يوميات علوب .....123.... ( ديسباسيتو )
عرس فاتن مفروض يكون شهر ( اطناشر ) لكن الجماعة
استأنفو الحكم وعجلو بالقصاص ....قالو ( أكرم ) عايز العرس يكون هسه في العيد دا عشان الإجراءات بتاعة الإقامة بتاخد زمن ..!!
.أكرم طلع في أمريكا (المجرم ) بقت علينا( عرسه وزوغه )
ماهو يالسجن ياغرامة ...لكن الاثنين معا ...( غلبني كتر علي )
انا من زمان قلتا ليكم البلد ده (معيونه ) اي حاجه سمحة ما بتستمر ..!! لازم نعمل حملة ( نبخر ) بيها السودان ده كلو ونقرا ليهو يالفقرا من عين الحسود يبرا ....!!! كان نفك ( الساجور) دا ...!!
هسا شوف ذي فاتن دي اتختفت كيف ذي البرق قبل مانشوفا سمح ...!! أهو يجو نوع ناس ( أكرم ) ديل دايرين يقعدو
في أمريكا جنب ( ترامب) ....!!! ويلقطو ( النوار ) بتاعنا برضو يخمو يودو هناك ...
.....!! يشيلو ويدفعو في الضرايب (قطعت قلبم ) ...!!!
هسا عليك الله عرسا ذي دي مش مفروض يدفعو لينا دمغة ( جريح ) ( عوقونا في فاتن ) ...!!! وضرايب للبلد دي ...!!! هسا الزول ده ( حيصدر ) ليهو منتج وطني نادر ذي ( فاتن ) دي ...!! كدا من غير أي إجراءات ....!!! معقولة لكن ...!!!!؟
ياحليلك بالكتير يافاتن يالجيتي ومشيتي ذي النسمة ..
ولا نقول الا مايرضي الله...!!! لله ما أعطي ولله ما أخذ
مشاعر قالت لي العرس خامسة العيد في صالة ( الأحلام ...) قلتا ليها والله فعلا الشخص المناسب في المكان المناسب ....!! عذبة انت كالطفولة ( كالأحلام ) ....ياها شبهك ياحلم الأماسي ....!! إنتي العيد ونحن ( الضحية )
بس قالت لي نحن ماحنمشي الصالة ...!!! حنمشي ليهم هنا بس في البيت ...!! قلتا ليها و ليي يعني ..!!؟
قالت لي عرفت من متين كمان انتا ياعلوب.... الناس ديل مما رحلو هنا جنبنا في الحلة دي ماتمو أسبوعين .....!! نتخمخم نمشي نكمل معاهم عرسم ...!!! انتا قايل نحنا ماعندنا ( برستيج ) ولا شنو ......!!؟؟
قلتا ليها والله ماعندكم...!!! ويوم واحد ماشفتو ( برستيجكم ) دا ...!!! بس قلبكم أباها ساكت البت دي ....!! يكون من السماحة الزايده دي ....!! ودي طبعا أفكار ( فلقصة ) أكيد ...!!
انتو انا مالقيتكم كلكم في عرس ناس الرشيد...
الحالة عازمنكم جيرانم ...!! وبعد ده كلو مشيتو.... لا ...!!ومرصرصات قاعدات في الصف الاول ...!!! والصفيق مع الفنان ...!!! وينو البرستيج دا ....!!؟؟ اقعدن تابعو لي ( فلقصة )دي لما توديكم الخور ....
وعلي كل نحنا غايتو ماعندنا ....لا برستيج ...ولا برسيم ...!! وماشين ماشين ....!! نلقي نظرة الوداع ونجي ...!!! هو فاتن دي بعرسوها كل يوم .......أخوها ده عزمنا وطوالي قبلنا الدعوة
المهم يازول اتجبصنا ليك من المغربية ناويين الوصول ....معاي الصادق صاحبي ده ....!! اها دا كمان النوع داك البتكسر مع نفسو ...!! ( حب داخلي عنيف ...!!! ) ...!! اصلو مابصرح ...!! فصيلة ( ياقلبي المكتوب كمد ...!! ) ...!! علاقاتو كلها من طرف واحد .....!! ( لأنو الطرف التاني أصلا مابكون عندو خبر ) شفتو الزول ده مريح كيف ...!!! بتكسر براهو كدا بمزاااج ...!! ويبقي مارق ...فعلا ( كسار نفسو ابليس ) ..
