يوميات علوب ..90.....ليلة القبض علي (مشاعر)
زمان في الابتدائي مشاعر اختي دي يادوب دخلناها المدرسه ...!! اها كل يوم تجينا باكية ....!! يابت مالك ...!!؟ اصلو مابترد ...!! بس تفقعا ليك بكيه اكبر من الجات داخلا بيها ....!! في شنو يابت اتكلمي ...!؟؟ اها هنا بتطلع في السلم السباعي ...قولة وررررر.... وتنفقع بالبكا ....!!! في شنو !!؟ في زول ضربك ...!!؟ لا لا ...!! ( دي الاجابه) طيب مالك ..!؟؟ وووررررر تاني فقعه ...!! المره دي معاها ابوالشهيق بتاع البكا داك ...!! قلنا أحسن نخليها لو واصلنا الأسئلة البت دي حتتشرط ..!!
...!!! اها طوالي وقفنا الاستجواب ..!! واتحركنا بي طريقتنا .،،!!! المهم بعد البحث والتحري عرفنا السبب ..!!! انو في واحده في سنه تانيه ولا تالته ماعارف بتستغل بنات سنة أولي الجداد ديل ...( بضم الجيم ) ...!! وواقعه فيهن( قريص ) ودق ....شهتن العافيه ..!! لا وكمان مرات بتاكل فطورن ...!! والمغسه وين ...!!! انو بتسألن بالصف الليله (حاشين) ليكن شنو ...!! البتقول بيض ...!! والبتقول فول ..!! وواحدات طعميه ..!! في النهاية بتختار من المطعم ده وتاكل ...!! ( تاكلي الأكلو جدي ) مع تحذير شديد اللهجه ...ياويلن وسواد ليلن كان كلمن زول بي البحصل ده ...!!! اتاري مشاعر بتبدي البكيه بي نمره واحد وكل ما نسألا تزيد السرعة لما تصل نمره أربعة المسكينه...!! وبين الدقه والتحذير انا من عذابك مستجير ...!!!
اها البت البدقهن طلعت اسمها ( ماجدولين ) قالو اسمها الحقيقي ( الجودليه) سامنها علي حبوبتا ...!! بس كبرت حبه اول حاجه عملتا جدعت ليهم اسم حبوبتا ده في خشم الباب ودرعت ليك ( ماجدولين ) ده ...!! وجات حاقده علي الأمة دي
واي اسم جميل بدخل ضمن العقوبات ...( الدق مقابل الغذاء ) ...!! اها مشاعر مسكينه كانت من المغضوب عليهم ...!! وخلاص كرهت المدرسة ...!! وحالتا حال ...!!! والصباح ده كأنو يوم القيامه رجل ورا ورجل قدام ...
دي قصة ( الجودليه ) ...مع الأخت الشقيقة ...!!اها تقولي كدا تلفي يا الأيام والسنين وتدوري ...!! وجاتني ليك مشاعر يوم قالت لي عندنا عرس صاحبتنا شديد دايرا لي حاجات اشتريها ...!!
قلتا ليها هسه نحن مااشترينا لي عرس صاحبتك قبل شهر بس ...!!قالت لي أجي ياعلوب ...!! يعني يشوفوني تاني بالفستان نفسو ولا قصدك شنو ....!!؟ قلتا ليها مايشوفوك انت (ميشيل اوباما) ...فيها شنو يعني ...!!! ولا علقت ...!! بس مادا أيدا وشابكاني ليك اطلع ..اطلع ياعلوب ..انكت (الضحاكات) ...!! (اعمل شنو اضطريت اطلع) ....!!!
المهم سألتها بالصدفة قلتا ليها انت صاحبتك دي منو الدايرين يعرسوها دي ...!!؟؟ قالت لي ( ماجدولين ) ...!!! انا قلتا ليها أوعي تكون (الجودليه) ...قالت لي (الجودليه) منو .....!!؟ تاني استدركت قالت لي اهاااا ..ايوه ..ايوه هيا ...!! لكن اسمها (ماجدولين) ياخ (الجودليه ) دي الذكرك ليها شنو .....!!؟ قلنا ليها والله فعلا (القريص )واللبع جاب نتيجة ...!! نستكم اسما الأصلي ذاتو ...!! عفيت منك يالجودليه .. من يومك حربيه ...!!
مشاعر قالت لي اها والنزيدك من الشعر بيتين (العريس) ده ذاتو قلعتو من صاحبتا ... كان (مجكس ) صاحبتا ومتفقين ...!!قلتا ليها دي كانت بتشيل فطوركم ..!! ماتشيل فطور العريس ..!!
وانت هسا ليك نفس كمان ماشه الحفله والفستان الجديد تحضري عرس ( الحديه ) دي ...!!
قالت لي العرس ده قسمه ونصيب ياعلوب وصاحبتا دي نحن ما
مابنعرفا ...!! بعدين دي (جوجو ) ياخ ...قلتا ليها هسه بقت ( جوجو ) ماكانت (عوعو ) ... !!
ماعارف ليي في اللحظة دي اتذكرت (ترامب ) الهايج ده هسه مالو عَلِينا خاتينا في القائمه السودا دي ...!! حكمة الله يوم واحد ماسمعتا سوداني عمل ليهو ارهاب ...!!
يكون ماعجبو اسم السودان ذي (الجودليه ) دي ...ونازل فينا
(قريص ) ..!!
لكن ياترامب نحن مازي مشاعر حنبكي ليك ياجيتنا براك
ولا كمان قطر عجيب ...(مشاعر ) تبكي بي طريقتا ....!! عليك الله شوف الزول ده ...( ترامب ) وهايج ...!!
بالله مشاعر دي مابالغت ماشه عرس البت دي ...!!