يوميات علوب ...101 ... (الصبحية)
امبارح طبعا بعد مانزلتا (الحفلة ) بتاعة المئوية ( اقصد الحلقة ) اتصلو بي ناس من أصحابي كان حكيت ليكم عنهم في يومياتي دي .... ذي اخونا الصادق (عطر الصندل) لو تتذكروهو .....قال لي ليه ماجبتا سيرتي ...!!! قلتا ليهو كفاية (ريحتك ) .....!! يضحك ساااي قال لي مابتتقبض ياعلوب ...!!!
اها في ناس كمان منكم سألت من ( السجم ) أقصد ( الكجم ) ( للطفولة عنوان ) ....!!! اريتكم كان سألتو من مليون دولار...اها بالصدفة انا ماشي شفتا ليك (الكجم ..) ...قلتا هيااا اخوانا انا (الكجم ) ده نسيتو كيف اريتني كان ماقلتا ....!! أول حاجه لقيتو مشنقل طالع ليك في الحيطه ...فوووق ...!!! عرفتا أمو مافي ...!! قلتا مابخلعو اكورك فيهو ينزل يقوم يقع كمان .....!!! جيت جنبو براااحه كدا قلتا ليهو ده شنو ياكجم ...!! ماقالو ليك خلي طليع الحيط ده ...!! قلتها ليهو بي حنية كده خايف علي مشاعرو ....!!! شوفو الرد بتاع المشاعر الخايف عليها ( ونحنا ماخايف علينا ) قال لي ....(قالو لي ماتطلع المغربييييه ..!! ) ....هسه دي المغربيه ...!!؟؟ أتخيلو ليكم منظر ...ولِسَّه هو طالع ....(شوفو النباهه دي ...!! ) انا ماقلتا ليكم الكجم ده ما تسألو منو ....!!!
اها انا بقيت محتاج أدير معاهو حوار ذي الحوار الوطني بتاعنا ده ....!!! وبهدوء كدا علنا نصل الي (مخرجات) ....!!! وانا مخرجاتي وااحده بس ....انو (كجم الجن ) ده ينزل من الحيطه دي ....!! دون خسائر ...!! بس جيت ليك جنبو كدا بي تحت ماداير استخدم اي أدوات ترهيب ...!! لانو اصلا ( الكجم ....) طالع في الحيطه ...!! طالع في الحيطه ...!! المهم الان انو ينزل كيف ....!! بالظبط ذي المعارضه المسلحة ...اصلا هم كدا كدا شايلين سلاح ...أحسن يتفاهمو معاهم براحه مايرشو ساكت من طرف ...!! (ياخ خلينا من قصة المعارضه دي قصة طويله ..) خلينا في الكجم ده ...!!! قلتا ليهو انزل براحه حبيبي جبتا ليك (الكداره ) الوعدتك بيها زماااان ......( استخدام الجزره كأداة ترغيب ) ......( الكداره دي ذكرتني (الوزارة ) ....!!! ماعلينا ...!! شوفو الرد المهذب ده من هذا الطفل الوديع ...!! قال لي ( كضاااااب ) ...قالا لي وهو جاري
في الحيطه ....(هسا امانه في ذمتكم دي ولاده دي .....) لا ولسه هو طالع ...!! وكمان فاتح نفسو ...!!! فاري يدينو جناح وماخد ليهو جكا في نص الحيطه ....!!! (ياربي الكجم ده بكون عايز يطير ....!!! ) بيني وبينكم الحركة عجبتني ...!!!! والله الود ده كأنو جاري في (حواشه ) ماحيطه ...!!! هسه عليك الله البلد دي لو بترعي المواهب الكجم ده مابطل اولمبي جااااهز في منشط الجمباز.....( وبالليل حرامي) ...!! ( ابدعتا ياكجم ) ...!!!
اها انا قلتا لازم استخدم أدوات الترهيب والقمع بعد فشل التفاوض ....!! قلتا ليهو أحسن لييييك تنزل والا بكلم ( التومه ) لما تجي .....!!! التومه دي أمو ....مرا حربيه أصلو مابتلعب ...تتذكرو ( الكجم ) ده ذاتو يوم كان عايم في موية المطره لحدي اضنينو أيام السيول ديك ....!! شفتو كيف محطتو ليك في ضهرو...!!! خلتو يتمرصع ...(الكلب) ...!!! حالتنا حجزناها ...اريتنا كان خليناها( شحطتو) التانيه ...هسه ماكان طالع كدا ...!! المهم قلتا خلاص علي حس (التومه ) دي بنزل .....!! (بعرفا ذي جوع بطنو ) لكن للاسف الكجم مانزل...!!! الكجم فتح عدييييل...!! وجوكرو بايظ .....!!! اتصورو قال لي شنو !!؟ قال لي ...كللللما قالو ليك انا خايف منها ....!!! (انا قلتا الكجم ده مؤكد شارب ليهو شربوت قايلو عصير ولا روب بايت ولا حاجه....!! (الود ده مابراهو ...) لحدي ماتما لي الجملة ..قال لي ( أمي ذاتا في الحصاحيصا) ....!!! ايواااا.. وانا أقول (كجمنتو) ده مالو متجدع كدا الليله اتاري (ترامب ) في الحصاحيصا ....!!!
