يوميات علوب ...113 .....سفير الانسانية ...
كان معانا واحد في المدرسة الابتدائية اسمو (اب جيبين ) لحدي هسه انا ماعارف ليه سموهو كده ...الزول ده جيب واحد ماعندو ...هو ذاتو مابحتاج لي اي جيب ..يعمل بيهو شنو..!!!
.انا اول مره أقف علي مصطلح (النهب المسلح ) ودلالاته مع هذا الشخص ...!!! اي والله ...
...اسمو الحقيقي (ود الجد ) ماعرفتا علاقة الجد والجيبين شنو ...!!؟ تكون الجيم ...!!!؟؟؟ ماشايف حاجه تانية ....
اول حاجه هو (مفتل ) شديد ....بدون (جم ) وحديد وبروتينات والقصص دي ....كده بس ...!!! خلقة الله .....!! الحاجه التانية بأمانه هو ذاتو الزول ده شخصية كدا ......طبعا هو اكبر زول في المدرسة..... !!! لاقي مجانية التعليم دي و ( حاضن ) .....!!!داخل ...مارق ...دارس ....ماكل شارب ...!!! كلو مجان ...!!!
لكن بتصدقو الزول ده فعلا قيادي ...اول حاجه مابتكلم كتير ....!!! ولو اتكلم كلامو قصييير مابزيدو ...اها نحنا صمتو ده كان بجهجهنا شديد ...!!! بنتخيل انو الزول ده بفكر ....وهو ولا بفكر ولا حاجه...!!! هو ببساطه مابعرف يتكلم ....!!! دي كل القصة وونحن يا مؤمن يامصدق ....!!!
أكسبه هذا الغموض خاصية (الشبح .....) واضفي عليه كثير من السحر والاثارة .....
والله ياخوانا في طلبه بخافو من (ود الجد ) ده اكتر من الناظر .....!!
وناس وليد (ديل حناكيش المدرسة ) بجيبو فطورم معاهم من البيت ...!! خوفا من التلوث البيئي والحاجات دي ....!!!
وبقية الشعب يمعط في (التبش ) و ( العجور ) من المحترمة ( نفلو ) صاحبة العلامة التجارية لأشهر( صلطة ) روب في ذلك الزمان .،.!!! ( نفلو ) بتفرش قدام المدرسة ...لو ماشفناها ولا بندخل ذاتو ...!!! (الداخلين ليها شنو ....!! ) ...لما جرس الفطور ده يضرب ....!!! قلوبنا ذاتا بتضرب...!!! ( فرحة كدا بس )
...ولا تحمل مخيلتنا ساعتها سوي صورتها الوضيئة ....!!! ..وبالألوان ...!!! واهمية الخالة ( نفلو ) عندنا لاتقل عن الحصص ...وتتفوق احيانا...!! لانو بنحبها اكتر ...!! بتحسسنا انها أمنا ...!! وهي كذلك ...!! طيبة لدرجة البراءة ....!! وعذبة حد الارتواء ....!! نص المدرسة بتتدين منها.. وأغلبها ديون هالكة .....!! ورغم ذلك لم ينقطع لها رزق ...!!! ولا اذكر قط أنني رايتها غير مبتسمة ....!!! لا زلت اذكر حتي سنها الذهبية في أقصي اليمين ...!! وحبات عرق تلمع في جبينها الوضيء كحبات تبر ....!!! انه الرضا في اسمي تجلياته ...!!!
اها ناس وليد ديل عادي بجو شايلين (سندوتشين) ...!!! واحد ليهم والتاني لي اب جيبين ...!! ( شوفو الزول ده اللقاها.... )
انا بس كان نفسي اعرف انو( وليد ) ده بقول لي اهلو مودي السندويتش (التاني ) ده وين ....!!؟؟
وزولك ود الجد يشيل ويمعط في الكبده والطعمية المنزلية بالسمسم ....!!! ونحنا طعمية ( نفلو ) بالنسبة لنا ....!! أطيب والذ ...
مرات شدة ما الله اداهو بقول لي وليد شنو اليومين ديل كلو يوم جبنة وبيض ...جبنة وبيض ....!!! مافي (شية) ...!!!
