يوميات علوب ...104 ....!! نحنا حالفين بالمشاعر ...!!!
خليل صاحبي ضرب لي من الصباح سلم علي طبعا بتعرفوهو خليل ...خليلوف ....!!! ايواااا ( نبض الجماهير ) بس ياهو ذاتو ... اها خليل ده ما بتصل ساي كدا من الصباح الا يكون (مأزوم) ذي مابقول .....!!! ما اداني تفاصيل ...!! قال لي لو عندك سكه نتلاقي ...!!! قلتا ليهو ...!!! سكه غير دربك تفتر ..!! ودنياغير دنياك تودر ...!!! ضحك لي ضحكتو الفخيمة ديك قال لي المزاج باين عليهو عالي ياعلوب ...!! قلتا ليهو مما سمعنا صوتك وين غاتس ليك زمن ...!! قال لي لما نتلاقي ...!!! المهم اتفقنا علي اللقاء هذه المره في الهواء الطلق بعيدا عن دهاليز المركز الثقافي الفرنسي كما اعتدنا ان نلتقي ...(مايفوتكم خليل يجيد الفرنسيه) اتفقنا نتلاقي في شارع النيل ...قلتا لي وين في شارع النيل قال لي شفتا برج الاتصالات ..!؟ قلتا ليهو بالحيل ..!! من بيتنا بشوفو ...!!! قال لي بس في ضلو ...!! في ست شاي اسمها (الرضية ) نتلاقي هناك اسأل من (الرضية ) دي أشهر من البرج ....!! قلتا ليهو ليي مالا بتعمل (الشاي) بي (الواي فاي) ...!!! قال لي ابدا وحياتك بس اسما بشبها مرا هدية ورضية ....!! ومجتهده في الدنيا دي فربنا ببارك ليها ....!!! شفتا البرج العالي ده بكل هذا الطول والفخامه...!! ناطحته هذه (الرضية ) سمعة ووسامه ...!!! يوزززززع ..!!! ( اعجبتني المقاربة ...) ياهو خليك مابتغير ...!!! قلتا ليهو ...اذن نتلاقي عند ( الرضية )
اها اتلاقينا هناك ...!!! ماشفتو سلام خليل والرضية ...سلام زولا حنين بكاي ...!!! (الرضية ) سألتو بي لهفه عن سر الغياب ...!!! ولم تخف قلقها عليه .....!!! قالت ليهو عليك الله يا الخليل ( الليله اول مره اشوف ( خليل ) بالالف واللام ) وكتين تغيب كدي كلمنا ...!!! بننشغل عليك ياخي ...بركه الشفناك طيب ...!! فرحتني بي جيتك دي الليله .....!!! أتلفت علي ابو الخل...!! قال لي عارف ياعلوب ناس البرج ديل مابتصلو بيك الا لما يكونو دايرين قروش الفاتوره .... أيهما اكثر حراره الان كل خطوط هذا (البرج ) البارده ولا خط (الرضيه ) الصادق ده ...!! الحاله ارضي ....!!! ماقلتا ليك الرضية أغلي من البرج ....!!
وعقب (الخليل ) ...!! الرضية ...!! عليك الله شاي خاص لي علوب صاحبي ده كلمتو عنك قبل نجيك مايشيل حالنا باقي هو شيال حال ....!!!
قالت لي حااااضر تسلم ويسلم علوب ......!! اتلفتا علي خليل قلتا ليهو وأغلي من شاي ( الهنايتين ) ذاتو ...وضحكنا ...!!! الرضية استفسرت مبتسمه....!!! قالت ليهو صاحبك ( الممسوخ ) ده بقول في شنو !!!؟؟ ...( ما أطعم الممسوخ بصوتك الطاعم ) ...قال ليها قال انتي أغلي من شاي ( الزرافتين ) ...!!! (طبعا خليل ده في حياتي ماشفتو يوم كذب
) لم تتأخر ( الرضية ) شاتتا بالمقاس قالت ليهو ...!! الأغلي من الدهب ...!! فقعناها التلاته ضحكة تشاركنا فيها الرضية ذكاء التعليق وبهجة والمكان ...!!!
