الحلقة المئة وعشرة من يوميات علوب مع الطيب عبدالماجد

يوميات علوب ...110....ولا بس معاكا ( كرور )

مش في ناس كدا بقفلوها معاك من غير سبب ....!! اها جارنا العزيز ( بله ) ....!!! نموذج ...!!! 

غايتو جنس عباطة واحده هي ...!! جاني قال بجمع في توقيعات عايزين يعملو حقيبة رمضان للفقراء والمحتاجين .....!! ياسلااام (بله ) نصير المساكين .....!!! اكبر مستهبل عرفه التاريخ ....والله الفكرة علي عينا وراسنا ...!!! لكن (بلة ) ...!!؟

(بله ) ده هسا الغزا شنو في النص .....!!! اي لمة لازم يكون في نصها ....!!! يعشق ( الملمات) ...!!! 

يازووول (متسدر ) ليك الموضوع ده ..قايم وقاعد ...!! داخل في شخصية ( النملة الشفوقه ..!!) ..

انا متأكد انو ( بله ) ده كايس ليهو (لبعة ) ...!!! ماتقولوا لي الظن ..!! وبعد الظن ...!! ورمضان ....!!! والقصص دي ...(بلة ) ده نصاب محترف مابختلفو عليها اتنين ...!!! مستهبل دي ما دايرا ليها درس عصر ....!! 

بس انا اديكم مثال لو انا (خاتي ) علي الزول ده قولو لي ....

.....!! ناس الحلة المساكين ديل وكلوهو هو ومعاهو اتنين عطالا كدا ..... !!! قالو يمشو يجتمعوا مع المعتمد ومسؤول (المحلية ) 

لأنو حلتنا دي الشبكة بتاعة المواسير حقتا ضاربا .....!!! وكل يوم (ماسورة ) مكسورة .....!!! وزقت حيطة الجامع دايرا ترميها ومهددة البيوت دي كلها ....!!! (مواسير ذاتا جاتا (هشاشة عظام....)تردح من زمن الإنجليز ...) ...!!! المهم ده الحصل ...!!! كلام جميل ...!!؟؟ طيب ...!!! 

اها الكلام الجاي ده ما من عندي ...!!! بحكيهو لي عمك (مصطفي ) وهو احد (الثقاة ) في الحلة دي ( سنة يالثقاة...!! غايتو مرات ياعلوب بتتجلي في التعابير ) ...!!! نرجع لي موضوعنا...!! اها (مصطفي ) ده احد أعضاء هذه اللجنة الموقرة بحكم انو عضو في لجنة المسجد وده السبب الوداهو مع بله والاتنين العطالة القلتهم ليكم ديل ....!!! وتوجه الوفد الي مباني المحلية ...!!! 

قال لي اول مادخلنا...!! (بله ) ده بدا يكبر ...☝....!!! نحنا ذاتنا اتخلعنا 😳..!! أعقبها بالتهليل ...!! ( فضل ليهو يزغرد ) قلنا مابطال....!!! أهو حركة لبث الحماس عشان نقضي غرضنا ....!! 

عمك (مصطفي ) قال لي والله ياعلوب وماطالبني حليفة ...حكينا مع المعتمد وبتاع المحلية ده في أي حاجه ...!!! الا موضوع ( المواسير ) ....!!! بتصدق ...!!! 

لانو ( الماسورة ) الكبيرة الاسمها ( بله ...) ده ....!!! استغلا اللقاء ونزل شكير وكسير للمعتمد والمعاهو علي الجهود المخلصة والدؤوبة لرفعة الحلة وجعلها في مصاف (الحلل ) المتقدمة ...!! 

(شوفو الزول ده ومغستو التشق ....!!! ) وطبعا استلم القعدة 

..!!! قال لي الساعة الطلع ليك ورقة من جيبو وطلع نضارتو ....!! انا قلتا ياسلااام غايتو ( بله ) المره دي جا جااااهز ....اكيد دي بتكون الخريطة بتاعة الشبكة حقت المواسير في الحلة ....!!! اتاري ياعلوب الورقة فيها (ماسوره ) وااحده بس ....!!! وتمنية بوصة كمان ..... !!! طلعت قصيدة عاملا الأفاك ده للمعتمد ...تتخيل ...!!!😳

قال ليهو ....

يامعتمد يامعتمد بيك نعتمد ...يا ابو الولد ( المعتمد جابو لي ولد قبل يومين ) 

انت العضد وانت السند ...

مددك مدد ...عبا البلد ...مددك مدد ..!!! ....!!! 

الله بركة الهي وانت جاهي (مديدة ) حاره يكبوها ليك في راسك الكبير ده يابلة ...معقوله ياخ ..!!! ده ياهو الاتفاق ...!! ياعواليق ...!! 

مصطفي قال لي لما ( المعتمد ) ذاتو إضايق كدا ...وحسا انو ده ما لوح واحد ...!! ده مصنع تلج كااامل في الحر ده ...!!! اها قال ليهو خير..!! خير ...خش في الموضوع ...

مش مفروض يخش في (الماسورة ) طوالي ...!! هل بتصدقو انو (بله) المجرم ده طلب من المعتمد يديهو الارض القدام الجامع دي ....!! قال هو متكفل بالإضاءة والنجيلة عايز يعملا ميدان كوره ...!! قال الأولاد في رمضان محتاجين حته يتلمو فيها ....!!! (عليكم النبي شوفو جنس الألم ده ....) ..!!! وقال انو حيسدد ليهم القروش في المحلية يومي ...!!! لأنو الأولاد بحبو الكورة شديد وبدفعو اي حاجه ..!! يدفعك البلا اليخمك ...!!! يدفعو لي شنو ذاتو ...!!؟ عشان تشيلا تخمها في بطنك الكبيرة دي ...!!! هي المحلية دي ذاتا لو ماعملت للأولاد ديل ميدان كوره قاعده تعمل شنو .... 

اها يا اخوانا (الملعب والنجيلة ( ماظبطت مع (بله) جاكم بي ...(الزيت والبليلة ....!!! ) انا كلمتكم ....

غايتو ( حقيبة ) رمضان تشمها قدحة ...يا بله ...!!! لكن انا بهدي ليك أغنية من (حقيبة ) الفن ...!!! 

الاغنية مهداة الي ( بله ) المرض ...!!! 

انا بي (دهاك ) مسحور بالله انت (براك ) ولا بس معاكا ( كرور) ....يا ( ياداقس الخمجان ) .....!!! ...الله لا جاب باقيكم ....!! 

معقولة لكن يابله ...!!بالطريقة دي ....