الحلقة المئة وعشرون من يوميات علوب مع الطيب عبدالماجد

يوميات علوب 120 .....باريستوس ..!!

عندنا واحد في الحلة اسمو الرشيد مشهور بي (قرضه ..)

ناس كتار مابعرفو اسمو الحقيقي ....!!! حتي نسوان الحلة الكبار ديل بقولو ( قرضه ) ...!!! مش في ناس كدا اول مايجو مكان بدوهو روح ونكهة....!!! بس هو من النوع ده ...وهذا النوع مهدد بالانقراض فحافظو عليهو ...!!! 

( قرضة ) أقوالو حاضرة ومابتكلم كتير ...لكن اذا تكلم اسمع ...!! بديك (الزيت ) مابزيدو نقطة موية ....!!!الناس دي كلها ممكن تضحك علي تعليق من تعليقاتو وهو ماض لايبتسم ...( ديل الناس البتدي بس مابتشيل ....) ....!!! 

لاحااااظ ...وعايااان ...وفقري ...!! والفي خشمو علي لسانو ...مابهتما باعداد الكلام قبل الطبع ...!!! مرات تتأمل بحيادية كدا تلقي وجهة نظرو سليمة علي قسوتها ...!! وحلاوة روحه تضفي عليها سحرا فتغدو ....طاعمة ...

بنات الحلة ...!!! بضايرن لما يلاقنو لانو ممكن ينهز الواحدة بي تعليق ( يفرطقا ...) ....ماهو قرضه ده هو السما أميرة.....!! ( فلقصة ) ....!!!

لقي ليك ( صفا ) بت جيرانا دي في عرس لابسا ليها فستان فيهو ذي ريش ولا صوف كدا ماعارف ...!! المهم منفووش ومجرجر ...!! ...!! قال أها وصفاء دي بعد الحفلة حتبيع الجلد ......!!!

صفاء قالت وقعت بعد الحفلة لوت رجلا ...!!! قرضة سحرا😳

( عليكم الله صفاء دي ما بالغت !!!؟ يسحرو ليك شنو ياصفاء (بالبرشوت) 💃🏿 الجاية نازلا بي في نص الحفلة ده .....!! النصيحة الفستان فيهو شبه كبير من (صوف الخروف ) ....!!! نكون واضحين .....!! 

المهم ده قرضة ودي أوصافو ....!!! بس الناس مابتزعل منو بالعكس بتستمتع بي تعليقاتو...!!! ( وعلي مرارتها احيانا) ...!!! انه لسان حال الواقع في كثير من الأحيان ....

اها الليلة نحنا مغروضين في ( قرضه ) ...وشديد كمان ...!!! عندنا صاحبنا كدا اسمو ( معمر ) جا من دبي شهانا العافية ...!! كل دقيقتين شابكنا ليك لا لا دي مازي الفي دبي ....!!! ( قلنا سمح ...) ...!!! ودبي فيها مترو ....!! ( الله يدينا ....) وليه ماعندكم مولات ..!!! ( ياربي عفراء والواحة ديل طواحين ) .. !!؟ والبيتزا بتاعتكم ضاربا .....!! ( حليل الفولة في محطة ستة ...!! معمر ده بالذات كان بقوم اخر زول ....) ...بس مدور ليك فينا تعليقات ذي دي ...!!! معطنا معط ياخ الزول ده ....!! 

لا ولابس ليك الجلالية بتاعتم ....!!! ياخ ده شدة ما الله أدا مره قال الدنيا ( شوب ) ...!! 😳اي والله ( شوب ) الواحدة بتاعة ( الزلمات ) دي ...!! ( الحر يايابا اليفسخك ...) ..!!! عليكم الله شوفو جنس المِحنة دي .....!! فنحنا شنوو ....قلنا مافي زوووول بقرضو لينا غير ( قرضه ..) ....

طوااالي مشينا ليك عليهو كلمناهو ...قلنا ليهو يا( معمر ) ده ياخ داخل ليهو في نمرة ما حقتو ....وأزعجنا صراحة ...!! شوف لينا حل ...