اذا سألتنا في ذلك التوقيت ....!! اها لما تكبرو عايزين تطلعوا شنو ....!!! ناس كتار كانو حيقول ليك عايزين نطلع ( ود الجد ) والله صحي ...!!!
أها الأسد النتر ده متجدع ليك في المدرسة دي ....!! زوووول قادر يقول ليهو حاجه مافي ...!! والطلبة يقدموا ( الأتوات ) والهدايا التذكارية بشكل متصل ....!!!
والأمور تسير علي هذا النسق والنهج ...!!!! لحدي ماجانا الفرج من رب العالمين ....!!!
عندنا واحد جابو لينا في المدرسة..... ضعييييف كدا...!!! تشوفو تحن علي حالو ....شعرو ملفلف كدا ....وعروقو ديل مشحطات ...وتحسا بيهو مضبلن كدا وسهتااان لكن عيونو ديل
فيهن لمعة كدا ذي عيون الكديسة ....ونضييييف ...متمر...
شكلو ود ناس أكابر ...اللبسة ذاتا نضيفه ...!!! والله عندنا واحدين القميص ماتفرزو من (البشاورة ...!!) ...ياحليلا (البشاورة) دي ياربي لِسَّه قاعدة ولا ( اتمسحت) ...!!!
😜
😜
المهم ود الجد طبعا عايز يوري الزائر الجديد ....النظام في المدرسة.... وكيفية تقديم أوراق الاعتماد
والود ده تاااكل كدا جنب شباك الفصل بياكل ليهو في (سندويتش ) وقاعد مطرف كدا ،..جاهو لبك (جدو) ....منزل كتف ...ورافع التاني ...!!! )(فتوه رسمي ) قال ليهو (الحشوة) بتاعتك دي بشنو .....!!! ؟؟ الولد ذاتو اتهجم...!!! ( حشوة ) دي يعني شنو ذاتا ماعارفا.....!!
( حشوة شنو انتا كمان ياود الجد ...!! بالغتا ....!!! عينك للسجوك تقول للود حشوة ...اسمو (سندويتش ...) (س ن د و ي ت ش ) ...يحشيك قمل )
ونحنا سامعين ليك الطلبة بتكلمو تحت تحت قالو جابو لينا في المدرسة ..(ود السفير ......) اها الظاهر وعلي مايبدو انو الود ده ياهو (ود السفير ) البقولو ....!!! وفي ناس معانا (سفير ) ذاتا يعني شنو ماعارفنها ...!!!؟؟ سألني وقتها صاحبي (الفرده ) اسمو (الرشيد ) ...الله يطراهو بالخير ...قال لي انتا ياعلوب ( سفير ) دي يعني (طياره ) ....!!! قلتا ليهو ايوا ....!!!!
المهم الود ده ولا اتلفت علي ود الجد ولا قال ليهو انتا ذاتك بتقول في شنو ...!!! وهذه تعتبر سابقة جديدة وخطيرة وتحدث للمرة
الاولي .....تطورت الملاسنة الي نظرات تحدي ....( ود ) السفير
و ( ود ) الجد .... ( أسفل المدينة ...!! مع سنامها ...!! ) حتما هو هو لقاء السحاب ....!!!
وسط متابعة كثيفة من الطلاب بمختلف توجهاتهم ....تسمع توجهاتهم دي تقول الله بوريني
هو توجه واااحد مشترك ياها ( نفلو ) دي ...وبرطيع في حوش المدرسة ..... !!بس ياها دي التوجهات
نرجع لي للازمة وشيكة الحدوث .... فقد وقع المحظور وغضب الجد .....اخفي الجزرة واخرج العصا ....!! ادا ليك الود ده هزا ودفرا كدا لما خلعو ...!! قال ليهو انا لما اتكلم ترد ....
والله يا اخوانا وماطالبني حليفه ...!!! دي كانت اخر عبارات سمعناها....!!! الباقي شفنا عدييييل ...شوف عين ...!!!