اها ناس فاتن ديل مما رحلو جنبنا ( الصادق) ده من تمنية صباحا تلقا ( مشحوط ) واقف جنب الظلط في المظلة ..( محل فاتن بتمرق ....!! ) يدي التحية ...!! قال بتدي طاقة إيجابية ....!! ( في دي صدقتا يالصادق ...)...!!! ( فاتن ) دي لو الكهربا قطعت ...!! عادي ممكن تضوي الحلة دي ( والحلل ) المجاورة ....
بس المطرة جهجهتو في النهاية بقي ماعارفا بتمرق بي ياتو شارع ....!!
نحن المطرة عندنا أسرع من الحكومة كل يوم بتفتح ليها شارع جديد ..لحدي هسا حصلو ( تمنطاشر )...!! غير البحيرات الصناعية ....!! ولسه قالو اثيوبيا شايلة تقيل ....!!!
(وإثيوبيا ) نصها معانا هنا ...) ..!!!؟؟؟؟
اللهم لا حسد ....
فعلا وصلنا ذي الساعة تسعة كدا ...!! ( قبل إدارة الصالة ) قلنا ناخد وضع ...!! والصادق صاحبي دا متحمس أكتر مني التقول عرس خالو ....
قال لي عارف ذي فاتن دي صاحباتا بكونو طيارات ...!!! اسألني انا ...!!
كلامو صاح الزول ده...!!! ( النوارس ) ...علي أشكالها تقع )
...!!!
المهم أخدنا موقع مميز ..!! ناصية ...!! وفاتح علي صفين ....!!! يتيح الرؤيا بزاوية منفرجة ...!! كان الله يفرجا علينا ....!!
فعلا العرس بس التقول في ( مجلة ) ما ( صالة ) ...!! الناس دي كلها متمره ونضييفة تحلف تقول ماخده ( أورنيش ) .....!!
الصادق قال لي كان تكلمني من بدري كان أديت بدلتي دي ( شطفة ) جيت بيها ...!! قلتا ليهو الحمد لله الما كلمتك ( تشطفا ) يا الصادق ....!!! يشفطك إعصار ( هيرفي ) ...!!! هي دي بدلة ولا فوطه البشطفوها دي .....!! أسكت خلينا نتفرج عليك الله ....!!! ( صدقو قال لي كلامك صاح ...!! )
اها جات وفود المقدمة ....!!! مجموعة من البنات ...يقدلن ....
وحدانا وزرافات....!! ( زرافات ) يعني مجموعات .....!!! ما ( الزرافة ) ست الاسم والريد ....!! استغفر الله ...!! طلع في واحدات ( ست الاسم والريد) ....!!! انا آسف ...!! 
🙈
🙈
لكن هن مالن يتشابهن و بسلمن علي بعض شديد كدا...!!؟ كانن مسافرات ولا شنو ...!!!
قلتا اسأل الصادق....!! بالمناسبة طبعا الصادق ده خبير ( حفلات وأعراس ) معتمد ...!!
قال لي زمان لما أكون زهجان بمشي أي عرس كدا من طرف ...!!! ولا بعرف أسيادو ...!! بخش بحضرو كلو وبغير جو وبطلع .....!!! وقال لي مرات بتعشي ....!! ولو كمان ماعندي حاجه تاني يوم ...!!! بحضر الجرتق ...!!! بجرتقم ...!! وأجي البيت ....!!! والنَّاس دي كلها بتسلم علي ...!!! ونبارك لي بعض ...واتخارج ...!! ( عليك الله شوف السودان ده حلو كيف ....!! ) لوحة بس ....