قرضة قال اعراضو شنو ...!! ابو الزفت ( دكتور بس ) ...

قلنا ليهو ....شوية نفشة كدا ....!! وتضخم في الانا ...!!! وصعوبات في التعلم ....!!! ونكران للواقع ...!! جعفر صاحبنا جنبي نطا قال ليهو ايوه نكران ( للواقع والذات ...) كدا الاتنين لصقن مع بعض ...!! اقسم بالله لو سألتا جعفر ده قلتا لي انتا ياجعفر هسا لييي ملصقن ....!!! ماحتكون في اي اجابة ...!! بس ياهو دا ...!! في ناس بتعجبم كلمات كدا بحشروها في اي حاجه واي حتة ( جعفر مثال ) ....!!! ودي مالمرة الأولي .....قبل كده قال جا بي زقاق لقي ليهو ( شرزمة ) من الكلاب قربت تعضي ....!! 

طبعا الكلاب يكونو سمعو( شرزمة ) دي ماتو من الضحك... !! وغيرو رايم ...🐕 هسا ده زول بعضو ....!!؟

لكن دي حالة شائعة أسمها ( حوص في الكلمات) ...

زمان الجماعة كانو مدورين في كلمة (شذرا ) دي ....!!! 

عذبوها عذاب ...!!! 

عاين لي ( شذرا ) ...!! وجانا ( شذرا ) ...!!! ولاقيتو ( شذرا ) 

......!!! لما ( شذرو ) بينا البارحونا وراحو..... شالو من وادينا بهجتو وافراحو بي الكتير ياحليلوم يا حليل الراحو.........!!!

( الله لا جاب باقيكم ...) .....!!

بس الخبر الكويس وذلك الفضل من الله إننا مزقنا فاتورة ( في الحتة دي ) .....!! الله ده كريم علينا اختفت من الرادار وطشت من الشبكة ....براها كدا ...!!! عدا بعض الحالات وأغلبها حالات فردية ومعزولة عن حركة ونبض الجماهير ...!!! انتو ( الجماهير) ديل اوعي نكون نحنا بس ....!! شايف اي زول بتكلم بي اسمنا ..... ويقيس (نبضنا ) ده ....!!! ياربي الجماهير دي بتنبض كم نبضة في الدقيقة ...!!؟؟

بس غايتوالبركة في (الحتة دي ) أختفت وانا البي كلو هين ...!! ياخ اي زول كان تلكزو ساكت في نص الشارع يقول ليك ( في الحتة دي انا بفتكر ...) ...!!! 

ياسلاااام ...الحتة ياتا...!! ؟؟ والله الا الحتة القدام المسطبة بتاعتكم دي ......!!! ماشايف لي حتة تاني .....!!! 

لذلك يمكن لوزارة الصحة ان تعلن الان بكل سرور ان السودان اصبح منطقة خالية من ( الحتة دي ) ...!! ( عقبال الملاريا ..وشلل الأطفال ) ....الصفقة للوزارة ....!!! 👏وزغردي يا الجودلية ...!! الجودلية منو ....!!؟؟؟

ده موضوع طويل ...!!! ياخ انا ذاتي مالي ومالم 

نرجع لي موضوعنا الأساسي ....!!!

وقفنا وين ..!!؟؟ ايوااا المهم ( قرضه ) مشاها لي جعفر وعقب قائلا ....اها مافي حاجة تاني .....!!؟؟ قلنا لي ذي شنو ....!!!؟ قال هل المتهم....!!! ( المتهم ده معمر ) 

( وبذلك تم توجية الاتهام رسميا للمدعو (معمر ) وبجري اعداد لائحة الاتهام ) 