الساعة الشافع ده جدع ليك السندويتش ده ورجع ليم خطوتين
لي ورا .....وقال كدا طار ليك (جوز )في (ود الجد ) ده ....!!! (غايتو نحنا بس عايزين نصفق .....) ...!!! جدعو ليك هناك ....واستدار بعدها الفتي استدارة شبه كاملة بزاوية منفرجة ....وجاهو ليك تاني وأداهو (رفستين) مع أسرع (بوكسيين) نشوفم في حياتنا ...(ان شاءالله بس مانكون بنحلم ...!!! ) ...والله ياخوانا كاننا نحنا البندق في جدو ده
غايتو الحمد لله حمدا طيبا مباركا ان حضرنا هذه اللحظة التاريخية ...ود الجد طبعا أتفاجأ وأتبكم ماقادر يقول بغم ...!!! قام يتنفض ومعاها عرجة ...!!! والخشم مليان تراب ...والعين وارمه..!! حالة صعبة شديد ... لما شفقنا عليهو ....!!!غايتو نحنا طيبتنا ذاتا فايتا الحد....!!
اها الود (المشحط ) ده نفض ليك يدينو كأنو ماعمل حاجه ....وطلع ليهو سندويتش تاني وقعد ياكل ( انتو الناس دي بتجيب السندوتشات دي من وين ....) ...!!!!
المهم لسان حال كل المدرسة في ذلك اليوم المهيب هو التهليل والتكبير لهذا الحدث الجلل والاستثنائي ليكتب التاريخ يومها معلنا انتهاء امبراطورية ود الجد ...!! وكثيرون لم يخفو ضحكتهم علي (الضحية ) وانتقلت عدوي الضحك الي الجميع ....!! ضحكنا كلنا ....!!! وكما لم تضحك من قبل ....!! ضحكنا ضحك سنوات خلت كانت مكتومة ..وقدام ود الجد نفسو ....!! ما اجمل الاحساس بالحرية والانعتاق ....!!
قدمنا التهاني للزائر الجديد بهذا الانتصار ...لكن ما أتذكره جيدا انه وعلي الرغم من عقولنا الصغيرة في ذلك التوقيت لم نغدق في التهنئة والثناء .....حتي لانصنع (ود الجد جديد ) وبمواصفات هذه المره ....!! خلاص تعبنا ...!!
الود طلع اسمو (هاني ) وفعلا هو ود سفير السودان في اليابان ....!!! (يادوب فهمنا سر الدقا القوية دي ...!!! ) اتاري الشافع مدخلنو ليك دورات في ( التاكوندو ) من عمرو تلاته سنين ....!! دي فاتت عليك ياجدو...االكفوة جاتك من خارج الحدود ...وبالفنية القاضية هذه المره ....!
ذهب بعدها (ود الجد ) الي مزبلة التاريخ ...!! وعااادي اي واحد فينا بقي يلاقيهو بديهو طقا في راسو ...!! ضحكني (الرشيد ) صاحبي ده .....قال لي تتذكر يوم (النتايج ) داااك ...اها ود الجد ده لاقاني قال جيت الكم قلتا ليهو (التالت ) قال لي بتصدق ياعلوب ..كان شايل ليهو بسطونة اداني (تلاته ) شحطات مسخ علي النتيجه ....( كانو يتربصو بالخمسة الأوائل ...!!! والطيش عند الله بعيش ) ...مش حاجه غريبة ....!!
اها ( الرشيد ) قال لي اول حاجه عملتها بعد سقوط (ود الجد ) .....جيت ليك عليهو قلتا ليهو انتا ياود الجد بتدق مالك يوم النتايج ...!!! لما اتخلع ...!!! وقعد يتمتم ...!!! اديتو ليك يا تلاته لبعات لما فهم حاجه ...لكن صدق ياعلوب ضهرو لي هسه قوي ...!!!
عرفت لاحقا وبعد ان وعينا ان من فقد الشرعية ليس له ظهر ....!!
...اما (هاني ) فقد صار بطلا قوميا ...!! غير متوج .....
وتحول ذلك اليوم الي عيد وطني في المدرسة تحت عنوان سقوط امبراطورية اب جيبين ....(ود الجد )
)ياربي الزول ده بكون وين هسا.....بس مايكون لما ليهو في ناس تانين ماعارفنو ....!!! ياربي !!!؟؟؟
كانت لنا ايام ....!!