زبادي وجبنة ...!!
غايتو أجمل مافي السودان دا البساطة
والجمال والطيبة ....
يكون في ( بوست ) كدا فيهو نقاش جاد وحاد
وكل يدلي بدلوه وتعليقات متراصة فجاة تلقى ليك تعليق في شكل إعلان
أول حاجه إحترم الناس دي كلها ولم يتدخل في النقاش
حتى لا يفقد زبائن من كل الأطراف الموجودة ...!!
بس ختا تعليقو بكل هدوء وفيهو تفاصيل المنتج
والعنوان ...!!
أها دا ياهو الإعلان اللاقاني ...
( سعاد للجبنة المضفرة والعادية ويوجد زبادي وروب .....) ..!!
( تدوس عليهو بوديك للتفاصيل)
لازيادة ولا نقصان كدا بالواضح ما بالدس ...
والله ياسعاد إنت من أجمل الناس
مركزا مع موضوعك ماعندك حاجه لي أي زول
مالك ومال ( سلك ) ....ومدني ( طار )
ركزي مع الزبادي دا والجبنة حلالاً طيباً مبارك
لو لقيت حاجه اكبر من لايك كان عملتها ....!!
نحن نفسنا قايم والحكومة كفاءات ولا محاصصة ونعم للتظاهر لا للتخريب ...وليه ماقالو ما حزبيه ....والضعين جايطة والدولار طاير
والصناعة مشت للمؤتمر
جات ( سعاد ) بكل هدوء قالت كلمتها ومضت
أدعمو ناس ( سعاد ) ديل بمشاريع للأسر المنتجة
شجعو الشركات الصغيرة ومتناهية الصغر ....
اعملو تمويل للشباب والخريجين ديل
عندهم أفكار خلاقة وخطط طموحة وطاقات متجددة دايرا دعم
دا ياهو المخرج الوحيد بكل أمانة عشان الناس دي تدور وتشتغل وتنتج ....العالم دا مدور بالشركات الصغيرة والمتوسطة دي ....هي عصب الاقتصاد .....
دايرين نمشي لي قدام ياخ ....
قدموا لهذا الشعب .....فهو الذي قدمكم الان
السودان بلد جميل ومليان خير ....
إلا معيون
مش كدا ياااااا سعاد ...!!