الحلقة المئة واحدي وعشرون من يوميات علوب مع الطيب عبدالماجد

يوميات علوب 121.......ظلل الجو بيك الغمامة ....!!

جا واحد سكن جنبنا جديد قالو أشتري بيت عمك الطاهر ....ناس عمك الطاهر ديل جيرانا هنا في الحلة ليهم سنين ماشفنا منهم غير كل خير ناس طيبين كدا في حالم وظريفين شديد ...!!!

عندهم بيت تاني في (السامراب ) .....!!! هم أصلا من هناك ...باعو بيتم دا قالو عندهم مشروع ورحلو مع اهلم في داك ....!!! الله يسهلا عليهم وين ما فاتو ....!!! 

لكن هسا ده ما موضوعنا ....!! موضوعنا انو الإشتري البيت ده مدير واحد من البنوك الحايمة دي ...بنك شنو كدا ماعارف للتنمية والأعمال .....!!! 

خلينا من البنك تبع منو وشايت وين ...!!! لأنو للأسف برضو ده ما موضوعنا ....!!! 

والقصة دي حكيتا ليه ليه ليه 🎼 ليه 🎼 ليه...🎼. ( قديتونا يا ناس سوداني بالقصة الابت تنتهي دي ....كرهنا الرصيد ...

نجي لي موضوعنا الأساسي البخصنا وبعنينا ومطلع عينا اللي هو ( بت ) مدير البنك دا ....الاشتري بيت ناس عمك الطاهر ...الباعو بيتم ورحلو ( السامراب ....) ....

الشهادة والعمل الطيب ...!! من القيامة الربطت ...!! والقنبلة الانفجرت في نص حلتنا دي .....!!! 

ده شنو دا دا ...وده منظر شنو دا ...!!! ودا كلام شنو ...!!! والله أصفق واعلق .....غايتو قدر مانقول خلاص وصلنا( الميز ) تجي واحده تكسر ليك النظرية دي وتكسر ( الميز ) وتكسر راسك ده ذاتو ....ذي ( بت ) الزول ده ....!! ( قطعة ناصية ) ...!!! (فاتحة علي مية شارع.....!! ) قالو اسمها ( فاتن ....!!! ) فتنتنا( فاتن ...!! ) ...!!! وحلات ( فاتن....) ...!! وجمال ( فاتن ....) ....!!! الحلة كلها بقت ماعندها سيرة غير ( فاتن ) بت مدير البنك ...( وفاتن ) بت الناس الرحلو جداد ...( وفاتن ) القيامة القايمة ....!! وفجأة تصدرت فاتن عناوين كل الصحف في الحلة...!!! وكان عشقنا بنعشق مفاتن ....!!!

هسا ده يسمو شنو ....!!! الناس دي ذاتا قاعده تجي من وين 

...!!؟ غايتو معناتا السودان ده شايل شيل اصلو ما معقول ...!!! البت ولا غلطة .....!! ( ماشاءالله ...تبارك الرحمن ) غايتو أبوها ده كان يكتفي بي لقب ( أبو فاتن ) دي ويقرط علي كدا ....!!! مالو ومال بنك ....!! ومدير بنك ....!! والقصص دي ....

المهم ( فاتن ) بقت حديث كل الحلة .....!!! وكما قال الشاعر 

(سماحة ذاتا فايتا الحد .....!!! لهبة لهبة نار منقد ....!! ) 

...هسا ياربي الشاعر ده وكت قال الكلام ده كان ( شاعر ) بي شنو مسكين ....!!! حنني بالجد ...!!! تكون ملاريا ...!!؟؟ 

ماعلينا ...!! المهم ناس ( مشاعر ) طبعا التقطو الإشارة وعرفو انو الحلة جاتا طياره ...!! وبدت عمليات البحث والتحري وجمع المعلومات ...!! طبعا الكلام ده في حلتنا بياخد ليهو أقلا من عشرة دقايق ...( أسرع كتير من المخابرات ...) المعلومات جات نازلة ذي المطر ...!! كل الواتسابات دورت ...!!! غايتو ( # مارك ) لو عرف جماعتنا ديل ( واتسابو ) ده بنهزو كيف ..!! كان هو ذاتو اقتنع ...!!! وجا بي نفسو وقف علي الحاصل ...واستقرا هنا مع ناس عمك الطاهر ديل في ( السامراب ) ...!! يتابع القصة دي بي نفسو ....!!

لأنو بأمانة ( الواتس ) ده ممكن يطرشق في اي لحظة ....!! ( الحمولة دي زايده شديد ...!!! ) ...!!! 