غايتو (انتحال شخصية ) دي ثابته ...الباقي مابعرفو

قرضه سألنا هل مرات بيحكي عن انو حال البلد ماعاجبو ...!!؟؟ قلنا لي ياريت ....!!! الزول ده نفضنا عدييييل ...!!! لمن تجي سيرة البلد بقول لينا ( بلدكم ) دي ....!! ملصا ودرعا فينا ....!!!( ياربي معمر ده يكون أدو الجنسية مع الجلابية دي ...!!!؟ 

قرضا قال ايوااا ...!! طيب سؤال اخير ....!! هل عندو اَي ملاحظات عن غلاء المعيشة ...!! قلنا لي الغريبة دي بالذات ماجاب سيرتا ....!!! هو ذاتو مافاضي من العزايم بس مدور فينا دبي وحشتنا ....والنت عندكم بطيء ....!!! و أحي من دبي...!!! وكلام ذي ده ...!!! 

قرضا بشرنا قال خلاص بمشيئة الله...!! حيجيبو الدايمة ...!!! ولا دايم الا وجه الله ،...!! ماقلتا ليكم قرضه ده دكتور .....!!! وأخصائي كمان ....!!! 

قال ولا يهمكم خلاص خلو علي وماعليكم ان شاءالله يستعدل ...!!! وأدانا الروشتة ...قال بس تطبقوها ذي ماهي ولا غلطة ...قلنا ليهو ظابط ....!!ٌ

اها حسب روشتة ( قرضه ) عزمنا ليك معمر ده في محل اسمو (باريستوس ) في الرياض ..!! يازول اتلملمنا ليك نحنا شلللة من أصحابنا ديل كلهم جو ....ناس منتصر .... وجعفر ده ذاتو ( شرزام الكلاب ...وللمرض جياب ....!! ) الله يدي العافية بس وإبراهيم والصادق....وبكور ...!!! المهم كل الشباب ...في واحدين اول مرة يخشو المحل ده ذاتو .....!! أقصي حتة بمشو ليها محل (معولق ) كدا جنب حلتنا سيدو غاشيهم معلق لي يافطة طويلة عريضة كاتب فيها ( ايسكريم الواحة ...) وهو عبارة عن (الداردمة ) الواااحدة بتاعة زمان البمصوها دي ...!!! بس بدل الكيس بكبها ليهم في كباية ..والجماعة يلهطو .....!!! تسأل ناس ( بكور ) كنتو وين ...!!؟؟ يقول ليك ضربنا ( ايسكريم ) الواحة وجينا .....!!! قسما بالله هو الضربكم وفلقكم فليق ...!!اقعدو تابعو لي ( ود الحاجه ) ده من (كيس ) لي ( كيس )لما يطلعكم من الدنيا وكيسا 

انا والله ده كلو ماهماني..... المزعلني بديهم ( كركدي باللبن ) 

بقول ليهم ( استروبري بالفانيليا....) وجماعتك...( يكدو ..) ...!!! 

لا ...!!! والعيون مغمتة.....!! شده ما متكيفين .....!!! بطريقتكم انا مالي ومالكم ...تاكلو السم ...!!! 

هو الزول ده كان بعرف ( استروبري ) ...معلق صورتو في المحل ...!!؟؟؟ 😳 ... 

......المهم وحسب ( اتفاقية نيفاشا ) عزمنا ( معمر ) قلنا ليهو محتفلين بيك بمناسبة جيتك من دبي ...!! يشيل ويتبسم .....!!! ( بموت في العزايم )....

بس دخلنا كدا الشباب بتناقشو اها يا اخوانا القعدا برا ولا جوه .....!!!؟؟ الجو برا شكلو ظابط مع المطره دي ....حقو نتكل برا هنا ...!! بس زولك نطا قال أووووف ....شوب ....!! الليلة الروووووب .....الروب يامعمر ( شوب ) تاني ...!! يا خوانا ما تشوفو لينا حجر نفلق بي (الهطلا ) دا .....!! ( الشبشب اليرصعوك بيهو في نص دومتك دي يامعمر يا ود (مدينة ) 

شوب يا (يارامي عياش ) ...!! 

