يوميات علوب .. 155.....كان وأخواتها ....
اجمل قصة حب في حلتنا بين ( أمنيات كرار ) وبكري ود الاستاذ ....!! بقولو ليهو ( بكور ) ....!! الأستاذ دا أبوهو اسمو ( سرور ) زمان كان بدرس ( لغة عربية ) في المدرسة الجنبنا دي اسمها الشمالية ....!!
أنا بس نفسي أعرف المدارس دي ليي كانو بسموها بالإتجاهات ....يعني دي الشمالية ...!! وديك الشرقيةً وواحدة الغربية ...
( وين الرياح العكسية الشمالية الشرقية ...)
الغريبة مافي الجنوبية ( الانفصال دا شكلو قديم )
وكان جنوبيا هواها ...!!
ياربي بكون موقعم الجغرافي عامل كدا ...ولا أزمة اسماء.... ولا بس حركةً في شكل ( مدرسة) 
🌹...!!
🌹...!!
ياخ خلينا في ( بكور ) ( وأمنيات ) ....!! حب شديد وكسير زي الكسير....!!
هم طبعا قايلين مافي زول جايب خبرم في العلاقة دي ...!! وهي وحاتكم منقولة علي الهوا ...!! ...الحلة كلها تتفرج ...!!
( طبعا الناس دايما بتحب تشوف وتتابع التانين ...!!
لما مرات بنسو يشوفو روحم ...!!)
ودي مشكلة كبيره طبعا لانو بالفرجة الكتيرة تلقي الواحد اتحول من لاعب لي حكم ...وداااخل في الشخصية والتحكيم فاشل ...
أها ( أمنيات ) أول ما تلاقي ( بكور ) دا طوالي ريقا بنشف ...وبتتخجا كدا وبتديها صنة .....!! ( وبكور ) ذاتو لو ساااكت لمحا ...عيونو دي بتقلب أبيض ....وبشفط هوا ....وبتبرجل .....
المهم غايتو أجمل مافي الموضوع إنو حبهم دا حقيقي وصااافي وصادق ....ماف أي ( شخشخة ) ...!!
لأنو بصراحة الحب الزمن دا لحق الغاز والبنزين ديل
( أزمة السنين ...) نصو موية ...!! بعد ان كان سريع الإشتعال ...!! مليان فرح كل الجمال ..!! لا فيهو واتس ولا اتصال ....!! معبا شوق وهادي بال ....
الناس الرايقا وما مضايقة .....!
وكلها فال.....!!
طبعا ( الفلس ) دا عدو الحب الرئيسي لسببين اتنين
السبب الاول ( المفلس ) مابكون مركز لافي حب لا غيرو ...!! تلقي بس قاعد يتأمل في فلستو دي ....!!! الحاجة التانية دايما بتخيل ليهو إنو بجي واحد خامي الدولارات يخم ( الحنان ) حقو دا وينسفو ليهو بي حزام ( سافف ) ....!!
فبكون مشغول بتوفير الحماية والتأمين ...!! أكتر من كب ( الرندوك ) والتسخين ...فيبرد الحب ويصيبه الجمود ....!! ( ينعل أبو الفلس ياخ )
وكل ما ابتعدت عن ( دايرة السنتر ) إزداد الحب تعتقا وجمالا وبريق ...!! بعيدا عن شمارات منتصف المدينة وضجيجها
فبكون علي نار هااادية ...عشان كدا طاعم ...!!
لذلك أجمل الشعر الإتقال في ( الحب ) جا من الأجواء دي ....من زمن قفا نبك بذكري حبيب ومنزل ...لغاية أنا وإنتا والنيل والقمر
هسا ( الحقيبة ) دي لو صادفت ( الجلاكسي ) دي كان بقت ....أنا و أنتا و ( النت ) الفضل 
😜
😜
بس في واحدين صناديد كدا بعرسو رغم ( الفلسة ) دي يقول ليك ناكلا بالعيش والسخينة ...!! ونشتل البيت بالأزاهر ...!! ونورو بي ضي الرتينة ....
( .. تلاته شهور الشكلة تقوم ....لافي سخينة ولا ازاهر ...!! بس الرتينة ...!!
( ومرات بتبقبق ....)
والبقاء لمن يعي أن الزواج مسؤولية وتضحية وشراكة
ما بصلة وحله ومفراكة ....
المهم ( بكور ) طبعا عندو خمستاشر جنيه كدا في جيبو ومافي شغل ...!! جا قال لي داير اعرسا ياعلوب ..!! قلتا ليهو تعرس شنو ياود هو العرس دا لعبه ...!!
قال لي ياعلوب نبدأ بس والباقي هين ....!! قلتا ليهو كلام حلو ...!! نبدأ من وين ...!!؟ الخمسة جنية العندك دي ...اتذكر إنو فعلا عندو خمسة جنية طوالي شات الحجر ....
قال لي بحبها ياعلوب ...أعمل شنو ....بحبها ياخ ...
قالا منفعل كدا ...شاروخان بس ...لما. حنني ...!!
قلتا ليهو خلاص أنا بوعدك بي حاجه ...! انا بكشكش ليك ابو ( أمنيات ) دي ...عمك ( كرار ) اشوف مويتو شنو ..!!؟ وشايت وين ...!!!
