يوميات علوب ....131.....الحب في الزمن الإضافي
كلنا في الحلة عارفنو بحبها وبموت فيها ...!! طارق ودحلتنا وصاحبنا ....!! ورحاب بت جيرانا وبتنا ...!!
المعلومة دي طاقشا أضان اي زول ....!! واحدين بقيفو فيها والبعض....بعمل ( رايح ) ...!!!
حب ذي الحب ...دا اسمو الحب الصامت
( والهزاز شغال لو جا اتصال ...!!! )
حب نووي ....!!! عشان كدا بكون كاتم صوت ...
الزول دا مكسر في البت دي ليهو سنين وهي ذاتا حسب ( ويكيليكس ) بتريدو بس متحفظة ....!! ما اضطرها أحيانا لرفع ( الزجاج ) ...القزاز .....!! القزااااز ...
رحاب دي ساكنا قدامنا بي ( مربوعين )بيتم اقرب لينا نحنا من ناس طارق..... بس بالنسبة لي اخونا ( طارق بن الملوح ) فبيتم يقع في ( البطين الأيمن ) لي قلبو ...!!!
( بحبها حب خيالي ....!!! )
عندو مشكلتين طارق ...!! الأولي إنو كبكاااابة شديد مابقدر علي المواجهات العنيفة والمطبات الجوية دي ....!! الحاجه التانية تعاطيهو مع البنات ...( صفر ) ....!! من زمن في الجامعة بخاف منهن ...!! والغريبة هو زول مرهف كدا ورقيق ...!! وحساس شديد ...!! ودي مواصفات فارس حوبا ...!! بس هو عامل ميت وقالب الهوبا ....!! وياهو بس ( ميت ) في البت دي ...!!!
ورسام جنس رسم طارق ....!!! غايتو بكون رسم ( رحاب ) دي زي مية مرا كدا ...
طبعا بتكيف لي كيف شديد لأنو أنا بديهو راحتو...( والزيت)
يقعد يحكي لي قصصو وأفلامو دي وأنا بخلي يفضفض كدا لما يرتاح ...!!! بجيني مليان فل ...!!!
وهو زول لطيف خلاص وبريء ...!! ( رجل جميل في زمن عليل ) عشان كدا بحب بي إخلاص ...!!
طارق ( بتأتيء ) مرات كدا في الكلام ..!! بس ( قطيع ) غير مخل بالعكس انا شخصيا بتعجبني الحاجة دي فيهو شديد لأنو متصالح معاها جدا رغم إنها موسمية الظهور بس لما تجيهو مابضايق وتحسا بيهو منسجم معاها .....وجزء من شخصيتو ....!!
..!! حلات القطعة فيك ياخ ...
( أي حاجة طبيعية حلوة .....!!! بس كيف نعرف نخليها علي طبيعتا )
عشان كدا طارق ( صادق )
إتصل علي في التلفون قال لي ....!! عععععع علوب كيفك ...!!
قلتا ليهو تمام ...!!!
قال لي ببببب بعد المغرب ععععع عندك حاجه ...!! عايز اشوفك ...!!!
( الله يستر ...!! القطيع الليلة مالو كتير كدا .. ...)
قلتا ليهو حتي لو عندي ياخ نحنا عندنا كم أبو الطا ...
جدا تعال تشرف طوالي ...!! منتظرك ...
( حسّيت بيهو ابتسم رغم أني ما شايفو)
قال لي خلاص تمام .... سسسسسس سبعات كدا بكون معاك
( والله بالقطعة الشايفا أنا دي انا خايفك بعد شوية ألقاك متلب لي هنا ...!!
( شبكتك كعععبة الليلة ....!! )
طارق شكلو مأزوم ...!! صاحبي وبعرفو ...!! ياحليلو ياخ راجل جميل ....
فعلا ستة ونص كدا لقيتو قدامي ...!!! قلتا ليهو هسا كان في داعي لي سسسسسس سبعات دي ( قلتها ليهو كدا بي جرتا دي ) ...!! ( يضحك ساااي ) زول حلو خلاص .....!! بالله في أجمل من كدا ....!!
سلمتا عليهو قلتا ليهو اتفضل ...!!
قال لي ممممم مش أحسن نمشي حته هاااادية كدا ...!! قلتا لي يا طارق قول بِسْم الله انا ما ( رحاب ) ...!! أنا علوب ....!! خش جوا...!! بلا ( هادية ) بلا ( طلسم ) معاك
(تاني ضحك ) ....قال لي قلتا كدا ...وانقشط ...
