يوميات علوب ...149.....مدام ( رباب )
اليومين ديل لاما فينا واحده في الحلة اسمها ( رباب ) شايلا ليها أفكار هدامة كدا عن الأكل الصحي ...والنظام الغذائي ومراجعة الأوزان ..والقصص دي .....
كدي إنتي هسي خليهو الأكل الصحي ..الما صحي ذااااتو وينو ...!! المرا دي ما نصيحةولا شنو ...
مشاعر قالت لي مدام رباب ( شوف مدام دي ذاتا كيف ) مدام رباب قالت قشر التفاح الأخضر مع البقدونس المبشور وزعانف القرش ...بحرقو الدهون بسرعة وبشدو البشرة .....!!! غايتو فضل لي أقع من طولي دا بس من الضحك ....!!!
بالله هو ( سمك القرش ) وصل حلتنا.....!! ؟؟؟
ألف ألف مبروك ...!! خبر السرور .....!! طوالي حاتصل بي ناس ( ناشونال جيوغرافيك) يجو يصورو ...
غايتو الحاجات ( أعلاه ) دي لو ( مشاعر ) لحقت لما مشت تشوفن في دكان عمك ( يس )طواالي حيتحصن ....!! دا لو ماقام جاري ....!!
عليكم الله هسا دا كلام دا .....
( رباب (دي هسا ( إتربت ) ...تجي شايلا ليها كلامات زي دي تطلقا في الحلة وللبنات القاعدات علي الهبشة ديل....!!
قلتا لي مشاعر ...قولي ليها علوب قال ليك داير ليهو زعانف قرش (استعمال خفيييف ) ...ولو عندك سنون ( صير ) ....!! وقولي ليها قال ليك
إن شاءالله يجي ( قرش ( يقرقشك مايفضّل فيك حته !
عليك الله شوف المرا دي ....!!
المشكلة هسا إنو مدام ( رباب ) دي عاملة جو في الحلة ومتمدده ...!! وكل يوم تتوهط اكتر ....وتزداد سطوة ...!! وناس ( فلقصة ) يعجبوك شايلين الطار ويدقو ....!! قالو القصة دي ( رباب ( قرتا قراية .....!! ما جربندية ساكت ...!! ( شوف ليك بنات ....)
هو هسا عمك ( قوقل ) دا داير ليهو قراية ....والله الا كان قرت ( سيدتي ) .....!!
....طبعا علي حس البقدونس وزعانف القرش دي قبضت الجو ...ومرات بتقول ليهم ( الماء الفاتر ) بسرع عملية ( الأيض ) ....ديل يسمعن (الأيض )دي بعتبروها دكتورة.... ويغمرن ...!!!
دا (الماء الفاتر ) ....!!! طيب وبالنسبة (للماء القاطع )
كيف يكون الأثر ....!!؟؟؟ أرجو إفادتي ....
( الحائرة نُون ) ....!!
غايتو بس البلد دي مرات كان داير تظهر ...!! جيب ليك كلمتين كدا غريبات ...وخلي تلاته من ( الفرد ) يصفقو .. ....!!! عااادي ممكن تضرب معاك .....
وانتشرت ( رباب ) في الحلة كما ( النزلة ) ...!!! واضحت تتقاضي رسوم عن كل استشارة ...!! غير الوصفات ....مع صعوبة في المقابلة ...
( دي خلاص عبرت ...!! )
وبقت تتجدع ...!! ورفعت سقف تخصصاتها لتطال البشرة والتجميل ...!! فالسوق يستوعب كل شيء
الظاهر بتمشي تجيب ليها زيت سمسم مع زيت ( صباح ) تخلطم مع ( طبشير ) ....قالت دي خلطة اسمها ( فلق الصباح ) .... بتجدد الخلايا ....!!
واللمة تحلي بزيت صباح ....غايتو الا كان تجدد ( وش البامية) .....!!! ولا ماياهو ...!!
وناس مشاعر يعجبوك جري يشترو بي مية وخمسين جنيه ( الفتيل) ....( قدر حق (القطرة ) ....!!
طبعا لو ادتك جالون هي الربحانة ...!! بس العبوة الحنينة دي لزوم ( التشويق ) والتسويق ...!!!
ونحنا ندفع ...!!
