يوميات علوب ...127.......بتوقيت ( الأبيض )
وانا طالع العصرية كدا لقيت ليك عمك ( كروم ) دا متحكر في كرسيهو قدام بيتم ....!! الكراسي الزمان بتاعت البلاستيك ديك قدييييم كدا منسوج اخضر بالكحلي لم يجتهد صانعه في اختيار ألوان متجانسة ..لكنه أتقن اللف علي الحديد ....وقد احكم الوثاق ...!! مايفسر بقاءة متماسكا طوال هذه السنين
... غير أن بعضا من ( سيورة ) فشلت في الصمود وتدلت مستسلمة من تحته علي استحياء .....!!!
لكن رغما عن ذلك شايل عمك بي مزاااج ومتوهط في نصو ...!!
خاتي قدامو طربيزة تحسا بيها واقفة غصبا عنها دايرا تقعد من فرط التعب ..!! وتبدو عليها أثار السنين والزمن قد ترك بصماته عليها بجلاء ...!! عابثا بملامحها ( ضربة هنا وخرمين هناك )
لكنها تواصل العمل صونا لعشرة ...!! وحبا لمكان ....!!
علي رصيفها راديو صغير ...!! بقول في شنو ماعارف بس مجرد إثبات الوجود دا كفاية في زمن اصبح فيه (الموبايل ) هو سيد المكان ...!!!
والعم ( كروم ) مركب نضاراتو يقرأ في كتاب مهتريء.. !! محكما قبضته عليه وبكلتا يدية كأنه يخشي أن يطير .....!!! استوقفني المشهد
بكل تجلياته وجك الموية الألمونيوم قداموا متمر ونضيييف يفيض نداوة وعذوبة ...تحس بالمويه جواهو تنبض حياة ...!! وقد نثرت ابتسامتها ( ندي ) علي جبينه....( شهاني الموية ذاتا ياخ)
حبيت المكان بكل تفاصيلو....!!!
وجيت عليهو من هناك بادرته التحية ...!!
عم كروم إزيك ...!!
( نحي الكتاب جانبا وأحني رأسه قليلا فتدلت معه ( النضارة ) ....!! ونظر آليا شاخصا من فوق إطارها )
هو دا انتا ...!!! اهلًا ...اهلًا علوب إزيك يا إبني زمن ماشفتك ...!! إنتا كويس ...!!؟؟
قلتا ليهو الحمد لله يا عم ( كروم ) ..!!
قال لي اتفضل ..اتفضل ...!! عاين كدا لقي مافي كرسي ..!! عاينتا انا للطربيزة حسيتا بتقول لي اوووووعا ولا تحاول ....!!! في إشارة لمجرد التفكير في الجلوس عليها ... ...!! وكأنها تذكرني بوعكتها ( الخشبية ) ...!! وملامحي تؤكد قبول الدعوة ....
قطع كروم المشهد... ونده علي احدي حفيداته بالداخل ....أمل ...!!! يابت ياااااا أمل ...!! ايوه ياجدو ....!! ردت الصغيرة ...!! جيبي كرسي بسرعة وخليهم يعملو شاي .،،!!!
( أجاب كروم ) ....وانا قد هيأت نفسي تماما للجلوس في حرم داره الوريف ..!!
( كروم ) دا راجل لطيف جدا ونضمو طاعم ..!! و هو ذاكرة هذه الحلة وإن لم أبالغ فهو ذاكرة وطن بحاله .....!! تنقل في أرجاء هذا السودان الفسيح وخدم في أكثر من مدينة و مرفأ ....
