يوميات علوب .....122 ...يارمال حلتنا .....
اغمامة من الحزن تلف المكان والحلة ذاتا تحس بيها مغبشة
كدا وما واضحة حتي الجماعة قدام دكان يس مابتكلمو عن
الريال والكاس ونيمار ...وهلال الأبيض ...!! حسّيت انو في حاجه ما ياها ...توجست ان اسأل لكني دوما اتحاشي الاجابات المربكة لذا فضلت ان أواصل المسير دون استفهام ....!! رغم ملاقاتي صبري في منتصف الطريق بيد أني تجاوزته بالكتف وعبرت ...!! خوفا من خبر صادم ....نحنا أصلا ما ناقصين والفينا مكفينا...!!! لكني علي قناعة تامه ان هناك شيء ما يلوح في الأفق والأجواء تبدو غير صافية.... حلتنا وبعرفا ... !! بشم ريحتا....!! وبحس ناسا ....!! معكننه ياخ ...!! ومزاجا ده مارايق ....!!! ان شاءالله خير ...
وصلتا البيت قلتا لي مشاعر سوي لي كباية ليمون ....!! ممكن ..!!؟
...!!؟؟ قالت لي بس كدا ...!! عيوني ...! عندنا كم علوب نحنا ....( مشاعر ) لعبت بالجوكر طالما قدمت (عيونها ) ....!دجالة البت دي تكون دايرة قروش ....!!!
لكن حست بي ....!! قالت لي مالك ياعلوب..!! في شنو .....!!؟؟
؟؟قلتا ليها أنتو الفي شنو ...!! ؟؟؟
قالت لي هيااا علوب ( أمونة ( ما عيانه ياعلوب ....طريقة الإجابة وتعبيرات وجهها ....تحمل بصمات ماهو أكبر من مرض عابر ...!! أحسست بشيء من ا الانقباض وخفت أن اسألها ... ( مالا عندها شنو ...!! ) فتصفعني مشاعر بجواب قد يكدر صفوي ..!! لكني تمالكت نفسي وسألتها بفرح في محاولة لامتصاص حجم الضغط الذي أشعر به الان ...!!
قلتا ليها هييي ها ( أمونه ) كمان بتعيا ..!! حركات منها ساكت ...!! هسا تقوم تفرفر ....!!
( مشاعر ) لم تقابل حديثي بأي تعبير يتناسب مع ما أقول ... و أطرقت رأسها الي الأرض وأحسست بمسحة حزن قل أن أشاهدها في ( مشاعر ) ...!! أيقنت لحظتها ان امونة مريضة لا محالة...!!! وشئ كبير .....!!
خقلتا ليها ...اااا ...أوعي بس ....!! لم أكمل ...!! قالت لي أيوا ياعلوب ....!!! صدقو مشاعر قالتا وبكت .....!!! بكت شديد ....!! ( أمونة مصابة بداء عضال في الثدي ....!!! ) ياااارب ....!! أحسست بحزن عميق .....!! ومر عليا لحظتها شريط ( أمونه ) بكل تقلباتها ....!!! فهي أشبة بالطقس ...!!! لكن لا أدري ...!! تذكرت فقط مواقفها الكبيرة ....!! خدمتا بي اخلاص في مناسبات الحلة دي كلها ...!!!خاصة لما يكون مزاجا رايق ...!! مناكفاتها وعلي حدتها أحيانا لكنها لا تخلو من طرافة وذكاء وبديهة حاضرة .....!!
(أمونه ) الوحيدة في حلتنا دي البتهتم بالشماسة والشحادين وعابري الطريق ....!! بتصدقو ....!! أمكن إحساسا بانو الحياة قست عليهم زيها خلي شعورا بيهم أكبر وأعمق ....عشان كدا لا تتردد في ان تقتسم معهم الأشياء....!!! وكل الأشياء ...!!! وهذه لعمري لا يفعلها الا الكبار ....!!