لكن هسا يا ( # مارك ) بيني وبينك كدا وبأمااانه ... وانتا تراكا لافي العالم ده كلو ...!! حصل لاقتك شمارات ناعمة ومدققه ذي دي ...!!!؟؟ قول النصيحة ...!! حلفتك وفي ذمتك دي ....!!! مانحنا المسخنين ليك ( الواتس ) ده ....!!!؟

نشيل ونغربل في الشمار ...وانت تمعط في الدولار ....!!! 

تاكل السم كان ما اديتنا معاك ....!!! قلبي وربي غضبانين عليك يا ( # مارك ) كان ماقسمتا لينا ....!!! ان شاء الله ماينفعك .....

اها يازوووول البيانات جات كابا كب 

اول حاجه جات المعلومات الأساسية ......

# فاتن مصطفي الطويل ....!!! 

قرت اقتصاد في جامعة الخرطوم .....!! 

شغالة في بنك تاني غير حق أبوها ...!!! 

طولا ستة اقدام وسبعة بوصات ....( الطول والعلا ) 

لونا عسلي ....!! ( دي ماعيونا.... دي هي ذاااتا ..) 

صاحباتا بقولو ليها ( نونا ...) وناس بيتم بنادوها ( تونا ) 

( ونحنا بنقول الحقوووونا ) ...

ويستمر تدفق المعلومات دون هواده ... !! طوالي جات نازلة المؤهلات العلمية ...

،. اقتصاد مع مرتبة الشرف ....( ده بسمو لقاء السحاب ...!! ( سماحة ونباهه ) (العجوة معطونة في عسل ....) ...!!! 

غايتو بكونو ناس الجامعة خجلو من ( القيافة ) دي مشرفاهم أربعة سنين ...خرجوها بي شرف ....!! بعدين للامانة ( المهنية ) ذي دي أصلا مفروض مايخرجوها ذاتو ....!! يخلوها كدا بس ...!! تتوارثها الأجيال ....!! ويسجلوها في اليونيسكو ...

والله جد ...

المعلومات الجات ومتوفرة حتي اللحظة انها من الجامعة كانت موقفا الحركة ...شالاها شل ....

في ناس حافظين جدول محاضراتا أكتر منها ...!! لما كانت تدخل كافتيريا اقتصاد ...كمية الشاي البتتشرب تكفي بيتين 

( بكا ) وعرس ....!! متعهد الكافتيريا بي نفسو بسوط ليها الشاي ....!! والجموع دي كلها ( بتشفط ) معاها وعلي شرفا .... !! وفي رابطة محترمة في كلية الهندسة اسمها (شهداء فاتن ....) ...!! 

قالو كانت صاحبة أجمل ابتسامة شهدتها الجامعة في السنوات الاخيرة ...!!! الرقم دا كان مسجل بي اسم واحده في اداب ...اسمها ( سهير ) ....!!! ( برضو كتاحة ) وشاااطرة شاذة ....!!! بتضرب انجليزي أحسن من اهلو ....!! قالو مدير الجامعة بي نفسو كان بحنس فيها تنضم لهيئة التدريس ....!! عرسا ود عمها ساقا السعودية هسا في ( الباحة ) وعندها خمسة شفع ....!!!

بس ( سهير ) ظلت محافظة علي هذا اللقب حتي دخول (الظاهرة ) فاتن ....كسرتو حطمتو انتهت منو ... قالو فاتن وكت تضحك اي حاجه فيها بتضحك ...نخرة...!! خشم ..!! عيون ..!! كلو ...كلو ....والجامعة دي كلها تبكي ...!!! 😭

اها دي بس المعلومات الأولية عن الحادث الضرب حلتنا ...!!!وجاري حصر الضحايا ....!! 

والواتس شغال يلقط في المعلومات ....!! والكلمة الأكثر تداولا في كل محركات البحث داخل الحلة ...!!! ( فاتن ) 

قالو البنك الشغالة فيهو ده بنك تعبان وما علي قدر كدا سانداهو البت دي بس ....!!! اي واحد عندو قرشين بمشي يختهن هناك عشان ( فاتن ) تشوفن كان قلبا يحن ....ولما تغيب بقفلو من حداشر بقولو للزباين عندنا مراجعة داخلية ....!!! 

يازووول كل المعلومات اتكبت في دقايق ...