قلنا مامشكلة نخش جوه ....!! خشينا جوه ...!!! قال ايوه هنا أحسن ...!!! بس ليي ماعندهم( تكييف ) مركزي ....!!! قلنا ليهو عندهم سلطان ( الكيف ) للعماري الجيد ....بنفع ...!!! صدقو الزول ده سكت ودنقر ....!!! معمر دا بكون ( بسف ) وداسي مننا ....!!! والله جد ....!! دي دنقيرة ( سفيف) ...!!

اها في قعدتنا دي جاتنا البت للطلبات نطا طوالي قال بالله انتو الويترز برضو هنا ( حبش ) ....!!! وخشا ليك في ( الطلس ... ) نحنا في دبي ......😳 ياااااااادي ...دبي..... ويوم دبي .....واليوم الوداك دبي يامعمر ....!! يوم اسود ذي السكن ....!!! اها ....

.قال في دبي الويترز ( إثيوبيات ...!!! ) بس المطاعم الكبيرة ( فلبينيات.... ) ....قلنا ليهو والله نحنا ياهم ( الحبش ) ديل حبايبنا ...!! بنحبهم وبحبونا .....!!! اطلب ....اطلب...!!! قديتنا ياخ ....الله يقدك ....!! 

شال المنيو ...قال اوووو البلد اطورت ....شايف في خيارات 

كتيرة بس هو بحب (الكابتشينو ....!!! ) ...!!! (حب جديد ولا علاقة قديمة ..ياعموري ..!! بقيت تحب الكابتشينو !!؟ قادر الله .!! حليل شاي المغرب الكنتا بتشربو يوم وتفطو تلاته يوم ...!! طبعا اكتر ناس مشاكلين خدر سيد اللبن في الحلة دي كانو ناس ( معمر ) ديل أمو اسمها ( مدينة ) بتغالطو ليك عادي في خمسة أرطال ...طوالي عمك خدر بفرض عليهم عقوبات ...!! وبقطع اللبن ...!! مرات بتدخلو الأجاويد لفك الحصار .....!!! ( ومرات بتوسط بي نفسو الحمار ) ....( أخو معمر الصغير ده علاقتو كويسة مع حمار خدر ده ...!!! ) 

مرات بفكو من الترلة ...!! والحمار يبردع في الحلة ....!! سااااكت كدا مضره .....!! ( في حب يا اخوانا اكتر من كده ....!!! ) اخوهو ده اسمو( ناصر ) معروف في الحلة بي ( كديس ) لأنو ببحت اي حاجه وفِي أوقات فراغو بكتب في الحيط ....!!! ماقلتا ليكم ...!!! دي اسرة ( مؤلمة) .....و تاريخ من الألم .....!!

ما علينا...!!! قلنا ليهو وفي (فرانشينو ) كمان لو ماعجبك ... !! قلناها ساكت كدا دي ... .....!!! صدقو البت (الويتر ) دي قالت ايوه في ( فرانشينو ) .....!!! ( الفرانشينو ) القطعنا من راسنا ده ....قالت في .....!!! 😳 بكون ده ( الكابتشينو ) ذاتو بس بدل يسوطو بالمعلقة بسوطو بي فرشه ببقي ( فرانشينو ...) ....ونحن نلهط وندفع ....🍮

المهم يازول كابتشينو ....🍮فرانشينو .....🥛دقيق فينو ... 🍚 قدر العرفنا والماعرفنا وال الله قدرنا عليهو طلبناهم ...!!! ملينا ليك الطربيزة دي لي عينا ستفناها ستيف ...!! ( ونمعط ...!!! ) ...ماخلينا شي ....!! وهو ذاتو معمر ده (يمعط) معانا في البداية كان اشغال (اوتوماتيك ) شوكة وسكين 🍴وكت لقانا( بننجز ) كفف القميص ونزل معانا ( جربوكس ) الخاين .....!!! ماقلتا مول الإمارات ....

