الحلقة المئة وسته من يوميات علوب الطيب عبدالماجد

يوميات علوب 106......(عرس جابر ) !!

‎ياخوانا (ملكه ) دي زول يديها راسا ...!!! بالجد الوليه دي يوم بتضيع ليها زول .....!! فجاتن كدا وبدون مناسبه قالت( جابر ) ود ناس الكارس ده ..داير تغريد ... !!! وكدا ...!!! بس هفت ليها الفكرة دي قطعتا من صنقوعا ده ...هي اصلا نظاما كدا المرا دي ..!! مرات لما ماتلقي حاجه تعملا وتنحسر عنها الاضواء...!! البجيها في راسا داك بتقولو ...!!! ويقولو (ملكه ) قالت ...!!! ناس كتاار زيها كدا ...!!! بتذكرني (ترامب ...) ينفش شعرو ده كل يوم ويجينا دافر بي موضوع .....

‎والله جابر خشمو ده ما فتحو ..!!! بعدين انتو قايلين جابر ده منو ...اكتر زول مسكين في الحلة دي ...!!! زول كدا في حالو ...!! حتي لو ماشي تلقي مدبي جنب الحيطه ...ماداير اييي جوطه ....!!! مش في زول بقول ليك الغنمايه تاكل عشا ....!! بسس ياهو جابر ده ...!! ياخ جابر ده حتي لو الغنمايه ابت تاكل عشاهو هو براهو بقوم يديهو ليها ...!! اها جابر ده النوع الممكن تقول ليهو قالو أمبارح قبضو ليهم (بعاتي ) في جهات ام درمان دي ....!!! عادي ممكن يقول ليك اها ولقو عندو قرون ....!! ده جابر ....!!! 

.....!!! 

نجي لي تغريد ...ست الريد ...!! بت شرانيه كدا ...بتلبس حلق في أضان واحده ..!! عندها ضربه في جبهتا ...!! (ماعارفا حاربت وين ) ...!!! جنها شكل ....!! مشاكله الحله دي كلها ...!! قالت ديل ناس متخلفين ساكت ... وكرور ...!!! زوول ناقشا ولا قال ليها بتقولي في شنو مافي ....!! مرات بتجي الحفله بي بنطلون كايسا ليها واحد ودحلال يقول ليها ده شنو ده ...!!! عشان تطقو بنيه ....!!! دي (العاصفه ) تغريد ...اسف (الانسه) تغريد ،...!! 

اها ملكه مالقت للزول المسكين ده غير (تغريد) ...!!! تقصد شنو ماعارف ...!!! لاقيت جابر قلتا لي انتا ياجابر صحي قلتا داير البت دي ....!!! جابر قال لي يااااعلوووب عليك الله ماامااماما تهاظر ياخ .....!!! (بقي يرترت ....) ..!!! ماقلتا ليكم الزول ده بحنن ....!! قال لي ياخ ملكة دي مالا معانا ...مالقت غيري ياخ ....!!! هسه افرض انا قلتا دايرا ...افرض يعني ...!!! وده ماحصل ....!! ولا حيحصل ...!!! انا ياعلوب عندي خمسين جنيه في جيبي ده ...اتعشي بيها ولا أعرس تغريد ...!!! بعدين ياخ تغرييييد ...!! 😳صدق انا تغريد دي بخاف منها ...!!! ياخ ملكه دي ذاتا مرا غريبه ياخ ..!!! في داعي تحرجنا كدا هسه وندخل في الملف ده .....!! 

المشكله هسه مافي جابر المشكله في تغريد ..!!! التي أخذت التهديد ماخذ الجد وتعاملت معه كأمر واقع ورفعت درجة الاستعداد الامني الي اللون ( الفوشي ) ...!!! وقالت والله جابر زول كويس بس مفروض يتلحلح شويه ...!! والزول ممكن يفكر ...!!! هياااا اليفكر ...!! 

تغريد فاتحا نفسا شديد ...!!! مابالغت لكين .....!!! 

اها انا كلمتا جابر بوجهة النظر التغريديه ...