طبعا عمك ( كرار ) دا زول لطيف كدا لكن صعب شوية لانو ( دغري ) شديد والزمن دا ( الدغري ) بقولو ( فقري ) ...!! كان معانا في لجنة ( الحلة ) عشان كدا بعرفو عن قرب ...!!
المهم لاقيتو جنب دكان عمك ( يس ) قلتا ليهو دايرك في شورة كدا ياعم كرار ...فبجي عليك بعدالمغرب إن شاء الله ...!! قال لي حبابك ياعلوب ...لكن ما تحاول ...!! أنا لجنة فيها ( الماحي ) تاني مابدخل فيها .....!!
هيااا اخوانا.. الزول دا في شنو وانا في شنو ...قلتا ليهو لا اطمئن ...الماحي مافي ...!! في ( الساهي واللاهي ) ابنكم ( بكور ) ....
المهم جيتو ليك فعلا بعد المغرب اتونسنا شوية في شؤون الحلة وشجونها واتضح لي إنو أي تجمع من أربعة أشخاص في أي حتة لازم يكون فيهم واحد علي الأقل معارضة ...!!
( اها دا بعارض اي حاجه من غير سبب ..!! زول ( عارض )
وواحد بكون حكومة ...!! ( بتأمل بس ) عارف الكورة عندو ..!!
التالت بتفرج والرابع بصفق ليهم كلهم
زي لجنة ( حلتنا ) دي معانا واحد اسمو ( الماحي ) لو قلنا الحمد لله ظهر ( بترول ) في. الحلة ...بقول لا ...دا بكون ( بترول ) ناس تانين ...بسس كدا ...!!
( التصنيف أعلاه قابل للتطبيق في اي لجنة )
المهم قلتا لي عمك ( ياخ ) انا جاييك في موضوع تاني
وخلي بالك انا ماجاي أتقدم ...!! بس الزول الحيتقدم صاحبي ...!!
وهو بصراحة داير ( بتك) ( أمنيات ) بس المشكلة إنو
لسة بكون في نفسو ...!! يعني ماعندو حاجه كتيرة ..فأنا جيت أشوف العرس بالفاتحة ياناس ما حلال ...ولا دا غنا ساكت ...!! عمك وعلي الطاير قال لي ( دا غنا ساكت ) لما داير أجري ...!!
ثم استعدل ( الكرار ) جلسته ..وقال لي شوف ياعلوب بغض النظر عن هو منو الزول دا ...!! الزواج دا يا ابني مسؤولية ومقدرة ...وكفاءة ....!! أنا مابدي بتي لي زول مجهجه هو في ذاتو ...!! وكمان في نفس الوكت أنا ماعارض بناتي سلعة للبدفع أكتر ...بس كمان في حاجه اسمها الحدود الدنيا ...!! لو اتوفرت ..!!الباقي هين ...
والله كلام سمح شديد ......قلتا في سري ( بكور ) دا ( الحدود الدنيا ) ذاتا ماعندو .....!!
.بس كلام عمك مطمن ..!!
قال لي ماعايز أجبرك ياعلوب ...!! بس دا منو هو ...!!؟
اترددتا كداا ...!! تاني قلتا ياخ الأتبلبل ..عام ...النكلمو
( قلتا ليهو دا ( بكري ) ...!!
( بكور ) ود عمك أستاذ ( سرور ) ...!!
وما أن نطقت اسم الأستاذ ( سرور )
حتي نزل ( السرور ) كله علي عمك كرار ..!! ولمعت عيناه ...وانفرجت أساريره ...!!
قال لي علي الطلاق أنا بي أبوهو دا بس بديهو بتي ...!!
انتا ماعارف الرجل دا عظيم كيف..!! هل تعلم ياعلوب انو أستاذ ( سرور ) دا من الرعيل الاول في التعليم القدمو ( تضحيات ) ماممكن تتخيلا ....دا راجل مفروض يتعمل ليهو تمثال في نص البلد دي ...!!
اللغة العربية دي تشتهيها عندو ...علما للاجيال..! ياسلام علي الناس العظام ....
( قربتا اصفق ...)
قلتا ليهو بي قلبي النار تلد الرماد بكور كان قلتا ليهو ( جاء الرجل ) ما موقع الرجل من ( الإعراب ) بقول ليك جا لي شنو ....!! ولو سألتو عن ( كان ومن هن اخواتها ) قطعا الإجابة ( أمنيات )
وهكذا كانت تضحيات عمك ( سرور ) وسيرته العطرة
مهرا لابنه في ( أمنيات ) ....
فعلا جينا مع عمك الأستاذ ( سرور ) شخصيا خطبناها
لي ( بكور ) ...!!
كنتا دايركم تسمعو خطبة ( سرور ) القالا
دايرا مترجم ( سوق عكاظ ) بس ،...الله بديك العافية
ان شاءالله
مبروك بكور وأمنيات عقبال الفرحة الكبيرة والبنين
والبنات ....
وعندما تقدم الأخلاق مهرا ويتم القبول ....!! فاعلم ان هناك أمل ...وياهو دا السودان ....!!