مره لقيتا قاعدة مع واحد مسكين كدا في الواطا دي بتقول ليهو في شنو ما عارف...!!! لكن ما أعيه جيدا انه كان يبتسم ....!!! ( شديدة علي الجميع رقيقة مع هؤلاء ...!!! ) الأولاد البغسلو العربات ديل بحبوها شديد سامنها ( الزعيم ....) مما يشوفوها من بعيد يقعدو يتبسمو ....!!! هي ذاتا ما بتقصر معاهم تخاطبهم بلغتهم احيانا ....( لغة أسفل المدينة) ... وييييين يافرد... !! وحافظا أساميهم واحد واحد ...وبتناديهم بيها ...!! ونحن من كنّا نظن أنهم بلا اسماء ....!! ( كما هم بلا عنوان ...!! (حلقتي فوقنا يا أمونه هذه المره ....!!
) قالو ليها والله لو عندك عربية نغسلا ليك مرتين في الْيَوْمَ ...وملح ....!!! قالت ليهم لأنكم عارفين ماعندي ولا حتكون عندي ...!! يلا شتتو ...!! (يضحكو ساااكت ...) ...!!! واحد قال ليها ...مالو يا زعيم ...!!! الله كريم ...!! في اجابة لا تخلو من أمل ويقين ...!!!
خلا شريط حياتك الذي يتماهي امام عيني الان الا من اللقطات الكبيرة والمعبرة والصادقة ....!! أهو التعاطف الوجداني والانساني مع محنتك ...!! أم أنك بهذا النقاء لكننا لم نكن نراه من قبل ...!! لست أدري ....
ان شاءالله ربنا يشفيها ...هكذا كان ردي لمشاعر ...قلتا ليها وأنا أقول الحلة مالا ما مفرهدا ...!! قالت لي والله الناس كلها زعلانه ليها ومتأثرة ... ...!! قلتا لي مشاعر المرض بلاء وابتلاء ...ياربي تشفيها ....عارفا ( أمونه ) دي بكل حاجاتا دي بس هي جزء من روح حلتنا دي ونكهتا ....!!!مشاعر قالت لي بتقول لي ياعلوب .. أي نعم هي طبعا مرات كدا غياظة ...!! قالتا مشاعر وأخدت ليها ابتسامة خاطفة بين الدموع واردفت تقول بصوت مبعثر ومتهدج ..!! بس هي زولة طيبانه من جوه وكمان .....!!!...و عايزة تكمل ...!! غلبا ....!! ولم تفلح ...!!! انفرط عقدها ...!! وبكت مشاعر.....!! 
😭😭 وخرجت ( المشاعر ) عن السيطرة وانخرطت في نوبة بكاء حادة هذه المره ......!! ( مشاعر ) بكت شديد ....!! لما جرت الاوضة....
😭😭 وخرجت ( المشاعر ) عن السيطرة وانخرطت في نوبة بكاء حادة هذه المره ......!! ( مشاعر ) بكت شديد ....!! لما جرت الاوضة....
أما أنا فلم تستطع مقلتاي لملمة بحيرة الأسي التي تكونت بينهما وسرعان مافاضت دمعة سخية علي خدي ... ...!!!
هزتني مشاعر الليلة ...!! وأربكت دفاعاتي امونة ...
لحقتها في الاوضة ...!! قلتا ليها ما تبكي ....!! إن شاءالله تتحسن وتبقي كويسة ....!! في شنو كمان ...!! حنعترض علي حكم ربنا ...!!! قولي بِسْم الله ...!!
المهم هسا هي كيف ...!! ومعنوياتا كيف ....!!! قالت لي ونعم بالله ..!!! والله ياعلوب نحن متجرسين اكتر منها ....!!!
قالت مافي مرض كتل ليهو زول ...!! الزول بكتلو يومو.....!!
قلتا ليها إذن أطمنك وأبشرك ....أمونه ( حتدوسو ) دي ما ( بتدوس ) أي حاجه ....!!
إبتسمت مشاعر بين الدموع وفِي ابتسامتها رضا هذه المره
قالت لي إن شاءالله ياعلوب....!!إن شاءالله....!!! أمونه دي أختنا الكبيرة في الحلة دي ...!! زمان لم نجي من المدرسة ونتسكع في الشارع أمونه دي بتهرشنا وجري علي البيوت ....!!! ياحليلا ...!!! بنخاف منها أكتر من المدرسات ...!!