( أمل ) جات شايلا الكرسي في نص راسا لما حننتني ...!! جريت اشيلو منها قالت لي ...حفيييف ( يعني خفيف ) ولسانها لم يصل بعد مرحلة وضع النقاط علي الحروف ...!! وقد ضمها كروم اليه في حنان قال ليها شاطرة يا أمل...!! يالله قولي ليهم الشاي بي سرعة ...!! قالت ليهو ( حار ) مابجيبو ...فضمها من جديد ..!! قال ليها تبري انتي من الحار ..انتي كلميهم بس ...!! هم بجيبو ...!! وانطلقت الصغيرة تعدو ....ولمست دفقا من حنان بين الرجل وإحدي حفيداته .،.،،
اها بعد ما قعدتا ...!!! قلتا ليهو كيفك انت ياعم كروم
وعاينتا ( للرادي ) قلتا ليهو اها اف 106 ولا اف ام 97 ولا بتحب ياتو إذاعة ....!!؟ قال لي أنا في حياتي ماسمعتا غير أربعة إذاعات هنا ام درمان... والبي بي سي ...وصوت العرب ...!! ومونت كارلو ....
...!! قلتا ليهو ولييي يعني ...!!! ؟؟ قال لي لأنو علي الأقل بتطلع ليك بي معلومة جديدة ....!! أو علي اقل تقدير بتكون عارف الدنيا ماشا علي وين ....!!
قال لي الإذاعات التانية دي عايزة تغني بس والغنا الأكثر من اللازم دا بكتل القلب ...!! ونحنا مافضل فينا قلب ...!! أعقبها بضحكة (صدوق) ...!!
رددت عليه مطمئنا .،..قلتا ليهو وييين ياخ ...قلب (كروم ) لايشيخ .....!!!
قال لي تعرف ياعلوب يا إبني ....نحنا في زمنا داك ما كان في حب ...!! أو بالاصح لم يكن معلن ....!! يعني العادات والتقاليد والمجتمع مابتسمح بي كدا ...!! لكن والله ياعلوب أنا الحب الحبيتو للمرحومة خالتك ( سعاد ) دي ...الله يرحما ويغفر ليها ...!! لو وزعوهو علي أهل الأرض جميعا لكفاهم وزاد ...( في حب يا اخوانا أكتر من كدا )
طبعا عمك كروم دا من مؤسسي هذه الحلة لديه سبعة من البنين والبنات ونصفهم من الأحفاد توفيت امهم وزوجته وكان اسمها ( سعاد ) ...منذ خمس سنوات واشتهر ( كروم ) بوفائه المطلق لرفيقة دربة ( سعاد ..) في حياتها وبعد الرحيل ...!!!
حتي انه لازال يشتري الأشياء التي كانت تحبها ...!!!
مره عمك ( يس ) سيد الدكان قال لي عمك ( كروم ) دا قال لي أديني من العسل الانجليزي دا اسمو ( أبو الأسدين ) ...سعاد بتحبو ....!! انا قلتا عمك دا اتلحس ولا شنو هي سعاد ماتت وشبعت موت ...!!
ولاني أعرف العم ( كروم ) جيدا قلتا لي عمك ( يس ) بيع بيعك ....!!! فالحياة عندك بيع .....!! واخرون قد أدمنوا الشراء حتي ولو دفعو حياتهم ثمنا لذلك ولأشياء غير قابلة للبيع ....!!!
إنتا ( بياااع ).!!!!! وفِي ناس ( بشترو ) .....!! قال لي بالحيل ...!!! ايقنت وقتها أنه لم يفهم من حديثي شيء ...!! ولا أظن ان ذلك سيحدث قريبا .....!!! فلو انك استوعبت مايقوله الرجل لكنت الان تبيع ( الزهور ) ....!! ( بدل الصلصة والبصل الانتا فيهم ديل )
...!! كروم مثقف حد الترف ...!!! ومطلع درجة التأمل ....
قلتا ليهو أحكي لي كيف قدرتا توصل مشاعرك دي رغم صعوبة
خطوط التواصل والاتصال الزمن داك ....!! قال لي المشاعر والأحاسيس الصادقة ياعلوب لاتحتاج كثير عناء فمتي مااستوفت الشروط فانهاتصل ودون وسيط ....!! لا ادري هل تحملها الملائكة الي الطرف الاخر أم انها تسبح هكذا في الفضاء حتي تصل الي وجهتها ....!! لا ادري ...!!! لكنها في نهاية المطاف ..!!! تصل .....!!
