يوميات علوب ...128 .......( حلقة خاصة بمناسبة رفع الحظر)
بيت مال ودولار ...!!
يازوووول ماف أي موضوع غير رفع الحظر وأمريكا...!! وترامب ...!! دي الكلمات التلاتة الأكثر تداولا في كل محركات البحث عندنا داخل الحلة حتي الساعة ...وأي زول شغال تنظير فيما يليه ....!!!
غايتو حلتنا الليلة ماعرفتها.....( دالاس ) بس ....!
لقيت ليك عمك ( يس ) سيد الدكان شدة ما الله ادا بتكلم في الدولار وسعر الصرف...!! ( الله قادر ...!! )
لو سألتو قلتا ليهو إنتا هو الدولار دا لونو كيف ...!!؟
(ما حتكون في أي إجابة ) لأنو ماعندو أي فكرة ....
المهم لقيتو ببايع لي في نسوان كدا وجماعة منتظرين في الدور شاف الحتة زحمة قال يعمل ليهو جدعة .....كبا ( الزيت ) في ( كيس ...!! ) ربطو أداهو المرا ....!!! و أدا الجماعة تحليلو للوضع الراهن ورؤيتو المستقبلية ...!!
قال ياخوانا الحظر ده ( لاحظو الظا مضمومة ) ....!!! ما تقولو يعني خلاس بكرا الحاجات بترخس وقصص ذي دي ...!!؟؟ ماف كلام ذي دا ...!! الدولار أياهو الدولار .....!!
هملتك ( يالحظووور) البحللك ( يس ) ...!!
غايتو الأمريكان لو شافو ( الزيت ) الكابنو في ( الكيس ) دا ...!! تاني كان حظرونا .....!!
عمك ( يس ) لاعب مصلحة ورقو ..!! أصلو ماداير يسمع سيرة
الأسعار نزلت دي ...!! هو المسكين قايل ( سيد الدكان ) دا يعني
محافظ (بنك السودان ) ....!! ماعارف انو ( سيد دكان ) دا زول مسكين ساي زينا كدا ...يقع عليه مايقع علي الشعب ...!!
هو حساب في البنك ماعندو مالو ومال الحظر فكو...!!! ولا ربطو ...!! يتشائم فينا ...!! ( حالة صعبة شديد )
اها جيت البيت لقيت ( ترامب ) برضو قدامي ....!!
الليله يحلنا الحلا ( الحكومة )
لقيت ليك ناس فوزية وسنية وملكة قاعدات مع الحاجه ( مجلس اللوردات ) ...حيروني ليك ....خلن أي حاجة ....!! الصندوق ...!! والتياب ...!! والعدة ...وعرس بت ( إقبال ) ...إتخصصو (حظر ) بس ...!! واليات رفع ....!!!
نقاش مستفيض في حيثيات القرار ....!! وتحليل معمق لأبعاده وتداعياته ....!!
فوزية قالت هسا يا بنات أمي يعني معني الكلام دا تاني جنس الغلا الفوقنا دا خلاص بخف ولا شنو ...!!!؟؟
( زوووول عندو إجابة مافي ....!! )
( سنية ) طبعا قرت لحدي الثانوي العام الزمن داك ...!! فشنو ...!! داخلا في الشخصية .....!! وكلهن بحترمن كلاما علي حس (الوسطي ) دي ( بالنسبة ليهن (هارفارد) ....!! وهي طبعا حاسا بالعظمة ...!! صلحت ليك توبا...!! وأدت يدها الشمال دي جدعة خفيفة كدا ...!! وأجابت باقتضاب ...!! ( ابدا ..! ماافتكر ....!!! )
(بقت تفتكر كمان ) ...!!
واضافت( السنية) ....إنو الحظر دا موضوع معقد جدا ونتايجو ما بتظهر طوالي ...!!!
(والله أصفق وأعلّق ...!!! ). انا ذاتي اتخلعتا ....!! يمين الوزير لو جاوب إجابة ( سنية ) دي يكون ماقصر ....!! دي ياها نفس اجابات الأمريكان لما يتغاتتو ....!! قوية يا سنية ...!!! والله جد ....
وقالت كدا ملكة نزلت ال debate ..وقررت المشاركة ...!! وليتها لم تفعل .....!!
قالت غايتو هي بس متكيفة من ( طرامب ) دا ( بالطا ) ...قالت غايتو الراجل المنفوش دا طلع بحبنا حب اصلو ما معقول ( لا ياخ ) ومن جوا قلبو ...( ومسامحك يااا حبيبي ) وأضافت ( ملكة جانسي ) في معرض ردها عن أبعاد القرار وتأثيراته قائلة ...( ياحليلو ...!! ) ....!! وكدا.....!! ( إنتهي بيان ملكة) ....!!!