مش انا جبتا سيرة ( رحاب ) دي كدا ساي بالصدفة في كلامي دا ...!! اها زولك دا بي جاي لمن عرق...واتبعثر ..ويتبسم برا .....( حب السنين ) ....!! قربتا أنادي لي كم نَفَر كدا من الشارع اقول ليهم تعالو شوف لسسسه الدنيا فيها ( حب )
...المهم دخلنا قعدنا ووصينا للشاي والبسكويت .....
قلتا ليهو خير يا طارق... قول ....!! شكلو في أزمة ....
قال لي ياخ (البببببب بت ) دي ياعلوب ياخ ...!!! طبعا انا طوالي عرفتها ...
اي زول غير طارق كان طوالي سألتو البت منو...!!؟؟
( الباقين ديل دنيتم ما مضمونة ) الليلة ( وردة ) وبكرة ( عزجد ) ...!!
قلتا لي مالا ....!!؟
قال لي بقت قاسية معاي ...!!؟
قلتا ليهو كيف يعني ..!!؟ ....
قال لي يعني كنتا عادة لما الاقيها .....!!! بتديني نظرة كدا خاصة ....!! ممكن تجدع لي بسمه.....!! احيانا ( بتكبا ) لي لفتة...أي حاجة ....!! المهم أي حركة تحسسني إنو أنا موجود ...!!
قلتا لي دا كلو عرفنا....!! واللفتة دي ( بكبوها ) كيف ...!! دي ( بت ) ولا ست لبن ...!!
صدقوا قال لي ...!! كدا ...!!
( أتلفت هو ذاتو ورآني الحركة بعملوها كيف ....!! )
بالله عليكم لاقتكم عذوبة وبراءة زي دي ...!! ضحكتا براي غايتو ....!!! أقول شنو ...!! مافي شي بتقال ...مع كل هذا الجمال
قلتا ليهو أها والحصل شنو هسا....!!؟
قال لي دي المرة التالتة تلاقيني ...!!! ولا حتي نظرة ...!!!
وهسا في عرس أخت ( ميسرة ) دا ....!! بتصدق ياعلوب ولا كأنو انا قاعد في الحفلة ...!! لا وكمان تشيل وترقص مع ناس معمر والصادق ...يعني المعني شنو ياعلوب .....!!؟؟
بتقصد شنو البت دي ....!! عليك الله دي ما حححححح حقارة ...!! 
😳
😳
(يالرسول .....!!! تاني قام يرترت ) .....
وواصل منفعلا ....!!! لا يعني في شنو .....!!؟
يازووول.....!!! وانفعل ليك فيني
قلتا ليهو هييي هيييي طارق ...!! طارق ...!! أنا ( علوب ) ( رحاب ) ما معانا هنا ....!! وأشرتا ليهو بي أصبعي علي نفسي إنو دا 
👈🏼 أنا ( علوووووب ...!! )
👈🏼 أنا ( علوووووب ...!! )
حتي اظنو إنتبه ...قال لي معليش ياخ البت دي ححححح حتجننا ....!! قلتا ليهو هو لسا حاحاحا ....!! ( جن أكتر من دا ) ....!!!
شوف ياطارق إنتا صاحبي وفردتي وكفاءة ...( يتبسم كمان
) شوف بعد الانفعال دا كلو ( يتبسم ) ....
انا قلتا ليكم طارق دا براءة السنين ...!! ومعاها مرات ( لتاخة) السنين
قلتا ليهو انتا البت دي حصل قلتا ليها ياخ انا بحبك ...!!؟؟
قال لي لا ....
قلتا ليهو حصل وصيت ليها زول يقول ليها ( طارق ) دا بخجل لكن قال ليك هو بحبك ...!!!
قال لي لا ...!!
قلتا ليهو حصل رسلتا ليها ( فيس بوك ) ( واتس ) ( انستغرام )( سناب ) .... أي واحد من منصات الصواريخ العابرة للقارات دي ...!!! عبرتا فيهو عن إعجابك وحبك العظيم دا ...!!؟؟
قال لي لا ...
قلتا ليهو طيب ...يلوي خشمك ياخ
( رحاب ) الجن دي تقرا إحساسك دا كيف ...!! ( بالكف ) ...!! 
