بمناسبة رجوع ( التوقيت ) لي وطن القماري
حلقة تاني من علوب
يوميات علوب ....133.....بتوقيت حلتنا
أزمة حقيقية في حلتنا ...بطلتا عروس جديدة ...!!!
والعريس ( راجل مرا )
ونسوان الحلة أعلنن حالة الاستنفار ..!! طبعا النوع دا من الظواهر بعتبروها دخيلة ومقلقة ..وتهدد السلم والنسيج الاجتماعي .....!! لذلك يجب مراقبتها ورصدها عن كثب
فتم رفع درجة الحذر والتأهب الأمني في الحلة الي اللون البرتقالي ...!! في انتظار بعض المعلومات المنقوصة والتحول مباشرة الي اللون الأحمر ...
العروس ( الشلابة ) كماجاء في وصفها ..!! سكنت في شقة كدا في عمارة بناها واحد من أولادنا الفي السعودية ديل ....(
( سنية ) في اول تصريح قالت أهو دي نهاية ( الشقق ) الداير تقوم في الحلة دي ...!!!
(خلاص رموها في الشقق ...!!)...!!
تطير عيشتا الشقق الرامين فيها أي حاجه دي ...!!
هي الشقق دي ( ذاتية القيادة ) ولا شنو ...!!؟؟؟؟
المهم قررن يعقدن إجتماع أزمة ....
وبنات الحلة الفي النص يتابعن المشهد بشيء من التحفظ وكل الاهتمام ...!!
شمارات ( الشلب ) تثير فيهن كثير من شجون ...!! وسيرة ( العرس ) عموما تحرك الساكن ...
العروس طلع اسمها ( إمتثال ...!! ) ...دون أي تفاصيل أخري ...!! ودي كل المعلومات الأولية المتاحة عن ( الحادث) حتي اللحظة
( والعريس ) مجهول ...!! بس من المؤكد انو دي ما أول مره يعملا .....!!!
لكن الكل حريص علي معرفة العروس دي منو ...!!!؟ وشكلها ذاتو كيف ..!!؟ وماتتمتع به من مقدرات خاصة تمكنها من ( إشتلاب ) الضحايا ....!!
و ( إمتثال ) بي هنا ما شغالة ليك بي اي زول ...!!! كل يوم بتطلع الصباح عندها عربية اتوس كدا نمرتا (505 ج ) تمرق بيها تجي الساعة أربعة ..!! خمسة كدا ( بالقديم ) راجعة الشقة ....!! وتاني مابتطلع ...وديل بي هنا روحن طالعا ....!!!..حيرتن في راسن دا ...
أهم الملاحظات الجات إنو ( ابو شلبا ) ما بمرق كتير ...
وهي ملاحظة جديرة بالبحث والتحليل ...!!! والعديد من الأسئلة التي تفرض نفسها بقوة ......
ياربي خايف من أم العيال تداهمو في الشارع ...!!!؟؟
ولا في اجازة لسة ....!!!؟؟ ولا مخندق بي شيكات ....!!؟؟؟
( مجلس اللوردات يبحث في كل الاحتمالات )
لكن كثيرا ماشوهد وهو يبتاع ( الفول ) مساءا من دكان عمك ( يس ) ...!!
والكل يبحث عن ( قوات خاصة ) تخترق الجدار العازل وتصل بي نفسها تجيب الشمار دا من الداخل ...!!
دي زمان كانت واحدة من مهام ( أمونة ) القتالية ...بتنفذا في خمسة ثواني وتبقي مارقا ...!! بس مما عملت العمرة حقتا دي ...!!! قللت النشاط ...وللحد الأدني ...!!
وفي الليلة الظلماء يفتقد ( النمر )...!!!
وتبقي امتثال الشخصية الأكثر اثارة وغموض في الحلة
الي ان ظهر المستور ....!!!
ومن منو ...!!؟؟
اكتر بت مسكينة في الحلة دي ... !!
( أمنيات ) صاحبة مشاعر ( السهتانة) دي ...طلع الخبر كلو عندها .....!!
لانو أخت امتثال الصغيرة صاحبتا وكانت معاها الجامعة ...وهي الوصفت ليهم الشقة دي ....
وطلع القاعد مع امتثال دا ( عمها ) لزم ...!! جا يقعد معاها لانو عندها دورة محاسبين قانونيين عاملا ليهم بنك السودان ...وهم أصلا من ( مدني...) ...( وانا اقووول الاتوس نمرتا ج ) ...!! ودي كل الحكاية ...ودا السبب الجابم هنا ...!!
غايتو بس تخجلن يالنسوان ....
...الرجال لما حاسين بي عظمة ...!!
لاقاني جارنا عمك كبير كد اسمو ( الباقر ) زول لذيذ بضحك برا ....!! قال لي والله ياعلوب بقينا لو أتأخرنا برا ساعة بس ....! المرا تضرب....!! ( خايفات الشلب )
قلتا ليهو والله يالباقر وأكون صريح معاك ....!!! مرتك ماعندها شغلا...!! وانتا فاتح نفسك ساكت وفايق ...!!
انتا هسا لا حساب ...!! لا شباب ...!!!
يشلبوك من وين ...!!! ويشلبوك ليك شنو هو ذاتو ...بس كدي كلمني ....!!!
يضحك ساااي ...قال لي ....!! ( مش كدا ياعلوب ...!! )
شوفو ليكم اجابة ...!!! دا هسا يشلبو ولا يضربو ...حالة صعبة
غايتو سمعنا بي الإسلاموفوبيا
بس ( الشلابوفوبيا ...) دي أول مره صراحة .....!!!
صنعتن المصطلح والرجال أجازوهو ...البسمع ( شلبتو ) يقول الرجال ديل منومين مغنطيسيا ....!!
لو هي شلابا ...!! هو الكترابا والمطرا البي سحابا ...!!!
هجمتو البت ساكت ...
اسفين يا ( إمتثال ) ...!! إن بعد الظن ( عم )
.....
والماشلبت ...!! ما مزة ....!!
معقولة بس ....!!؟؟