يوميات علوب ...130 ....النيل والقمر
الليلة مودعين إسماعيل ...!! ود حلتنا ..!! وود قلبا ..!! وود أمي ..!! وود أي حاجه ....!!!أظرف شاب في حينا ...!!! وأكتر زول مسكين ولطيف ومهذب في الحلة دي ...!!!
وديع جنس وداعة الود دا ...!!! ومؤدب أدب ...!!! الناس دي كلها متكيفة منو ..وبتحبو ...!! ومن جوه قلبا ...!!
إسماعيل ياخ ....!!! شاب زي الورد ....!! ما بتكلم كتير ..وطوااالي مبتسم .....!! ومجامل شديد ...!!! أي مناسبة في الحلة بجي أول واحد ...!! وآخر زول بفوت ...!!
ياسلاااام علي إسماعيل ياخ ...!! لو قعدتا أكتب للصباح ما بديهو حقو ....!!!
مش مرات بقول ليك دا زول ( ملك...!! ) ...بس ياهو دا ...!!
هم ساكنين في البيت المقابلنا دا طوالي...!! بينا وبينم الميدان
أخوهو أصغر منو اسمو ( الصادق ) وعندو تلاته أخوات ...!! واحده قدر ( مشاعر ) ( وصاحبتا كمان ) إسمها ( إنتصار ) والتانيات أكبر منها ...( إمتثال ) ( ووهيبة ) ....( وهيبة ) دي أكبر واحدة بعدها اسماعيل وهو الماسك البيت .......والدهم ترجل قبل سنوات خلت ...!! فأضيف لإسماعيل لقب ( المعيل ) ...!!
أنا شخصيا أي حاجه بشتغلوها شفتا ( إسماعيل ) دا اشتغلا
رغم إنو إتخرج من الجامعة ودرس ( المحاسبة ) ....!!!
غير أن ( الجامعة ) في هذه البلاد لاتمنحك الحصانة وحق العبور ...!!! فالطريق مليء بالأشواك والصخور .....
( والحساب يوم الحساب ) ....!!!
كان شغال ببيع في مكتبة كدا في شارع الجمهورية ....مرات كتيرة بمر عليهو هناك ....القاهو ليك راااضي ...!! ويتبسم ...!! مره قال لي اذا اشتغلنا في مكتبة فأنت ( محظوظ ) ...تغذي الجيب والروح معا ...!! ياجمال روحك انتا ...!
إشتغل بعدها ( مندوب مبيعات ) ..وقعد فيها فترة ...يساسق ويتجاري من مكان لاخر بحثا عن رزق ...!! وتأكيدا لحضور...!! لايستسلم....!!! ولا يخور ...!!
إشتغل برضو أستاذ متعاون في المدرسة الجنبنا دي أخد ليهو فيها زمن ....!!! وآلله لمن داير يمشي الطلبة بكوا بي دموعن ( إي حتة بمشي ليها بخلي ريحتو فيها)....!!
الحلة دي كلها بتحترمو ...!! صغارا قبل الكبار
إسماعيل النوع داك البتستامنوا علي بيتكم ...!! مش في ناس كدا الله خلقم عفيفين خلقا وسيرتم سمحة.... بس ( إسماعيل ) دا منهم ....
البنات لو كانو في مناسبة بقولو حنجي مع ( إسماعيل ) ....ونعم الشقيق .....
( ديل ياهم أولاد الحلة البوصلو بنات الحلة بيوتم ....) ...!!
...............
بس الليلة نحنا الحنوصلو ....!!! رغم إنو يوم مختلف عندو بس قطعا هو يوم حزين في حلتنا كلها ....!!
( إسماعيل ) كان وقع ليهو ( اللوتري ) السنة الفاتت ...!!! وهسا خلاص كمل إجراءاتو كلها ...!! ومسافر أمريكا بكرة الساعة ستة بالخطوط التركية ......!!!
صحي ( اللوتري ) عزال .....!!!
