الحلقة المئة واربعة عشر من يوميات علوب مع الطيب عبدالماجد

يوميات علوب ....114.......(كتمت )

عزمونا تخريج ود جيرانا .....اسمو ( أيوب ) قالو التخريج في نادي الضباط يوم الخميس الساعة تمنيةّ مكلمننا قبل اسبوعين.... طوااالي يازول اتقشطنا مشينا ..

لقينا ليكً( الروبات ) والطواقي دي ماتديك الدرب والقيامه قايمه والخريجين ديل فايرين فوره شديده ...!!! جزء كبير محنن ....!!! ( اخر بروفه للعرس ) واهلم ديل مالين النادي .....!! الفرحة دي ظااااهره في وشوشم ...!!! ( ان شاءالله دايما ...!!)....!!!

و ( أيوب ) يازووول الارض دي ما شايلا يقوم ويقع ...!!! والحلاقة بالجنبة... والبدلة ...والمنديل (اهما شي ....!!! ) قلنا حقو ويوم فرحتو .....!!! وكلنا أهو (متكشين ) نشاركو الاحتفال ...

(أيوب ) ده ابوهو كان امام الجامع حقنا ده ......!! حصل خلاف (فقهي ) كدا ....!! قام ( اعتزل ....!!) وخلي الجامع ذاتو ...!!! مشي جامع الحلة التانية ...!! زول صعب خلاص .....!! لكن بي جوه والله هو زول طيباااان و أمو 

دي صاحبة ناس أمي اسمها ( الطاف ) (ولكل من اسمه نصيب ....!! ) مرا لطيفة جدا وبشووشه ...!!

المهم لقينا ليك كل اللمة دي هناك ...!! عّمك فاروق شخصيا متلفح بي بالشال الجديد ..!! والجلابيه بيضا مكوية.....!!! والخالة ( الطاف ) بالتوب والقشرا.... ومعاهم أولادم ...هم اصلا تلاته أولاد ( أيوب أكبرم ) واختو واااحده اكبر منو اسمها ( مزن ) ....!! معاهم بنات خالتم مشاركين بالفرحة ( كورال ) ...اها ديل كلهم في الحفلة ....!!! 

و أنا والحاجة وعبير وفطوم .....!!! مشاعر قالت ما ماشا ... ( مزن ) ماعزمتا ....!! 😳 رغم انو الناس ديل رسلو لينا كلنا .....!!! قايماعليها الحالة ....!!! ولااااا اشتغلنا بيها الشغلا ...!! سقتا ليك الحاجة وعبير وفطوم وانطلقنا....!! (فطوم ) دايرا (تتشقا ) من الفرحة .....!!! فستان تخريج (أيوب ) ده كلو يوم يطلعو من الدولاب ويدخلو ...لينا اسبوعين بالحالة دي ...مستعدة اكتر منو .....!! 

اها وصلنا ليك هناك لقينا الحفلة مدوره والنَّاس مبتهجه .....!! والموسيقي بتاعة البوليس دي شغاله .....!! والدنيا والعالمين 

قالو الان جاء دور التكريم والتخريج وتسليم الشهادات ....!! قلنا سمح ....!! وسكتنا ....!!! والراجل بدا يذيع .....

الخريجه ....ولاء احمد المبارك ...!! طوالي (عمرو دياب ) دور ليك باعلي صوت ...!! ميال ...ميال ...ميال ..🎤 وفي حبك ..انا ميال .....🎤 و (ولاء ) دي جات ليك من هناااك تتهوزز ...سواقه جد ....!!! ساااايقا وتتمايل مع ميال دي ......وجو ليك عليها اتنين من زميلاتا برضو ميلو معاها .....!! ونحنا ذاتنا أخدنا شمال ....!!! المهم الحال كلو بقي مايل ....!!! 

عاينتا ليك لي عمك (فاروق ) ده ....!!! لقيتو داير يتفقع ...

بقي يتمتم برا .....ايه الكلام الفارغ ده ...!!! ده شنو ياخوانا ده .....!!! لا لا لا مش معقول ...!! ( بس شغال كدا ....) والطاف مرتو تحاول أن ( تلطف ) الأجواء ....قالت لي أجي يافاروق ...نحنا يعني نحنا ناخد زمنا وزمن غيرنا ...!!! الشباب ده ياهو حالم ....!! خليهم يبتهجو ...!! الليله يوم فرحتم ....!! قال ليها لا بس كمان مش بالطريقة دي كدا و قدام الناس .... أيه الكلام الفارغ ده ...!! بس ماتما كلامو سمح .......!! 