اها جزء من بنات الحلة وكت مالقن طريقة في ( اللوك ) قررن يعملن ( بلوك ) ....!!! ديل ناس ( فلقصة ) ومن لف حولهن ...!! وده تخصصن ....!! إسقاط راية الحق والجمال ....عشان يغزن (عكاكيزن ) دي ....!! قالو البت دي ( البت دي قاصداتن بيها فاتن ).....!!! اول حاجه ما اسما ...( البت دي ) اسما (النجفة دي ) ....!! لو سمحتو ....!!! 

اها قالن هي من ناحية سمحة النصيحة سمحة ماقلنا حاجه ( البركة في الاعتراف الدولي ده ....!! كان أحسن تقولو ) ..!!! 

قالو سمحة ...!! لاكين ...!! ( خلاص لكنوها) ( الشيطان يكمن في التفاصيل ) ...!! قالو عندها شوية عوارة .....!!! 😳( ماقلتا ليكم ...!! ) صفاء نطت قالت .....ما شوية ياأميرة ...قالو عويره رسمي ...!! ....ا طبعا صفا بتكون عايزه تموت من الحمامة الركت دي .....!!! خلاص ( قرروا تصفيتها ...!! ) و( اغتيالها سياسيا ) ....!! 

طيب ياخ فرضنا انها عويييرة هطلا وريالتا سايلة ... ( طبعا ريالة فاتن دي ميه الميه بتكون السكر السايل البعملو في اللقيمات البجيبوها في الدعاية دي ..) ...!!! 

اها انتو الماعويرات ديل استفدنا منكم شنو ......!!؟ وعملتو شنو في الحلة دي ...!!! ووينا إسهاماتهم ...!! اول حاجه ( صفا ) دي تحديدا قالت قرت (تصميم إيضاحي .....) ماسكانا زمن بالقصة الحزينة دي لحدي ما اكتشفنا إنّو التصميم الإيضاحي القاصداهو( صفصف) طلع ( التطريز ) .....!!! 

اها جدعة مهمة للشباب ...!!!

البنات اول مايقولو ليك البت دي عويره ...أقع ( العويرة ) دي طوالي .....!!! ولا تتردد ....( دي الزيت ....!!! ) ...بتكلم جد

هسا البنات ديل لا أتكلمن معاها لا قعدن معاها ...بس كدا ( اون لاين ) و ( بلوتوث ....!!) معقولة لكن ....!! انا غايتو عاذرن يبحتن في الحلة دي ليهن سنين تجي الطيارة دي تكتحن وتستأثر بالاهتمام ....!!

ناس قرضة سموها ( نيمار ) ....وديل معلمين كبار ما بلعبو الا مباراة ذي دي ....!! 

ياخ البت دي عندها( توسان حمرا ) 🚘 كدا موقفنها في قفص قدام بيتم ..!! وكت تقول كدا تجي تركب فيها الصباح مع القفص ده بس ياهو ( الأسد النتر ) البقولو ....!! مافي اي احساس غير كدا ....( إنها سطوة الجمال ....!! ) والله حقو الناس دي تقطع تذاكر تجي تشوف ( الأسد ) ده لافي في القفص ده وتمشي ....!!! وممنوع اصطحاب الأطفال عدا ( عكرمة والكجم ...) ....!! لا والمنظر الجدير بالتأمل لما تركب وتدي العربية دي حبة ( ابنص ) خفيف كدا تسخينه ....!! (بتعزف مافي شك ) ...!!! والله (سخنو) بينا الفارقونا وراحو ...!! 

والعجب لما تدق الخلف دا وترجع ورا ....( كلنا بنرجع ورا ....) ونفسنا ده بقوم ...!! وتقول كدا تستعدل وتركب الزلط ....!! ( الاماراتية وطارت ) .....!!! رويحتنا دي تشيلا معاها ...!!! وسوات العاصفة بي ساق الشتيلة الني ....!!! 

الله يعدلا عليك وين ما قبلتي ويكفيك شر الطريق يافاتن .....!!! محفوفة بدعوات كل أهل الحلة ....!! رجالا وشيوخا واطفال ولا استثني ( عكرمة) .....!! ( النسوان حادات ) .....!!!! 

صحي الجمال لا وطن له ولا.....!! ( ميز ).....!!! 

في واحدات وكت مالقن طريقة شبكونا ليك حوا وااااااالده يابت أمي ......!! ( يلولون في قداديمن ) ...!!! 

طيب المشكلة وين ماياها دي ولدت قدامكم ...جابت (فاتن ) دي ...!! ولا فاتن دي ( طفلة انابيب...!!؟؟؟ ) ...

خلو روحكم رياضية ياخ ...!! الجمال جمال الروح .....!! الا روحكن محرقاكم ساكت ....!!!!