قال لي هسا الزمن دا في مليون خط اتصال ...!! يفشل معظمها في إيصال الرسالة ....!! قلتا ليهو ....الظاهر ( الشبكة كعبة ...) التقطها الشفيف ( وعلي الطاير ) وضحكنا سويا.. ومن جوووه هذه المرة ..( لعاب ياكروم ) ...!!
قال لي سعاد دي الله يرحما ...!! ثم صمت قليلا ...!! وأضاف من عنده متحدثا مع نفسه وبصوت عال وقد حاد ببصره قليلا عني ( الله يرحمك ياسعاد وان شاءالله في حال أحسن مننا ) استوقفتني هذه الوصلة التي تعبر بجلاء عن سطوة الشعور وعمق المكانة لهذه المرأة في قلب الرجل ... واستطرد مكملا
قال لي كانت لازم تصحي قبل ما أنا اصحي ....!!!
والله يا علوب يا ابني مابتذكر يوم صحيت وسعاد نايمة...!!! تلتين سنة ...!!! مابتذكر دا حصل ..!!
عشان كدا لا أذكر قط ...!!! أني رايتها كما لاتريد ...!!
اجمل شاي شربتو في حياتي من سعاد...!! وأطعم قهوة سوتا سعاد .....!!! وأطيب أكل أكلتو من يدها ....
تتخيل ياعلوب مرات الزول بتمر بيهو ظروف صعبة في حياتو
ودا الوكت البتعرف فيهو صليحك من عدوك ...
بتذكر كنتا وكتها في ( الأبيض ) الكلام دا بدري شديد معاي سعاد دي ويادوب كان عندنا ابني ( أزهري ) دا ....وبنتي ( توحيدة ) ....!! أم ( أمل ) الجابت ليك الكرسي دي ..!! وكانو لسا صغار ...المهم انا كنت مدير الحسابات في ( هيئة توفير المياه ) كان اسمها كدا الوكت داك ....
فجانا قرار لغو فيهو الهيئة وضموها لي حاجه سموها
( هيئة مياه المدن ) ...ولأنو الكادر الجديد ما بستوعبنا قالو لينا اي زول يحاول يشوف ليهو مكان تاني ....!!!
جيت البيت الْيَوْمَ داك هموم الدنيا دي كلها في راسي... وحالتي جد صعبة ...واعاين لي ( أزهري ) ( وتوحيده ) ديل صغار أقول وديل ذنبهم شنو ...!! المهم الدنيا مقفلة قدامي .....!!! شافتني ( سعاد ) وأنا في الحالة دي ...!! عرفتني طوالي ...!! ما سألتني أصلو في وكتها ....!! شوف الأدب دا ذاتو كيف ...ديل حالتن نسوان لاقرن لا اتعلمن ...الأدب والتربية ديل كمان مادايراتن ليهن كتاب ...!! فهمتا ....قلتا ليهو فهمتا ...!! بس كمل ...!! ( شدتني القصة ...) ...!!
قال لي المهم المسا كدا عملت لي الشاي وبراااحة سألتني قالت لي انتا مالك يالخير في شنو ...!!!؟ تتخيل انا مش اسمي ( كروم ) سعاد بتقول لي ( الخير ).....!! قالت هي بتحس انو انا ( السجمان ) دا عبارة عن ( خير ) يمشي علي الارض ،،،،
( والخير ياعشايا تودينا لي اهلنا )
قلتا لي بي قلبي ( الخير) الان هو من يمشي علي ( البنك)
اها لما حاصرتني بالاستفسار ...كلمتها وفِي القلب حسرة ...!! تعرف ياعلوب يا إبني ..!! ولا حتي رمشت...!!
قالت لي هسا دا كل الموضوع ...!! شفقتني انا قلتا في مصيبة ....!! قلتا ليها مصيبة أكبر من كدا...!؟؟
قالت لي كلمتين اتنين لازلت اذكرهما ولازلت ألجأ إليهما عند الملمات ....!!! قالت لي الوفر ليك ( توفير المياة ) بغلبو يوفر ليك
شيتن تاني ...!!! ولَم تزد ....!!