🖐
🖐
قال لي اقسسسسوم بالله هي عارفاني ومتاكدا عشان كدا بتتدلع فيني ....
( يحلنا الحلال الليلة ...) ...!!
قلتا ليهو طيب انتو ناويين حبكم دا يكون سري كدا ...!! ولا الخطوة الجاية شنو ...!!؟
قال لي ياخ انا بس منتظر أموري تتزبط شوية طوالي بتقدم عديييل كدا ...!!
قلنا ليهو طيب لو في الوكت دا ....عرسوها ...!!!؟؟؟
أهااااا أريتني كان ما قلتا ...!!! كأنو ( دقيتو ) الزول دا .....!!
وشو اتغير...!! والحالة بقت صعبة...!! و أبا الشاي .....!!
قال لي ما تقول كدا ياعلوب ياخ ...!! بزعل منك والله ....!! ياخ لييي ياخ ...
هيااااااا اخوانا ... أها شفتو جنس الحالة دي ...!!
قلتا لي شوف ياطارق أنا حأتكلم مع البت دي عديييل نيابة عنك ...!!! والله جد ...!! إمكن هسا إنتا بتحب من طرف واحد ...!!
تاني اتململ ...
قلتا ليهو والله ياطارق بالطريقة دي بتصحي يوم الصباح تلقي الكرت بتاع ( رحاب ) دي في راس الدولاب عندكم في البيت ( العقد يوم الخميس في مسجد السيدة سنهوري وصالة الخليل الجمعة ....!! والحفلة بي عاصم البنّا ...!! )
والله تشرب ماتروي ..!!
يازووول قام ليك علي حيلو ....!! وحيلو ذاتو برد ....!! والكلام راح كلو كلو ....!! بقينا نفتش للرترتة .....!! وخلاااص زولك دخل في حان الزفاف ....
قلتا لي روق ...!! روق ....!! أنا بحكي ليك بس عن الممكن يحصل .....!! وان شاءالله مايحصل ( دي ريحتو شوية )
قلتا ليهو فأنا شايف أحسن ليك تحسم الموضوع دا ...ولا أنا بتدخل ....
( خوفتو ليك حتة الكرت الفي راس الدولاب دي ) ...!!
قال لي أيوا ...!! أيوا ...!! خلاص ياعلوب إنتا أخوي ياخ أحسمو طوالي .....!!!
اها أنا قمتا من الصباح ولا اتلفتا طوالي علي ( رحاب )
هي شغالة في إدارة المعامل في وزارة الصحة.... قرت ( مختبرات ) ...طبعا أنا بعرفا كويس ...!! بت جيرانا وصاحبة ناس مشاعر وبعرف ناس بيتم ...!! سلمت علي ....!! قالت لي منورنا الليلة ياعلوب كان تكلمنا بالزيارة دي نستعدا ليك ...!! قلتا ليها كدي إنتو استعدو للخريف ..أنا هين ...تشيل وتضحك ....
قالت لي نحنا البجينا هنا ما بنقول ليهو تشرب شنو..!! ولا تاكل شنو ...!! بنقول ليهو ( نفحص ) ليك شنو ....!!!
لقيتا ليك فرصة ...!! طوالي قلتا ليها عندكم فحص ( مكنة ) ...!!! استغربت كدا ...!! قالت لي مكنة شنو كمان ياعلوب ....!!؟؟
قلتا ليها ( قلب ) ....!! ( قلب ) ....!!! في فحص ( قلب ) .....!! ضحكت قالت لي غايتو مستهبل استهبال ....!!!
قلتا ليها عليك الله ( يارحاب ) ومن غير لف ولا دوران ...نحنا كلنا عارفين ( طارق ) دا مش بحبك ....!! دا تجاوز المرحلة دي ووصل دور الأربعة....!! هسا بالله قبل ما يصل المباراة النهائية و بأماااانة كدا .....!! وبي كل تجرد...!! وانا اسف إنو بتدخل في أمر شخصي ....!! بس زي ما إنتي عارفا ( طارق ) صاحبي شديد ...!! وإنتي زي ( مشاعر ) وواحد ....!!! فبالله إنتي رأيك شنو ...!!!؟؟ هي ذاتا بلعت ريقا واخدت ليها رجفة كدا ...( والله ما ساهل يا ابوالطا كهربتك واصلا ...!! )
ساكت جادعنك...!!