مسافر وين مخلينا يا سمعة ياخ مالسا بدري ....!! نحنا لسة ما استمتعنا بيك ...!! ولا شبعنا منك ....!!! ولا عرفنا اخرك .....!!
اتعودنا نشوفك داخل ومارق ...!! داير تمرقا في البلد البعيدة ديك ...الكلام دا بجي ياسمعة ... !!؟
معقولة لكن ...!!! أمريكا طوالي كدا ...ولا حتي قريب هنا كم يوم وتجي راجع ...!!!
ياخ مالك علينا ياخ ...!! والله نحنا ما ناقصين
أنا والله عارف البلد هنا ( كاتمة ) وعارفك تعبنا شديد ...!! والشغل يوم في ...ويوم مافي ...!! والحالة صعبة ....!!!
لكن دا مَش انتا ذاتك البتقول لي ....بكرا احلي ...!!
ماعايز تحضر معانا ( بكرا ) دي يا اسماعيل ....!!
ماقلتا أحلي ياخ ....!!
كنتا بتصبرني ساكت ولا شنو ....!!
اقول ليك كلام ...!! الحظر ذاتو فكو ...!!
إمكن ( بكرا ) دي جات يا ابو السا ...!!! كدي اصبر شوية بس .....!!!
عليك الله ...!!!.!.
والله العظيم ......حبه بس ...!!
بعد داك لو ماظهرت حاجه انا زاتي بقول ليك امشي ...مش عرض كويس ...اها رايك شنو ...!!
ضحكتك الصافية دي لا نحن حنلقاها هنا ولا إنتا حتضحكا هناك .....مالك علينا
إسماعيل ...!! الحلة دي ما دايراك تونسا ياخ ....!! منو البقيف ويتحزم في فرحا ومن البنكرب في اتراحا...
شايفك في عرس بت الصاوي ...الأسبوع الفات ...( بكور ) قال لي شوف ( إسماعيل ) شغال اكتر من ( ميسرة ) أخو العروس ...!! وطواااالي إنتا كدا...!! وياهو حالك
وحياة ديني ....ياسمعة ...!!الحلة دي بتتطمن عديل كدا بي شوفتك .....!! جااادي معاك ...
تتذكر لما لقيت ( الكجم ) طالع في الحيطة أول ماشافك نزل وقام جاري ..!! 
🏃🏻🏃🏻 و إنتا سكيتو لحقتو وهجتا فيهو ...!!! أول يوم أشوفك هايج ....!!! قلتا ليهو تاني لو لقيتك طالع في الحيطة دي حأدقك ...!! ضحك وقال ليك عارفك ما بتدق ...!!!
🏃🏻🏃🏻 و إنتا سكيتو لحقتو وهجتا فيهو ...!!! أول يوم أشوفك هايج ....!!! قلتا ليهو تاني لو لقيتك طالع في الحيطة دي حأدقك ...!! ضحك وقال ليك عارفك ما بتدق ...!!!
( ياخ الكجم عارفك ما بتدق ) .....
حتي ( عرفة ) أمو جات لقتك ماسكو ( تنهزر ) فيهو قالت ليك مالك ما ( فرمتو ) ... في إشارة الي فلذة كبدها ( الكجم ) وإشارات أعمق إلي صدق وعدها ( اسماعيل ) ...!!!
( الكجم دا بطلع الحيطة تاني لو انتا مشيت ...!! انا غايتو كلمتك وانتا حر ...!! )
عارف ليي ( حاج عطية ) بناديك دون أولاد الحلة تسوقو الدكتور
ياسمعة...!!! لانو بطمن معاك وقد حرمه الله الذكور وأغدق عليه من الإناث ....
اتذكر نبرته عندما يتجادل مع بناته في مواعيد الدوا أو شأنا يخص صحتة ....!!! طوالي يكورك بي أعلي صوتو ......!!!
انا قتلكم نادولي ( اسماعين ) ........