قالت لي قالو ممكن تتعالج وبره أفضل لانو المرض في بداياتو لكن طبعا القصة دي عايزه قروش كتيرة .....
...تاني القروش جاتنا ...!! تسرق في حاجاتنا ...!!! منعول أبوك يا قروش ....!! القروش جوا الكروش ....!!! والكروش عايزا المفتاح والمفتاح عند التمساح
( والتمساح عايز قروش ....والقروش عند التمساح ...) بتصدقو
.....!!! دي فيثاغورث ما بحلها ....!!
ماعلينا الله في .....
طوالي دخلتا جوه اتصلتا بي الشباب في الحلة ناس جعفر ومنتصر والصادق وود الحاجه وقرضه وبكور وحتي صبري ومأمون المهم كلهم ....!! قلتا ليهم تجوني في البيت ضروري بعد المغرب ...!! فعلا كلهم جو ...قلتا ليهم طبعا امونة أختنا دي عيانه ذي ما انتو عارفين ....!! ولازم تتعالج ...العملية بتكلف خمستاشر الف دولار ...والزمن ما في مصلحتنا ....!!! الناس دي كلها بي صوت واحد قال مافي اي مشكلة حنجمعا ....!! اي فخر وجلال احسسته في تلكم الأثناء....!!! ياها المحرية فيكم ...!!! أولاد حلتي و أخواني ...!!
(صبري ) طلع متين دولار من جيبو ...قال ( والله انا كنطتا مصافر لكن ما مشكلا نشوف موضوع أمونه ضي والصفر ملحوق ....!! )؟ماكل هذا الألق والبهاء ياصبري .....!!! بكور لما دميعاتو جرن...!! حنين خلاص ( بكور ) ده ...!! قال هُو عندو صندوق مشترك فيهو صرفتو اول الشهر بقسما مع أمونه ...والله كريم ....!!! تسلم لينا انتا ولي امونة....!! وتسابق كل من كان معنا ...!!! كل بما يملك ..!! رغم انها لا تسوي شيء أمام المبلغ المطلوب لكن قيمتها الحقيقية ....!!!أننا ما زلنا بخير .....!!
ود الحاجه قال نشوف اولاد الحلة البرا السودان كيف ممكن يساعدو... ياهم اخوانا ....!! ( وأمنا علي المقترح ...!!!
) لم نخرج من البيت الا وكل واحد منا قد استلم مهمة محددة يعمل عليها ....!! وخرج الجميع تحت عَنْوَان واحد
أمونه في عيونا ...بنكرما وبنصونا ....!! الله عليكم ياخ ....شباب ذي المطرة ...!!!
قضيت ليلتها بإعداد قوائم بي أولاد الحلة البرا السودان في الفيس بوك ...فوجدتهم يتمددون في القارات الخمس ...!!! أولاد حلتنا الصغيرة منتشرين في كل بقاع المعمورة تتصورو ....!! شي استراليا ..!!واحدين كندا ...!!والسعودية وأمريكا ....!!! ده شنو ده ....!!!
كيف ضاق بهم هذا الوطن الفسيح ..!!؟ تأملت ذلك لكني لم أسترسل ...!! فأنا لا أودّ أن اشغل نفسي بهم آخر ....!!!
لم يخيبو ظننا وتسابقو لفعل شيء ...!!
لكن حدث مالم يكن في الحسبان ....!!! بتتذكرو دكتور ( كمال ) ...!!؟ دكتور كمال ده مره كدا حكيت ليكم عنو في يومياتي دي ......!!! وكتها كنت بكلمكم عن اولاد حلتنا السافرو وسافرت معهم احلام مؤجلة ...!!بحثا عن رزق وضفاف ...ومآرب اخري ....
ولما جيت لي دكتور كمال حكيت عنو في المقطع ده ....!!!