كأنما صفعتني ( سعاد ) ....!! وكأنني افقت لحظتها ...!! وفعلا سلمت أمري للديان ونمت ليلتها سعيدا في واحده من الليالي التي كان من المفترض ان تكون غير ذلك ...!!
أرجعتني سعاد الي المسار ولَم اخرج منه منذ ذلك الحين ...!! بتصدق يا علوب في أقل من أسبوعين اتصلو علي ناس شركة ( باتا ) العالمية دي كان عندهم فرع ضخم في السودان ...أمسك ليهم الحسابات...!! في زول كلمن عني ...لي هسا ماعرفتو دا منو ....!! وقد كان...!!! وبضعف الراتب ...!!! بالله دي مش مرا عظيمة ......!!
في تلك اللحظة أغرورقت عينا ( الرجل ) ونزلت دموعه سخية علي خده ...يشيل ويقشقش في دميعاتو بي كم جلابيتو من تحت النضارة ....!! كطفل صغير ...فقد الصنو والرفيق ...!! لقد بكي ( كروم )....!!!!
يا الله ....!! لم استطع ان أتمالك نفسي فقد هزني الموقف
ماعرفتا أعمل شنو ...!! ..وقد احتقنت عيناي ...وفِي القلب لوعة .....!!
الله يرحما ....الله يرحما...(عقبت أنا ) ...!! في محاولة لتهدئته ...!!
خلاص يارجل ( سعاد )عند خالقا ...بنعترض علي حكمو ..!! استغفر .....!! واستغفرنا سويا ...وسقاني من (جك ) الموية الذي استهواني ....!!!
فوددت أن نخرج من هذه الأجواء ... قلتا ليهو بيني وبينك كدا ياعم ( كروم ) أصلو بعدها مافكرتا تتزوج ....!!؟؟
ضحك هو وسط الدموع ...!!
قال لي بي استغراب ...!!! أنا ...!!!؟؟؟؟
ضحكتني ياعلوب ....!!!
قال لي ملكة بريطانيا دي جات زيارة للسودان زمااان ايّام عبود وانا بيني وبينك كنتا طوااالي بقرا لي ( سعاد ) الأخبار وبوريها الحاصل شنو في البلد وكانت سعيدة بي كدا ...ومرات كتيرة بتناقشني كمان ....!!! اها وريتا صورة الملكة إليزابيث
قلتا ليها شايفا المرا دي ....!!! دي بتحكم نص العالم ...!!
دي ملكة بريطانيا العظمي ...!! جاتنا زيارة هنا السودان
حسّيت بالغيرة في عيون ( سعاد ) من فرط حديثي عن ( إليزابيث ) بهذا التفخيم ...!!
تعرف ردت علي قالت لي شنو ...!!
قالت لي ( ملكة ) علي روحا ...ولم تزد ...!!!
وقد صدقت ...!!! فسعاد هي ( ملكتي ) المتوجة وستظل....!!!
اها دحين ( الملكة ) بعرسو فيها ياعلوب ....!!؟؟
قربتا اقول ليهو لكن هي ...!! ( ربنا يرحما ....!! ) تذكرت العسل الانجليزي مع عمك ( يس ) وأيقنت ان مثل كروم وسعاد بينهما....!!! ( عسل ) دائم ...وميثاق لايموت .....
بالله مش عندي حق ( اتكل ) مع عمك كروم دا ....
مياه صافية... وحديث عذب ...وعوالم أقرب للخيال مع كل هذا الصدق والبهاء ....!!
يديك الصحة والعافية ياعم ( كروم ) والي جنات الخلد ( صاحبة السعادة ) ...!! ربي يسعدك في الاخرة كما اسعدتيه في الدنيا ...ياسعاد ....!
ويسعد مساك الخير يا ..(الخير ) ...!!!
أوا لم تسمه كذلك ..