قال لي بس خلاص قولو ليها حاولنا نلحلحو .....!!! أبا يتلولح ....!! قلتا ليهو ياجابر الموضوع أخطر من كدا ...!!!

تغريد دي اول محاوله لغزوها....!!! وهي محتفله بالقصة دي ...!! وما حتخليك بي اخوي وأخوك ...استعد للمعركة ياجابر ...!!! والله ياجماعه الزول ده وشو بقي أصفاااار ...لما حنني .....!! بس بقي يقول انا اعمل شنو يا اخوانا... دي مصيبة شنو .دي ...!!! 

قلتا لي جابر طلع إشاعة انك داير بت خالتك ...!! قال لي اخير تغريد ...!!! 😳 ابو الزفت ( صحي حوا والدا) 

اها تغريد المنتشيه .....توزع في التغريدات ذات اليمين وذات اليسار ....!!! عايشه اجواء الخطوبة من طرف واحد ...

وجابر جبر الله كسرو ماقادر يبوح.. وماقادر يصرح ....

!! 

قلتا لي جابر بسس لقيتا ليك ...!!!نطلع اشاعه انو جاك 

عقد عمل في السعودية ..!! ونعمل ليك ديك يا الربه ....!!! حفلة وداع وهميه كدا ...وخلاص الناس حتعرف انو جابر مسافر ولا في خطوبة ولا شتين ...!! لقيتني كيف ..!!؟ قال لي مكسب...!!! اي حاجه ياخ ....!! اي حاجه ...تمرقنا من الزقاق ده ...!!! بس فكني ....!! قال لي بتصدق ياعلوب تغريد دي رسلت لي ورده وقلب 🌹💕في تلفوني ...!! ( هيااا ياتوتا القلوب شنو فينا كمان .... !! ماقلتي كرور ...!!! ) 

قلتا ليهو هانت ...!!! بكره حترسل ليك طلقة ...!!! لما اتبكم ابو الجا ...!!!

فعلا أطلقنا الصاروخ بنجاح ...وجهزنا الحاجات ( #وجابر _ماشي _السعودية ) هاشتاق ملا الحلة ...!!! وعملنا لمه صغيرة كدا 

(والله كنا محتاجين ليها بغض النظر عن هذه المحاوله الانقلابية ...!!!! ) نشيل ونسكسك مع جبوره .... البشوفو يبشر..!! تحلف تقول طيارتو اتنين صباحا .... 

لكن للاسف وقع المحظور ....!! تغريد لم تستسلم...!!! أطلقت اشاعه مضاده انو اصحاب جابر محتفلين بي خطوبتو عليها في محاوله بائسة لاستثمار الحدث ...!! 💃🏻المشكله مافي تغريد.... (دي اصلا موضوعا مستحمي ...) ..!!! الكارثة في في (جابر ) العجبتو قصة السعودية الالفناها دي ...!!اتصورو قال لي ياعلوب قالو السعودية دي بقت مازي زمان...!! شغلا كتير ...!!! وقروشا حبه ....!!😳 ( الله بركة النبي يقرش حلقومك ياجابر ....!!! ) عاينتا ليهو كداااا...قلتا الزول ده هسه ارصعو كف ...!!! ولا اقشو بنيه ...!!! ولا اضحك ولا ابكي ولا بس العمل شنو قولو لي ....!!!! واااا مغستك التهرد ..!!! 

قلتا ليهو مامشكله يا جابر انتا قضي ليك سنة سنتين وتعال راجع ....!!! صدقو قال لي انا ذاتي قلتا كده ....!! 

يبدو ان (الملكة ) اختارتك بعنايه ياصديقي ....!!! غايتو تغريد لو اجتهدت حبه حتعرس الزول ده ...!! ( الغنمايه لم تكتف بتناول طعام العشاء فحسب ...!!! الغنمايه أتعشت..!! وشبعت ...!! ونامت ...!!! ) راجي الله تعقد عليك باقي اليوم ده ياجبوره ...!!! 

وجابر العريس انا عجبني لي وسيرتو بالخميس وانا عجبني لي 

... أبشري ياتوتا .....!!!