حاعيد ليكم المقطع الكنتا كتبتو عنو في تلك اليومية من يوميات علوب .....كانت تحمل الرقم 24 ...علي ما أذكر ...!!! لايهمني الرقم الان ...!!مايهمني الان هو هذا الطبيب ( الرقم ) ....والإنسان ...!!!وبعدها حاوريكم الزول ده عمل شنو ....!!
كتبت وقتها عن بعض هذه الشخصيات في حلتنا التي سافرت وبعضهم خرج ولَم يعد ولما وصلتا دكتور كمال قلتا .....!
(دكتور كمال أظرف دكتور فى السودان ..!! لو فى زول ساكت جاتو حمي في الحلة طوالي ينادوهو..!! وطوالى بجي ومبسوووط ...الحاجات الكبار ديل فى كان ماشافن دكتور كمال اصلو مابقولن بقينا كويسات ....!!!وشفع الحلة ديل كلهم اداهم التطعيم كمال ...!! بشوش ولطيف وود ناس ......!!! وشاطر جنس شطارة ....!!
مشيت وين يادكتور ...!!؟ انت ماعارف نص بنات حلتنا ديل مكسرات فيك ودايرنك عريس ...!! ياخ نحن الأولاد مكسرين فى أدبك وأخلاقك وظرفك ...خيلك منهن ..!! ليه مشيت ياخ ..السعودية أحسن مننا فى شنو ...!!
قالو فى حته اسمه ..( القنفذه ..) هنااك فى الحدود مع اليمن ...ياخ انت كلك خضره وجمال ...مالك ومال الرمال ...!! ويارمال حلتنا زولا كان بآنسك ياحليلو ...!! حاجه ( ريا ) دى مامنتظراك تديها حبوب الضغط ...حلفت قالت بتجيبم ليها لاقرش لاتعريفه .....!! و أي حبوب تانى بعدك مانفعتا ....!!! مشيت وين خليتنا ...!! ماعندك جيه قريب ...!! فاقدنك ياخ
اها دا دكتور كمال وده كان المقطع الحكيت فيهو عنو ....!! وحاجه ( ريا ) دي أم امونة ...!!!
وكمال كان علي الوعد ماخلانا ولا حيخلينا ...!!!
دكتور كمال ...تكفل بي علاج ( أمونه ) كاملا مكملا وعمل ليها زيارة للسعودية هي ومرافقين ....!!! ورسل كل شيء ...ورتب هناك اي حاجه ....!! يا الله ....!! من اي طينة قد خلقنا...!!! وما كل هذا الجمال يا كمال .... !! طبعا لا جديد ...!!! ياهو شبهك يا دكتور .....!!!
بس إتصلنا عليهو ووريناهو الحاصل لي أمونه ونحن بنعمل في شنو...!!! ووصلنا وبن ...!!! فحسم الامر...!!!
قال أمونه أختم ذي ماهي أختكم ...!!! الله يفتحا عليك وين ما ما قبلتا ياخ ...!!
الْيَوْمَ الخميس موعد سفر امونة الي العاصمة الرياض والجميع في بيت ناس امونة... الهادي اخوها حيسافر معاها ....ولانو أمونه ماعندها اخوات حتسافر معاها أمها حاجه ( رَيَّا ) واكاد اجزم انها احدي سيدات الجنة لفرط طيبتها ونقائها ...!! اكتر حته بتحبها في الحلة هي ( المسجد ) ...!!! الجماعة بقولو لي امونة حاجه ( ريا ) دي ما أمك لا ختلاف الطباع ...
كذب وتحري الكذب من قال انه ولو عن طريق الصدفة والخطأ قد سمع ( ريا ) وقد تحدثت يوما ما عن شخص من وراء ظهره غيبة ونميمة ....!! هل من مبارز ...!!؟؟
وهي مرا كبيره وتعاني ...!! ورغم معاناتها اصرت علي الذهاب مع ابنتها فهي وحيدتها التي تحبها اكثر من نفسها ...وتحسا بيها شايله الهم اكتر من بتها ...لكن في محياها صبر
ورجاء ...!!! إنه قلب الام ...!!
