يوميات علوب ....99....سقوط الفلوجه
الليله من الصباح مشيت اعمل لي توكيل كده في المحكمة ...لقيت لي واحده شغاله هناك غايتو بس استغفر الله من حقها ...لئامة السنين ومساخة الدنين ...!!! (انتو الدنين دي شنو ..!!؟؟ ) ...لا وكمان عامله البت حلوه ولذيذه واستايل .. ....با ناس المحكمة هوي ...!!! ( أليس بينكم رجل رشيد) يكلم البت دي تخلي عويج الخشم البتعمل فيهو ده وتغيير الصوت ...وتعطيش الجيم دي
ياخ عطشتنا نحنا ذاتنا... كتلتنا كتلا ...!!! ( مالكم كيف تحكمون ) ....!! البت دي نفسا قايم ...وقومت نفسنا معاها ....!!! حلات قالت لي ...انتا الووب...!!؟ (اي والله قالتا لي كده ....!!! ) قلتا ليها اسمي علوب ...!!!علوووووب ..،!! ما ( الووب ) قالت لي اسمك مالو عامل كدااا.. دي ... !! تشيل وتجرجر في الكلام ...!! (يجرك من شعرك (المركب ) ده ...!! ) قلتا ليها كدا مالو..!!؟؟ بخوف ولاشنو ...!!؟؟ عامله سنيناتك ديل ... !! عندها سن (مترومه ) كده ...عاملاها في شكل فلجه ...وهي وحاتكم ( الفلوجه) ....!!
اها زولتك تشيل وتعاين لي ورقي ده ...وترفع راسا تديني طله ....التقول لاعبين حريق ...!! بس حرامي وبحققو معاو ) ...!! وتشيل وتتونس مع الموظفة الجنبها ...!!! يعني المعني ماشغاله بيك ولا قارياك اصلا ...!!! وانا بس اها واقف ذي بوليس الحركة ....!!! مدت لي الورقة كده بي زهجه ولا عاينت لي ذاتو .... !! قالت لي امشي هناك اعمل ليك دمغة وتعال ....(اشرت لي علي (هناك )دي بي طرف اصابعينا .... ...!! قربت تقول لي (طير ) ....!!! و تاني رجعت لي جارتا يتمو باقي الشمار....الظاهر انا جيت في وكت غير مناسب ...
يازول شلتا ليك ورقي ده ماشايف قدامي وزهجان ليك منها جنس زهجه ...!! عليك الله اخرتا ( الفلوجه ) دي تتفسح فيني كدا ....وتدور بي ...!!! طيب اصبري لي ...!!! وقلتا كدا جيتا ليك تاني بس المره دي بي (خطة التحرير ... ) قلتا ليها هاك ده الورق..!! ودي الدمغة ...!! والامة مجتمعه ....!!!طبعا اتلفتت ادتني نظرة ( القط ) ...(ماعارف اشرحا ليكم كيف لكن اي واحد يتذكر عيونو يوم لاقت عيون (كديسه ) بعرفا ...) طبعا مستغربة في الامه مجتمعة دي ...قبل ماتستفسر وتهيج ...!!! طوالي كبيت ليك التوصيله ...قلتا ليها ....!!! غايتو الواحد هسه لو (معرس ) كان قعد في الواطا دي بلا سفر بلا دمغات بلا تلتله ....!!! (يمين لما عيونا برقن) ...!! وحسّيت ليك بيها نفسا ده برد ...!!! قالت لي ....غايتو الهنا متلتلين والبره متلتلين الله يسوي الفيها خير بس (ههههههههه) ....هياااا اخوانا كمان فرت خشما تضحك .....!! تكون اتخيلت نفسها معاي ونحن الاتنين متلتلين بي بره ...!! (الشرك ده اظنو قبض ...!! ) قلتا النقدم ( قولة الخير ) ....!!! قلتا ليها (التلتله مع الحنان ...!!! بتخفف الاحزان ....) والله لما انا ذاتي اتكيفتا خليها هي ....!!! علوب يا ....!! والله ياجماعة ولا كضبت طوالي رقعتني ليك بي بسمه ....( تفصلي يا الفلوجه ) ...معاها حبة خجله كدا ومضايرا ...(ماعروس كمان ) ...!!! (قبل شوية كانت بتعاين فيني ذي ناس المباحث )
قلتا ليها اها الخطوة التانية شنو في الورق ده ...!!؟؟؟ قالت لي خطوة شنو كمان ..!!!؟؟ انا بكمل ليك باقي الإجراءات ..!! (ابو الزفت دخلنا الجرتق...) .......!!!!!!!اها يازول انا عجبتني القصة قلتا النكملا معاها ....
قلتا ليها والله بنات الزمن ده ذاتن تحسي بيهن برااااحه كدا وسحسوحااات ....الكلام ذاتو كيف ..كيف ...كده والاستايل والحركات ...!!! ده شغل داير ليهو راجل صبووور ....!!! (صبور دي اديتا جرا كده) ...!!! عشان تاااامن ....وتحس بالسرور ....!! والله يا اخوانا الساعة الجدعت ليك الجيم المعطشه دي رمتا هناااك ...(ملتا مويه) ...وقبلت ليك علي .....!!! أجي يابنات أمي ...( اممممك ركبت شريحة سوداني ) ...وكبتو ليك ...قالت لي ديل غبيانات ساكت ....!! قسمتا البت لو ماكانت فنجرية وحربية ( هنا استدركت) وصلحتا .....!! اقصصد اصلية ( اخير حربيه ) ...رترتت كده وواصلت ...يعني بت جدعه كدا....!! بالله فايدتا شنو ...!! الحياه دي دايرا ليها مسايسه ....!!! ومرا تقيف مع راجلا في الحلوه والمره ( المره شفناها قبل شوية....!! باقي الحلوه ) ...(واستطردت تحكي ) ....ديل كضابات ساكت ...!!! والله مافي كضابه غيرك ...!!!! يا اخوانا بس كأنو زول تاني البتكلم ...
وانا بس واقف أعاين ...وأمتع نفسي بالدهشة...!!! أتلفتت علي جارتا تاني ...( المره دي الموضوع انا ) قالت ليها عليك الله ياعايده ورق (علوب) ده سرررعه يخلص ...!!! الزول ده قريبي ...!!! هيااااا القريبي ....قبل شويه ماكنتا ( ابوالقنفد)
انا بس داير أقع .....!!!
فعلا يازول ادوني ليك التوكيل (مبروز ..) وسبعمية ختم ....!!! مع الشكر والثناء ....!!
اها هسه العروس دي أسوقا طوالي.. ولا أحسن أصل هناك وأرسل ليها ...!! (ياالله تغفر لي ...!!! ) لكن بأمانه (الفلوجه) ما بالغت ...!!!؟؟