والجنيه ذاتو عامل ريجيم وعامل نايم ....ومحتاج تجديد خلايا.....!!!
( كان يغمسو في الزيت دا ) ....
قالت فلق الصباح ....!!
( الفلقة ) يارباب في نص جبهتك العريضة دي كان جبتي لينا جن جديد في الحلة ....
( مودة) كمان كملانة مِن لحم الدنيا قالت رباب ادتا
برنامج ....اسمو القوام الممشوق ...!! دا بكون ود عم ( العشق الممنوع ) ....!!!
تابعيها سمح باعصعصة ....لو ما كسرتك النص تضحكي علي ...!!!
(كدي شوفي لي برنامجك دا مافيهو ( ضنب القرد )
( صفاء ) جات من هناك تتجرجر مخمخمة ونفسا قايم قالت لي مشاعر ( ارحكاكي ) معاي نجيب ( زعتر ) ...!! مدام رباب قالت ( الزعتر ) مفيد للتمثيل الغذائي
...( الحلة دي خلاص باظت ) ....!!!
قلتا ليها عليك الله كلميها بعد ما تجيب الزعتر تمشي طواااالي تمثل في باب الحارة خليها من ( التمثيل ) الغذائي دا ....
عرفنا المسلسلات ......!!جابت ليها ( أكل ) كمان ......!! البنات ديل مودننا علي وين...!!!؟؟
ياخوانا دا السودان ما (السوران )
زعتر ياصفاء ....!!!؟؟
ما خليتي ليك دومة ما كديتيها
قلبتي ( زعتر ) ....!!!
مشاعر قالت لي صفا دي بالذات لحدي قريبات دي كان بتسف لبن البدرة..... وأكلتا المفضلة المنقة بالشطة ... والدكوة بالسكر .......!!!!
🎵
🎶
ودااايرا تبقي.... (زعتر ) ...!!
عفيت منك يارباب عرفتي ليهن وقلعتي قروشن ..
تكون كانت راقدا كدا في الحوش ومفلسة وقافلا معاها فجاة جاها الإلهام إنها تتحول الي خبيرة في ( العضة ) وملهمة للطعام ....!!!
المشكلة مافيها....!!! المصيبة في بنات الحلة الإقتتعن ديل...!!
ياخ مشاعر لقيتا شايلا ليهاحاجه كدا ...قلتا ليها دا شنو االشايلا دا ....!!! قالت لي دا (لسان العصفور ... ) ياسلااااام ...هو بالله قام ليهو لسان ...
قلتا ليها أها ودا مالو كمان ...!! بغرد ...!! قالت لي دا بنظم السكر والدهون ....
( غايتو السويتيها يارباب ما اظنها تمرق قريب دا ...!! )
البنات ديل كانن بياكلن (العنكوليب ) ...!!
قلتا ليها إنتي هسا يامشاعر عيد الضحية الفات دا مااكلتي لسان الخروف دا براك ....!!!طواااالي كدا مشيتي علي ( لسان العصفور ) .....!!! ماف ترانزيت ....!!
( غايتو كان عرفك كان ...طار ...!! ) 
🐥
🐥
قالت لي خلاص عليك الله ياعلوب ما تقلب علي المواجع ...ديك كانت فترة الجاهلية .....!!
قلتا ليها والله مافي ( جاهلية ) أكتر من مباراتكن لي ( رباب بنت عتبة ) دي ......
أنتو في دا ولا ناس ( سنية) خشن الملعب...!!! رباب وعدتم ترجع ليهن شبابن ..ياهن ديك واقفات ( شريط ) راجيات برنامج رباب .....
غايتو (سنية ) دي شوفي ليها ضفر الثعلب ....!!!
( نفس الفصيلة ) ......!
😂😂😂😂
😂😂😂😂
المهم يازول ( رباب ) خلاص احتكرت الملعب بالكامل وسيطرت علي كل الجبهات ...وغشت النساوين وهسا بتفتش ليها في محل عايزا ترقصن ( زمبا ) ...
💃🏿💃🏿
💃🏿💃🏿
غايتو الحلة دي لو لحقت لما ( اتخجت ) تاني مافي شي بوقفا ....!!!