جانا ليك صوت المذيع تاني وهو النوع داك الصوتو تخيييين وقعد يكورك ....!!! الخريييييج ...( معاها جرا كمان المره دي ) 

أنور قاسم سراج .......!! والله ياخوانا الساعة (البوب مارلي ) ده قال ليك ....قيت اب ..!! ستاند اب .. استانداب فور يور رايت ...!! 🎤 وأنور ده جا ينطط .....( كديسه في راس الحيطة ) ....!! (أنور )ماخلي ليهو شعرا مابارما .... (طلع راستا المجرم ....) ....لا والنضاره السودا بالليل 😎 ( جيمس بوند ) ....!! وهو ذاتو بشبه ( بوب ) ....!! بس للاسف مع الجوطة والبردليبة دي ماعارفناهو ذاتو اتخرج من ياتو كليه .... ( الزول اب نضارات ده غالبا بكون قرا ( كف ) 🖐

المهم ( أبو النور ) استلم ليك شهادتو ذاتا بي حركة (ثورية ) كدا ومشي ...!!! مبروك يا ( جيفارا ) .....!!!!

عمك فاروق بقي يتململ .....!!! ( جابت ليها بوب) ....!!!!

وانا بقيت هامي علي عمك ده مايدور لينا (خطبة ) هنا ...

بس زولك تاني رجع يذيع ......!! الخريييجة ...( سارا الواثق فؤاد....) أبو الزفت ...!! ( شوف الاسم ذاتو.....!!! ) ...( من بيت يطمن ) ...!! ولم تخذلنا ( سروره ) ....!!!صحي ( بت الواثق ) ....!!! 

دي طبعا مابتدخل بي السباعي والخماسي والكلام الفارغ ده 

جات قادله بي ...(بيونسيه) ( وسنغل ليديز ..

‏single ladies 🎤💃🏻💃🏻💃🏻

شوف الثقة دي ذاتا كيف ...!!! المسرح ده داير يتهزا ...وسارا ماقصرت ... أول حاجه حافظه الاغنية صم ...!!! تشيل وتغني .....ومعاها ( الأوادم ...) ...صاحباتا ( الانتيم ) ...!!!كلهن حافظات وقادلات ....!! اها أهل (سارا ) دي بقو برشو في البنات ديل بي حاجه كدا ذي (الجمكسين ) ....!! بس ريحتا حلوة ...!! غايتو بس أظننا نحنا قاعدين ساااكت في البلد دي ...!! زوووول بستشيرنا مافي ....!!! هسا دي شنو ياربي الرشوها في البنات ديل ....!!!؟ 

أها عمك فاروق خلاااص ( بيونسيه ) دي جابت اخرو ...وقعد يطنطن ...!!! وبدا الهمس جَهْرًا .....يا اخوانا البنات ديلً خلّونا نتكلم مع أهلم ديل .....( عليك الله شوف الراجل ده .....!!! والله أهلم كان سمعوك الا يدقوك .....!!! اهلم ماياهم ديل قاااعدين جنبك ....!!! ياخوانا زول يتكلم لينا مع الحاج دا ..!! خلاااص خشمو أكلو داير يخطب ....!! 

بس ( الطاف ) مرتو دي بي مسكنتا دي أدتو ليك نظرا جنباوية كدا ....أها نوع النظرة دي او بالاصح (الحدرا ) اسمها (البرق الخاطف ) تستخدم فقط في المناسبات.... وبتكون (مشفرة ) الراجل بس هو البشوفا (حصري ...!!! ) 

لانها بتجي لافه ذي ال (توماهوك ) يلفلف كدا لما يصل الهدف ...!!! الا اذا كان حظو سييء والحفلة مسجلة فيديو وعادو اللقطة دي بالبطيء ....!! أو كان في زول زيي كدا متابع المشهد عن قرب ....!!! في الحالتين ....بتفكا التشفير ...!!! غايتوالرجال ديل مش كان بقو (امام جامع ) كان بقو (شنو داك ) النسوان ديل بحدرو ليهم ... !! بحدرو ليهم ....!!! وغالبا بتجيب نتيجه ...ذي دي ..!!! أهو (عمك ) سكت ...!! وهدن شويه كدا ....واستغفر ...!!! قال الله يهدي الجميع ....!!! ايوا كدا يامولانا ياخ ركز لينا علي الهداية دي .....!!! 

انتو بالمناسبة لما يقولو كان بقي ( شنو داك ) ...!! يعني بكونو قاصدين منو ..!!!؟ كان ( شنو داك ) مابعرف 

أووووووووو ... أيوب ظهر ...!!! شايفو ليك من هناااك... بدا يسخن ...!! الظاهر دورو جا ...!!! ان شاءالله يا أيوب شحدتا ربي تجي خاشي لينا ..( بالخدير انا قايلو حي ...!!

النقدو الطير ان قايلو حي .....🎼🎺🎼🎺 

ودق العيش في القمرا ...

يا اب راسين👦🏽👦🏽 نارك حمرا ! ) 🎧 

هي ذاتا جايه مع راسك الكبير ده كان تريحنا وتريح ابوك دا معاك ....!!! 

ولم يطل الانتظار ....

اها ( ود أم بعلو ) تاني بدا يذيع .....

