الحلقة المئة من يوميات علوب

يوميات علوب ...100 ....الليييييييييله (حلقه خاصه )

الليله طبعا الحلقة .... (ميه) 100 ...ماعارف اكتب ليكم اي حاجه غير اني عايز أقول ليكم قدر شنو انتو منورننا....وقدر كيف انا بكون مبسوط وانا بحكي ليكم عن يومياتي ....بي كل ضحكاتا واحيانا اهاتا .......!!!! بالجد مشواري معاكم لطيف ...!!! وجدا كمان ....وحضوركم الوريف بجمل المكان ...وفي ناس لما بقيت حافظ مقاعدم ....!! كلكم ...!!! كلكم ...بحبكم ياخ .....!!! 

ناس البيت كلهم بسلمو عليكم الحاجه قالت ليكم عافيه منكم ....!! عفويا يتقيكم ويوقيكم ....!!! ومشاعر بتقول ليكم مشتاقييين ...ياها دي جنبي ملفلفه شعيراتا ( بالرولات ) ...خلاص يعني البت الشعر الطويل معذبا ...!! وهي كل يوم شكله مع أمي انو شعرا ( اتمعط) من المكوه ...!! وكالعادة طبعا طلبات مابتخلص ...!!! بس أبشركم انو سجلنا ليها في الماجستير ....!! بعد الرحلة الماكوكيه إياها ....😜ياها دي بتعاين فيني وتضحك... !! تكون حاسا اني بكتب عنها المجرمة ....!!! أهو فرصة تاني الواحد كل مايكون زهجان يمشي يجيبا من الجامعه مع (البلوم ) الراكي هناك ده ...!!! جامعة السرور ...!!!

(عبو ) نحنا بنقول ليها (صفيه ) اسمها في الشهادة كدا برضو بتسلم عليكم ...حلات الدنيا عليها الرايقه الما مضايقة اصلو مابتطلب حاجه...!!! انا ماعارف (مشاعر ) دي جات من وين ...!!عشان كده (صفية ) دي انا مابلعب فيها ...!! ظريفة ياخ ...!! حاسا بي البت دي ....تسلمي لي ياصفصف ...!! 

اوووووو (فطوم ) ...حلاوه لكوم ...!!! دي حبيبتي ياخ ومن غير ماتطلب ...طلباتا مجابا .....!!مشكلتا متأثرة بي (مشاعر ) شديد ...تتذكرو يوم قبضتها جالطا ( الروج ) في خشما يوم عزومة مشاعر في رمضان ...!!! مدسية مني تلاته يوم ....!! بس غايتو لما أجي داخل وتجيني جاريه دي براها بالدنيا ...!!! مرات بتقول علوب أبوي ...بتصدقو .....!!! الله يخليك لي ....!! 

ان شاءالله ربنا بقدرني علي البنات ديل وأوفر ليهم اي حاجه .....!! (ومحمد معانا ماتغشانا من مشاعر وطلباتا) ...قالت لي الماجستير ده ياعلوب داير ليهو (جلاكسي ) قلنا ليها بسيطه خلي الماجستير ...!!!!! تاني ماجابت سيرة (القطر ) ...!!! ان شاءالله يا ( شوشو ) الله يقدرني وأجيب ليك النفسك فيهو ...!!! طبعا الكلام ده بقولو بي (سري ) لو قلتو ليها اكيد حتتجدع ...!!! اختي وعارفا ...!!! بس للامانة في احيان كتيره بتراعي كل الظروف..!!! وده العاجبني فيها ...!!! بس كمان مرات لما تكون متابعة ليها مسلسل تركي وتشوف اللبس والقشرات بتقوم عليهاالحاله ...وتكون دايرا اي حاجه ...يومين كدا وتروق ..!!