اها قال لي ماتشوف السلام ده ...!! ديل بكونن اتلاقن الليلة الصباح لكن ده لزوم الحفلة ....!! ( السلام من الداخل ) ...!!
وقالت كدا الايفونات والجلاكسيات دي مرقت ....ودورن ليك تصوير....!!! ( سيلفي السرور ) ( والقداديم ) ( اطمطت) ..!! بوزي وبوزك ....!!! انتو ليي هن بمدو (البوز ) ده كدا ...!! في واحدات ( ممطوط ) طبيعي .....!!! برضو مصرات يدوهو وصلة ( البطة بريئة منكم الي يوم القيامة ) ...!!!
المهم يازول الموبايلات دي لما آمنت ..اتستفت لي عينا
...!!! هسا ياربي الصور دي بودوها وين .....!!؟؟؟
اليومين ديل كمان في موضة ( عدسات ) كدا لافا....!! تلقي الواحدة لونا بني والعدسة خدرا....!! ( نمر بس ) ...!!
🐆
🐆
يا اخوانا البنات ديل مافي زول يتكلم معاهن إنو مافي أحسن من خلقة رب العالمين دي ....
بس الصادق قرصني بي تحت ...!!! ( يعني شوف شوف ...) والله يا اخوانا لما أديت عيني دي حكة ....قلتا إمكن بتخيل لي ....!!! لكن والله ولا خيال ولا حاجه .....!!
واحده من البنات ديل شايلا ليها ( كلب ) صغير كدا في صفحتا .....!!! الكلب الواااحد ده ... !!
إذن كلام ( بكور ) صاح معناتا القيامة دي فعلا قربت تقوم ...!!
هسا الكلب دا متلتلنو جايبنو بالليل ده مالو ...!!! يكون عيان ....!!!؟؟؟ ولا احتمال لقتو واقع برا .....!!! لا لا ما ظنيت ...!!! دا ماشكل كلب واقع ...!! ( الكلب ) دا الترطيبه والهدوء والطمأنينة الفيهو ماقابلتني قريب دا ....!! ظاهرا في عيونو .....!!
هياااا اخوانا 
😳😳 ملبسنو ( فيونكه ) كمان ....!! 
🎀الصادق قال داير يدي البدلة ( شطفه) ....!! تعال اخد ليك نقلا ....!!!
😳😳 ملبسنو ( فيونكه ) كمان ....!! 🎀الصادق قال داير يدي البدلة ( شطفه) ....!! تعال اخد ليك نقلا ....!!!
والله انا خايف يكون عازمنو ( الحيوان ) دا لانو (الكلب ) ده يعاين كدا بي طرف عينو وبي ثقة شديدة عين ( كلب ) مستغني كدا ....ولا شغال بي القصة دي كلها...!! شكلو متعود علي الطلعات الجوية دي ...!!!
الصادق ميت بالضحك ...قال لي (كلب ) ناس حاج التوم ذي الوكت دا تلقا نايم يشخر .....!!! كان يجي يشوف ( الكلاب ) اولاد ( الكلاب ) الجد جد ....!! قاشرين كيف ....
البت طلعت ليها حاجه من شنطتا أدتا الكلب دا ياكلا ....نحنا بس بقينا مركزين مع القصة دي .......عرفناالشغالات الفلبينيات في الاعراس .....!! جابت ليها ( كلاب ) كمان.....!!!
بتصدقو قالت ليهو عشاني يا (دودي ) حته بس ....!! ( دودي ده الكلب ) ...!!العجبني ولا هببو ليها...!!! رفض تماما الدعوات لفك الإضراب عن الطعام ...!!! قدر ماحنستو ماغير موقفو ....!!! ( شبعان يا ود الكلب ....)
والشماسه اللافين بي برا ديل ...!!! مالاقين ليهم حتة لقمة ...!!! البحنسم منو ديل ....!!! ؟؟؟ يفوطو في العربات ذي (الطرابيز) ودودي بي جوه مابي الأكل ....!!
