الحلقة المئة واحدي عشر من يوميات علوب مع الطيب عبدالماجد

يوميات علوب....111 ......جوز اللوز ..

الليلة جيت شايل الفرح ..ترارارم ...قصدك تعوضني اللي فات ...!! ترارارا 🎺....

صحيت من الصباح لقيت نفسي بغني في الاغنية دي ...!! ليه ماعارف !!؟؟ ....اتاري قلبي كان حاسي .....( فدوي ) (ومعزة ) جونا في البيت ....!! 

( فضوي ) ياخ (ومعظه ) اخوات ( صماح ) علي قول (صبري ) جوووه البيت ...!!! زيارة ( أمل ) .....!!! الطيارتين نزلو في وكت واحد .....!! ......!!!! اورورووووووك ياناس الحلة اجرو تعالو (علوب ) مكتول في بيت القاضي ....!!!!!

....لا لا لا بالله هسه بس ده يسمو شنو ده ...!!؟؟ سماحه ....!!! ياخ دي كلمة ضعيفة ...هزيلة ...ركيكة....أمام هذا الزحف الأسطوري.......!!! حلا ....!!؟؟.....( عادية ومستهلكة ولاتفي بالغرض ....!!) ......لذاذه ...!!؟؟ ..(اصلو ماجبنا جديد ...!!! ) اها ده شنو هسا ...!!! (الم ) ....!!؟؟ ( ممكن ) ....آذي ( آذاني يايمه وأذاني البريدو) ....!! مرض...!! ( ياحبيبي انا عيان ) ده شنو ده ....ماشاءالله تبارك الله ....!!! 

هسا بتعرفوني ليكم ميه وعشره حلقة حصل يوم لقيتوني 

بالحالة دي ...!!! بس ياهو ده الحاصل ...!!! عشان تكونو عارفين ...

غايتو ناس (فدوي ) ديل ببالغو عدييل كدا في السماحة ...!! شالوها كبوها عندهم في البيت ده وقَعَدن ...!!!

ياخ عشان ما اتكلم كتير ......!!! ( أمهم ) ذاتا سمحه ..!! اها تاني في كلام ...!!! 

اول حاجه هذه ( الفضوي ) الخلاقة ...جات لابسا ليها توب رابطا في نصها ....!!! دايرا تتقطع النص....!! لما شفقتا عليها ...!! الشهادة والعمل الطيب ....!!! 

قالت لي ..!! وييين ياعلوب ...!! (داير اتكفي علي وشي ...!!! ) قلتا ليها وين ...!!!! ؟؟؟ والله انا ذاتي ماعارف ...!!! اتخيلو ده كان ردي...!!! لما قعدت تتبسم ....!! (وليتها لم تفعل ...!! ) فقد صبت (الزيت ) علي النار ....!! وطلعت ( زيتنا ) ذاتو ...!!! هو نحن غير بسمة ناس فدوي ديل المصبرنا علي البلد دي شنو ...!!! شرفتينا يا ( الزيت ) ...!!! 

والله ياخوانا انا شفتا (سنون ) كتار قلال ذي ( سن ) فدوي مالاقاني ...!!! ماشفتوها ياخلاني ...!!! زمان مش كان بجدعو (السن ) المقلوعة دي ويقولو ياعين الشمس هاكي سن (الحمار ) ادينا سن الغزال .....!!! انا شايف في (سنون ) كتيره مشت وجات ذي ماهي ....!!! 😬 الا انتي يالملكه رسلتي (سن ) غزال ..وجاتك الغزالة شخصيا ...!!! اتذكرتا (صفا ) بت جيرانا قالت كانو بقلعو ليها سنونا بالخيت ....!! ( تلقاها (دبارة) السنين ...!! ) 📿الخيت ده يخلو هنا لي ناس (الخيت ...!!! ) فدوي دي غايتو بكون الهوا هو القلع سنها .....!!! 

.المشكلة وين هسه...!!؟ فدوي جات و معاها اختا (معزة .....)(بالمعزززززة . ..🎼 بالمودة البيييينا🎻بي أغلي الصفات ) الله يرحمك يا ابوعفان ....!!! المشكلة هسا نعاين في فدوي ولا معزة....!!؟ ولا الاتنين سوا ...( الخيار التالت مستبعد لأنو ممكن تتشرق ...!!) 

غايتو الليله زارتنا البركة ...!! (القيامتين ) في بيتنا ...!! 

( معزة ) دي كمان قصتا غريبة شوية ...!!! والله ياجماعة البت دي قدر ما اشوفا القاها بي شكل مابشبه القبلو....!!! ( تكون جنية ) ....!! 

؟؟

مشتهي انا يا ( معزة ) ألقاك تعبانه كدا في روحك ومجتهده 

...!!! يوم عرس (سماح ) اختا ....ناس ( مشاعر) وبنات جيرانا ديل داخلين معسكر هنا في البيت ده يومين ...!! ريحة المكوة والشعر تجيب المطافي ...!!! اها (معزة ) اللي هيا اخت العروس شخصيا ما عسكرت ...!!! بعد دا ادتن ٠/٣ ...!!! 

