يوميات علوب ...89....ميسي جا
قفلة الجن والجنبو ...!! الليلة من الصباح ماشه عكس ....اصلو الجيب ده وكت يتقدا خلاص ...الناقصة بتم ...هسه نقبل وين مع البلد (الكتاس ) دي ...!! فكو الحصار ..!! فكو الحصار... لما قربنا نمشي (ام فكو) ...!! وينو الفك ده دايرين نشوفو ...والله المره دي زول يهبش (فك الحصار ) ده يا نحنا... ياهو .... !!
لمو ليك فينا البترول جا ...البترول جا ..مافهمنا اي حاجه ...لمن فات ..!! ...هسه يفكو الحصار ده ...يقومو كده ( التماسيح ) يقدلو يحاصرونا تاني ...!! والمره دي زول بكون شايفنا مافي ...!! ( دوري السودان ...!! الجزيرة مابتنقلو) ...علي الأقل الحصار الكبير ده امريكا ضد السودان ...مباراه العالم ده كلو شايفا ...ومنقوله لايف .....!!
المهم ..!! قلتا خلينا النمرق نفك (الساجور ) ده كان نلقي لينا
شغله ...!! وانا طالع قلتا (اغشي ) عادل صاحبنا ده فتح ليهو محل كده بتاع (سيراميك ) وحاجات (المتابخ ) وقصص ذي دي ..المهم لاقيتو ليك ..... تحايا وسلامات وأشواق ...عادل ده كان معانا في الجامعه ومن زمان (مقرم ) ببيع اي حاجه ..!! كان ببيع لينا المذكرات ايام الامتحانات ..!! وهو زول لذيذ كده ...وبتاع حركات ...!! وصاحبي شديد ...اها في قعدتنا دي ...ونتذكر في الأيام الجميلة والذكريات ....
القيامة الرابطة جات داخله ...!! (الليله سجمنا) ....انا غايتو قريب ده ..!! ماشفتا ذي ده ...!! نجفه ..!! نجفه ...!! البت يشهد الله باقي ليها تولع ...!! ومفتاح العربية مدلدل في اليد ...(لما تحسا بيهو مبسوط( ...واليد من حرير ..!! ولا الشعر الداير يطير ..!! اها السودان القبيل داك الطلعتا بيهو من البيت كلو طار لي ...!! ياهو ده السودان ...!!!
المهم البت دي جات داخله ...!! طبعا ماسلمت ..!!! (اصلو النوع ده مابسلم ..) ..!! طوالي بدت تعاين في السراميك والاشكال ..( والله مفروض السيراميك هو اليعاين ليك ...) انا غايتو بس لزمت الكرسي القاعد فيهو واعاين بي طرف عيني ...!! وعادل يعجبك ..!! عامل فيها مشغول ولا كأنو في زول ...( حركات التجار دي ...!! ) وعينو لل ( الاماراتية ) النزلت دي ...!!
...وانا منتظرا تنطق ...( ولم يطل الانتظار ...) قالت ليهو ...ماعندكم سيراميك اسباني ....!! اللليله ووووووب ....!!! كملت ..!!!
ده ماصوت..!! دي كمنجه ...!! طبعا في ناس كده مرات
بقفلو المجموع ....!! ياهو ذي دي ...ياخ مش ماسلمت برضو لذيذه ...(المشكلة الشينات المابسلمن ديل) ..!! عادل ذاتو بس بقي يعاين ...!!! الا انا لكزتو ...إسباني ..!! قالو ليك سيراميك إسباااني .. ماعندكم ..؟؟ حتي شوية انتبه...!! قال ليها ابدا
ابدا والله في (راس الخيمه ) بس ....!!! (الله بركة النبي الخيمه
التغتس حجرك ياعادل ...!!! ليه ماجبتا الإسباني ...!! ماعارف (برشلونة ) دي بتجي ..!!
انا طبعا طوالي دخلتا في الموضوع ...!!! قلتا ليها مافي مشكله ممكن نوصي ليك عليهو بس بياخد كم يوم ....!! وعادل فاتح خشمو يعاين لي ...!!!قالت لي خلاص مافي مشكله بمر عليكم بعد يومين ....!!!
وبقت مارقه ..أدتنا عجاج كرعينا ..!! اقصد ( رزاز ) كرعينا (كرعين شنو كمان انتا ياعلوب ) دي اسمها ( ساقين ) من ساق يسوق سوقا ...وسايقا صلاح ...
عادل بس فاتح خشمو يعاين لي ...!!! قال لي ود اللذينا شنو المهارات التسويقية دي ...!! من الليله انت لازم تجي تسد معاي في المحل ده ..!!! عملتا نفسي تقيل شويه قلتا ليهو بديك تلاته يوم في الأسبوع ...!! قال لي ياخ ان شاء يوم ياعلوب ...!! لكن لقيتك استاذ في ( الماركتنغ) ...!! قلتا لي كان بتضمن لي زباين ذي ديل ...الجمعة بشتغل ..!! وبالفعل تم الاتفاق ..!!! وضحكنا سويا كما كنا نضحك في تلك الأيام الخوالي ...!! ...!!ياحليلنا ...!! ناس دايرا سيراميك إسباني ...!! وناس حيرانة وتعاني ....!! والسعيد بالجد ....الراضي بالمقسوم وباني ....!!!
اها ياعلوب شوف ميسي (باصا) ليك القون ده كيف ...!!!
كريم وادا (غشيم) ...!! ياربي بتجي بعد يومين ..!!!؟