سترك يارب
الناجيان الوحيدات من سراب ( رباب ) لحدي هسا هن ( تقوي ) و ( أمنيات ) ..!!( البنات الزيت ...) ...!!!
لاقيت (تقوي ) داخلا علينا في البيت قلتا ليها أها ياتقوي ومدام رباب شخصت حالتك بي شنو ...!!؟
قالت لي دي مرا موهومة ساكت وحات الله ......
هو عليك الله ياعلوب زول بعمل للناس ريجيم وصحة
وحاجات زي مش مفروض يشوف نفسو الأول ...
كدي عاين ليها...!! ( أهاااا ) زي التلاجه
...( نفخت لي جضوما كدا حاكتا لي ...!لذيذة ياخ )
ينصر دينك ياتقوي ريحتيني في حناني
قالت لي ياعلوب أنا لو ما ( غمزتا ) لي عشره بسكويتات ( بركة ) في الشاي الصباح ولا بقدر افتح ...!!!! 
😳
😳
عفيت منك يالكنداكة ....!! ينفعك 
👏
👏
قلتا ليها تعالي شوفي مشاعر ....بقت بتاعة ( طيور ) وعصافير باقي ليها ( تزقزق ) .....!!
المهم يازول الله دا كريم علينا ....!!
صحيت لقيت ليك ( مشاعر ) مافي من الصباح قلتا ليهم في شنو ..!!؟ قالو مدام ( رباب ) في المستشفي وحالتا صعبة الحلة كلها هناك ....
المهم ماعرفنا الحصل لحدي ماجات مشاعر راجعه ...قلتا ليها خير ....!!!
قالت لي الخير يجي من وين ...بتصدق ياعلوب المرا المجرمة دي أتاريها اتسممت ...
الدكتور بسأل فيها أكلتي شنو ...!!؟؟ تشيل وتعاين لينا زي الحرامي ...ولأنها موجوعة ومافي طريقة تلف وتدور كان لازم تعترف ...واريتا كان ما اعترفت ....
بتصدق ياعلوب الحاجات الرصتا واكلتا براااحة تعمل ليها عزومة ....اقلا حاجه البطاطس المحمرة الحذرتنا منها زي مية مره دي .....والطعمية...!!
والدكتور يشيل ويكتب في ( المنيو )دا ...قال ليها الظاهر عليك بتحبي الدهون ....الكلسترول شكلو عالي ...!!؟؟
صدق قالت ليهو ... أيوة بحبها ...!! 😳
😳
عليك الله شوف المرا المابتخجل دي ...
شابكانا ( لسان العصفور ) ... والبنجر المبشور ....وهي تلهط في صواني المكرونة ....!!
الغايزني ياعلوب وفاقع مرارتي ...!! الدكتور قال ليها المكرونة الاكلتيها دي مالحة ولا مسكرة ....!!
قالت ليهو الاتنين ....😳
😳
بتصدق حاجه زي دي
(اتنين شهر ونص في (كوبر ) يارباب ..شاحدا ربي عليك ...مع الغرامة ) ......!!!
تمعط وكاتلانا بالجوع ...
غايتو انا داير أصلي ركعتين أن كشف عنا هذه الغمة قلتا ليها كلمتك زماااان .....!! المرا المدورة دي مجرمة حرب ....!! تأكلكم الزعانف وتقوم بال ( قرش ) ....
لتعود الحلة من جديد لهدوءها الرصين بعيدا عن
سعرات رباب الحرارية والتواطؤ مع البطاطس
وضرب الطعمية
( طعمية حارة شديد )
غايتو الربه الربتا رباب للحلة تعمل ليها صبحية .....
جيت طالع لقيت ليك مشاعر ....قاشطا ليها
نص كيكة في كباية شاي كبييييرة (حتي فاضت)
خلتا تنقط ....!! .....أو الطوفان
قلتا ليها وين العصفور الليلة ......
ماقادرة ترد ....!! ( الخشم مليان ) ....!! 
🤒
🤒
اشرت لي بي راسا علي السما.....!!!
يعني طار
قلتا ليها ما تتقلي من الكيك دا بعمل ليك ( سنام )
ضحكت لما اتشرقت ....!!!
انا ذاتي ضحكتا ....
.....!! الله يسعدك ياشوشو
الجوع رطن ...!! ورباب ( عذاب ) ..
مبروك .......