....قالت لي شوف ( طارق ) بالجد زول كويس ...!! وكويس جدا ...!! بس يخلي الخوف والتردد بتاعو دا ويجتهد اكتر .....!!
لكن هو كشخص أكيد ما عندي فيهو راي .....!!!
دي طبعا العبارة الذهبية لما البت تكون عايزة ليهاواحد ولديها بعض الشروط
طوالي تقول ليك .....
اكيد هو كشخص ( ممتاااز ) ...!!! لكن ..!!؟؟
وفِي النوع التاني داك ...
ديل ما بكونن متشددات شديد
بقولن ليك .......
(اكيد هو (شخصيا ) زول كويس والله ماف كلام ....!! بس كمان ..!!!؟ ( وكمان دي ذاتا بتكون برااااحة كدا وتعبانة شديد ) ...ديل ( نص استوا)
اها يجن ليك ( المثقفات ) ديك ....!! قيامة وربطت
ديل كمان كلامن برا
...تقول ليك هو مستوفي شروط ( الشخصية ) ،..بس ببقي في ( بعد ) تاني ...!!
أوووو ...ناس الأبعاد ...ومدي الاستعداد.....!!! حب ذاتو مقعد كدا و4G ....!!! اها ديل بقعدن ( ينظرن ) كدا لما الحكم يصفر..!!! وفِي ( بعدك ) ياغالي أضناني الألم ...!!!
ياخ خلينا منهن ...!! بي طريقتن ..!! هن حرات
نحنا هسا في ( حوبة ) دي ....قلتا ليها نفهم من كدا...!!! إنو من حيث المبدأ ماف مشكلة ...!!؟
قالت لي وليي أصلا يكون في مشكلة ....!!
أبو الزفت زاتو ..لا أبو الحسم ياخ ....!!! نسوان زي الصاقعة .....!! دي هسا قرت ( مختبرات ) ولا ( مفرقعات )
تعال اخد ليك نقلا ياطارق تتراجف زي ( الجلي )
فضحتنا فضيحة ...!!
والله يا اخوانا فرحتني فرح رحاب ...فرحتا لي طارق صاحبي دا من جوا قلبي ...!! مخلص ياخ ...!!
قلتا ليها يلا مع السلامة ...!! قالت علوووب إنتا صدقتا نحن بخلا .ولاشنو ...بالجد اشرب ليك حاجة ....!! قلتا ليها كفاني نتيجة الفحص دي ..!! مش مافي ( ملاريا ) الباقي كلو هين ....!! نشرب شرباتك ان شاءالله ....!! لما دنقرت ( المجرمة ...!! ) خليتا وشتتتا ...!
( والله طارق ليهو حق أول يوم أعاين ليها كويس ...شديدة البت)
اها أنا شغال بفتش في ( الكاهن ) الاسمو ( طارق ) دا ... قافل موبايلو كمان ...!! البشوق قفلة التلفون يقول اجتماع مجلس إدارة ...!!!
اكيييد شاحن ....!!! ما دام هو شخصيا عايز ( جارج ) ....
...لفيت عليهو الحلة دي كلها ...في النهاية لميت ليك فيهو
جاي من بعيد يتهوزز ....!! شافني من هناك جا جاري جري لما حنني ...!! عتر ليهو حجر داير يتكسر ....!!!
( ياحليلك ( مكسر ) هنا وهناك ....)
قلتا اجننو شوية ...!!
قلتا ليهو والله يا طارق ما عارف اقول ليك شنو ....!!! يبدو إنوالموضوع دا ....!!!؟ ..............
في اللحظة دي حسّيت ليك الركب بدت تطاقش ...!!!
ما قدرتا أواصل ...!! ملامحو الوديعة دي نقطة ضعفي ....!!! بدا يفتح في خشمو ...ويدخل في الحالة ( الغرابية )....!!!
الليلة ( غاااااغ) علينا ...!!
قلتا اخير احصلو قبل مايغمر
حضنتو شديد قلتا ليهو ...مبروك ....!!
بتصدقو طارق ......بكي
....!!! عليكم الله ما يستاهلا....!!!
ربنا يتمم ليك علي خير.... ( ورحاب ) تكون من نصيبك يا ابوالطا
دا اسمو الحب في الزمن الاضافي ....بين ( طارق ) الخرافي
( وحوبة ) ...!! ست الناس ....
وافحصني بي ( مجهرك ) ....!! واملاني أنا ( إحساس )
مبروك ....!!! 