( واحلاتي يادودي ...انتي مادايرا تاكلي ...!! ياتمبوشه.... )
راجي الله تاكل ( الحمط رمط ) مع شوييية ( أندرين) ( معلقتين ونص ) ..!! بتعرف ( الحمط رمط ) يابيبي ...!!
ده مابوربك ليهو ..!! خلي مفاجاة ....!! لكن ( الاندرين ) ده نوع من ( المبيدات ..) ...!!!نص معلقة بس بترجع ( الكوشة ) تاني ...!! يا كلب ياود الكلب ....!!!
انا المستغرب ليهو البت دي هسة شالتو كيف من أمو ...الكلب دا ( سغير ) شديد ...!!! زمان نحنا لما نكون عايزين نسرق لينا (جريو ) ....!! التخطيط للعملية براهو بياخد أسبوع ...!!
في ستة مهمتم الاساسية انهم يشغلو أمو ....والسابع يتولي مهمة سحب ( الجريو ) وإخراجه ...!! وبعد الترتيبات الأمنية ده كلها ...!! احتمال أمو تقبضك وتعضيك يتجاوز ال ٧٠٪ .....!!! فعلا التكنولوجيا سهلت الحياة ...
ود الحاجه عضاهو ( كلب) مشي الدكتور قال ليهو بديك الحقن لكن أمشي بعد تلاته يوم شوف لي الكلب دا حي ولا مات ...!! مشي بعد تلاته يوم يشوفو ...!! عضاهو تاني ...!!
دي ياها الكلاب البنعرفا نحنا ...!!! كلب يعني كلب ....!!! مالي مركزو وعارف بعمل في شنو ...!!
هسا البت دي تشيل وتمسح في الكلب ده بوَّظتو ..انتهت منو .... ده بكون خلاص نسي ( الهوهوا ) ذاتا.....!!! بقي يدندن ....!!
البت دي بتكون شافت ( أليسا ) عندها ( كلب ) قالت لي ( دادي ) اشمعنا انا ماعندي ..!! (دادي ) عيونو دمعت مشي جاب ( دودي دا ) ...!! دي بتكون القصة
قلتا لي الصادق هسا الجماعة ديل حفلتم بي منو... !!؟ قال لي يعني حتكون بي ( قيقم ) ...!!!
ما يا ( تيتو ) ولا ( مونتي ...) قلتا ليهو ديل ( قوارض ) ولا شنو ....!! قال لي يعني يا طه ولا منتصر ....!!!
لكن غالبا ( تيتو ) قال لي سمعتا البت قبل شوية قالت ....( تيتو ) جا .....!!
( ياسلااااام بالله هو ( تيتو ) جا ....!! وليه ما أديتونا خبر ...!!! الف الف حمدلله عالسلامة .....!!! وجا متين ( تيتو ) ....!!! ( بالله ده كلام ده )
.....قلتا لي معناتنا حفلة (بسمات ) الحضرناها في الحلة كانت بي ( عوعو ) .....!! قال لي ( عوعو ) ده منو ...!!!؟؟ قلتا ليهو( البعيو ) ....!! وفقعناها ضحكة ....!!!
الصادق ده مفروض يدوهو أستاذ زائر في مادة الأعراس دي ....عجبني والله .....!! خبير وطني ...مفترض ياخد بطاقة تسمح له بالدخول لي أي عرس ويعامل معاملة خاصه
اتصورو عاين لي ساعتو كدا ...!! قال لي خلاص العروس بتكون علي وصول ....!! فعلا خمسة دقايق فاتن جات ...!!
( أذهلني الصادق )
طوالي قلبي ضرب التقول انا العريس ....يا زووول العربية طبعا بتجي منقشطا جوه الصالة ...الصادق قال لي الصالة دي بي مية وخمسين مليون ...قلتا ليهو في الشهر ...!!! يضحك ساااي قال لي دخلة العربية دي براها بتكون بي أربعين مليون ...!!! قلتا ليهو مالا ....!! داخلا ( جامعة الخرطوم ) ...!!!!؟
قال لي ما دا جزء من ( الكنته ) مافهمتا ( الكنته ) دي شنو ...!! لكن إتخيلتها ....!!!
