! نتجاوز الطين والوحل النحنا غرقانين فيهو ده ....
( هو بالله نحنا زمنا ده كلو ( وحلانين ) وانا ماجايب خبر) ...
( وانا بس واقف قداما ...اها 😳 ( عادل امام يوم جاهو الأسد)
😳 ( عادل امام يوم جاهو الأسد)
( ودي كانت اول مره اعرف فيها انو نحنا وحلانين )
قالت لي عموما فرصة سعيدة.....!!
( السعادة خليها ....!!! الفرصة ذاتا وينا..!!؟
آمنت بالله
بس غايتو العاجباني في البت دي ثقتا دي ... ورصريصا للكلام ده ....!!! ولا بتتلفت ...!! اكيد البت ماخدا ليها دورة قدرات
اها بعد ( الرص ) دا كلو حتي اتذكرت انو تعرفني بي نفسها ....!!!
قالت لي انا اسمي ( إنتصار ) ....!!! انتصار السيوفي ..!! أبوي سماني كدا لانو ولدوني في ( أكتوبر ) الثورة العظيمة الزلزلت أركان الظلم والطغيان ....( غايتو ابوك كايس لي موضوع ساكت ....!! نحنا عندنا خمسة في حلتنا دي مولدين في أكتوبر....!!! اتنين منهم جووه الجك ...!!! ( يوم واحد وعشرين ذاتو ...) ....الود اسمو ( الطاهر) والبت ( فدوي ...!! ) ماجابو سيرة الثورة دي ولا بالهظار ..!! الا كان الثورة بالنص ... ...!! لأنو ( فدوي ) دي خيلانا في السابعة ) .....!!
قالت لي بدرس قانون ...!!! اخترتو بي عناية لانو أنا نذرت نفسي لإحقاق الحق ...و "و إرجاع كل الحقوق المستلبة .....( غايتو لو دي طريقتك ....!!! فلسطين ذاتا بترجع )
فكانت هذه أول محاضرة لي في الجامعة من ( إنتصار ) إنتصار السيوفي عبد الواحد ...!!! ( دا الاسم بالكامل )
بعد داك بقينا أصحاب ....!! بنتلاقي من وكت لآخر ...
( إنتصار ) دي البت الوحيدة اذا كانت مشغولة بتقول ليك ( سوري ) انا مشغولة هسا ...!!! اشوفك وكت تاني ...!!! كدا بكل وضوح وشفافية
و أي (ركن نقاش ) بتلقاها في النص ...!! قاشطا نضاراتا ديل وشاكين ليك الكدارة ....!! وبنطلون الجينز ....!!
وطبعا هي ( قليلونه ) كدا ...تشوفا تحن عليها ...!! لكن بتقيف في ( الأركان ) ذي الاسد ...!!! وعندها كمية من المعجبين ....!! بكوركو لما تجي ...!! مرات لما يكون مزاجا رايق بتخش ليك بي بيت بيتين من الشعر الثوري داك ....!!
يا وطن ...دغشك طلع ...
باعك لي مين ..!!؟
قبض التمن ....
إنتا وأنا ....و أنا والزمن ....
المهم نوع الكلام الزِّي دا .....!! والناس دي تصفق ....!!
هي ذاتا شكلها انتفاضة ...انتفاضة كدا ...مع التسريحة
اها ( إنتصار ) ما محسوبة علي اليسار في الجامعة رغم تقارب اللغة ....! واليمين المتشدد بتعوذ منها ....!!
قالو ( بت السيوفي) خارجه عن الملة ومفارقة للجماعة ...( أبو الردم ذاتو ...) ( إتهامات ذاتا تملا الخشم ...!!! )
ديل طبعا ماعندهم أنصاف حلول ...!!! تأشيرة الخروج بتاعتم جاااهزة اي لفة جاي ولا جاي بدقوها ليك عادي واكتر من
سفرة ( mult visa ) لما ترجع بالسلامة ....!!! (
( وترجع أيامنا الجميلة ....!!!) ....!!!
أو الحظر ....!!!
وهي ذاتا ما بتقصر بتردم من طرف ...!! وماعندها كبير ...!!!
دي ( إنتصار ) السيوفي .....
لتدور السنوات وتمضي وقد تفرقت بِنَا السبل وكل ذهب في اتجاه ...!!
إنتصار هسا في ( دبلن ) متزوجة ومع راجلا هناك
المهم لميت ليك فيها في الفيس منزلا ليها صورة وهي في المطبخ بتغسل في عدة...!! وولدا الصغير ماسك في رجلا تحت والتاني قاعد يعاين ليها...
كاتبا فوقا ...!! ( مع شقاوةً البيت والعيال ....!!! ومعتصم الله
يديهو العافية في الدوام ....!! ( معتصم دا راجلا ) ...!!
قالت ( الصورة للفت النظر وقصة شعري الجديدة ) وتلاته وشوش بتضحك 
😂😂😂
😂😂😂
ده البوست
...!!
والجماعة تحت مدورين ....!!!
لايكات بالصف ...
وتعليقات ...طن ..
.........رهيبة يا نصرا والشعر بجنن 
👍
👍
وواحدات بعلقن ...ماعرفناك بالعدسات لكن مباااالغة ...!!! 
👁
👁
( جدّعت ( النضارة ) في ( دبلن ) المجرمة ) ...
واحدة كاتبا ليها ....!!!
انتصار ،..!! شوق السنين..!! تعالي لي دايراك في الخاص ...ضرووووري ...!!!
وهي بترد ..اغسل العدة دي وأجيك ...ياهنو ...!! شكلو ( شمار ) حار ....!!
جابت ليها ( شمار حار ) كمان ...!! 😳
😳
يبدو انو انتصار ( حمرت ) الدور الطليعي والمتغيرات الحتمية مع ( بصلتا ) دي ....!! والمرأة والمجتمع رفعتم للتحلية 😂😂
😂😂
كتبنا ليها ( كومنت )
قلتا ليها الله يعينو علي حلتك ...!! معتصم زوجها نحنا بنعرفو عن طريقا كان بجيها طوالي في ( السنتر) كان وكتها ( فاينال ) طب في المجمع ....!!
زول مسكين كدا وهادي ماعرفتو قدر عليها كيف...!!! ردت قالت
لو ماعجبتو يجي يعمل ....قلتا ليها دا كان زمان
حلفتك كان ما سويتي ملاح ( ورق )
علي الأقل تتذكري الأركان وورق النقاش
شايفك قلبتي ... فيس بوك ..!! كيبورد وفلاش ....!!
ده كان ردها علي الرسالة .....
( يجازي محنك ياعلوب ...انتا لسه فاكر )
ومعاها الوشوش الميتة بالضحك دي
😂😂😂😂😂😂😂😂
بقيتي تتدققي في الشمار ....
( والحلة ) فوق النار
....!! دي أخرتا يا إنتصار .....!!!
كانت لنا أيام ....!!