عليك الله خلونا من الصواريخ المضادة دي ....🚀 نرجع لي ( فاتن ) والجمال الفاتن ...!!! ( تنتن ) الرز باللبن ....!! البت دي طبعا ماطويلة وما قصيرة ....!! لاسمينة ولاضعيفة ... أي حاجه في النص ....!!! الا العيون...!!! والنص ...!!! 

سماحة ذاتا تشق النص ......!!!! 

العيون 👀 مابتعرفن شايتات وين ....!! ولا باديات وين ومنتهيات وين .....في ناس كتار في الحلة بقو يطلعو مع تسخينه العربية البي الصباح دي ...!!! تجي لابسا التوب رابطا في نصها ..ما بتعرف منو الشايل التاني ...!!؟؟ وشايلين ليك مفتاح العربية ده فيهو ( دبدوب ) صغير كدا حلات الدنيا علي ....!!! أي زول في الحلة من طرف لو سالتو الصباحية ديك أمنيتك شنو ...!! طوالي حيقول ليك الامنية....!! (دبدوب ...!! ) 😂

ماهو ذي تونا دي كان شفتها الصباح قطع شك يومك حلو ..،،!!! المسائل دي معروفه وعندها علاقة بالكيميا والطاقة الإيجابية والكلام ده ...يعني انا لاقيت أمونة الشيطونه دي ذي خمسة مرات من الصباح ....الخمسة ديل أسوأ خمسة ايام في 2017 اخر مره لاقينا ده ....اتقلبت بينا الرقشة.... بس كويس انها في زقاق مافيهو عربات اتنفضنا وقمنا ...

لاقيتا قبل يومين من بعيد في شارع ناس ( بكور ) ده ...!!! داير أبرك في الواطا دي ...!! لأنو مافي مخرج طوارئ ....🔃 الله شافني اتقشطت ليها في بيت ....!! ( مايجي يوم ( أسد ) كدا تايه ياكلك يريحنا منك يا امونه ) ....!!! بس العاجني في امونة دي الدايرا بتقولو ...!! 

قالت نسوان الحلة متابعات ( حريم السلطان ) ويومن كلو مساسقا ...وجري في الحر ...!!! حقو يسموهن ( حريم الدكان ) ...!! 😂😂😂.....

التصريح ده وصلن كلهن بالصف ( قلتو وانا ستو ) ....!!! وحتي اللحظة لم يخرج رد رسمي ....!! ( ولن يخرج ...!!! ) 

تقول لي أنجيلا ميركل ....!! ) ...امونة ياخ ....( المرأة الشبح ) ..

ده شنو ده هسا ده .....!!!! حتي هنا ( أمونه ) لاحقانا ومضيعا لينا الزمن ....!!! عليك الله كدا ولا كدا... بلا امونة بلا كرتونة ...( ما تقوم تسمعنا كمان ماناقصين ...) ...!!

ده وكت امونة ده هسا ....!!!! 

نرجع للحليب والرز بالذبيب ...

اها ذي ( تونا ) دي طاقة إيجابية للحلة دي كلها ...عشان كدا بالجد مفروض ندفع ليها رسوم اصحاح البيئة ....( بتلون الأجواء ....) ....!!! بالجد كدا ...!!! بدل نديها ناس النفايات (المرض ديل ) ...!!! يشيلو الرسوم....!! ويخلو النفايات ....!!!

.،،،،بس دايما الحلو مابكمل .....!!!😳 فمن ضمن تسريبات( ويكيليكس) والسيل. ( العرمرم ) من البيانات المتدفقة الجات عن البت دي وردت معلومة مربكة إنو ( فاتن ) علي علاقة....!!! ولازالت.....!!! مع زميلا منذ سنوات الدراسة و ( كيس ) كان مشهور في الجامعة ومعروف ....!!! الود ده للأسف اسمو ( أكرم ) ....!!! ( لازم يكون (أكرم ) حيكون ( الكجم ....) ...!!! وللاسف دي شنو كمان انتا ياعلوب ...!! خلي الحسادة ....!!!

بس الحمد لله الأخبار المطمئنة شوية ...!! وجات بعد كدا ..انو بيناتم خلاف ...!! 

شوف بالله نحنا وصلنا وين....!! (بقينا نقتات علي الخلافات ..!!