المهم جابو لينا الشاي بالهبهان ...!!! وتاهت الرضية في زحمة زباين اخرين ...والتفت انا الي صديقي خليل استفسر الحال ....!! اخد ليهو نفس طويل قال لي ياعلوب انا عندي مشكله وكبيره كمان ....!! قلتا لي خير هسه تلقاها حاجه بسيطة عامل ليها توم وشمار ...!!! قال لي بالجد يبدو اني تعبتا شديد في البلد دي ....!!! احيانا بقيت مابعرف هل انا الصاح والناس غلط ولا انا الغلط والنَّاس صاح ...!!! ماعارف ياعلوب ...!!؟؟وفي نفس الوقت انا مابقدر أغير نفسي وارضي الناس ...!!! قلتا ليهو من غير مجامله ياخليل وحسب معرفتي ليك اطمئن ...!!! انتا الي حد كبير الصاح ...!! قلتا ليهو مرات الناس مثلا بتشوف (القمامه ) في الشارع ...!!! بس لانهم اتعودو علي المنظر فممكن مايلفت نظرم كتير واحيانا بكون جزء من المشهد العام كأنو شي طبيعي ...!!! ومقبول كمان ...!! علي النقيض انتا احيانا بتظهر بسلوك سليم كمبدأ خاص بيك ...!! لكن غير مألوف للآخرين كمعايشه ....!!! فبتشاف غريب .....!!! رغم صحتو ...!!! قادر تفهمي ....!!؟؟ خليل ضحك ..!؟ قال لي علوب انتا الليلة بتقول في كلام كبير..!!! بقيت تذاكر من وراي ....!! ؟ قلتا ليهو تلاميذك يا ( سارتر ) (
قال لي اووو المعلم الكبير ...!!! لكن السؤال هل ( سارتر) بقدر يعيش هنا ....!!؟ قلتا ليهو ممكن..!! لو هدن شويه وقفل الاستارتر ...!!! ضحك ضحك خليل ده ...!!! طبعا خليل ده لو النكته ماكانت بعمق مترين اقلا حاجه ولا ببتسم ذاتو... خليك من الضحك....!!!
قلتا ليهو بسيطه خلي البلد تخليك .....!!! قلتها بي ضحك كده لكنها عند ( الخليل ) كما تناديه( الرضية) تحمل مدلولا اخر
قال لي في زول عايش جواك بخليك ...!!!البلد دي جواي ...!!!
قلتا لي شوف ياخليل الكلام بتاع المثقفاتيه ده ....!!! عايش فيك وجواك وتحتك ووراك ده مابحلك ...!!! بس والله ياخليل بتصدق لو انت تحديدا سافرتا من السودان ده انا يادوب حأحس بي وجع ....!! ووجع حقيقي ...!!! صحي كتير من أصحابنا وحبايبنا سافرو وهجو من البلد دي ...!!! الفي الخليج ..!! والفي امريكا وكندا وأستراليا لحدي مصر القريبة دي ...!!! بس جد يا ابو خليل انا فعلا قاعد اشوفك ذي (خليل عازه) الواحد ده ...!! اتخيل انو انا بشوف فيك السودان ده بكل تفاصيلو ....!!! ياخ قرفتك ذاتا عندها طعم ...!!! وضحك (الخليل) بفرح ...!!! قال لي تسلم ياعلوب ياخ انتا قايلني انا بتصل بيك من فراغ ...!!!بالجد ياعلوب انا بس لما اتذكر انك قاعد هنا معانا صدق بطمن ماعارف ليه ...!!! طوالي غنيت ليهو .....!!!