المهم فعلا العربية جات طول القطر داخلا فيها عشرة شبابيك
غواصة بس ...!! و ( أكرم ) العواليق ده جا نازل .....
وقالت كدا ( فاتن ) جات دافرا ...
الغزالة النافرا ...!!!
النجيضة وماها خاسرا ....!!!
الحنينة ولينا آسرا .....!!!
هييييع ....!!!
الناس دي كلها وقفت ...!!! الشهادة والعمل الطيب ....لوحة بس ....!! ولا كلمة ... !! ...غسلت وشها ده بي موية وجات عرسا ....!!! نجفة بس ...!!
جات واحده كدا جارية قاطعا ذي ( الموتر ) مشت خمت الفستان بتاع ( فاتن ) دا من الواطا ...!!! ديل طبعا وكت مالقن العرس ...بقعدن يجرجرن في فساتين الزفاف دي كان( تهد ) فيهن .....اي حفلة مشيتا بكون فيها واحده ولا اتنين ذي ديل ...انا زمان كنتا قايلن بجن تبع الفستان ،....!!!!
اها جن ذي ستة كدا كل واحده تديك احساس انها ( الانتيم ) لي فاتن ...واحده تجي تكلما في اضانا وتمشي....!! هسا دي تكون بتقول ليها في شنو في وكت ذي ده .....!!
وواحده شغالة ذي ( منشات العربية ) تفتح في الشارع للوفد الميمون .....!!
المهم العرسان نزلو ( وأكرم ) قابض مكنكش ( ليك حق ) ..!!بس بعد شوية الصالة ضلمت ...!! انا قلتا اكيد الكهربا قطعت ودورت ليك موسيقي هااادية كدا ....وزولك دور ليك ( سلو ) مع فاتن ....!! ( ماينفعك ) ...أتذكرت لي مقطع فديو فيهو جلد وبطان في عرس كدا ...قولة ( شششبطك ) دي ..،الواتس لما يتهزا ...!!!
كان يجو يشوفو .... ( رقصة البجعة دي ...) كانو ( محطوهم ) الاتنين ....!!!
المهم خمسة دقايق النور ولع ...نحنا الخمسة دقايق دي كنا أنجزنا ...!!! وقمنا بالواجب مع العشا ....(انا وأبو الصا )
الأكل مردوم ردم في الطربيزة ...زول شغال بيهو مافي ...بس كنّا ما قادرين ...استغلينا الضلام ده والرز مع اللحمة مع الطحينة عجناها عجن ....قشينا خشمنا بي الفوطه و جدعنا الصحانه بي تحت ....ماشاءالله الفوطه بتاعة الطربيزة ماااهله ستارة بس ....سترت الصحانه تمام ...!!! الحمد لله ....بقينا ناس ( بيبسي ) بس ...الصادق قال هو بحب ( السفن اب ) كمان لو لقينا لينا كباية شاي كان تكون كملت ...!! الحمد لله حمدا طيبا مباركا ....
بس بعد شوية جن بنات كدا خاماتن ليهن حاجات جارنها جر بي عربية صغيرة كدا بي عجلات يوزعو فيها علي ( الطرابيز ) قربتا أصفق...!! قلتا للصادق دي شكلها ( حقيبة رمضان )
ورد علي الخبير والباحث في التراث والأعراس د . الصادق
...قال لي دي حاجه اسمها ( الفال ) بوزعوها للناس ...!! وهي تبع ( الكنته ) القبيل ....!!
الله ينعل يوم ( الكنتة ) ( والشنطة ) ( والنطه ) ...!!والبطه ....!!! الناس دي قروشا محرقاها ..!! ولا لقتا واقعة ...!! ولا القصة شنو ذاتا ...!!
ياخ حتي لو مدفقا في الواطا دي مافي داعي للقصص دي ....!!! وانا اقول السخانه دي من شنو ...!!؟؟
اها بعد شوية تيتو جا ...!!! فعلا طلع طه ......