تحلي ليك العافية ان شاءالله ....!! ( الصفقة لي ملكة ) ست الراي والفهم ...)
صحي والله بحبنا ....!! وشديد كمان ....!!
هو جيرانم ( حيطة ) بالحيطة عايز يبني بيناتم (حيطة ) ....!!! انتي ماسمعتي بي حيطو مع المكسيك ...يحبنا نحنا المناسبة شنو ...!!؟ ....!! أولاد عمو ....!!؟؟؟
....!! ( ملكة ) دي دخلوها الضل ....
المهم يازول بس غايتو الماسورة دي كان فتحتها تنقط ( حظر )
ناس ( بلة ) ديلاك كمان كلامن برا ...جنس نفشة هي ...!!!
( بلة ) واهم نفسو رسمي إنو هو من الناس الأسهمو في فك الحظر دا ...!! أي والله ....!!! وجااااادي .....!! قال يا اخوانا دا الكلام القلنا في ( المحلية ) قبل شهور ....
( محلية ( ميريلاند) ياربي ) ...!؟
قال قلنا ليهم ياااا أمريكان .... لو ما فكيتو الحظر دا حتضيعو علي نفسكم فرص كبيرة جدا في البلد دي ...!!انتو عارفين ( خرفان ) سااااكت ممكن تغنو....!!!
ياسلام يا بلة ياخ ...!!! كفيت ووفيت والله ....!!! جيت من الاخر ...!! ما شاءالله تبارك الله ...!!! أيه الدرر دي ...بالجد مكانك ( الكونغرس) هناك مع الجماعة ...!!
محلية شنو كمان ....!!!
أو تمشي كمان مع (الصادر ) القلتو دا ....!!
وبي امااانة كدا وبدون مجاملة ...!! أنا شايف خيار ( الصادر) أنسب ....!! لأنو بالجد ماشايف لي ( خروف ) غيرك ....!!!
فكنا يا ( بلة ) ياخ كرهتنا ...اي موضوع انتا غازي عودك فيهو
في شنو ياخ ...!! مالك ،..!!؟
اها لاقيت ليك ود الحاجه ...ماشي يطوطح بي رجلينو الطوال ديل ...!! قلتا بسس دا الزول الوحيد البكون منفض للموضوع ...!!! ديل ناس ( مخرجات ) ساااكت ...!! دايرين نتايج ...!! مابحبو اللولوة ...!!
قال لي ماشين نضرب ( الفولة ) ...!! ارحكا معانا ...!! قلتا ليهو ظابط ...!! واستدرك متسائلا...!! قال لي إنتا هسا ياعلوب باقي ليك ( شيلة ) الحظر دي حتغير في موضوع ( الفولة ) دا
ولا ( البوش ) دا ما داخل في الاتفاق ...!!!
فعلها الحريف ...!! وعلي الطاير دون أن يدري ....!!
( ود الحاجه يملك نصف الإجابة ) ...!!
شوف ( شيلة ) دي ذاتا حنينة كيف .... ( بدأت إجراءات السودنة) ....!!
ومشاعر من جانبها تستفسر ..!! قالت لي صحي ياعلوب (كنتاكي ) جاي السودان ....!! قلتا ليها كدي النمشي بكرا المطار نشوفو جاي ولا حيتأخر شوية ...!!
هو نحنا كدا قادرين عليك ياشوشو ...!! عايزا تتعشي ( كنتاكي ) كمان ....!!!
نومي نومك.....!! ( كنتاكي ) دا ....!! ( الجايبنو ) و ( الحياكلو ) الاتنين ما مننا ...!!! إرتاحي ليك راحة ....!!
ياربي الناس دي دايرا ليها موضوع ولا هو في شنو...!! بعدين ياخ تابعتا ليك كل القنوات دي زول كدا طلع ورآنا الحيحصل شنو بالظبط مافي ....!! اوعي بس ( الرفع ) دا فاجأم زي ( الخريف) ...!!
غايتو أهما مافي الموضوع انو الناس دي لقت ليها خبر سعيد بعد غيبة ....!! راجي الله دا ...!! وشاحدو الكريم ...!! تنفتح عليكم وين ماقبلتو أهلي الحنان ....!!! ويديكم لامن يرضيكم ....الأكبر مني ومنكم ومن ( طرامب ) ...!!
اسف ( ترامب ).....!!
شايف خدر ( سيد اللبن ) قال داير توكيل ( CERElAC )
أنا كفاي ( ماكدونالدز ) 
😜
😜
والأغنية مهداة للأخوات تماضر وانشراح في ( فرجينيا )
والخال أنور في ( أتلانتا ) وست الحبايب حاجة عزيزة في
( تكساس ) المحطة .......!!!
ارررررح يا
Washington DC في زول نازل
مبروك القرار .....
بيت مال ... ودولار 
💰
💰