اها في قعدتنا دي ( قرضة) ضرب لينا حسب الاتفاق قلنا ليهو وييين ياقرض ....!! نحن جنبك هنا في ( باريستا ) تعال ...تعال قرضة جا خاشي ...!! ديجانقو بس .... !! 🕵🏽خاتي ليهو قشة في خشمو بالجنبه كدا ...!! ( بكد ) فيها..... ويتلولح ...( للفخامة عنوان ) ...😎 ودخل علينا هو طبعا ذي الكتاحة بهيج الواطة ...بس هبوبو باردة ....!!! كيف شباب ...اهلًا قرضة ...اهلًا شباب ..!! كيف ....كيف ....!! تبادلنا التحايا ....قرضه قال جعان شديد ...!!! نادينا الويتر تاني ...!!! جات ...!!

قال ليها اول حاجه خلينا من الطلبات إنتي عارفا انك شديدة شدة الحرامي ....!! ( ودنانش مسكو يلام... اقرش يت نو ....) البت لما اتخلعت ...!!! تشيل وتضحك ...!!قالت ليهو ...( دناني ..) ( أديس ) يالام ...!!! قلنا ليهو عليك الله ياقرضه بس قلتا ليها شنو...!!! قال سلمتا عليها ....بي (دنانش) ....!!! (واقرش يت نو ...) يعني إنتي من وين في اثيوبيا ....!!؟؟ قالت هي من أديس ....!!! 

واضاف ( عبد الله الطيب ) ...هذا بالنسبة للمرأة تقول لها ( اقرش يت نو ) أي من أي المناطق انتي .....!!! أما عندما تخاطب الرجل في بلاد( الحبشة ) فيجب ان تقول له ( أقرك) يت نو ...) بالكاف وليس الشين كما في مخاطبة المرأة وهنا يكمن الفرق والله اعلم ....!!! 

لوووووول قرضة يا منقطا ....!!! 

شايف يا معمر....!!!! أهو ده الكلام .....!!! لغات ..!! خليك انتا في المول حلو ...!! والمترو سريع ....!! 

والله البت كان ليها مراد تعزم قرضة شدة ما اتكيفت ....!!! قرضه ياسيدا ...

قال ليها أهلا ياست البنات عندكم جداد ....!!؟؟ قالت ليهو مشوي ولا بروست ...قال ليها لا (ميت ) فيك زيي كدا مافي ...!!؟ أعقبها بأمهرية صريحة ... ( سمش مانو !؟؟ امتشي مغب سيغا دبو غاريا ) لاعرفناها ترجمة للكلام القالو ده ...ولا حاجه جديدة....!!! آلمهم انو البت دايرا تتدردق من الضحك ...وردت بعربي أديس ( واللهي انتا هلو شاديد ....!!! ...انا أسامي ( كاتي ) .....!!! نحنا قربنا نصفق ...انه حوار الشعوب ....!!! ....( معمر جاي لابس جلابيتم .) 

أها جابوهم ليهو الاتنين ...المشوي والمحمر ...!!! ضربم ليك وطلب العصير....!!

وقبل ليك علي معمر شبكو ليك كيف يا مان ...شكلك ذاتو بقي يشبه دبي ....( اها دي طبعا شقت معمر النص ......) طوالي ( قرضه ) لصق ليهو التانيه ....ودي شنو القمصان الراقية دي ...( معمر بقي يتهوزز ) ...!!! قال ليهو طبعا دبي ( البراندات) ( كلها اصلية ) ....( قرضا اضايق.....!!! لكن أكلا في اللباد ) .....قال ليهو والله هنا مافي ( براندات ) ياهن (برندات ) السوق العربي الشايفن ديل ....بس وفقعناها ليك ضحكة .....!! قرضة ياخ ....!! قرض الناس قرض ...!!! ينثر الفرح أينما حل ....!!! والنَّاس في بلدي يصنعون الحب ....!!! 