ربي يفرحك بيها وترجعو بالسلامة ....!! طبعا امونة لما تحلف بي أمها دي وتقول ليك ( وحات أمي ( ريا ) المابحلف بيها كذب ...!! فاعلم أنها تغلظ الحلفان ... وأن الأمر جلل ....!!! ولا غرو في ذلك فقد عاشتا لبعضهما البعض مع ولد وحيد ....لذلك فالعلاقة هنا تكون أكثر حميمية ودفء ...وعلي الرغم من بعض الملاحظات علي امونه وحدتها احيانا ...فأمها( ريا ) تراها ملاك .....!! أوا لم تكن الجنة تحت أقدامهن .....
أما (عزيزة ) بت جيرانم فهي إحدي نسمات حلتنا الباردة ...!!ا مابتسمع ليها صوت ....!!! حتي ضحكتها دي ابتسامه ....اصرت هي الآخري ان ترافقهم الي هناك ...!!! قالت حجه ( ريا ) براها مابتقدر ....!!!
وهذه لا تحدث الا هنا ...!! ( فقط في السودان ) .... ونتحدي بها العالمين ...
الناس دي كلها في بيت ناس (أمونه ) والطيارة الساعة خمسة ناس (مشاعر )وكل بنات الحلة واقفات ومتحزمات ( يستفو ) في الشنط...!! ونسوان الحلة كلهن حاضرات ...واحدات جابن بصلة محمرة وويكة ناشفة يشيلوها معاهم ...!! وأخريات بالتوابل والبهار ...!! في تحد صريح لمرض يريد أن يسرق العطايا والأمنيات ....!!
وامونة شامخة كما عهدناها ...!!! لم تفرط في شخصيتها بعارض يبدو لها عابرا ....وسيكون كذلك إن شاءالله ....
أزفت ساعة المغادرة ...!! أخفت النساء بعضا من دموع...!! وبعضهن الاخر بدا متماسكا ...!! يزود ( أمونه ) بجرعات من الأمل والإيمان ....!!
نحنا شلنا الشنط ...و ( الصبر ) ...!! واتقدمنا مع ( الهادي ) اخوها علي المطار .....!! لحقتتا ( أمونه ) ومعاها نص الحلة اصرو علي الحضور معها حتي الطائرة ...
كل ( الامجادات ) ألفي حلتنا تفرغت وبلا مقابل في وداع امونة للاستشفاء ...،فكان اسمها كوسمها تحكي عن ( مجد ) وتخبر عن (عزة ) ....!!
اولاد الحلة ختو للهادي دولارات في شنطتو دون إخطاره .... ودكتور كمال يتصل كل خمسه دقايق يستفسر الأحوال ....!! لحظات امتزجت فيها المشاعر بين الوجل والأمل والرجاء ...!! بحبكم ياخ ...!!!
وغادرت امونة ..وحلق طائرها في السماء ...!! تحفها دعوات الاوفياء ....
ان شاءالله يا امونة ترجعي سالمة وغانمة يااارب ....!!
استبشرنا خيرا ان اختار لها الله لها ارض الحرمين لتلقي العلاج ...!!!
مرت الأيام ثقيلة ونحن نطمئن عليها يوميا وفِي الْيَوْمَ مرتين ....!! حتي جاء الخير اليقين ....!!؟؟؟
وياله من خبر ....!!!
الورم طلع ( كيس دهني حميد ) ولا يوجد
أبدا مايقلق ....!!! التشخيص في الداخل خرج في عجلة من أمره ...ولامس السقف دون أي مبرر ...!! ( خلع امونه وخلعنا كلنا ...)....تري من الذي يتحمل كلفة ذلك ...رهقا وخيفة
ام انها ستلحق بمثيلاتها وتقيد ضد مجهول ...!! لايهم ....!!! فحسبنا الوكيل ....وعابر من كان حسبه ....
كرمك يا منان ...!!! الحمد لله .....!!!!