هكذا يبدل لامك نون ...وقد أحسن بك كل انواع الظنون
خل وفِي ...!!! وابن حنون
حتخليهو لي منو الحاج دا ...!!! انتا طبعا عارف انو بسمع كلامك أكتر من بناتو والدكتور ...!! خاصة في موضوع الدوا ....!! وعبارتو الأشهر الا يجي ( اسماعين ) ...!!
بتقدر علي زعلو عمك عطية دا .....!!؟
بعرف إنو امبارح كنتا معاهو ووادعتو....!! وأداك رضاهو ...!! بس بتو قالت بعد مامرقتا منهم ..!!! أجهش ابوها بالبكاء .... بتصدق ياسمعة ........
ياخ أمريكا دي ذاتا ما بتشبهك يا اخوي وصاحبي .....!!! صحي هي متطورة ومنظمة والأولي ...وأي حاجه .....بس ما بتستوعب روحك دي ...!! دي بلدا طيرا عجمي ...!! ولسان حالك ( سوداني ) مبين....!!!
دي بلد دايرا ليها زول ذي الرجل الآلي يطلع كدا من الصباح يندرش لحدي المسا ...!! يجي مهدود ما عندو سكة غير يستعد لي بكرا ....وعلي ( الراقي ) تدور السواقي ...!!
ديل يحسبوها بالثانية والدقيقة أولاد ( سام ) ديل ...عشان كدا راتبم بالساعة ...( والساعة بي خمسة جنية والحسابة بتحسب )
والبني ادم عندهم جزء من الساعة دي يلف ذي عقاربا..!! ولو ما لفا ....!!العقرب بتدلغو وتكشو قداما .....!!
إنتا ما زول كدا ياعزيز ....!!!
ياخ إنتا عايز تقرا الجرايد وتتفرج في الدارفوري العصرية وتحضر ابو اللمين والكورال في نادي الضباط ...!!!
وعايز تكون مع الناس والنَّاس هناك مشدوهه اكتر من هنا ...!! لدرجة انو ما بعاينو لي بعض ....!!! ديل ما ناسك يا اسماعيل المابشوفو بعض ديل ...!
انتا بتحب تحلق شعرك عند عمك ( النور ) ( حصريا ) تتونس معاهو وبتستحمل كلامو الكتير داك ...!!! يشيل ويفرجك في ( القطعية ) بالمراية من سبعة زوايا التقول ناقل كاس العالم ....!! بس انتا الوحيد البتستحملو وبطيب خاطرو عشان كدا بحبك وبطلع ليك الفوطة الجديدة ...!!
انتا ياسمعة عايز تلحق صلاة المغرب في الجامع و شاي المغرب عندنا ...!! ( وبين المغربين ...!! دنيا ودين ....)
وتشاغل الحاجة ...وتجيب ( سمسمية ) لي فطوم ...!! وتمشي تتونس حبة مع عمك عطية ....!!
أمريكا وبكل جبروتها لن تستطع انتاج هذا الجمال ....!!!
شفتا لما كنا في الحافلة والراديو غني مابنسي ليلة كنا تايهين في سمر بين الزهور.... انا وانتا والنيل والقمر ...قربتا تتلب من الشباك ...!! لفرط الانتشاء ...
القمر هناك
( وكالة ناسا وأبحاثا )
وقمرنا هنا سماحة ناسنا واحساسنا .....
هسا دا قمر بفوتو ياسمعة
أزفت ساعة الرحيل وعقارب الساعة تشير الي الثالثة بعد الظهر موعد التوجه للمطار ...بيت ناس اسماعيل مليان بالخلق ده غير القالو ما يقدرو علي لحظات الوداع ....ابراهيم تحسا بيهو متماسك لكن عيونو بتقول غير كدا ....!!
أراها تتجول في ارجاء المكان و كأنها تحاول ان تلتقط اكبر قدر من التفاصيل وتختزنها في الذاكرة استعدادا لسنوات عجاف ......!!