قال لي معمر الشغل كيف ....!!؟ معمر قال ليهو والله تمام طبعا أنا مدير فرع النسيان فرع ( زعبيل ) في دبي ...( هو نحن انتهينا من دبي تطلع لينا ( زعبيل ...) ...قرضا قال ليهو ....والله تستاهل ....معلم كبير ....!!! مرتاح لكن....( ولامس معمر هنا سنام الشعور بالعظمة ...!! ) ،.،

( قرضه ) طبعا مابخجل ولا بلاوذ طوالي نادا ليك البت الويتر ....ياكاتي ( بي اسما المره دي ) قال ليها عرفتي الزول ده ...!!؟ (أشر ليها علي معمر ...) ....( كاتي ) شهقت شهقتم ديك ....يعني ماعرفتو ....!!!؟ 

قال ليها كيف ياخ ده ( معمر ) ملك النيسان وفخر السردان سفيرنا قي دبي ... وكل الحنان ...!!! 

غايتو معمر لو داسو الوكت داك كان طار ....!! ( اتنفخ وقف لستك ..... ) .

بس البت جابت الحساب ....!!! الجماعة حسب خطة ( قرضة ) انهم يحاولو يدفعو....!!! مجرد محاولة انقلابية فاشلة ....!!! وقرضا بتم الباقي ...!!! فعلا كل واحد دخل يدو في جيبو ....!!! قرضا قال ليهم بس .بس ...بس ..!! ده شنو البتعملو فيهو ده معقولة لكن ....!!! ...عايزين تحرجونا ....!!! معانا ملك النيسان سيد الدراهم والدولار.... وسيد الشي كلو وتدفعو انتو ...الكلام ده ماعيب ...!!!؟ وقبل ليك علي عموري ....

يلا يا سيد اللعب ...كشكش وري الوهم ديل ...درهم ( دبي ) بعمل شنو .....!!! ؟؟ ( دي الوحيدة المعمر ماعمل حسابا ) عاين ليك الفاتورة لقاها عايزا تطرشق ....شي كابتشينو وفرانشينو وكلابشينو ( دي الشينات بس ) غير المحمر والبروست والمشوي ...لكن ماف طريقة ....!!! ماقلتا زعبيل ...!! وجمل الشيل ....!! اها خم وشيل ....!! يازول دفعا ليك علي داير المليم .....(وفِي القلب حسرة ...!!! تاني بتجي ...!!؟ 

الشباب شكروهو ....!! ودخل معمر في حالة صمت وحداد ...الحساب سبعمية وسبعين جنية .....وقرضة حلف التلتين الباقية تشيلا ( كاتي ) قال خدمتنا بي اخلاص .....!! فقفلت تمنمية في عين العدو ....!!! ...ودي ذاتا سلامة مع الرحلة الجات دي ....!! 

الشباب اتمطو من الشبعة قالو اها بعد ده نتوجه علي الأيسكريم في ( لذيذ ....!!! ) (قال الواحة قال )

يازول معمر قال لا لا مابقدر عندو وجع بطن ....!!! والواطا ذاتا سخانة ...!!! ( ماقلتا شوب ) ...!!! دوا قرضا بدا يشتغل والمريض بدا يستجيب للعلاج ....!!! عقبال الجلابية 

وجماعتك يعاينو لي بعض وكاتمين الضحكةً ...معمر قال والبلد دي مالا بقت غالية كدا .....قلنا ليهو عرفتها هسا ...!!! هي فعلا غالية شديد.... لكن برضو غالية علينا ومابنرضي فيها ..... بركة الرجعتا البلد بالسلامة شابكنا ( بلدكم ....) ان شاءالله البلد عجبتك بس ...!!! عزومة تانية ذي دي ....!!! بتجينا راكب حمار خدر...!!!

والطيارة جات بتحوم دايرتضرب الخرطوم ضربت حمار كلتوم ست اللبن ياحاجه لا ....!!

وأموت واعرف في شنو في دبي ....ياعينيا ... تاني بتجي يا معمر ....!!!؟؟؟؟؟

- [ ]