يااااحنييين يامطمني ومطمن ياحنييين ...!! أبشر قال لي ...!!! اها ياعلوب عندي سؤال شرط تجاوبني بصراحه ... هسه لو لقيت فرصة سفر واستقرار بره بتسافر ..!!؟؟ قلتا ليهو انا مابسافر وأخلي فطوم ...!!! كدا من الاخر ....انا ياخلي (الجان.... حارس السودان) ......
خليل قال لي ياحليل الجان ...قال ابقو الصمود ماتبقو زيف
...!!! نحن خلقونا عشان نعيش هنا ياعلوب ونكتب تاريخ البلد
دي ...!!! في ناس بره هسه محرومين من قعده ذي دي جنب
الرضية ( الضوايه) دي ...والليل يوشوش في الخمايل ...!! قلتا لي بجي النهار وكلامك ده ببقي ليك كحلي ...!! قال لي بتكلمني انت بي نهار الخرطوم .....!!! البركه في ليلا ونيلا ...!!! وستار ياليل ....!!!
طبعا الونسه مع خليل ده طعما برا ...يازول انداح ليك مع الشاي والجو الحلو ونسي ليك حكاية تعب من السودان... والسفر ...وقلنا ماممكن تسافر ...!! والكلام ده ..!! اها انا لقيتا فرصة قلتا اريحو شويه ابو الخل ده ....قلتا ليهو وين ياخ حبيبتك ديك ...!!! الماشغاله بي (نبض الجماهير) ...!! طوالي قلب ...قال لي لو سمحتا ياعلوب ياخ الألفاظ دي مامناسبة ..!! ما تستعملا ..!!! شنو حبيبتك دي ....!! قلتا ليهو اسف (جكسويتك ...!!! ) ...قرب يمشي ...!!! قلتا لي خلاص خلاص معليش ...(زولي وعارفو) ...!!! قلتا ليهو أقول ليك شنو ياخ .....!!! قال لي كونها منتقصه من اهتماما بي بعض الاساسيات ...!!! ده ما بديني ولا بديك الحق انك تجردا من إنسانيتا وتنعتا بالأوصاف دي ...(هيااا ياخوانا حبيبتو وجكسويتو بقت تنعتا ...) ..!!! قلتا ليهو انا اسف ....طيب الحنان بتاعك كيف ..!!؟؟ ( لقيتا برضو شترا ) لحقتها طوالي ....!! زولتك طيب ...!!؟
مافي فايده ياعلوب جردتا البت حتي من ذاتا بقيتا كأنها حقتي ...!!! هي شنو قالو ليك عربيه ولا شنطه دي ما إنسان وكيان مستقل بي ذاتو ...!!! ( النعامة التزوزي بيك ياخليل غير ذاتك وذاتي دي شي طفشا منك مافي ...!!
قلتا ليهو عليك الله كلم الرضية تدينا شاي تاني ...!!! صدق انت شخص مؤلم وبتعمل صداع ...!!! قال لي انا مرايتك ياعلوب لازم تشوف نفسك فيني واشوف نفسي فيك ...!!! اصحاب علي شنو ...!!! قلتا لي ممكن تكسر المرايه دي ما دايرا ...قعد يضحك قال لي مابقدر ودي جزء من أزمتي .....!!! تاااني أزمة ( وكمان جديده ) ...!!! ذي ناس خليل ديل بفطرو أزمات.... وبتغدو مواجع ...!!! بالجد ...!!!
اخد ليهو صنه كدا قال لي اقول ليك بصدق ....
(انا بالجد حبيتا ياعلوب ..!! بس ماحبيت خصالا ...!!! هويتا وكرهتا افعالا .....!!! ) امممممك 0/3
عليك الله قهوة تاني يالرضيه الله يرضي عليك ....!! الزول ده مؤلم ...بس جميل ...ابو الخل ياخ كل الجمال ..والغريبه الساعة جنبك تبدو اقصر من دقيقه ...!!!