اها مرات بلقاها ماسكا الفرشه قدام المرايا وتغني ...ومندمجة 

...مغمتين ليك العيون ...ولاوين البوز ...!!! الحاله دي بتجيها كل ماتحضر( ذَا فويس ...) بتتخبل نفسها في المرحلة قبل النهائية ومنتظرا التصويت ......!!! مره قبضتها قالت صوتو لي علي الرقم ٧ .....!!! اها ده كلام ده ..!! وفطوم جنبها ميته من الضحك ...مونسه روحا غايتو....

وصاحبتا (الاوادم ) ...!!! غايتو انا بس متكيف من اتنين ( تقوي ) (وأمنيات ) بنات لذيذات ياخ ...وحربيات ...!! بس اديهن الضحك ...!! اكبر مستوردات للشمار...!!! الكويسه انو ماعندهن انتاج للتصدير.... دي براها سلامه ....!!! هو لكن ناس (عصعوص ) بدوهن فرصة ....(موده ) كيس المخده .....محتكرا السوق ....!!! دي الشمار ذاتو لو ما غربلتو ودقتو وجابتو ناااعم مابتكبو ...!!! طبعا جنها وجني ...عشان زمان قلتا أخطب ليها شنو كمان سوط العنج دي ...!! 

(انتا كمان ياعلوب قايل نفسك ( دينزل واشنطون ) ....!!عامل راسك ده ....) هي ذاتا مابتقصر معاي قالت علوب رقبتو ملويه.... ( يلوي بطنك ) ......

اووووو نسيت اميره (فلقصه) ..،فلقوص يا ....غايتو من يوم عرسا كمال وطلقا بس ياها ( التوسان ) دي المرقت بيها 

...خففت علينا شويه حق (الامجاد) ....بتخم البنات ديل معاها للمناسبات ...مشاعر قالت لي الأغاني كلها جوه العربية اغاني (الشلب ) اتاريها كانت بتتدرب...!! الشلابه ....

هسه بقت تشغل ...!!! الرجال عذاب .... !!!!

ناس حلتنا كلهم بيسلمو عليكم (يس ) سيد الدكان و ( خدر ) سيد اللبن ...!! حتي سعيد الدرويش ...وعمك بله ....بالمناسبة عمك خدر وقع من الحمار كسر يدو ....!!! رسلتا لليسع بتتذكروه صاحبنا الحنين داك بتاع عسير ...قلتا ليهو شابكنا (يس ) و ( خدر ) واللبن والفول .....اها (خدر) وقع كسر يدو ....!!!! هل بتصدقو (اليسع ) رسل ألف ريال قال لي توديها لي خدر ...وتقول ليهو سلامتك .....!! قسما لولا انو حرام كنت عايز اشيلا انا ...!!! قلتا ليهو يا اليسع ده شنو هسه انتا وكت قدر ده ماترسل لينا نحنا ...!!! قال لي أكسر يدك وشوف ....!!!! ضحكني ياحليلو....!!! ما أجملك يا يسع ....!!! وديتا لي خدر قلتا ليهو دي رسلا ليك (اليسع ...) بتعادل قريب خمسه مليون .....!!! (قرب يقع تاتي ....!!! ) غايتو دعا ليهو جنس دعا والله قرب يبكي ....!!! هو زول لذيذ كده عّم خدر ده ...قال لي ماكان تقول ليهو خدر كسر رجلو ...!!! هسه كانن ألفين كنّا قسمناها سوا ياعلوب ...!! 😂😂(وتقاسمنا لحظتها ضحكة من القلب تساوي آلاف الريالات ....!!

بالمناسبة نسوان الجيران كلهم بسلمو عليكم ...بدون فرز

فوزيه وسنيه ...كل واحده رسلت سلاما براها ...اليومين ديل العلاقة متوتره كالعاده...!!! بس بذكروني مصر والسودان 

اي ( عنكبه) ...!!! السودان يمرق كرت حلايب ...!! مصر تسكت ...!! مصر تدور تاني ...!؟! السودان يقول خلاص مافي ابل وعجول تمشي من هنا مصر ....!!! وفواكه من هناك مادايرين ...!!