اها افرض مابينم اي خلاف ......!!! ياخ افرض ماف اي علاقة بينم أساسا ....!!! نحنا نستفيد شنو من الموضوع ده ده ..!!؟ 

النصيحة بنستفيد....!! ياخ مجرد الأمل انو ذي ( فاتن ) دي قاعده كدا منتظرا النصيب وماعندها حاجه دي هسا كدا مابراها حالة من الفرح ....!! ودفعة معنوية انو الدنيا لسه بخير ....!!! إنتو قايلين الشباب ( المفلس ) ده بضايق ليي لما يعرسو واحده سمحة لي واحد ( غني ....!! ) بحسو انو الفقر حال بينهم وبين السعادة ....!!! رغم انو ده مفهوم خاطئ ...!! لكن أهو في النهاية احساس ....!!! 

هسا فاتن دي بالله ماتهبشوها لينا خلّوها لينا بس كدا علي خلافا ده .....!!! وأمتع نفسي بالدهشة .....

جيت البيت لقيت مشاعر وصاحباتا ناس صفاء وأمنيات وتقوي ململمات ...!! ومعاها كم بت كدا وصوت ( السشوار ) ذي ( الموتر ) واصل الشارع .....!!! ( الناس راكبة (توسان ) انتو اقعدو اركبو لي ( السشوار) ده ....ورررررررر فينا ....!! ) ريحة الشعر ذي الشية ...!!! والله انا قايلم ( بلحمو ) ليهم في حاجه .....!! قلتا ليهم خير ان شاءالله في شنو ...!!؟

قالو معزومين عن جيرانا الجداد ....!! قربتا أقول ليهم ماشي معاكم ....!!! قلتا ليهم حفل تعارف ولا شنو ....!!؟؟ قالو أبدا ( سد مال ) فاتن ....!!!!!!! 😳😳

والله ياجماعة مش مرات الزول بشوف ليهو نجوم ✨⚡️💫وحاجات كدا قدامو .....!!! ويدينو ببقو صاقتااات ..بس دي حالتي ....!! 

الله يسد نيتكم ذي ما سديتو نفسنا ...!! عملتا نفسي ماشغال بالموضوع من غير ما اشعر قلتا ليهم ان شاءالله العريس يكون أكرم بس ....(التقول دفعتي العواليق دا ) ....قالو لي بي فرحه صدق صاح اسمو ( أكرم ...!! ) صاحبك ولا شنو ......!!! عقبالك ياعلوب ....!! تاني النجوم ظهرت 🌟✨⚡️...!!! المره دي معاها عطشه كدا .....!!! 

قلتا ليهم صاحب السجم .....!! هم قايلني زعلان إنو ماكلمني....!!! قالو لي لا ياخ ماتظلمو .....دي حقت النسوان ياعلوب .....!! اكيد حيعزمك العرس قالو حيكون شهر ( اطناشر) .....!! (قشطوني العكاز التالت ) ...!!!الحقوني يا خوانا ......!!! تاني تاني جن ⭐️🌟✨🌟⭐️🌟✨🌤🌟🌟⭐️⭐️🌟☀️☀️⚡️✨🌟🌟🌟✨✨⚡️⚡️✨💫💫💫💫✨⚡️المره دي ملونات وكتار شديد ....

من المغسة قلتا ليهم شهر ( اطناشر ) ذاتو البرد حقنا التافه ده زول بحضر لي حفلة مافي ...!! ( شوف المستوي الوصلنا لي ) 

هسا في داعي ناس ( فاتن ) ديل يرحلو جنبنا ....ويحرجونا كدا ...!! ماكنا كويسين ومتعايشين مع (!مودة ) التليفة و ( أمونه ) الأليفة ...!! جاية بس خراب طبع ....!! وخاما معاها( أكرم ) كمان .....!!! بالله شوف حظنا ذاتو كيف ....!!! قاعدين في حلتنا دي جوه ....!! المصايب تجينا في محلتنا ....استغفر الله .... !!! بس أملنا في الله كبير ....

قلتا ليهم اها الحفلة شهر واحد بي منو...!!؟ ما أظن بلقو فنان فاضي ....!!! 🎤

صدقو ا فقعنها ضحكة ....😂😂 قالو لي اخد ليك دش ياعلوب الظاهر عليك تعبان .....

الما بتعبني شنو ...!! فاتن ذي المطره جات وفاتت ....!! فعلا كلامن صاح البنات ديل ... انا محتاج لي دش ....

دخلتا الاوضة اشيل وأغني ....!! 

ياحمامة مع السلامة .....!!! ظلل الجو بيك الغمامة ....!! 

المهم غايتو استحولتا واستغفرتا.... ....وراجين (الأكرم ) من ( أكرم ....)

( فاتن ) فاتت .....!!! أقرعو الواقفات 

ياربي ( زولا ) ده بسوقا طوالي.... ولا بخليها لينا شوية ....!! 

...يا اكررررررررم ... ....