يوميات علوب 97 ......عرس بس ...!!
غايتو انا بكري صاحبي ده بحبا ليهو في بت تلاته سنين ورا بعض ... سنة تنطح السنة ...وكسير السنين ...!! لو ساكت جابو أغنية كدا فيها ريحة شجن حتي لو خفيييفه...!!! اها بكري ده بقعد في الواطا دي يقرب يدردق .....!! ويعولق في عيونو يشنقلن ليك في السما ده .. !!! سألتكم بي الله ... هسا أغنية (مسافر جوبا ) دي فيها اي اشاره للمحبوبة ...!!؟ بكري برضو بتعولق فيها ....!!!!! قال حبيبتو دي هي مدينتو ووطنو وبيتو ...!!! اها مايفوتكم هو طبعا ماعندو بيت .....!! بس ياها حبيبتو دي هي بيتو .....!! (ان شاءالله بس يابكور الأساس يكون لي أربعة طوابق ...!!! )
ياخ ده كلو قدرناهو وقلنا خيييير ...من الحب ما (رزع )
...المشكله انو ( ليلي ) دي لِسَّه (قيس ) ده ماكلما وصارحا بي حبو ده ....!! بتصدقو ...!! اي والله لي هسه الحبيب بكري المشهور بي (بكور ) ما ادا ست الحسن والجمال حبيبتو الخفيه دي اي اشاره ولو من بعيد انو بحبها ومكسر فيها ....!
( نزلت الرصيد.. تيييييت ...!!! دقيت الرقم....تييييت ...رقم الحبيب....!! دخل الجرس.. تييييييت تييييييت .. وتاني جرس.. تبيييت تييييت تبيييت مافي مجيب.. ياربي وين.. وين الحبيب.. في ياتو طريق...تيييت 
🎶 🎶 🎶 ...اها بس ياها دي الحاله ...!!! انا قبيييل ماقلتا ليكم الزول ده ( ني ) لسه مانجض....!!!
🎶 🎶 🎶 ...اها بس ياها دي الحاله ...!!! انا قبيييل ماقلتا ليكم الزول ده ( ني ) لسه مانجض....!!!
اها أتخيلو ليكم منظر ....!! لاقاني ليك الليله من الصباح ....قال لي ألحقني ياعلوب جات ....!! قلتا ليهو الكهربا ..!؟؟ قال لي جات ياخ جااااات أقول ليك ..!!! منو الجااات تجيك (الرعده ) انتا ....!!! منو الجات ...!!! قال لي هي ياخ ....هي ياعلوب ...دنيتي وعذابي ...!! مويتي وشرابي ....!!! جات هسه ماشه بي هنا .....!!! اتلفتا مالقيت ولا زول ...(ياربي بكري ده اتلحس ...!!! ) بس من بعيد كده شفتا ليك طرف توب اخد الملف وانقطع ليهو في بيت ....ايوااا الليلة غايتو شفنا توبا
...!! ( وتاني (توبا ) لاريد لاغرام لاخطوبة.... ( عرس بس ) ...!! (كمان انتا ياعلوب بس فايق تغني ...!!! ) كدي شوف زولك الملحوس ده مالو ....!! بس لميت ليك فيهو قلتا ليها انتا يابكور البت دي وكت بتحبها قدر ده ...ما تفاتحا في الموضوع ده
وتعبر ليها عن مشاعرك المكبوته دي ....!!! قال انا ياعلوب كان بعرف افاتح واعبر دي حالتي ...انا ياعلوب طرف (توبا ) بس بخليني في جنس الحاله دي ....انا خايف لو وقفتا قداما أقع ...!! ( الله تقع لهاتك انتا ..!! ) دي وقعة شنو دي ...!!!
ياخوانا الزول ده قاعد وين....!! اصلو بكري الجن دا ده ماعندو واتساب ..!!؟ ولا مابحضر (zee ) أفلام ،،،!!! ولا مابمشي حفلات ...ولا مالو هو ...!!؟ بعدين الحب البقعو فيهو ده ...!!! والزول يتمتم ويعرق ويدوخ ...!! وقلبو يضرب ....جابو من وين لقطو ( بكور ) ده ...!! (الصنف ) ده معدوم ليهو زمن ...والله جد ....!!
قلتا ليهو شوف يابكور لانك انت رجل حساس ونقي وصدوق ( صدوق دي فيها قوة كدا اكتر من صادق ) عشان اديهو حقو كمان ...قلتا ليهو لذلك انا حاساعدك ...!!! انتا وريني ليها وانا
بتصرف بجازف إحساسك ده بوصلو ليها ...!!! الكلام ده فيهو حاجه ...!!! هل بتصدقو بكري داير يفلقني ....!! واستلمني ليك ...!! قال لي ياعلووووب (بي الصوت داك بتاع الدراما السودانيه لما الممثل ينفعل) ....بالبساطة دي ...!!! المشاعر تتحول لي سلعة ...ووسيط وسمسار ...!!! ؟؟ مافي احساس ...!! مافي خصوصية .....!!! مافي قدسية ....!! كدا ياعلوب ...عايزني أهدر مشاعر البت ( امممممك ( هدرا ) ....
وانا بس أعاين ليهو وهو مواصل ....ومنفعل ...!! معقوله ياعلووووب ( تاني صوت المسلسل ) اذبح كبرياء انثي ....(خلااااص ...!! ضبحا المعفن ) الليله يمرقنا الله من كفار قريش ديل ...!!! وانا اها بس أعاين ....وأتأمل ...!!! وبكور مواصل ....قال لي ...دي (مشاعر) شنو البنقلوها عبر الوسايط دي ...!! عايزا تنكفئ علي ذاتا ( الحمد لله الماطلعت ( مشاعر ) اختي) .....!!! تنكفي يايابا علي قدومك ده يابكري يا ود (مدينة ) راجي الله عليك ....!!! وانا أقول مالو بقدر (المدن ) كده وبعزها ...!!! اتاري امو ذاتا طلع اسما (مدينة) .....يا (محاسن) الصدف ....( ماااا ( الحرجل ) ...
يازول اداني ليك محاضره ...والعيون اتشنقلن ...!! والعروق اتشحطن ..!! والريف نشف ....!!! يشهد الله حنّيت علي حالو ....قلتا ليهو خلاص خلاص معليش يابكري انا والله كان قصدي أساعدك ...لكن بالله ماتزعل مني واصلو مرمي الله مابترفع ...وراجي الله ....!!! يعزموكً عقدا يوم الخميس الفي وشنا ده ....!! قال لي ( تف ) من خشمك ياخ ....ان شاءالله عقدا لي ...قلتا ليهو ان شاءالله ...!!! مالو ....!! لكن بي حالتك
دي ماظنيت ....!! فجاة تاني العيون نططن ...والوش اتكرفس ...وبقي يبلع في ريقو ...اتلفتا القي ليك التوب المابيغباني تاني جا مارق ...!!! يبدو ان ( (أميمة ) بنت خلف كانت في غزوة لبيت احد الجيران ...) وبكور خلاص طبعا شافا ....وسيح مكنه ....( بتشديد الياء والعقوبة ) والله لما حنّني ....الله يجمعك بيها يابكور ...!!! وشفتا التوب وست التوب ومالاقاني اجمل منو .....!!! وتاني توبا لاغرام لاحب لاخطوبة ...الليله مالي معلق في الاغنيه دي كدي .....!!!!
وتركت (بكور ) في نص الخور ...ان شاءالله ياربي يعدي ...ونطلق البخور ....!! ( عرس بس )