عيش حياتك ياود التومه ....!! طبعا ابوهو متوفي الكجم ده ....!!! عندو اخت اكبر منو وواحدة أصغر ...هو عامل فيها راجل البيت... (المفعوص ده ) .....اها راجل البيت اول فرصه لقاها طلع الحيطه .... !!! الفرصة التانية بطلع (نشال ...!!! ) والله جد ....!!
المهم مافي فايده فشلت كل المحاولات ....!! والكجم مواصل السباحة في الفضاء ...!! وانا ماهاين علي اخليهو مشعلق كدا وامشي ...يقوم يقع ...!!!
قعدتا انتظرنا لحدي ما السيد الكجم تعب وفتر ونزل براهو ....!!! اها ياهو ده (الكجم ) السألوني منو بعض اخوانا امبارح ....هسه بالله ده زول يجيبو سيرتو ...!!
لكن انا( التومه) مكلما مكلما ...ابقو قريبين بس احضرو ( حنة ) الكجم اقصد ( شحطتو)...!! اليظبر لي بس ....!!
اها بالمناسبة اتصلتا علي (خليل ) اكيد بتتذكروهو خليل صاحبي المأزوم داك ...بتاع نبض الجماهير ...ايوه ياهو ذاتو ...!!! قلتا ليهو امبارح كنا محتفلين مع الاخوان بي مئوية علوب ...هل بتصدق يا ابو الخل ناس كتيرة سألتني عنك رغم انك ظهرتا مره واحده بس .....!!! شوفو بقي الردود المقعدا ...!! قال لي لانهم ببساطة ناس شفيفين ....!!! ( جنس شفوفيه هي ) ومدي الرؤية عندهم. سرمدي ...( شوف سرمدي دي ذاتا كيف ) ...!! وانا بي هناك أقول ليهو اها ...!! دايرو يتجلي ...!!! عشان انقل ليكم كلامو ...ولم يخذلني الخليل ....!! قال لي عارف ياعلوب الانسان تأثيرو مش بي كترة ظهورو ...!! التحدي الحقيقي انو كيف يترك ( بصمة ) ...!!! (ابو الزفت) ..!!! غايتو نحنا البصمة البنعرفا ياها بتاعة (المباحث) دي ....!!! بصمة خلي دي بعرفا هو
قلتا ليهو شكرًا ياخ ...كدي لمن أجيك بالدرب ومزاجي يكون سرمدي كدا عشان ( افتو ) معاك ...قال لي نعم ..!!؟ بي استنكار كدا ...انتبهتا انو كلمة ( افتو ) دي بتكون اربكتو ...قلتا ليهواقصصد ( افتيك ) من ( فتوي) يعني ....!!!حتي قال لي اوكي الي لقاء ...(هو ماعارفا جاياك وجايه ( افتو ) معاك ...!! يا ابشرا ...!! ) ...(كان سكاني) ...
اها ياهو ده خليل الرجل الجميل ...اها دايرننا نجيبو بعد ده كلو يعسم لينا القعده ...!!! لكن هو فعلا زول لذيذ ياخ ونبيل ...!!! ابو الخل يا ....اخو اخوان والله ....اها ديل الناس السألتو عنهم ...!!
ايواااا ...اتذكرتا قبل ما أنسي ...بالنسبة للناس السألت من ... استاذ عبد القادر ( قدوره الأصلي ) ...اها ده انا ذاتي بفتش ليهو فتيش ...!!! بالله عليكم الله اي زول يعرف عنو حاجه بكسب ثواب ويكلمني ...!!! قدوره ياخ ....اشتاق حتي ل ( سوطك ) ...!!
اصلي والله ...الله يمسيهو ...ويمسيكم بالخير ...!!
مانكون نسينا زول كمان ....!! الحلقة دي اسمها صبحية مئوية علوب ولا زال الليل طفلا يحبو ( تسعة وتسعين في الميه من حفلات زمان قالو فيها العباره دي ) لا وفي واحدين بجروها ( يحبوووووو ) ...( لزوم الإذاعة ) والحفلة للصباح ....
...!! هسه حداشر الا خمسه ...الفنان بمشي ينوم ...يخلي الاورغن شغال برا ...والجماعة شغالين (زنق ) يا ازررررررق ...!!! بالله في زنقة اكتر من دي ....!!!