بتدي الوش ده شطفه بالموية وتبقي مارقا ....!!! ينعل ابو الثقة ذاتا ...

اها هسا جاتنا دارعا ليها ليها (شبشب ) عااادي ذي الشباشب البجرجروها البنات ديل ....لكن بس تعالو شوفو المنظر ...!!! يعني لو رسلت صوره لي رجلها بس في الشبشب ده ممكن تتخطب ...!!! اتاري المشكله مافي الشباشب ....!!! المشكلة في المراكب ...!!! 😜

ياخ ديل بنات شنو ديل ....!! (بالله انت ملاك ولا من حسان الحور ..) ... لافحا ليك توب أمها ده (مكرفس ) تشتهي الكرفسه...!!! والخصل دي تمرق وتدخل مع الهوا.....(عصافير الخريف ) ...!! لاعرفنا الخصل فرحانه ولا الهوا النشوان ...!!!

لا ومعزة دي كمان عندها الألم الكبير ،،،،،،،!!! العيون ...👁عيون السواد والنوركن بجهرا .....!!! اها عيون معزة دي ماتتوصف ...والله جد ...!!! تتشاف بس ...!! عشان كدا مابقدر اقول ليكم عنها اي حاجه ....!!! ايوااااا ...!! في معلومه ممكن تساعدكم ...!!! طبعا بنات الحلة ديل فيهن واحدات حاقدات كدا ...!!! وكت مالقن في (معزة ) دي فرقا... قالن عينا الشمال دي فيها لفة صغيرة....!!! والله انتو (اللافاتنها ....) ....طبعا دي العيون التي في طرفها حور ...!! لفة شنو كمان البنات الغبيانات ديل ...!! في لفه ياخوانا بتخلي الحلة دي كلها لافه ...!!! بس بالمنطق كدا ...!!! 

اها ده كلو كوم وظرافة البنات ديل وطيبتن كوم ....!!! طبعا كدا كسرو ليك الدش لي ناس (فلقصة ) في يدهن ...!! كانن حيقولن 

بنات القاضي سمحات ( الورقة دي طبعا مابقدرو يلعبو فيها ) الا ( ثقيلات ومسيخات ) ...!!! اها ناس (فدوي ) ( ومعزة ) حرقو ليهن الكرت ده حريق ...!!! جنس ظرافة ولطافة هي ....!!! فايتا الحد ...!!! الثقة كمان ...!!!

اديكم مثال وانتو احكمو... وشوفو الكلام البنقط عسل ....

(معزة ) قالت لي مشاعر.....!! النبي ياشوشو (علوب ) ده ماتعرسو لي خلّونا (نهجج ،،،!!!! ) ..ياسلام... ياسلاااااام علي الاريحية واللذاذة والانسيابية ...والسهل الممتنع ...انا دايركم بس تتأملو لي في كلمة ( نهجج ) ..دي ....!!! مرقت ذي الباسطة ...!!! عليك الله يا (مودة ) ماتجي تاخذي ليك نقلة ...!!! تشيلي وتعسمي في الكلام .....!! معزه قالت (نهجج ) انتي مفروض تقولي (نحتو قرض ...!!!) 

غايتو الليله برشلونة والريال ...!! (فدوي ) قالت لي شنو ياعلوب ياخ مادايرين نفرح بيك ...!!! مانويت لِسَّه ....!!! والله ياجماعة في اللحظة دي عيوني ديل ذي طششن حبه كدا ...( ورأيت 

فيما يري (الطاشي) ...انو فدوي دي خجلاااانه وانا جنبها في الجرتق ..!! وادوني جغمة اللبن عشان ابخها ...!! يازووول في عز المنظر ده واظني سرحتا شويه كدا وكنت شايل لي مويه في يدي ...اسمع ليك مشاعر( الفقر) دي ...قالت هيي ها ...!! ( شوفو اللغة ذاتا ...!!! هييي ها ) .....مرض ..!! 

قالت لي فدوي دي ما بتتكلم معاك ...!!!! لما خلعتني ....!! داير أرد .. لقيت الموية في خشمي ...بوووووف ..!!! بخيتا ليك ذي الغسال ....!! لما البنات ديل نطن ...!!! قربتا اقول ليها اها يافدوي بعد الجرتق ده ...!!! ودعي اهلك ديل سرعة .....طيارتنا دي مواعيدا قربت ...!!! 

...والله الا كان (التونسية ) ياعلوب ....!!! 

عليكم الله يافدوي ومعزة كل يوم تعالو ...!!! ناس (عصعص ) وصفصف ديل قدونا قد ...!!! 

والليله جيت شايل الفرح ...قصدك تعوضني اللي فات ....!!! حسّيت بي حنية (عيون ) ما لقيتا في اقرب صفات ...!!! صحي يامعزة ....!!؟