يرجعو يقولو لينا.... ليه كدا ...!!! دا احنا اخوات ...!!! وهكذا دواليك ...واحيانا ( دلاليك ) ...(وراسني ياجدع) 👏 ...!!! 

اها ما انسي ملكه وكدا ...!! بتسلم عليكم شديد ...قالت لي سجم خشمي هو علوب بكتبنا للناس ...!! قلتا ليها اشتهرتي ياملكه أهو دخلناك (الفيس بوك) دايره شنو تاني ....!!! شوفو الرد ....!! قالت لي (فيس ) شنو كمان ...!!! دخلني في ( صندوق ) والصرفه الاولي وكدا...!! ( مافي فايده ياها ملكة ) ....

تقبلو تحيات كل اولاد الحله مصباح وجعفر ومصطفي 

والسر المعولق ...(قال لي ماتكتب (المعولق ) دي ...الجكس يقول 

شنو ..!!قلتا ليهو الجكس بعرفك من وين انت (كاظم الساهر) ..

صاحبتنا بسمات ( عباس ) يترسل ليكم سلام خاص ...قااااعده ماسكة الحسابات لي معاذ راجلا في الصيدلية ....جابو ليهم بت حلاااتا ...!!! غشيتا مره قلتا ليها شنو وجع الوش ده قاعده مع الراجل أربعة وعشرين ساعة اديهو فرصة شوية ....!!! غمتتني ليك بالجنبه كده ومعاذ قاعد ....!!! قالت لي راجل المرا حلو حلا .....!!! (بشرب لي في شاي كشحتو من خشمي بالضحك .....!! ) معاذ قال لي ..قالت ليك شنو المجرمة دي ...!! قلت ليهو ...قالت لي ...عايزه تساعدك ...!! نطت هي قالت لي كضاااااب ...ياعزو ...قلتا ليهو خايفاهو (يتشلب ...) ...(الله لاكسبك يابسمه طواالي قايمه بي نمره اربعه ) ...الحاجه الكويسه انو معاذ مابكون عارف (يتشلب ) دي يعني شنو ....تعرفا الممسوخة دي ...ألذا ناس ياخ .....

والله حتي (ليزا) بتسلم عليهم شابكاني احلي ايام قضيتا في السودان ...والسودان مافي منو ...!!! مره قلتا ليها خلاص تعالي استقري هنا فضي لي مقعدك في لندن ...!!! قالت لي no no ...لازم سوا سوا ...!! حلات العربي قي قدومك الأحمر ده ....!!

...وتقبلو سلام خاص من ود الحاجه ...

قال لي والله أصحابك الفي الفيس ديل حلوين ياخ ...وقفو معاي ووعدني بانو يخليني أصور رقصة( القطر صفر ) وافكها ليكم لايف ....!!! نص عمركم ضايع لو ماشفتوها ...

اها فضلت ( هنايه ) طبعا مابقدر اجيب اسما تقوم عليها الحاله تفتح فيني بلاغ ...!! طبعا عرفتوها ...!! ( هنايه ) ياخ ...!! الداست الديك....وعملت ميته ...!! ( الف... ميم ...واو ....الباقي تمو انتو ...!!!اها دي الوحيده الماقالت لي وصل السلام ... تكون قافلا معاها.... بس لازم نقول سلمت نعمل شنو ..!!!تقوم تفكنا بي طوبه ....ليكم كل تحياتي وتحيات الجميع 

ان شاءالله دايما عامرين يارب ونتلاقي في السمح وكل الأوقات الجميلة ياجميلين ...بحبكم كلكم ....

علوب 

ملحوظة 

صبري الفقري جاني هسه بعد ماقرا الكلام الفوق ده في الفيس قال لي 

وانا مالي مابطجيب صيرتي ....ولا ماقضر المقام

اها ياجماعة صبري طلع قدر المقام ...(تطلع ماتجي انتا) 

..الي لقاء في يوميات علوب 101

علوب ..