وأولاد الحلة ديل كلهم بالصف موجودين.... ( مافي زول ما بحب ابراهيم ...!!! ) وتحس بيهم متأثرين شديد ....!!
أنور جا بي ( الامجاد ) حقتو... وركبنا كلنا ....
اسماعيل بودع في اهلو ...وحاولو يكونو قويين عشان خاطرو بس اول ما ركب ...!! والعربية عايزه تمشي ...!!!
(وهيبة ) أختو الكبيرة فشلت في لملمة لوعتها وانفرط عقدها وبكت بي أعلي صوت عندها .....!! بكاء مر ....!!
قالت وهي تجهش بالبكاء....!!! ( اسماعيل ) ما تطول ...نحنا بلاك ما بنبقي يا أخوي ياود أمي وأبوي ....!! وبكت من جديد ...!!!
وادمعت معها عيون ( عذاري الحي ) ...
شوف بنات الحلة ديل متاثرات كيف ياسمعة ....واقفات قدام بيتكم ...!! أول يوم اشوفن ساكتات كدا ...!!! كانن دايرات يتلمن كدا في عرسك ....!!
اسماعيل لما شاف اختو بتبكي أوشك علي النزول وحاول جاهدا ان يتمالك نفسة ...لكن دمعة موجعة قفزت من عينية .....!!
قال لي. أنور إتحرك ...!! إتحرك ..!!!
وبالفعل تحركت الامجاد ...اسماعيل ينظر من الشباك وكأنه يري الأشياء للمرة الأولي ...!! ووصلنا بعدها المطار وليتنا لم نصل ....
قلنا قدامو لازم نكون صامدين لنمنحه القوة التي طالما منحنا إياها ...وهو يحتاج إلينا الْيَوْمَ أكثر ....نزلنا من العربية
وصافحنا اسماعيل في الوداع الأخير ...وان شاءالله ما اخر وداع
كل واخد بقلدو بكون ما عايز يفكو ...!! ( بكور )صاحبنا دا طبعا حنين شديد ...!! طوالي بكي ....!! بكي شديد..!! لما قلد سمعا .....!!
ود الحاجه حاول يلطف الجو قال أديتونا إحساس انو الزول دا ماشي ( بورما ) في شنو ياخ الراجل دا ماشي أمريكا محل البهجة والمزيكا ....!! ابتسم سمعة وسط الأسي ...
وناداني بي الجنبة كدا ....قال لي اخواتي ياعلوب والحجه خلي بالك منهم ...!! كدت ان انفرط وتماسكت ...!! قلتا ليهو عيب ياسمعة ديل في عيوني ... ناداني تاني قال لي عم ( عطية ) شوفو من وكت لآخر ....!!! والله ماف ( عطية ) غيرك ...!!انت عطية السماء
واتصورنا كمية من الصور.... وختمناها بي لقطة ( سيلفي ) كلنا نحيط باسماعيل ...الذي حمل اوراقه ومضي ....!!! واندس بين جموع المغادرين ونحن نتتبع خطواته حتي غاب عن اعيننا .....!!
في هذه الحظة تحديدا .....!!! بكيت انا ....
ياحليلك يا اسماعيل ....!!! ربنا يعدل طريقك ويحفظك من كل شر ....!! مع السلامة ياحبيب ...
ركبنا العربية وليس بيننا سوي الصمت الجميل
كل زول بعاين في تلفونو...!!!
عاينتا في الصورة الاخيرة ( السيلفي ) لقيت كل الناس الفي الصورة راكبين في العربية ...الا ( اسماعين ) .....!!
فاخفقت مقلتاي ان تلملم الدموع والجراح .....!!!
ربي يغتي عليك ويجمعنا في ساعة خير ...مع الف سلامة يازول ياطيب ....!!! ودعناك الله والرسول يا سمعة .....!!!
ويستمر الحريق ....!!!