دكتور كمال قال لينا حنعمل ليها عملية بسيطة جدا لإزالة الكيس وبس .....!!! الحمد الله حمدا طيبا مباركا ...!! إنها رحمة
السماء لمن صبر وصابر ....!!! جاياهو كل يوم في بيتو يا حاجه ريا ...
فأكرمك الْيَوْمَ بكرمة المطلق ....!!! ونعم الوكيل
خبر مفرح في زمن عز فيه الفرح ....!!! وتنفست حلتنا الصعداء
أمونة عملت العملية وشالت الكيس ...!!
كمال عمل ليهم عمره ...فاعتمرن ثلاثتهن ( أمونه وأمها والعزيزة معاهم الهادي أخو أمونه ودكتور كمال
....!! بكت حاجه ( ريا ) في البيت الحرام ..!! كما لم تبك من قبل ...!!! امونة قالت ليها لييي بتبكي كدا يا أمي انا الحمد لله أهو دي بخير وطلع ماعندي حاجه ....!!
أمها قالت ليها الفضل لي سيد الفضل...!! أنا قبل فترة حلمتا إني طايفة البيت ...!!! وصحيت فرحااانه شديد .....!!! قلتا بيني وبين نفسي ...!! الحمد لله الطفنا في المنام ....!!! الا بنقدر نصل قدام ....!!
القدر قال لي كضبتي وينو ظنك في الليكي ديمة بيعطي
وتراهو أداني وجابني لا أحرا ولا أدرا .....!!! وبكت من جديد ....!!! عزيزة كبرت وهللت ...( يستحق الشكر والثناء لجلال وجهه الكريم ) ...!!!
أو لم يسم نفسه القادر ....!!! ونعم بالله العزيز المقتدر ....أوعدنا يارب والجميع ....
بعد العمره الدكتور ساقم باب شريف ...!! ( سعد قشرة النسخة السعودية ) ....!!حيث التياب والعده ...وحاجه ريا تشيل وتسلم علي اي سوداني تشوفو ....!!! وما أكثرهم في هذا المكان ...!!
اشترو الحاجات والهدايا في الطريق الي الخرطوم التي وصلوها علي مشارف الثانية بعد الظهر وسط استقبال لم يسبق له مثيل لامونه في المطار ،...
كلنا كنّا هناك ....وأطلت امونهً وسط احضان الجميع والبكا ( والنخجي.....!!! ) وشقت زغروده عنان السماء ...ابتهاجا بسلامة العودة واحتفالا بعمرة مقبولة ...!!! ود الحاجه قال هي امونه دي فازت في ( ذا فويس) ولا شنو ......!! وتعالت الضحكات ......!!!
جينا كلنا البيت وضبحنا خروفين وكانت المفاجاة انو دكتور كمال الرجل ( الوطن ) حلف قال القروش الطلعا للعملية مابترجع تاني يشترو بيها ( امجاد ) لي ناس امونة ...!!!
امونة بكت بدموع سخية تشكر فيها الجميع ....!! قالت وهي تبكي ....!!! عطية البغسل العربات قال لي لو كان عندك ( عربية ) بنغسلا ليك كل يوم ...قلتا لي عشان عارف لا عندي ولا حيكون ...!! قال لي الله كريم ...!!! وتاني بكت ...!!!
عرفها الصبي ....!! وفاتت علي امونة ....!!! دي اسمها يديك لما يرضيك ....!!
امونة سألت بعد داك ...اها كيف الجيران الجداد قصدها ناس ...( فاتن) ..ان شاءالله انسترتو معاهم وانسترو معاكم ...!! سنية قالت كان كدي النقوم نمشي البيت...!!! امونة رجعت نصيحة .....!! وسط ضحكات كل الحضور ... ومن الأعماق...!!! ربي يغتي عليكم ...!!
انه يوم في التاريخ .....!!! حمد لله علي السلامة ...!!
يبدو ان القصة لم تكن مرض أمونه ...!! ولكنها عمرة الحاجه ريا ...وعزيزة العزيزة ...!!! واشياء اخر ....!!!
هذه الدنيا يديرها ملك ...!! مالكم كيف تحكمون ....!!!
عشرات حبابك ....!!! سلامات