ودور ليك ...سايق الناس ديل سواقا ....والحفلة ربت ... وكت وصل قنبلة وحلات الزول في الطول والعلا بس فديو كليب مع ( الكونتيسة ) ....!! أول مره الأغنية تكون في محلها مع البارجة ( فاتن ) .....!!!
اها أصحاب ( أكرم ) ديل كمان بالصف شارطين ليك البدل دي كيف ...!! وكادين الشعر بالجنبات ....!!! وينططو ...!!! انتو النطيط ده شنو كمان ....!! كلهم بنططو في الاغنية ...!! دي قصة غريبة ...!!! يكونو لاعبين مباراة بكرا ....ولا هو ذاتو الحاصل شنو ....والله ماعرفتا ...!!
بس ( تيتو ) غادر حداشر .....!! تحفة دعوات المعجبين
جا واحد قالو اسمو ( فيزكس ) جا داخل بي عدتو ....انا قلتا ده أكيد دا عالم فلك جا يشوف الخسوف
طلع ( فيزكس ) بتاع ال DJ ....يشيل ويسلم علي البنات ديل ...!!! طلع بعرف نصهن ...!! وبطلبن كمان ....!! واحده جنبنا كوركت ليهو من بعييد ....هاي فيزكس...!!! ( ديسباسيتو ) ياراستا ....!! قلتا لي الصادق ...قوم قوم نتخارج من هنا ...!! جماعتك ديل الظاهر من ( عبدة الشيطان ) ....!! قوم قلتا ليك .....سرررعه ..
...!! قال لي روق روق ياخ (ديسباسيتو ) دي الاغنية العاملة ضجه في العالم حضروها اكتر من تلاتة مليار في اليوتيوب ...!! انتا قاعد وين أصلك ...
قلتا ليهو البركة في ( اليوتيوب ) الخلاك تحضر معاهم يالصادق ...!!! بقيتو تلاته مليار وواحد ....ديل في عديلم انت حاضرا لي شنو .....
فعلا استجاب ( فيزيكس ) للطلب ...وشغل الاغنية فصار الجميع يرقص علي انغام ( ديسباسيتو) في ( الخرطوم ) وأرواحهم معلقة في سماء ( بورتريكو ) موطن الاغنية الأصلي ....!!! صدق من سماها ( صالة الأحلام )
...!!!
المهم بازول طبعا ( النطيط ) وصل الذروة ....والبنات مع الأولاد خاتنو قرض ..!! وأهلم بتفرجو ...ومظاهر غبطة وسرور تعلو محياهم فهاهم يقدمو لنا فلذات أكبادهم ....بجسد معنا ...وروح تحلق في عالم بعيد ....!!
( مالنا ومالم ...!! بي ظروفم ...!! كل ( شاتن ) معلقا من عصبتا) ....!!!!
انفضٌ السامر ...!! فاتن الي حياتها الجديدة ....!! ونحنا الي
بيوتنا ....!!
دخلنا الحلة أنا ورفيقي ( صادق الوعد ) حوالي الواحدة والنصف بعيد منتصف الليل ....وحلتنا ( صااانه ) تغط في ثبات عميق ....!! إلا من أصوات متفرقة لنباح ( كلاب ) تتسامر ...!!
طوالي اتذكرتا ( دودي ) ...!!
يكون نام مسكين ....!!! راجياهو مدرسة الصباح .....!!
والأنوار ( مطفطفة ) الا من بعض الأشعة التي تتسرب من نوافذ بعض الغرف المغلقة ....!! ولا شك ان بعضهم يداخلها يبحلق الان في صفحات بعض المواقع والأسافير.....!
لتبقي المحصلة أن من قابلناهم في الصالة ...ومن هم في منازلهم الان .....!!! كلهم سابحين في الفضاء ....!!
أولئك في صالة الأحلام...!! وهولاء علي رصيفها ...
والدنيا مني و أحلام ....مبروك يا فاتن ..!!
- [ ]