الخرييييييج ....أيوووب فاروق السناري ....(الطاف وبنات خالتو فكو ليك الزغاريد ....!!! ) (وعمك فاروق ذاتو رفع عصايتو اخد ليهو هزا ...) .....(ياحليلو فرحان بي ولدو ...) لما كيفني ...!!! لكن يدي في قلبي (أيوب ) ده ان شاءالله يسترنا 

........أنا غايتو اول ماسمعتا صوت الاورغن عرفتها باظت .....!!!! في صوت (كتمه ) كدا ...🎧بعدا طوالي بدا الكتم الأصلي ...!! زنق الزنق ...!! 🎼🎺🎼

الله لاكسبك يا أيوب لكن الليله مازنقتنا مع عمك فاروق ده زنقة السنين ....

والله الفنانه الجا داخل بيها( أيوب ) دي وكت تقول ليك ....تييييت ضرب الجرس ☎️ تييييت تيييت ...!! جرس الحبيب ...!!! تيييت تيييييت ...

و أيوب يلولح (بالشهاده ....) ....و أبوهو يردد في (الشهادة ) ...انا قلتا ( الشهادة ) والعمل الطيب ...!! الليله عمك (فاروق ) ده بنفضو ...!!! 

وناس (الطاف ) وأخوانو ولا هماهم مهججين يكوركو مع (أيوب .....!! ) أعاين ليك بي تحت القا ليك (فطوم ) شغاله تييييت ...وتنطط ...!! ( كدا الفستان جاب حقو ).....( اكتر حاجه عجبتا في الحفلة ...!! البوري ده ....) انشاءالله تكبري يافطوم وتتخرجي وافرح بيك ....

اها انا قلتا احسن اتصرف حتي لايقع (المحظور....!!! ) أو عمك ده (يقع .....!! ) المهم واحد فيهم كان حيقع ....اتلفتا ليك عليهو طوالي ودخلتا ليك في شخصية (قدور ) وبي صوت فخيم كد قلتا ليهو ده طبعا ياعم فاروق ده اسمو غنا الكتم ..!! والزنق ....😁 ...هي بِسْم الله ...اقصد الكتم (والزندقة ....)😁 لا لا لا لا لاحولاااا ...زندقة ...!!!؟؟؟؟ ( زندقة )شنو انتا كمان ياعلوب دي ممكن تلحس أيوب ده عااادي ......قلتا ليهو لا لا اقصد البرق⚡️ ...البرق ..!! ⚡️ايوه ا(البرق ) ياحاج لانو إيقاعو بكون ذي المطره كده ...!! شوووو بجي كابي ( يمين انا ذاتي صدقتا.،..!!! ) 

المهم اي كلمة غير (الزنق ) دي ... لانو ماعندها اي علاقة بي صوت ( الكابلي ) الانا راكبو ده ....وواصلتا بي كل ثقة.... قلتا ليهو يعني ممكن تقول كدا ذي غنا الحماسة بتاعكم ده .....!!! هههههه ( ضحكة مقطوعة من الراس ) ...!!! 😀وواصلتا قلتا ليهو ...استايل شباب و كدا ...!!! ههههههه ...(ضحكة تاني .. أخير الاولي ) 😃 ده كلو كان الموضوع ده يعدي ...!!

اتخيلو عمك فاروق صدق ...!!! قال لي كان كدا تمام ....!! بدل الغنا الفاضي دا .....!!! 

قربتا اقول ليهو .... تييييييييت ...!! غنا (الحبيب ...!!) ....خفتو ينجلط ....!!!

غايتو خارجناك منها المره دي يا أيوب ...وفوتناها ليك.... قلنا الدنيا تخريج وبهجه وعيد ....!! اعتبرا دي هدية النجاح ....!!! لكن بالله الحق لو واصلتا كدا .....ياها( الكتمت) فيك وفي أبوك ....!! وفي بيتكم ده كلو .....!!! 

اها الزول المابعطش دا تاني جا ...!!! وقعد يكورك ....!!!!الخريييييييج .....بشاره عوض الله البشاره ...اها ده ولا داسيها جا خاشي بي (الكنداكه ) عديييل ....!!! اصلو ولا أتلفت ....!!! خلي الحفلة دي كلها تكندك .....!!! هييييع البشارة .....!!! يمين المسرح كلو اتخجا ...والعمم دي اترفعت ...عرضا جد ...ايوا كدا ياخ ....!!! انتا من قبيل وين .....سوداني والجوه وجداني بريدو ....والكان داكا سيدي سيدي الاراكا ....

انتهي الحفل وانفض السامر ...!! 

مبروك للخريجين ..

وجماعة 

(بوب ) (وبيونسيه ) (وعمورة ...) ....نقول ليهم الف مبروك .....وشرفتونا يالسياح ...

ونقول للبشارة انتا كدا 👍 

ونبارك لأيوب البكالريوس مع مرتبة ( الزنق ) ...تييييييت ( كتمت ) ...!!! مبروك يا (مان ....!!! )